1, 2. Jmé kjoanda xi tjínná xi testigole Jeobá maa, kʼoa jósʼe tokuin nga kui kjoanda tjínli.

NʼIO nkjín chjota xi nʼio tsjoa sʼele kʼianga jngo premio bʼaile tsa jmeni xi kasʼín. Tobʼelañá, tjío chjota xi premio bʼaile kʼianga binyakao je naxinandá xi tjíokján tsakai nga katasʼele kjoanyʼán. Tonga ngisa tse kjoatsjoa tjínle je chjota xi Niná síkasén nga binyakao chjota nga nyʼán katabatio ngixko̱n Niná.

² Kui kjoanda jebi xi tjínná xi testigole Jeobá maa. Je Niná kʼoa kao Cristo kʼoatsoná nga kʼoakʼuínlee chjota nga katasímiyo je Niná (2 Cor. 5:20). Ñá tísíchjénná je Jeobá kʼianga katasíchriantʼale je chjota. Kʼoa tsʼato jao siento kao kanxjaʼaon naxinandá kao ʼnde jña tíʼmiyason kʼoa jemiyón mani chjota xi nda tjíobatio ngixko̱n Niná kʼoa tjíosʼele kjoachoya nga koa̱n koatio ngantsjai nichxin (Tito 2:11). Ñaki kao kjoatsjoa nga ʼmiyasoán kʼoa nga kʼoaʼmilee “je xi mele, kataʼbi nandá xi tsjoá kjoabijnachon, xi tokjoatjao” (Apoc. 22:17). Nʼio chjí ʼyaa xá jebi kʼoa ñaki kao kjoatsjoa nitjosoán kʼoa kuinga kʼoabixónsíñá nga kui “xá xi nda tjín” kʼoatinʼia (Tito 2:14). Kuila kataʼyaa jósʼin binyakao chjota nga síchriantʼale Jeobá kʼianga nʼio mená nga ʼmiyasoán.

3. Jósʼin sínʼio tokoán nga kʼoasʼin nʼio mele Jeobá nga sichikontʼain chjotasonʼnde.

³ Ya Isaías 9:7 kʼoatso nga Rey koa̱n je ʼNdíle Niná kʼoa nga nʼio tse kjoanichikontʼain tsjoále chjotasonʼnde. Kuinga kʼoakoa̱nni nga je Jeobá nʼio mele nga kʼoasʼin. Jebi kui bakóyaná nga nʼio mandosinle je Nʼainá xi tíjna ngʼajmi nga katabitjontjai je chjota. Kʼoa kuinga bʼenesínilee yaoná nga bʼainganʼioá je xá xi kitsjoaná nga kʼuínyasonlee chjota. Kʼianga nʼio mená nga binyakoaa je chjota nga katabe Niná kui bakoá jokji kjoatsjoacha tjínle Jeobá. A tijnandaní  ji nga kʼuínyasuin je énnda chjotse jokji tje̱n kuicho nganʼioli (1 Cor. 3:9).

4. Jósʼin tsakakó Jesús kʼianga nʼio koanmele nga kitsoyason kʼoa nga kʼoakisʼinntsjai.

⁴ Je Jesús jngo choa̱ tsakʼéjnaná nga nʼio koanmele nga tsakasenkao chjota kʼianga kitsoyale xi tʼatsʼe Niná kʼoa kʼoakisʼinntsjai. Ninga nʼio kitjenngike chjota, tosi tonda kitsoyason saʼnda nga kinikʼien (Juan 18:36, 37). Kʼoa kʼianga jekjimachrianle nichxin nga toje tsjoátʼa yaole, ngisa tinʼio kitsoyasonngánile chjota tʼatsʼe Jeobá.

5. Jmé xi kisʼin Jesús kʼianga kitjoson je choa̱ xi tsʼe yá higo.

⁵ Kʼianga cha̱nntjao̱ nga nó 32, je Jesús jngo choa̱ kisikʼéjna tʼatsʼe jngo yá higo xi tjínntjele ya jintsojmintjele jngo chjota, xi jejan nó tjínle nga tsín bale to. Kʼianga kʼoakitso naile tsojmintje jebi nga katabicha yá higo, je choʼndale kʼoakitsole nga katakoyakaola, nga sitjékjoanlale nangi (tʼexkiai Lucas 13:6-9). Kʼianga kinchja̱ én jebi je Jesús, tosʼa choa mani chjota xi jekoankjainle nga kʼoasʼin kitsoyason. Tonga je Jesús, nʼio kisixá xi jaonsa sá tíjnale nga kitsoyason ya Judea kao Perea. Kʼoa nga tojeme si̱kʼien saʼnda kiskiʼndántjai chjota judío nga tsín kinrʼoéle (Mat. 13:15; Lucas 19:41).

6. Ánni nga ngisa nʼio kʼoénesínilee yaoná nga kʼuínyasoán.

⁶ Nga jenʼio machrianle nga kjoetʼa xi chon sonʼnde, nʼio machjén nga ngisa nʼio kʼuínyasoán (tʼexkiai Daniel 2:41-45). ¡Nʼio tse kjoanda tjínná nga testigole Jeobá maa! Toñá ñá xi kʼoasʼin tibʼailee jngo kjoachoya je chjota nga ñaki sʼe̱ndajin je kjoa xi tjínle. Chriansʼa, jngo chjota xi periódiko kji, kʼoakitso nga liʼya xi koa̱nle kʼoakuitso “ánni nga kui kʼoamatʼainsíni xi chʼaotjín je xi nda chjota”. Tonga ñá ʼyañá jotso Biblia tʼatsʼe kjoachjonangi jebi kʼoa je Niná jngo kjoanda títsjoáná kʼoa jngo xá tíbánená nga kʼuínyalee je chjota xi mele kjuinrʼoé. Kuinga ñaki kao kjoatsjoa si̱tjosonsíñá xá jebi (Rom. 12:11). Je Niná sichikontʼainná nga nkjínsa chjota katabe kʼoa katamatsjoake kʼianga kʼoasʼin nʼio mená nga ʼmiyasoán.

7, 8. Jósʼin bitjongʼa je Jeobá nga tiyondaa kʼianga ʼmiyasoán.

⁷ Tojo koantʼain je pastro Pablo, kʼoati sakʼoa tsín soyofe kʼoa saʼnda biyonchjanntjaiñá xi totʼatsʼe xále Niná (2 Cor. 6:5). Je ndsʼee kao tichjaa kʼoati tjíosʼín kʼianga tjíotsoyason je énle Niná. Je xi precursor sʼin tjíosíxá kui títjon tjíosíkatío xále Niná, ninga kʼoati síxákaoni nga bajngiʼa yaole. Kʼoati tjío je xi misionero ma, xi nʼio tjíosíxále Niná nga tjíobinyakao chjota ya jña xin naxinandá (Filip. 2:17). Je xi chjotajchínga sʼin tjío kʼoati sakʼoa likui kjien kʼoa likui fayofe nga síkuinda je choʼndale Jeobá. Kʼoa kuilakjoan je ndsʼee xi jetjínle nó kʼoa tsa jeje̱ xi chʼin tjínle, bʼénele yaole nga fi kjoajtínná kʼoa nga tsoyason. Nʼio tsjoánganʼioná nga kʼoasʼín ngatsʼi ndsʼee xi kanikʼaxkiaa, nga nʼio bʼénele yaole nga sítjoson xá xi tsʼe Niná. Kʼoa saʼnda je chjota xi tsín kotʼaya kʼoati be jokji chjí ʼyatokoán je xále Niná.

⁸ Jngo chjota xi i̱ tso xo̱n xi kisikasénle periódiko xi Boston Target ʼmi, xi ya bitjo Reino Unido: “Je chjota jetsínle kjoamakjain [...]. Jméni xi sʼín bʼajnda nichxin je chjota xi tjíotítjonle ya yo̱ngo̱. Likui kʼoasʼín jokisʼin Cristo nga kikásjai chjota [...]. Tojékjoánla testigole Jeobá xi mandosinle chjota, nga̱ fikásjai kʼoa ñaki kui xá sʼín nga tsoyason énle Niná”. Je chjota xi tjín Sonʼnde to kjoatsjoa tjíofitjenngi, tonga ñá tiyondañá nga ʼmiyasoán kʼoa jé Jeobá chʼasjengʼaa nga kʼoanʼia (Rom. 12:1).

9. Jméni xosíkaoná nga tosi tonda ʼmiyasoán.

 ⁹ Tonga jméni xi sʼiaan kʼiatsa tsín tikʼoasikji meniná nga ʼmiyasoán. Machjénní nga si̱kjaʼaitsjenjiaan jókji kjoanda tje̱nkao xá jebi xi títsjoáná Jeobá (tʼexkiai Romanos 10:13-15, Traducción del Nuevo Mundo [TNM]). Tokʼianí nga kuitjontjai je chjota kʼiatsa koa̱nkjainle xi tʼatsʼe Jeobá kʼoa kuinchja̱ni jaʼaínle, tonga jósʼin skoe̱ni kʼiatsa tsín kʼuínyalee. Kʼianga nichoyalee yaoná jebi, kui xosíkaoná nga tosi tonda kʼoanʼia xá xi ndatjín kʼoa nga bʼenelee yaoná nga ʼmiyasonlee chjota je énnda chjotse xi tsʼe Niná.

10. Kʼianga nda mangínkoaa yaoná, jósʼin binyakao je chjota kʼianga síchriantʼale je Jeobá.

¹⁰ Ninga nʼio chjíle nga kʼoasʼin ʼmiyasoán, ali tsa tokuijin xi binyakao chjota nga síchriantʼale Niná. Xi kʼoati binyakao kuinga nda mangínkoaa yaoná. Je pastro Pablo kʼoakitso nga nʼio chjíle jebi, kitso: “Niʼyajin xi chʼaosʼin maínkoaijin, jméni nga je xánajin lijme jée sʼe̱nesínile” (2 Cor. 6:3). Kʼianga nda tso én nokjoaa kʼoa nda mangínkoaa yaoná, tikui binyakaoni je chjota kʼianga je Jeobá bexkón (Tito 2:10). Kʼoa kjitʼa sʼejinná nga makjainle je chjota xi tʼatsʼe Niná kʼianga be nga Cristo tichjenngilee.

11. Ánni nga kao kjoabʼetsʼoa si̱kjaʼaitsjenjinsíñá josʼin kotsenná je chjota.

¹¹ Kʼianga nda mangínkoaa yaoná, je chjota mandosinle xi tʼatsʼe Niná, tonga tsa chʼao sʼiaan kʼoati likui síchriantʼale je Jeobá. Kuinga bʼenesínilee yaoná nga nda nʼia tojñani nga tiyoaa, a yaa tʼaxáná, a yaa niʼyaná axo yaa ndʼiaskuela. Kʼiatsa toxá kuijnyíjéeñá, tse kjoa kuiyojiaan (Heb. 10:26, 27). Kʼianga si̱kjaʼaitsjenjiaan tʼatsʼe jebi, kʼoétsʼoalee je Jeobá ánni nga jchasíñá jmeni xi tinʼia kʼoa josʼin kotsenná je chjota. Nichxin xi  tiyoaa ndʼaibi, je chjota nʼio chʼao sʼín, kʼoa je chjota xi ndatjío ni̱ma̱le skoe̱ní “nga tsín mangóson je chjota xi kixi kao chjotatsʼen, kao xi síxále Niná kʼoa kao xi tsín síxále” (Mal. 3:18). Tojosʼin tiʼyaa, kʼianga nda mangínkoaa yaoná nʼio chjíle, binyakao je chjota nga miyole Niná ma.

12-14. Jngola choa̱ tʼejnai, jósʼin binyakao je chjota kʼianga kaná nga chotʼayakao kjoamakjainná.

¹² Je karta xi kisikasénle Pablo je chjotale Cristo xi tsakatio ya naxinandá Corinto kʼoakitsole nga tse kjoañʼai tsakjaʼá, nga tsakichon kʼoa nga ndoyá kichani (tʼexkiai 2 Corintios 6:4, 5). Kʼianga be chjota nga kaná kʼianga chotʼayakao kjoamakjainná kʼoati binyakao nga makjainle tʼatsʼe Niná. Tobʼelañá, jngo ʼnde xi ya nchja̱ni ya naxinandá Angola, je chjota kontrale ndsʼee kʼoakitso nga jngokʼa sikjeson je testigole Jeobá xi ya tsʼe. Chjota jebi, jao ndsʼee xi jekisʼenngindá kʼoa kante chjota xi jefi kjoajtínná tsakʼéchjoandaile. Xijekoan, kinchja̱mañale chjota xi ya tsʼe nga katakotsenle nga tsakále je xíngiaa saʼnda nga tsakʼasjele njín. Kʼoakoantʼain ni xi yánchjín kʼoa ni xi xtiʼndí, kʼoa kui kʼoakisikaoni nga katatsokjón je chjota nga tsín je kjuinrʼoéle je testigole Jeobá. Tonga nga tsabe je chjota nga kʼoakoantʼain je xíngiaa, nʼio nkjín mani xi kʼoakitso nga kataʼmiyale Biblia. Saʼnda nga kʼoakoan, ngisa nʼio kitsoyason je ndsʼee kʼoa koannkjín chjota xi koankjainle tʼatsʼe Niná kʼoa tse kjoanichikontʼain kisʼe.

¹³ Choa̱ jebi kui bakóyaná josʼin binyakao je chjota kʼianga kixi maa nga chotʼayakao kjoamakjainná. Kʼianga kixi koan je Pedro kao pastro xi ngikʼa likui ʼyaa jokji nkjín chjota xi miyole Niná koan (Hech. 5:17-29). Kʼoatisʼinni tsanda ñá, tochale koa̱nkjainle je xi ñatje̱n nixá, xi ñatje̱n bitsomaa skuela kʼoa tsa jeje̱ xíngiaa kʼianga tjíobe nga kixi kjimaa.

¹⁴ Tjío ndsʼee xi tjíofitjenngike chjota. Tobʼelañá, ya naxinandá Armenia, ñachanla mani je ndsʼee xi ndoyá tjíoʼya xi totʼatsʼe nga tsín mele nga sondado koa̱n, kʼoa tochale nkjínsa xi sʼa cha̱ni ndoyá nichxin xi nroa. Ya naxinandá Eritrea, ñachanxjaʼaon mani je choʼndale Jeobá xi ndoyá tjíoʼya, kʼoa tjío xi jejchínga xi saʼnda jejankanle nó. Ya naxinandá Corea del Sur ñatola siento mani xi ndoyá tjíoʼya xi totʼatsʼe kjoamakjainle. Jejankan nó nga kui kjoa tjín naxinandá jebi. Kʼoétsʼoantjé je ndsʼee xi kjoañʼai tjíofaʼá ánni nga je Jeobá katabitjongʼasíni nga kʼoasʼin kixi kjima, kʼoa nga katabinyakao je chjota xi kui tsjoake xi kixi tjín nga katabexkón je Niná (Sal. 76:8-10).

15. Jngola choa̱ tʼejnai nga kotʼaya chjota je énle Niná kʼianga nda nʼia.

¹⁵ Kʼianga chjota kixiaa kʼoati binyakao je chjota nga kotʼaya énle Niná (tʼexkiai 2 Corintios 6:4, 7). Jngola choa̱ kataʼyaa jmeni xi koan. Jngo tichjaa xi jetíbʼéchjí pasajele ya karro kʼoa jngo chjoón xi bexkon kʼoakitsole nga tsín katabʼéchjí nga̱ to chrian jña tífi. Je tichjaa kʼoakitsole nga tsín kixi tíjna tsa tsín kʼoechjí pasajele ninga tochrian jñani tífi. Kʼianga jekitjojen karro je chjoón xotítsole, je xi tísíxákao karro i kitsole tichjaa: “A testigole Jeobání”. “Jaon, ánni”, kitso tichjaa. Kʼoa je chjota jebi kitso: “Kanrʼoeña jme xi kasi, kʼoa ʼbeña nga je testigole Jeobá likui bʼanacha, ñaki chjotakixiní”. Nga jeki sá, kʼianga tísʼejna kjoajtín, jngo chjota kichosítiʼnda je tichjaa kʼoa kitsole: “A faʼaitsjenli ʼyani an, anña xi tisixákaoná karro kʼianga tsakʼechjínái  pasajeli. Kʼianga tsaʼbe nga kʼoasʼin ñaki chjota kixio, kʼiaa kiskotʼaya Biblia kao testigole Jeobá”. Choa̱ jebi kui bakóná nga chjotakixi sʼin bekonná je chjota kʼianga nda nʼia.

16. 1) Jméni xi ma kʼianga tjínná kjoatsejta, kjoatsjoacha kʼoa kao kjoanda. 2) Jngola choa̱ tʼejnai jmeni xi sʼín je xi nyatítjonle je relijión ndiso.

¹⁶ Kʼoati binyakoaa je chjota nga síchriantʼale Jeobá kʼianga bakoá kjoatsejta, kjoatsjoacha kʼoa kao kjoanda. Tsakui nichxin je chjota xi kotsenná, tjíoni kʼa xi mele skoe̱ je Jeobá, jmeni xi tjínndajinle kʼoa kao tʼatsʼe naxinandále. Jonʼia kʼoa josʼin mangínkoaa yaoná jé Niná bitjongʼa. Tjínkʼa je xi nyatítjonle relijión xi kʼoasʼin síkjaʼaitsjen nga nda tjíosʼín kʼoa nda tjíofikao yaole. Tonga tobʼéndisole chjota kʼoa to tao̱n síchele. Tjínkʼa xi kui tao̱n jebi batseni niʼya xi nʼio yʼai kjoan kʼoa kao karro. Saʼnda jngo xi niʼya tsakʼéndale níale, kʼoa niʼya xi tsakʼéndale ñaki tjínle aire acondicionado. Chjota xokjoan alikui tokjoatjao kʼoasʼín je xále (Mat. 10:8). Tojo kisʼin je naʼmi xíjin xi tsakatio ya naxinandá Israel, kʼoati to tao̱n xi sʼínnile je xi nyatítjonle relijión xi tjío ndʼaibi kʼianga bakóya, kʼoa jmeni xi bakóya saʼnda tsínni ya Biblia faʼaitʼa (Miq. 3:11). Kʼianga kʼoasʼin jaonkjaín, alikui tjíobinyakao je chjota nga miyole Niná katama.

17, 18. 1) Jósʼin bitjongʼa Jeobá kʼianga nda nʼia. 2) Jméni xosíkaoná nga tosi tonda kʼoanʼia xá xi ndatjín.

¹⁷ Tonga nga ñaki kixi xi ʼmiyaa kʼoa nga nda nʼia ñaki kajin je ni̱ma̱le chjota. Tobʼelañá, jngo ndsʼee xi precursor sʼin tísíxá jngo ʼndíchjoón jchínga tsakjákaonajmí, ʼndíchjoón jebi kjitʼanangi kʼoakitso nga tsín jme xi mele. Kʼoa kʼoakitso nga jngo escalera tími nga tísíkʼantjaiya je focole ndʼialʼíle kʼianga kicho síkjanetʼa niʼya je ndsʼee. “Ali tojijin kʼoanikoai” kitsole je ndsʼee, kʼoa jé kisikʼantjaiya foco kʼoa xijekoa̱n ki. Kʼianga kisʼejinle je tile ʼndíchjoón jebi nga kʼoakisʼin je ndsʼee ñaki tokʼoakoanle, kʼoa kikásjai je ndsʼee nga kitsjoale kjoanda, kʼoa xijekoan, saʼnda kiskotʼaya Biblia ti jebi.

¹⁸ Ánni nga mesínili ji, nga tosi tonda kʼoasʼiain xá xi ndatjín. Kuijin nga ʼyai nga je Jeobá bitjongʼa kʼianga nda mangínkoaa yaoná kʼoa nga ʼmiyasoán. Kʼoa nga kʼoanʼia binyakaoñá je chjota nga kuitjontjaile yaole (tʼexkiai 1 Corintios 10:31-33). Kʼianga bakoá xá xi ndatjín nga ʼmiyasoán énnda chjotse kʼoa nga ndasʼin mangínkoaa yaoná kuinga mená koakolee je Jeobá nga tsjoachaa kʼoa nga kʼoati tsjoachaa je chjota (Mat. 22:37-39). Kʼiatsa kʼoasʼiaan nʼio tse kjoanda sʼe̱ná ndʼaibi, sʼená kjoatsjoa kʼoa nda sʼe̱ tokoán. Kʼoa kʼoati choyalee je nichxin kʼianga ngatsʼi chjota xi koatio ñaki tsjoa sʼe̱le kʼianga skoe̱xkón je Jeobá, je Niná xi kisindaná.