Je Biblia jao koya bakóya anni. Xi títjon, ningalani nʼio kjimachjine je chjota, alikui kʼoasʼin koannda nga tojé koandiaale yaole. Xi majaoni, kuinga “i̱ ngakijnda sonʼndebi tíjnakao na̱i”. Kuinga tsín nyʼán tjíobatiokaosíni xínkjín je chjota. (Tʼexkiai Jeremías 10:23 kao 1 Juan 5:19.)

Nga to yaole fini kʼoa nga xkaiʼa ma je chjota kʼoati kui xosíkao nga tsín nyʼán batiokaoni xínkjín. Kʼianga sʼe̱ kjoanyʼán jngo tjíjtsa Sonʼnde jngo chjotaxá machjénná xi koanentsja ngakjijngo Sonʼnde, xi kʼoasʼin koakoyale chjota nga kui kʼoakatasʼín xi ndatjín kʼoa nga katamandosinle xínkjín. (Tʼexkiai Isaías 32:17 kao 48:18, 22.)

Je Niná xi ngisasa tse nganʼio tjínle tongini kʼoakitso nga kjoaʼaxin chjotaxá sonʼnde kʼoa nga tsʼe chjotaxá sikʼéjnayangajaole (Daniel 2:44). Je xi séjnatítjonle chjotaxá jebi jéní Jesucristo, kʼoa je Biblia “Chjotatítjonle Kjoanyʼán” tsole. Jéní xi koa̱nle kjoaʼaxin je kjoatsʼen xi tjín kʼoa koakoyale chjota nga nyʼán sʼin koatio. (Tʼexkiai Isaías 9:6, 7 kao 11:4, 9.)

Nichxin xi tiyoaa ndʼaibi, miyón mani chjota xi je Cristo tjíobándiaale nga tjíobakóyale je chjota nga nyʼán sʼin katabatiokao xínkjín, kʼoa kui Biblia tjíosíchjén. Jeme sʼe̱ kjoanyʼán jngo tjíjtsa Sonʼnde. (Tʼexkiai Isaías 2:3, 4 kao 54:13.)