1, 2. 1) Ánni nga ʼyachjísíñá je miyo xi kixi kʼoa xi síchatʼaná kʼianga saténgiaa. 2) Jñánile nga jan kjoachjonangi xi chótʼayajiaan ibi.

JÓSʼÍN xi ñaki miyo. Jngo tichjaa xi Ashley ʼmi i kitso: “Xi kao an, jngo miyo xi ñaki kixi jéní xi tíjnakaontsjainá kʼianga jme xi kjimaná kʼoa xi síchatʼaná kʼianga jña saténgiaa”. Ngatsʼiñá nga ʼyachjiá miyo xi kixi fitʼaná kʼoa xi síchatʼaná. Bakóná nga tsín toñá tijnaa kʼoa nga tsjoakená (Prov. 17:17).

² Je miyo xi nʼiosa kixi kʼoa xi ngisa síchatʼaná jéní Jeobá. Jngo xi kiski Salmo i kitso: “Ji, Jeobá, nda chjotai kʼoa tijnandaní nga nichatʼai; kʼoa tse kjoanda kao kjoatsjoacha bakolai ngatsʼi xi nchja̱li” (Sal. 86:5). Jmé xi tje̱nkao nga kixi maa kʼoa nga bakoá kjoamatokon. Jósʼin bakó Jeobá nga jao koya jebi. Kʼoa jósʼin chjénngiaa choa̱le. Kʼianga jechótʼayajiaan nga jan kjoachjonangi jebi, ngisa tsjoacha koaan Jeobá nga̱ jé xi ñaki miyoná kʼoa kʼoati koa̱nmiyosaa je ndsʼee kao tichjaa (1 Juan 4:7, 8).

3. Jósʼin jngo chjota xi ñaki kixi.

³ Jngo chjota xi kixi, alikui yátsʼin basénle je chjota xi tsjoake. Bakóle kjoatsjoacha kʼoa basenkao, kʼoa ali tsa tosakʼoajin nga kʼoasʼín, kixi fitʼale ninga kjoa tífaʼatojin. Je Jeobá jé xi ngisasa kixi (Rev. 16:5, TNM).

4, 5. 1) Jósʼin bakó Jeobá nga ñaki kixi. 2) Jósʼin tsjoánganʼioná nga nikjaʼaitsjenjiaan nga kixi je Jeobá.

⁴ Jósʼin bakó je Jeobá nga kixi. Alikʼia tsjionkon je choʼndale xi kixi fitʼale. Tobʼelañá, je rey David kʼoakitso nga ñaki kixi koan Jeobá xi kao je  (tʼexkiai 2 Samuel 22:26). * Jé Jeobá tsakándiaale David, kisikuindaa kʼoa tsakʼasjentjai nga kjoa jaʼatojin (2 Sam. 22:1). Ánni nga ñaki kixi koansíni Jeobá xi kao David. Kuinga kʼoati kixi koan je David. Je Jeobá nʼio bechjí je choʼndale xi kixi fitʼale (Prov. 2:6-8).

⁵ Kʼianga nikjaʼaitsjenjiaan nga kʼoasʼín je Jeobá nʼio tsjoánganʼioná. Jngo ndsʼee xi Reed ʼmi itso: “Nʼio tsjoánganʼiona nga bʼexkia josʼin tsakasenkao Jeobá je David kʼianga kjoa jaʼatojin. Je Jeobá tsakasenkaontsjai, tsakasenkao kʼianga kitokachjinganá kʼoa nga to ngijaoná tsakʼejnangi. Jebi nʼio sínʼio tokoan. Kui síkjaʼaitsjenjinna nga ninga tse kjoa kjoaʼatojian, je Jeobá koasenkaontsjaina nga tonga kixi kjoanni kjuítʼale”. Kʼoajinti sʼin nikjaʼaitsjeen tsanda ñá jokitso je ndsʼee (Rom. 8:38, 39).

6. 1) Jósasʼin bakó Jeobá nga ñaki kixi. 2) Kʼoa jósʼin basenkaoná ñá xi choʼndale maa.

⁶ Jósasʼin bakó Jeobá nga kixi. Jngo koya kuinga kʼoasʼínntsjai jotso kjoatéxomale (Is. 46:4). Tojmeni xi sʼín yaa bʼangini kjoatéxomale kʼoa kjoatéxomale alikui kʼia bʼantjaiya xi tʼatsʼe jmeni xi ndatjín kao xi chʼaotjín (Mal. 3:6). Ijngosa koya josʼin bakó Jeobá nga kixi kuinga ñaki sítjoson jmeni xi tso (Is. 55:11). Nga kʼoasʼin kixi Jeobá tse kjoanda sokóná ngatsʼiaa, nga̱ tsa ñá xi kʼoénelee yaoná nga si̱tjosoán kjoatéxomale sichikontʼainná (Is. 48:17, 18).

7. Jngola koya kʼoasi josʼin koa̱n chjénngilee je Jeobá.

⁷ Jósʼiaan nga chjénngilee je Jeobá. Jngo koya jokoa̱n sʼiaan kuinga kuinyakoaa je xi kjoa tjíofaʼatojin (Prov. 3:27). Tsakui nichxin sʼe̱jinná kʼianga ba tjínle jngo ndsʼee xi totʼatsʼe tsa chʼin tíbʼetʼale, tsa xínkjín tjíofitjenngike kʼoa tsakuije̱ nga tsín nda kisʼin. Nʼio nda tjín tsakui chja̱koaa je én xi nda tso, én xi sinʼio kon (Zac. 1:13). * Tsa kʼoasʼiaan koakoñá nga ñaki miyole maa, jngo miyo xi ngisa koa̱nnʼiotʼa tikʼoajinni jngo xi ñaki ndsʼe̱ (Prov. 18:24).

8. Jósʼin chjénngilee je Jeobá kʼianga kixi koa̱nlee je xi chixankoaa, kʼoa jñásani nga kʼoati kixi koaan.

⁸ Jósasʼin koa̱n chjénngilee je Jeobá nga kixi koaan. Tobʼelañá, tsa jechixán tjínnele nga kixi koa̱nlee je xi chixankoaa (Prov. 5:15-18). Likui koa̱n nga kui kʼoasʼiaan jmeni xi kjoachajngi ska̱nijinná (Mat. 5:28). Xi ijngosani, kʼoati kixi koanngíntʼalee je ndsʼee, likui énndiso si̱siaan kʼoa likui kui cha̱nibasoán. Kʼoa likui koa̱n kuinóʼyalee ʼyani xi kʼoatso nga̱ to síkjinná xíngiaa (Prov. 12:18).

9, 10. 1) ʼYáni xi ngisa kixi koanngíntʼalee. 2) Ánni nga tsín choa ñʼai tíjnasíni nga nitjosoán kjoatéxomale Jeobá.

⁹ Tonga xi ngisa nʼio kixi koanngíntʼalee jé Jeobá. Kʼoénelee yaoná nga tsjoacha koaan jmeni xi tsjoake kʼoa jticha koaan jmeni xi jtike. Kʼoa kʼoasʼin koanngínkoaa yaoná josʼin sasénle (tʼexkiai Salmo 97:10). * Kʼianga kʼoatisʼin si̱kjaʼaitsjeen josʼin síkjaʼaitsjen je Jeobá ngisa choa ñʼai koa̱nná nga si̱tjosonlee (Sal. 119:104).

 ¹⁰ Kjoaixiní nga tsín choa ñʼai tíjna nga nitjosoán kjoatéxomale Jeobá. Tsakui nichxin nʼio kʼoénelee yaoná nga kixi koaan. Kui kjoa tjíofaʼatojin kʼa xíngiaa xi sʼa tjíotojé xi mele nga kuixan tonga kje sokójinle jngo chjota xi skénndiaale i̱ jinnaxinandále Niná (1 Cor. 7:39). Tsakui nichxin jngo tichjaa xi sʼa tíjnatojé nʼio bʼénele je chjota xi ñatje̱n síxá nga katabixan kʼoa saʼnda básjaile xi kʼoéjnakao. Ningalani ba male je tichjaa nga toje tíjna ñaki kʼoatjín kon nga kixi koaitʼale Jeobá. Tsí nʼio chjí ʼyatokoán je xíngiaa xi kʼoasʼín. Alikui jao tjínná nga sichikontʼain Jeobá je xi kixi koaitʼale ninga kjoa kjoaʼatojin (Heb. 11:6).

11. Jósʼín Jeobá nga síchatʼa.

¹¹ Je xi kʼoati nʼio bakó je Jeobá kuiní nga tíjnanda nga síchatʼaná. Jósʼín Jeobá nga síchatʼa. Síchatʼale ʼyani xi kʼoamanile jéele. Tonga ali tsakuijin xi tsonile kʼiatsa sasénle jmeni xi kasʼín jngo chjota kʼoa tsa tsín kuenta sʼín, kui xi tsonile nga tsín bʼéngijti kon. Je Biblia kʼoatso nga tíjnanda Jeobá nga síchatʼale ʼyani xi kʼoamanile jéele (Sal. 86:5).

12. 1) Jósʼin bakó Jeobá nga tíjnanda nga síchatʼa. 2) Jósikao jéená je Jeobá.

¹² Jósʼin bakó Jeobá nga tíjnanda nga síchatʼa. Ya Biblia kʼoatso kʼianga je Jeobá “nʼio male síchatʼa”. Jebi kui xi tsonile nga jngokʼa síchajin kʼoa tondiaa síchatʼa je jéená (Is. 55:7). Jósʼin ʼyañá nga tondiaa síchatʼa je Jeobá. Si̱kjaʼaitsjenla je én xi faʼaitʼa ya Hechos 3:19 (tʼexkiai). Je pastro Pablo i kitsole chjota xi tjíonrʼoéle: “Tikʼantjaiyao tsokʼoa kjoafaʼaitsjenno [kʼoakatamanino jéeno], katabʼantjaiyanio”. Jngo chjota xi ñaki kʼoamanile jéele, kʼoamanile jme xi kasʼín kʼoa kʼoabʼé kon nga tsín tikʼoasʼinni (2 Cor. 7:10, 11). Chjota jebi síkʼéjnaa  jmeni xi chʼaotjín kʼoa kui kʼoasʼín ijngokʼa jmeni xi sasénle Niná. Jmé kjoanda xi kisokole je chjota xi kinrʼoéle Pedro kʼianga kʼoakoannile jéele. Je Pedro kʼoakitsole nga jchatʼa jéele. Je én xi koanchjén kʼianga én griego kʼoasʼin tsoyanile josʼín jngo chjota xi borrador síchajonni jme xi kakji. Kʼoasʼín je Jeobá, kʼianga síchatʼa, jngokʼa síchajon je jéená (Heb. 10:22; 1 Juan 1:7)

13. Jméni xi bakóyaná kʼianga kʼoatso Biblia nga tsín tikui síkjaʼaitsjenni Jeobá je jéená.

¹³ Jméni xi bakó nga ñaki tondiaa síchatʼa Jeobá. Chótʼayajinla je én xi tongini kinchja̱ Jeremías tʼatsʼe je kjoasʼendajin chjotse, xi kisʼendajin kao je chjotale Cristo xi ya koai ngʼajmi (tʼexkiai Jeremías 31:34). * Je Jeobá kitso: “Sichatʼale jme jée xi tsakajngi kʼoa alikui tikui kjoaʼaítsjennina je jéele”. Tojosʼin tiʼyaa, kʼianga síchatʼaná je Jeobá kʼoatso nga tsín tikui síkjaʼaitsjenni jée xi kabijnyaa, likui tikui kjoéyani tojoni nga jme xi kuitsoná kʼoa tsa kjoañʼai tsjoáná. Tondiaa síchatʼaa je jéená (Rom. 4:7, 8).

14. Jósʼin basenkaoná kʼianga nikjaʼaitsjenjiaan josʼin síchatʼaná Jeobá. Jngola choa̱ tʼejnai.

¹⁴ Nʼio tsjoánganʼioná nga nikjaʼaitsjenjiaan nga kʼoasʼin síchatʼaná je Jeobá. Tobʼelañá, jngo tichjaa xi tsakichonsjejin naxinandále Niná kʼoa ijngokʼa nda tsakʼejnani nga jejaʼato nó, kitso: “Kʼoaxinle xi ngikʼa kʼoa kʼoaxinle yaona nga jekisichatʼana Jeobá, tonga joxi kjin tíjnana koanna, kʼoa kʼoasʼin kisikjaʼaitsjen nga ngisa chrian tjíole xi ngikʼa tikʼoajinni an”. Je tichjaa jebi kʼiaa kitjonganʼiole kʼianga tsakʼéxkia kʼoa kiskotʼaya jotso je Biblia tʼatsʼe josʼin síchatʼaná je Jeobá. Tsabení nga tsjoakeni je Jeobá. Kʼoa i kitso: “Alikui koa̱n nga tosi tonda kui si̱kjaʼaitsjenjiaan je jée xi jekasíchatʼaná Jeobá”. * Je tichjaa kʼoakitso nga kʼiani koanjinle nga jekisichatʼale Jeobá kʼoa nga tjínnele sichajin jme xi kisʼin. Kitso: “ʼBeña nga tse kuichomani, tonga jetsen kjimana nga kjimachriantʼale Jeobá kʼoa ñaki kjimatjana”. Je Jeobá nʼio tsjoakená kʼoa nʼio bakóná kjoamatokon (Sal. 103:9).

15. Jósʼin chjénngilee je Jeobá kʼianga si̱chatʼalee xíngiaa.

¹⁵ Koaan chjénngilee je Jeobá kʼianga si̱chatʼalee xíngiaa kʼiatsa ñaki kʼoamanile jmeni xi kasʼín (tʼexkiai Lucas 17:3, 4). Kʼianga síchatʼa je Jeobá jngokʼa síchajin je jéená kʼoa alikui tikui síkjaʼaitsjenni jmeni xi kanʼia. Kʼoati koa̱n si̱chajiaan tsanda ñá tsa jme xi kasíkaoná xíngiaa kʼoa tsín tikui si̱kʼaxki̱ñá nga koa̱nskanni.

16. 1) Kʼianga nichatʼaa, a kui xi tsonile tsa sasénná jmeni xi kanikaoná kʼoa tsa sasénná nga totaon ʼyaná. 2) Jméni xi sʼiaan kʼiatsa mená nga sichatʼaná je Niná.

¹⁶ Kʼianga nichatʼalee xíngiaa alikui xi tsonile tsa sasénná jmeni xi kasʼín kʼoa tsa sasénná nga totaon ʼyaná. Kui xi tsonile nga tsín bʼengijtiaa tokoán. Si̱kjaʼaitsjeen kʼianga tjínnele si̱chatʼalee xíngiaa kʼiatsa mená nga sichatʼaná je Niná (Mat. 6:14, 15). Je Jeobá bení nga chjotajée maa, nga̱ “to  chaoñá” (Sal. 103:14). Kuinga kʼoati si̱kjaʼaitsjensíñá nga chjotajée je xíngiaa kʼoa tsa jme xi síkaoná tjínnele nga ñaki kao ni̱ma̱ná si̱chatʼanilee (Efes. 4:32).

17. Kʼiatsa jngo ndsʼee xi josikaoná, jméni xi koasenkaoná kʼianga tsín kʼoéngijtilee tokoán.

¹⁷ Sakʼoa ñʼai maná nga nichatʼalee xíngiaa. Saʼnda je chjotale Cristo xi títjon tsakatio kʼoati kisʼele kjoa (Filip. 4:2). Kʼiatsa jngo ndsʼee xi josikaoná, jméni xi koasenkaoná kʼianga tsín kʼoéngijtilee tokoán. Kataʼyala je choa̱le Job. Je Job nʼio aon koanle jmeni xi kitsole je Elifaz, Bildad kao Zofar nga tokjoatjao jmeni xi tsakáne (Job 10:1; 19:2). Xijekoanni, je Jeobá kisikixiyandale chjota xokjoan, kʼoa kʼoakitsole nga katafikonle je Job kʼoa nga cho̱ katatsjoátʼa xi totʼatsʼe jéele (Job 42:7-9). Tonga je Jeobá kʼoati kitsole je Job jmeni xi sʼin, kʼoakitsole nga katabʼétsʼoantjai chjota xokjoan kʼoa je Job kisitjoson. Kʼianga koanle kisichatʼa je Job, je Jeobá kisichikontʼain (tʼexkiai Job 42:10). * Jméni xi bakóyaná jebi. Kui bakóyaná kʼianga tsín sʼe̱ngijti tokoán kʼiaa tsa kʼoétsʼoantjé tsa ʼyani xi jokasíkaoná.

18, 19. Jméni xi mená nga tosi tonda sʼiaan.

¹⁸ Nʼio kitsjoanganʼioná jotjín koya kichotʼayajiaan jokjoan je Jeobá. Tsaʼyañá nga tíjnanda nga nrʼoéná, nga tsín ʼya xi faʼájin, nga tjotʼa, nga ndʼé, nga kixi kʼoa nga male síchatʼa. Tonga sʼa nʼio tsesa xi koa̱n chótʼayasoán jokjoan je Jeobá. Kʼianga sʼe̱ná kjoabijnachon xi tsínkʼia fetʼa sa nda sa nda jchaa je Jeobá (Ecl. 3:11). Kʼoati tjío tokoán, joni tsa pastro Pablo kʼianga kitso: “Li tokʼoakji tse tjín kjoachjinele kao kjoaʼisentakonle Niná”. Kʼoati kuenta nʼia josa kjoan je Niná, nga tjínle kjoatsjoacha kʼoa kao xi jaon koya jekichotʼayajiaan (Rom. 11:33).

¹⁹ Tosi tonda chótʼayasoán jokjoan je Jeobá, si̱kjaʼaitsjenjiaan kʼoa chjénngilee jokjoan (Efes. 5:1). Tsa kʼoasʼiaan kʼoatisʼin si̱kjaʼaitsjeen tojosʼin kisele Niná je salmista: “Tonga xi an, kʼianga sichriantʼale je Niná nʼio nda síkaona” (Sal. 73:28).