1, 2. Jméni xi koa̱n sʼiaan, xi miyole Jeobá maa, kʼianga kuiyoaa tokʼia saʼndani.

JNGO tichjaa xi Monika ʼmi i kitso: “Jekjoan kanxjaʼaonnajin nó nga chixainjin kʼoa nʼio nda ʼyaijin xíngijin. Tonga ninga jekʼoakji tse tiyokoaijin xíngijin tojo tjínsa xi sʼa tiʼyaijin jokjoainjin”. Nkjín mani xíngiaa xi jechixan xi kʼoati ma, kʼoa kʼoati maje̱ xi miyo fáo.

² Nda sʼe tokoán nga ngisa nda ʼyaxkoaan je chjota xi tsjoachaa. Tonga je xi ngisa mená nga ndasa jchaa jé Jeobá, nga̱ jé miyoná xi ngisasa nda. Ninga tsínkʼia ñaki jchayejee xi tʼatsʼe (Rom. 11:33). Tonga kʼianga kuiyoaa tokʼia saʼndani sʼená nichxin nga tosi tonda chótʼayá kʼoa nga tosi tonda jchachjiá jokjoan Jeobá (Ecl. 3:11).

3. Jméni xi chótʼayá i̱ kjoaʼmiya jebi.

³ Je kjoaʼmiya xi jaʼato kui kitsoyaná nga tíjnanda Jeobá nga nrʼoéná kʼoa nga tsín chjota faʼájin. Kjoaʼmiya jebi tsakasenkaoná nga ngisa tsaʼyachjiá jokjoan je Jeobá. Kʼoa ndʼaibi ngi jao koya chótʼayá. Kui chótʼayá nga nʼio tjotʼa kʼoa nga nʼio ndʼé. Kjoaʼmiya jebi koasenkaoná nga ngisa koa̱njinná nga “Jeobá bakóle kjoanda ngatsʼi kʼoa bakóle kjoamatokon ngayeje xi kisinda” (Sal. 145:9).

4. Jósʼín jngo chjota xi tjotʼa.

⁴ Jósʼín jngo chjota xi tjotʼa jme xi tjínle. Je Jesús kʼoakitso nga “tongisa ndaní nga kʼoee kaoni tsa nga chjoé” (Hech. 20:35). Kui xi tsonile nga jngo chjota xi tjotʼa jéní xi tsjoá jme xi tjínle, jolani nichxinle, nganʼiole kʼoa kao tsojmi xi tjínle kʼianga basenkao xi kjaʼaí, kʼoa kao kjoatsjoa kʼoasʼín. Kʼianga tjotʼa jngo chjota ali tsakuijin xi tsonile jotjín kasʼengile jme xi tsjoákjoatjao, kuiní tsa ñaki kao ni̱ma̱le tsjoáni (tʼexkiai 2 Corintios 9:7). Je xi ngisasa tjotʼa jéní Jeobá.

5. Jósʼin bakó je Jeobá nga tjotʼa.

 ⁵ Jósʼin bakó je Jeobá nga tjotʼa. Tsjoále ngatsʼi chjota jmeni xi machjénle, saʼnda kʼoasíkao je xi tsín je bexkón. Je “Jeobá bakóle kjoanda ngatsʼi”, tojosʼin jekaʼyaa. “Síkjitjoson tsʼuíle xi tʼatsʼe xi tsʼen kʼoa xi tʼatsʼe xi nda. Bʼanele jtsí [...] je xi kixi kʼoa xi tsín kixi tjíoma” (Mat. 5:45). Kuinga koan i̱ kitsosínile pastro Pablo je chjota xi tsín Niná tsabexkón: “Kjaínga nda kisʼin. Kitsjoano jtsí xi ngʼajmi nroani, kʼoa nichxin josʼin nga majchá tsojmintje. Kitsjoano je tsojmi xi biyochonnio, kao kjoatsjoa xi sʼejnajin ni̱ma̱no” (Hech. 14:17). Tojosʼin tiyaa, je Jeobá nʼio tjotʼa, tsjoále ngatsʼi chjota jme xi machjénle (Luc. 6:35).

6, 7. 1) ʼYáni xi ñaki kao kjoatsjoa tsjoále Jeobá jmeni xi machjénle. 2) Jngola choa̱ tʼejnai xi bakó nga síkuinda Niná je choʼndale xi kixi tjíofitʼale.

⁶ Je Jeobá nʼio tsjoa sʼele nga tsjoále jme xi machjénle choʼndale. Je Rey David i kitso: “Kʼoati xti koan tsanda an kʼoa jekoanjchínga ndʼaibi, tonga nisañandiajinla ʼbe tsa ñaki jngokʼa njiotokon jngo chjota xi kixi, kʼoa tsa tsínle jme xi tjíokjine je xtile” (Sal. 37:25). Nʼio nkjín chjotale Cristo xi ñaki tjíobe nga tíbitjoson én jebi. Jngola choa̱ kataʼyaa.

⁷ Ñandia kʼianga jngo tichjaa xi Nancy ʼmi, xi precursora sʼin tísíxá, nʼio ñʼai koanle tao̱n. Tichjaa jebi itso: “Ñandia nga jankan kaoni jaon dólar koanchjénna xi kʼoechjíña niʼya jña tijna kʼianga koa̱nnyaonni, tonga likui ʼbe jña kjuíkʼa. Tsakʼetsʼoale Jeobá kʼoa tsakʼeyanajmíle tʼatsʼe jebi, xijekoan, kiña xáná. Restaurant sixá kʼoa likui koyale nga tse tao̱n tsjoána chjota nga kʼia, nga̱ me tsín nanda ʼya xi bichókjien nga kui nichxin. Kʼoa tokʼoakoanna nga toxkia nkjín chjota kichokjien. Kʼianga jejetʼa xána, tsakʼexki̱ña tao̱n xi kitsjoana chjota kʼoa jankan kaoni jaon dólar mani”. Je tichjaa Nancy kʼoatso nga je Jeobá kitsjoale jme xi koanchjénle (Mat. 6:33).

8. Jñánile kjoatjao xi ngisasa nʼio chjíle xi kitsjoaná je Jeobá.

⁸ Je kjoatjao xi ngisasa chjíle, xi kitsjoaná je Jeobá, koaan tjoéle toʼyani. Kjoatjao jebi kuiní kjoabʼechjíntjaile ʼNdíle. Je Jesús kitso: “Nga̱ Niná kʼoasʼin koantsjoake sonʼnde nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai” (Juan 3:16). Je xi sonʼnde tsole ibi jéní chjota. Kuinga kʼoabixónsíñá nga kjoatjao jebi koaan tjoéle ngatsʼi xi koa̱nmele. ʼYani xi sʼe̱le kjoamakjain tʼatsʼe Jesús kʼoaile kjoabijnachon xi tsínkʼia fetʼa (Juan 10:10). Nga kitsjoa kjoatjao jebi kui xi bakó jokji tjotʼa je Jeobá.

9. Jósʼin chjénngilee je Jeobá nga nʼio tjotʼa.

⁹ Jósʼin chjénngilee je Jeobá nga nʼio tjotʼa. Tojo síkaoná Jeobá nga “tsjoáná ngayije tsojmi, jméni nga sʼe̱síniná kjoatsjoa”, kʼoati tjínnele si̱koaa xíngiaa tsanda ñá, kʼoailee jmeni xi tjínná ánni nga kʼoati tsjoa sʼe̱sínile (1 Tim. 6:17-19). Tsjoa sʼená nga jme xi bʼailee xíngiaa, miyoná kʼoa kao chjota xi ma̱ tjío (tʼexkiai Deuteronomio 15:7). * Jméni xi sʼiaan kʼianga tsín chajinná nga tjínnele tjótʼaa. Tjínkʼa ndsʼee xi i̱ sʼín: Kʼianga jme xi bʼaikjoatjaole, kʼoati sʼín tsanda je, tjín xi tsjoákjoatjaole tsa ʼyani. I̱ jinnaxinandále Niná nʼio nkjín mani ndsʼee xi tsjoále tsojmi xínkjín.

10. Jósʼin koakoá nga tjotʼaa.

¹⁰ Jngo koya josʼin nga tjótʼaa kʼianí nga kʼoasʼin si̱chjén nganʼioná nga kuinyakoaa kʼoa si̱nʼiojiaan xíngiaa (Gál. 6:10). Kʼianga jchaa tsa kʼoatinʼia koaan chjónangilee yaoná: “A be xikʼa nga tijnanda kʼianga kʼoasjeʼale nichxin kʼoa nga kjuinrʼoe jme xi makjaojinle. Kʼiatsa ʼya xi kʼoatsona nga koasenkoa kʼoa tsa jme xi bʼéxána, a sitjosonle. Kʼiáni nga kʼoakixinle tsa jngo ndsʼee kʼoa tsa xíngia nga nda tísʼín”. Kʼiatsa kʼoasʼin si̱ngalee yaoná nga tjótʼaa ngisa koa̱nchriantʼasalee Jeobá kao xíngiaa (Luc. 6:38; Prov. 19:17).

11. Jósʼiaan nga kʼoati kʼoailee je Jeobá jmeni xi tjínná.

¹¹ Kʼoati koa̱n kʼoailee jme xi tjínná je Jeobá. Je Biblia itsoná: “Chʼa̱sjengʼai Jeobá kao tsojmichjí xi tjíoli” (Prov. 3:9). Tsojmichjí jebi kuiní je nichxinná, nganʼioná kao tao̱nná, kʼoa kui xi koa̱n  kʼoailee kʼianga si̱xálee. Saʼnda je xi sʼa xtiʼndí koaan tsjoále Jeobá. Jngo nʼai xi Jason ʼmi itso: “Kʼianga bʼejnaijin tao̱n ya Ndʼia jña chotʼayá, kʼoati ʼmilaijin ʼndíxtinajin nga kʼoati katabatío tao̱n ya yakaxa̱. Nʼio tsjoa male nga kʼoasʼín, kʼoa kʼoatso nga tjíotsjoá i̱natjínle Jeobá”. Kʼiatsa skoe̱ je xi sʼa xtiʼndí nga tsjoa sʼená nga bʼailee Jeobá, tojo kʼoasʼin nga jekoa̱njchínga (Prov. 22:6).

12. Jósʼín jngo chjota xi ndʼé.

¹² Ijngosa koya jokjoan je Jeobá kuinga nʼio ndʼé. Jósʼín jngo chjota xi ndʼé (Tito 3:1, 2). Ali tsa ñaki kjoanʼiojin kʼoasʼin bitjosonle jmeni xi tso kʼoa alikui nʼio bʼejna. Tosa nda síkao ngatsʼi chjota kʼoa kui fini josʼin tjío. Tíjnandaa nga nrʼoéle, kʼoa tsa tje̱n ndiaale, tsjoáʼndele nga kʼoasʼín jmeni xi mele sʼin.

13, 14. 1) Jósʼin bakó je Jeobá nga nʼio ndʼé. 2) Jméni xi bakóyaná jmeni xi kisikao Jeobá je Lot.

¹³ Jósʼin bakó Jeobá jebi. Kui fini jotjío kjoafaʼaitsjenle je choʼndale kʼoa tsjoáʼndele nga kʼoasʼín jme xi mele je choʼndale. Tobʼelañá, kʼianga kʼoakitso nga sikjeson je naxinandá Sodoma kao Gomorra kʼoakitsole Lot nga ya katamanga ya jña tjío nindo. Tonga je Lot kisijéle kjoanda Jeobá nga katatsjoáʼndele nga xin ʼnde koa̱nnga. Si̱kjaʼaitsjenla kjoa jebi. Je Lot kui kisijéle Jeobá nga katasíkʼantjaiya jme xi kitsole (tʼexkiai Génesis 19:20). *

¹⁴ Kʼianga bʼexkiaa tʼatsʼe Lot tsakui nichxin kʼoasʼin nikjaʼaitsjeen nga tsín tse kjoamakjain kisʼele kʼoa tsamaije̱ nga xíjin koan. Nga̱ je Jeobá koaanle kʼoasjentjai tojñani nga tíjna ali anni nga tsokjonni. Ninga kʼoalani, kitsokjon. Je Jeobá tsabe jokoanle Lot kʼoa kitsjoaʼndele nga ya tsakanga ya naxinandá jña kitso ninga kʼoati sikjeson Jeobá tsakai naxinandá jebi (tʼexkiai Génesis 19:21, 22). * Jebi kui xi bakóyaná nga je Jeobá nʼio ndʼé kʼoa alikui nʼio bʼejna.

15, 16. Jósʼin tsakakó je kjoatéxoma xi kitsjoale je naxinandá Israel nga nʼio ndʼé je Jeobá. (Chótsenlai sén xi faʼaitʼa ya jña fitsʼiani kjoaʼmiya jebi.)

¹⁵ Ijngolasa choa̱ kataʼyaa xi bakó nga nʼio ndʼé je Jeobá. Tʼatsʼení je kjoatéxoma xi kitsjoale je naxinandá Israel. Kjoatéxoma jebi kʼoatso kʼiatsa jngo chjota israelita xi nʼio ma̱ tíjna kʼoa tsín kʼoakoa̱nle nga jngo barré kʼoa tsa jngo tindso tsjoátʼale Jeobá, koaan jao tójoo kʼoa tsa jao to̱nia̱ tsjoátʼa. Kʼoa tsa ñaki nʼio ma̱ tíjna kʼoa tsín so̱kole jebi, je Jeobá kitsjoaʼndele nga skoa̱n harina kitsjoatʼa. Tonga jéní skoa̱n harina xi nʼio nda, je xi síchjén chjota israelita kʼianga tjín xi bichókonle (Gén. 18:6). Jósʼin bakó jebi kʼianga kosonnile Jeobá jmeni xi síjéná (tʼexkiai Levítico 5:11). *

¹⁶ Cha̱niyala jkoaa jebi: kʼiatsa ñála ñá je chjota israelita xi nʼio ma̱ tsakatio. Kʼoa nga jekuichoaa ya ndʼianajño jña tsaʼyaxkón Jeobá i̱natjín skoa̱n harina kichʼá kʼoa je chjota israelita xi nyiná cho̱ kuichokao xi tsjoátʼale Niná. Tsakui nichxin soa koa̱nná nga nʼio choa chjíle xi kʼoaitʼaa ñá. Tonga faʼaitsjenná nga nʼio chjí bekon Jeobá ninga tokui kichʼá.  Ánni. Kuinga je Jeobá kui kisijé je skoa̱n harina xi nʼiosa nda. Joxi ini kitsole je chjota israelita xi nʼio ma̱ tjío: “ʼBeña nga tsín bichó nganʼiono nga kʼoati kji kʼoaináo jokji tjíotsjoána xi ngikʼa, tonga kʼoati ʼbe nga kui tibʼaináo xi ngisasa nda xi tjínno”. Tojosʼin kaʼyaa choa̱ jebi, je Jeobá kui fini josʼin tjío kʼoa jokji tje̱n bichó nganʼiole je choʼndale (Sal. 103:14).

17. Kʼiáni nga nda sʼele Jeobá josʼin nixálee.

¹⁷ Nʼio nda sʼe tokoán nga nʼio ndʼé je Jeobá, nga nda sʼele nga nixálee jokji tje̱n bichó nganʼioná (Col. 3:23). Jngo tichjaa xi jejchínga, xi Constance ʼmi, xi ya Italia tsʼe, kitso: “Xi ngisa nʼio tsjoake kuinga tʼatsʼe Niná fakaonajmíña je chjota. Kuinga fixinyasonsíña kʼoa tsjoasíña estudio. Kʼoa nga kʼoasʼin chʼin tjínna, sakʼoa kʼoamana nga tsín titse sixánile Jeobá, tonga ʼbeña nga tsjoakena kʼoa nga bechjí jokji tje̱n bichó nganʼiona nga̱ bení nga tokʼoakji koa̱n sixále”.

18. Jósʼin koa̱n skénngile Jeobá je xi xijchá ma.

¹⁸ Jósʼin koa̱n chjénngilee je Jeobá nga kʼoati ndʼé katamaa. Si̱kjaʼaitsjenla ijngokʼá jokisikao Lot. Je Jeobá tiʼndele nga kʼoakuitsole Lot jñani koai. Tonga tsakakóle kjoanda, kinrʼoéle jokitso kʼoa kitsjoaʼndele nga ya ki jñani koanmele. Kʼiatsa xijchá maa, koaan chjénngilee Jeobá nga kuinóʼyalee jmeni xi tso ʼndíxtiná kʼoa kʼoaiʼndelee nga kʼoakatasʼín jmeni xi mele nga tonga tsínkjoanni chʼaotjín. Je rebista La Atalaya xi tsʼe 1 de septiembre de 2007 kʼoatso kʼianga tjínkʼa xijchá xi tsjoáʼndele ʼndíxtile nga kʼoakatatso jósʼin síkjaʼaitsjen tʼatsʼe kjoatéxoma xi tjínnele kuitjoson ya yaniʼya. Tobʼelañá, je xijchá kʼoatso jochon tjínnele kuichoni ʼndíxtile kʼiatsa jña kafi, kʼoa tjínle ʼnde nga kʼoasʼin. Tonga je xi chjotale Cristo ma koaan kjuinrʼoé jósʼin síkjaʼaitsjen ʼndíxtile xi tʼatsʼe jebi. Tsakui nichxin sakʼoa tsjoáʼndele ʼndíxtile nga ngisa kjoaʼato ora jochon kuicho nga tonga tsínkjoanni kjoatéxomale Niná tjíofaʼatone. Kʼianga je kjoanla títjon kjonangile ʼndíxtile je xijchá josʼin síkjaʼaitsjen tʼatsʼe kjoatéxoma xi tjínnele sitjoson ya yaniʼya, je ʼndíxti ngisa majinle anni nga kʼoaʼminile kʼoa ngisa sítjoson.

19. Jósʼin skénngile Jeobá je xi chjotajchínga sʼin tjío.

¹⁹ Je xi chjotajchínga sʼin tjío ya jinjtín bʼénele yaole nga fitje̱nngi choa̱le Jeobá, kuenta sʼín jokji tje̱n bichó nganʼiole ndsʼee. Nichxin kjoatse, je Jeobá tsabechjí jme xi kitsjoatʼale je chjota israelita xi nʼio ma̱ tsakatio. Kʼoa nichxin xi tiyoaa ndʼaibi tjínkʼa ndsʼee xi tsín tinʼio tse síxánile Jeobá, tsakui nichxin jenʼio jchínga kʼoa tsa chʼin tjíobʼetaleje̱. Kʼiatsa ba tjíole xíngiaa jebi, je xi chjotajchínga sʼin tjío koaan tsjoánganʼiole nga kʼoakuitsole nga tsjoake je Jeobá nga̱ kʼoakji tjíotsjoá jokji tje̱n fichó nganʼiole (Mar. 12:41-44).

20. Kʼianga kuenta nʼia jokji tje̱n bichó nganʼioná, a kui xi tsonile nga koa̱n tochoa si̱xálee Niná.

²⁰ Kʼianga kuenta nʼia jokji tje̱n bichó nganʼioná alikuijin xi tsonile tsa koa̱n tochoa si̱xálee Jeobá kʼiatsa kʼoanikoa̱nná nga tsesa si̱xálee kʼoa nga tsín to yaoná kjuinñá (Mat. 16:22). Tosa nʼio kʼoénelee yaoná nga kʼuínyasoán tʼatsʼe Chjotaxále Niná (Luc. 13:24). Tjínnele nga si̱xálee Jeobá jokji tje̱n kuicho nganʼioná kʼoa si̱kjaʼaitsjeen nga tsínkui síjéná jmeni xi tsín kʼoakoa̱nná. Je Jeobá tsjoa sʼele nga bʼailee jokji tje̱n bichó nganʼioná. Tsí tsjoa maná nga je tinixálee Niná xi bechjí jmeni xi nʼia kʼoa nga nʼio ndʼé. Ya kjoaʼmiya xi ijngo, ngi jao koya chótʼayá jokjoan je Jeobá (Sal. 73:28).