Jngo tichjaa xi Ángela * ʼmi, xi sʼa tíjna toje, xi jetsʼato kante nóle me tsa títsokjón. Jé kuichokonle xi chjotajchínga sʼin tjío ya jinjtínle kʼoa kui tísíkjaʼaitsjen jméni xi kʼuínle. Likui tinanda tífini kjoajtínná, nga̱ jenʼio kijtale nga faʼaini nga fisíxá. Jé chjota xi jekoanjchínga síkuinda bʼajnda nichxin. Kʼoa kjaʼaísanile kjoanikjaojin xi tjínle nga nyaon nyaon, kʼoa nʼio síkjaojinje̱ nga tímʼe je male.

Kʼiatsa chjotajchínga sʼin tijnai, kʼoa ji kʼuínnixatʼai je Ángela, jósʼin kʼoainganʼiolai (Jer. 31:25). Jósʼin kuijnandai nga kʼuínnixatʼai xíngiaa xi jetjíonroajen kon nga tjónganʼio ijngokʼanile, joni tsa tichjaa jebi.

Toxá sakʼoa bijtaniná ngatsʼiaa, tsakui nichxin totʼatsʼe je xáná kʼoa tsakuije̱ xá xi kjinená ya jinjtín. “Nʼio kijtana” kitso je profeta Daniel kʼianga tsín koanjinle je sén xi tsabe (Dan. 8:27). Xi koanskanni, je ánkje Gabriel kʼoasʼin tsʼatsenle nga kisichoyale jotjínni xi tʼatsʼe Niná kʼoa kʼoakitsole nga je Jeobá kinrʼoé kjoabʼetsʼoale kʼoa nga tojo nda tísasénkon xi tʼatsʼe (Dan. 9:21-23). Kʼoati ñandia nga jngo ánkje xi kʼoati kui én kisichjén nga kitsjoanganʼiole je profeta Daniel nga kʼoasʼin jetíbijtale (Dan. 10:19).

Kuinga ndatjínsíni nga títjon kjoanla tikjaʼaitsjenjin tʼatsʼe jngo ndsʼee xi jetínroajen nganʼiole kʼoa xi jetínroajen kon nga kjesa ʼminixatʼajin. Jmé kjoa xi tífaʼatojin, jósʼin tíbijtajinle kjoa xi tífaʼatojin kʼoa jméni xi ndatjín tíbakó. Jngo ndsʼee xi Richard ʼmi xi kjoan kan nó nga chjotajchínga sʼin tíjna itso: “Kui sikjaʼaitsjenjian jmeni xi nda tjíomasʼín je ndsʼee. Kʼoa tiʼbeña nga tongisa  choa ñʼai maná nga bʼainganʼiolee nga títjon kjoanla nikjaʼaitsjenjiaan je kjoa xi tjíofaʼatojin nga kjesa mangínchonjinlee ya niʼyale”. Kʼiatsa kʼoati koaikao jngoli xi kʼoati chjotajchínga sʼin tíjna nga kʼuínnixatʼai jngo ndsʼee, nʼio ndatjín tsa títjon kjoanla cho̱bayaño je kjoa xi tífaʼatojin.

A tsí kjoaixi nga ñʼai maná nga kui bʼeyanajmiá jotjío je tokoán. Kʼoajinti ñʼai male jngo ndsʼee nga bʼéyanajmíle je xi chjotajchínga sʼin tjío jotjín kon. Jósʼiaan kʼianga kʼoama. Tsa nda tso én xi chja̱koaa kʼoa tsjoá kuijnokoaa tochale kʼoakuitsoná jotjín kon. Jngo ndsʼee xi Michael ʼmi xi jetsʼato ñachanle nó nga chjotajchínga sʼin tíjna i tsole ndsʼee nga bichósíxatʼa: “Jngo xá xi nʼio tsjoa fáya kon jngo xi chjotajchínga sʼin tíjna kuinga fisíxatʼa ndsʼee ya niʼyale nga ngisa nda skoe̱xkon. Kʼoa kuinga nʼio tsjoa tjínnina nga kanroakonle ndʼaibi”.

Nʼiojin ndatjín tsa jngo kjoabʼetsʼoa kʼoétsʼiakaoñá nga chja̱kaonajmiá je xi kafichonixatʼaa. Kʼianga tsakʼétsʼoa je pastro Pablo, kui nʼio kisikʼaxki̱ je kjoamakjainle, kjoatsjoachale kʼoa nga tjíokale je ndsʼe̱ (1 Tes. 1:2, 3). Kʼiatsa kui si̱kʼaxki̱ nga kʼoétsʼoai jokji chjí ʼyai jme xi nda tísʼín je ndsʼee, tinikʼéjnandaní je ni̱ma̱li kʼoa kao tsʼe nga ngisa nda cho̱banajmío. Xi ijngosani, je énli tsjoájin ñaki sikinjenyʼánjin ni̱ma̱le. Jngo xi chjotajchínga sʼin tíjna, xi Ray ʼmi, xi jenʼio tjínle kjoafaʼaitsjen, itso: “Sakʼoa chajinná nga nʼio binyakao je ndsʼee jmeni xi nʼia kʼianga tinixálee Niná, tonga kʼianga ʼya xi síkjaʼaitsjenjinná jebi ngisa tjonganʼioná”.

Tojo kisʼin je pastro Pablo, kʼoati koa̱n kʼoailai “jngo kjoatjao” xi tsʼe Niná tínroani je ndsʼee, ninga tojngo testo xi tsʼe Biblia si̱chjain nga kʼoainganʼiolai (Rom. 1:11). Tobʼelañá, tsa jngo xi nʼio tísíkinroajen kon tochale kʼoasʼin síkjaʼaitsjen nga tsín jme  chjíle. Koaan chja̱kaonajmíni xi tʼatsʼe salmista. Je salmista kʼoa kisʼe kon joni tsa jngo xjoa̱le cho̱ xi nandá sʼeya, xi jekixí nga niʼndi̱ tífingile. Ninga kʼoalani, i kitso: “Tsín tisichajian je kjoatéxomali” (Sal. 119:83, 176). Kʼianga jekʼuínyalai je ndsʼee jotso bersíkulo jebi koa̱n kʼoati kʼuínlai nga kʼoati tsín tísíchajin je kjoatéxomale Niná.

Kʼianga koa̱n kuisenkoai jngo tichjaa xi tsín titsjoa tjínnile nga tísíxále Niná kʼoa tsa jekisikjinle je jtín koaan kui chja̱kaonajmíni je choa̱ xi tsakʼéjna Jesús tʼatsʼe jngo chjoón xi jngo tao̱n xi dracma ʼmi kisicha (Luc. 15:8-10). Dracma jebi tsakui nichxin ñaki tao̱nchxoa koanndani, kʼoa chjoón jebi jngoyale tofangi sʼin kisichjén kʼoa kui jngo tao̱n jebi xi kiskale. Kʼianga kʼuínyalai choa̱ jebi je tichjaa ticho̱yalai kʼianga nʼio ʼyachjí ya jinjtín. Koa̱njin kʼoakʼuínlai nga nʼio bechjí je Jeobá nga̱ ʼndíbarréle mani.

Nʼio nkjín ndsʼee xi nʼio tsjoake nga kʼoatso josʼin majinle testole Biblia, tʼaiʼndelai nga katanchja̱, ali tsa tojijin nokjoai. Kʼianga jekʼoéxkia jngolai testo xi bakinle, jngo én chjoéjin xi koasenkao kʼoa kʼoatʼinlai nga kʼoakatatsoli jósʼin síkjaʼaitsjen. Tobʼelañá, koaan kʼoéxkialai 2 Corintios 4:16, kʼoa i̱ tʼinlai: “A tsí jesa tsaʼyai josʼin kitsjoanganʼioli je Jeobá”. Tsa kʼoakʼuínlai ñaki koa̱nnʼiojin kon je ndsʼee (Rom. 1:12).

Kʼoati koa̱n kʼoainganʼiolai jngo ndsʼee kʼiatsa kui chja̱kaoni tʼatsʼe jngo chjota xi síkʼaxki̱ ya Biblia, xi kʼoati kui kjoa jaʼatojin. Tobʼelañá, tsa jngo xi jetínroajen kon tsakui nichxin koasenkao je choa̱le Ana kʼoa tsa tsʼe Epafrodito, nga̱ sakʼoa nʼio kisikinroajen kon. Tonga je Niná tojo nʼio tsabechjí (1 Sam. 1:9-11, 20; Filip. 2:25-30). Kʼianga bakinle, koaan je choa̱ xi faʼaitʼa ya Biblia si̱chjain nga kʼoainganʼiolai je xíngiaa.

Kʼiatsa tojo si̱kjaʼaitsjain je ndsʼee nga jekaʼmichonlai ya niʼyale kʼoasʼin koakui nga mandosinli xi tʼatsʼe (Hech. 15:36). Tobʼelañá, kʼianga ya sʼa tijnai ya niʼyale koa̱n kʼoéndajion nga meli nga ñatje̱n kuitjokʼinyason. Je ndsʼee xi Barnard ʼmi, xi chjotajchínga sʼin tíjna, kjonangixó ijngokʼale ndsʼee kʼianga kajin, i̱xó tsole: “Jókjimaninda xi kichobanajmínáñá”. Kʼiatsa kʼoasʼin koa̱nndosinli je ndsʼee jchajin tsa machjénsale nganʼio.

Ndʼaibi, ngisa machjén nga kʼoakatasatío kon je ndsʼee nga kjimakuinda, nga kuenta kjima kʼoa nga tsjoacha (1 Tes. 5:11). Kuinga machjénsíni nga títjon kjoanla tikjaʼaitsjain jmé kjoa xi tjíofaʼatojin je ndsʼee kʼianga kjesa ʼmichonjinlai ya niʼyale. Kʼoatʼinlai Jeobá nga katabasenkaoli kʼoa ndakjoan chjoéjin je testo xi si̱chjain. Tsa kʼoasʼiain koa̱nsjaili én xi tsjoánganʼiole je xi jetjíonroajen kon.