Je Adán, je chjota xi títjon koannda, me jngo jmi nó tsakʼejna. Tonga koanjchínga kʼoa chan kʼien. Ánni. Kuinga jée tsakajngi kʼianga jaʼatone jme xi kitsole Niná. Kʼoa ñá kuinga kʼoati biyañá nga̱ ntje̱le maa. Kʼoa jokji nga tínroa nichxin, je chjota nʼio tjíobásjaile jmeni xi koasenkao nga tsín tikoa̱njchíngani kʼoa nga tsín tikuiyáni, tonga lijme xi kjimasjaile. (Tʼexkiai Génesis 5:5 kao Romanos 5:12.)

Kʼianga koa̱n kuiyoaa ngantsjai nichxin machjénní nga tjín xi kʼoechjíntjainá (Job 33:24, 25). Je én xi kjoabʼechjíntjai tso kui tsoyanile jotjín machjíntjai jngo chjota xi tíjnanʼio nga katanikʼéjnandaí, kʼoa je xi tjínnele ndaí kuiyolee kui kjoabiya (Éxodo 21:29, 30). Kʼoa je xi tsakʼéchjíntjainá jé Jesús kʼianga kitsjoa kjoabijnachonle xi totʼatsaan. (Tʼexkiai Juan 3:16.)

Tonga likui tongatsʼi chjota nga ndaí koatiole je chʼin kʼoa kao kjoabiya nichxin xi nroaján. Je xi tsín sítjosonle Niná, jokisʼin tsa Adán, sicha kjoabijnachonle. Tojéní chjota xi cha̱tʼale jéele xi koa̱n koatio ngantsjai nichxin. (Tʼexkiai Isaías 33:24 kao 35:3-6.)

Jméni xi sʼiaan kʼianga cha̱tʼaná je jéená. Machjénní nga kataʼyaa xi tʼatsʼe Niná nga chótʼayá je Énle. Je Énle Niná basenkaoná nga ngisa nda biyoaa, nga sʼená kjoanda ngixko̱n Niná kʼoa nga so̱koná kjoabijnachon xi tsínkʼia fetʼa. (Tʼexkiai Juan 17:3 kao Hechos 3:19.)