A koaan si̱nʼiotʼaa je relijión josʼin fikao yaole
Jngo chjoón xi Silvia ʼmi yaa síxá jña makuinda je chjota xi jejchínga kʼoa itso: “Nʼio nkjín chjota xi ñatje̱n kia ya universidad xi nʼio sísin tʼatsʼe relijión. Tonga kʼianga bʼénda je examenle ñaki tobʼanacha kʼoa droga kjen kaoni. Alikuini nda fikao yaole ninga relijión tjínle”.
Je xi Lionel ʼmi itso: “Je chjota xi ñatje̱n sixá sakʼoa likui bichósíxá kʼoa kʼoatso nga chʼin tjíobʼetʼale ninga maini. Alikui kuenta sʼín relijiónle, tokʼoasʼin bekon joni tsa jngo yá xi ya machjén ya yaniʼya tonga xi tokʼoanisʼin séjna”.
Je chjota alikui kuenta sʼín relijiónle josʼin fikao yaole. Nʼio nkjín chjota xi kʼoatso nga “bexkón Niná, tonga tjíotʼaxin[ni]le nganʼiole Niná” (2 Timoteo 3:5). Je xi nyatítjonle relijión alikui nda choa̱ batíole je chjota kʼoa alikui kʼoasʼin tjíobándiaale jotso je Énle Niná nga tsje koaikao yaole. Kʼoa yaa nroani nga nʼio nkjín chjota xi kʼoasʼin síkjaʼaitsjen nga tsín mandosinle Niná josʼin fikao yaole.
JMÉNI XI BAKÓYA JE BIBLIA
Je Biblia bʼéjnatsen jomale Niná jmeni xi nʼia, kʼoa kʼoatso nga nʼio mandosinle josʼin mangínkoaa yaoná. Kʼianga nʼio xíjin koan je chjota israelita “nʼio aon koanle” Niná (Salmo 78:40). Tonga tse “kjoatsjoa sʼ[e] ya ngʼajmi” kʼianga jngo chjota xi kʼoamanile jéele kʼoa síkʼantjaiyani kjoafaʼaitsjenle (Lucas 15:7). Kʼianga ʼyaa jokjoan je Nʼainá xi tíjna ngʼajmi ngisa nʼio matsjoachaa kʼoa kui xosíkaoná nga tsjoacha maa xi tsjoake kʼoa jticha maa xi jtike (Amós 5:15).
JÓSʼÍN JE TESTIGOLE JEOBÁ XI TʼATSʼE JEBI
Jngo periódiko kitjo xi kʼoatso nga je testigole Jeobá “kʼoasʼin bakóyale je chjota nga jtín katabatio ya yaniʼyale, nga chjotanixá katama kʼoa nga kixi katama” (The Deseret News, Salt Lake City, Utah, Estados Unidos). Kʼoa itsosa: “Je testigole Jeobá tjínle kjoatéxoma xi fitje̱nngi josʼin fikao yaole. Kʼoasʼin makjainle nga tsín nda batio ngixko̱n Niná je chjota xi na̱jno̱ kjen, xi droga síchjén, xi tao̱n sískáni, xi síchajngi kʼoa je xʼin xi tixʼin xínkjín fayokaoni kʼoa je yánchjín xi tiyánchjín xínkjín fayokaoni”.
A tjíobinyakao chjota je xi nyatítjonle relijión nga nda katafikao yaole
Jósʼin tjíobinyakao je testigole Jeobá nga be jokjoan je Niná. Je Silvia itso: “Nʼio tjín kjoachʼanacha ya jña makuinda je chjota xi jejchínga. Chanjin kʼoati sʼiaan tsanda ñá kʼiatsa kʼoaiʼndelee yaoná. Tonga je xi basenkaona nga tsínkui kʼoasʼian kuinga ʼbe nga tsín sasénle je Jeobá. * Ñaki tsjoa tjínna kʼoa nyʼán tjín tokoan ndʼaibi”. Je Silvia ñaki tjínjngo kon nga je xi tíbasenkao josʼin tífikao yaole kui jmeni xi makjainle.
^ párr. 9 Ya Biblia kʼoatso nga Jeobá ʼmi jaʼaínle Niná.
