A koaan si̱nʼiotʼaa je relijión jotjíosʼín nga kjoajchán sʼe
Jngo chjota xi Alberto ʼmi, me te nó nga sondado koan, kʼoa itso tʼatsʼe jngo naʼmi xi tsabexkon: “Kʼianga kisichikontʼainnajin i kitso: Yaa tje̱n tíjnakaono Niná. Kʼoa an isʼin kisikjaʼaitsjen: Ánni nga kʼoasʼin chjota fisikʼiensíña tsa kʼoatso je Énle Niná nga tsín koa̱n si̱kʼieen”.
Kʼoa jngo chjota xi Ray ʼmi, sondado koan kʼianga kisʼejna je Kjoajchántse xi majaoni. Kʼoa ñandiaxó i̱ kitsole je naʼmi: “Faʼai̱ní i̱ chitsonajin, bʼejnaní kjoachikon xi tʼatsainjin kʼoa nga katanjenajin. A tsí kʼoati matʼainni je chjota kjoajchán kontranajin”. Kʼoa je naʼmi tokʼoaxókitso nga liʼya xi be anni nga kʼoasʼínni je Niná.
A bʼéjngo tokuin jme xi kitso naʼmi jebi. Tochale mai. Tonga ali nikjaojinjin, ali tsa tojijin xi kʼoasʼin nikjaʼaitsjain.
JMÉNI XI BAKÓYA JE BIBLIA
Je Jesús kʼoakitso nga kui kjoatéxoma jebi xi kʼoati nʼio chjíle: “Katamatsjoachai xikʼa joni nga tijini” (Marcos 12:31). A kui xi kitso Jesús nga tochja̱ʼajiaan je chjota xi tsjoachaa koaan, jolani tsa tokui kjuinñá jñáni naxinandále. Mai. Tosa i̱ kitsole chjotale: “Kʼuisʼin skoe̱ ngatsʼi nga jon nío chjotana, tsa kʼoasʼin matsjoachao xíngio” (Juan 13:34, 35). Jebi kui xi tsonile nga skoe̱ ngatsʼi chjota jokji koa̱ntsjoake xínkjín chjotale Jesús, kʼoa nga tsín tije sikʼienni xínkjín kʼoa nga saʼnda tsjoántjai kjoabijnachonle xínkjín.
Kʼoa kuikjoán jebi xi kisʼin chjotale Cristo. Jngo libro kijna xi i̱ tso: “Je naʼmi xi títjon tsakatio, jolani je Tertuliano kʼoa kao Orígenes, kʼoakitso kʼianga je chjotale Cristo likui koa̱n nga chjota sikʼien, kʼoa kui nga tsín sondado koansíni ya Roma” (The Encyclopedia of Religion).
JMÉ XI KUIXOÁN XI TʼATSʼE JE TESTIGOLE JEOBÁ
Me ngakjijnda Sonʼnde nga tjín testigole Jeobá. Kʼianga kjoajchán sʼe alikui ya tsjonjin yaole, tosa bakóle kjoatjaocha xínkjín.
A tjíobakóya je relijión nga tsjoacha koaan xíngiaa jokitso Jesús
Tobʼelañá, kʼianga kiskan je chjota xi hutus kʼoa xi tutsis ʼmi ya naxinandá Ruanda kʼianga nó 1994, je testigole Jeobá alikui ʼya xi kitsjoanganʼiole. Tosa kisikatíoʼma xínkjín ningalani xkón sʼin kisikatío kjoabijnachonle nga kʼoakisʼin. Kʼianga kindoa jao Testigole Jeobá xi hutus xi kʼoasʼin kisikatíoʼma je Testigole Jeobá xi tutsis, je sondado xi kitsoa i kitsole: “Jon tjínno jée nga kʼoasʼin binyakao je chjota xi tutsis”. Kʼoa xijekoan, kisikʼien nga jao (Juan 15:13).
Jósi xi tʼatsʼe jebi. A kʼoasʼin tjíobakóle kjoatsjoacha xínkjín je testigole Jeobá jonga kitso Jesús.
