Tsa ya tsakijnajinlai jngo relijión xi tsínni nda sʼín, tsakui nichxin ñʼai koa̱nli nga si̱nʼiotʼa ijngui relijión. Tonga tíjna jngo relijión xi koa̱n si̱nʼiotʼai. Kʼianga tsakʼejna Jesús i̱ Sonʼnde kisikatíojtín je chjotale kʼoa kui tsakakóyale nga kʼoasʼin katafikao yaole jotso je kjoatéxomale Niná. Nichxin xi tiyoaa ndʼaibi, tojo tjín chjota xi ñaki chjotale Cristo ma, xi tjíobʼénele yaole nga kʼoasʼin tjíofikao yaole jotso je kjoatéxomale Niná. ʼYáni chjota jebi.

Je Estelle, xi jesa kanikʼaxkiaa, itso: “Kʼiaa saʼnda koanjinna je Biblia nga kiskotʼaya kao je testigole Jeobá. Ñaki kʼoatjín jotso ya Juan 8:32, nga i̱ tso: Jchanío xi kjoakixi, kʼoa je xi kjoakixi sikatíondaíno”.

Je Ray kʼoati tso: “Je testigole Jeobá kui Biblia kisichjén nga tsakakóyana nga tsín je Niná xotísʼín nga kjoañʼai tjín. Kʼoa ninga be je Niná anni nga títsjoáʼndesíni nga kjoatsʼen tjín, kʼoatso nga jeme kjoaʼaxin kjoa jebi”.

Kjoaixi nga tsín choa ñʼai tíjna nga kui kʼoanʼia xi ndatjín kʼoa nga tsínkui kʼoanʼia josʼín chjota nga tsín nda tjíofikao yaole. Tonga koaan kʼoasʼiaan xi ndatjín tsa ñá xi mená. Nʼio nkjín chjota xi mele nga koa̱njinle jotso je Biblia kʼoa nga kʼoasʼin jmeni xi tso. Kuinga kʼoatjíosʼínni je testigole Jeobá nga miyón mani chjota xi tjíobakóya kjoatjaole Biblia nga xki̱ xomana jngo tjíjtsa Sonʼnde. Kʼoa nʼio nkjín chjota xi kjimajinle jmekjoanni xi bakóya je Biblia, tjíosíchriantʼale je Niná xi kisindaná kʼoa ngisa tsjoa tjíosatío kon. *

Kʼiatsa sa̱téjin je testigole Jeobá koaan chjónangilai ánni nga sínʼiotʼasíni je relijiónle. Kʼoati koa̱n kuijnatsʼinyai jmeni xi bakóya kʼoa josʼin tjíofikao yaole, kʼoa jisoa kataʼyai kʼiatsa tíjna jngo relijión xi koa̱n si̱nʼiotʼai.