1, 2. ʼYáni xi tísíchjén Jesús kʼianga títsjoáná kjoankjíntokon xi tsʼe Niná, kʼoa ánni nga nʼio machjénsíni nga kataʼyaa ʼyani.

JNGO tichjaa xi i̱ tso je xo̱n xi kisikasén ya jña tje̱n tísʼendiaanile xále Niná jngo tjíjtsa Sonʼnde nga kitsjoa kjoanda: “Ndsʼe, jekichajinna jotjín kʼa nga kuikjoan nchja̱ni je xo̱n xi bitjo jmeni xi kʼiakjoan machjénna”. Tojo kitso tichjaa jebi, a sakʼoa kʼoati mai tsanda ji. Nʼio nkjín mañá xi kʼoamaa.

² Nga kʼiakjoan bʼainá kjoankjíntokon xi tsʼe Niná kʼianga machjénná kui bakó nga Jesús, je xi ngʼajko̱ tíjnale je jtínle Niná, tísítjoson jmeni xi kitso. Tonga ʼyáni xi tísíchjén. Kʼianga kʼoakitso jme choa̱ xi sʼe̱ kʼianga jetíjna, kʼoakitso nga je sichjén “je choʼnda xi nʼiotʼakon, xi nda be xá” kʼianga tsjoále je choʼndale xi ngikʼa “xi koakje̱nni nga fichó choa̱le” (tʼexkiai Mateo 24:45-47). * Jé choʼnda jebi tísíchjén Jesús nga títsjoále kjoankjíntokon xi tsʼe Niná je xi ñaki chjotale mani nichxin fikjetʼa xi tiyoaa ndʼaibi. Nʼio chjíle nga kataʼyaa ʼyáni choʼnda jebi. Nga̱ yaa tínroani jmeni xi nda sikatíoná ngixko̱n Niná kʼoa nga koa̱nmiyosa xi kao je (Mat. 4:4; Juan 17:3).

3. Jósʼin tsakakóyaná je naxinandále Niná xi tʼatsʼe je choʼnda xi nʼiotʼakon, xi nda be xá.

³ Jósʼin tjínnele nga katamajinná je choa̱ xi tsakʼéjna Jesús tʼatsʼe je choʼnda xi nʼiotʼakon, xi nda be xá. Nichxin kjoatse, kʼoasʼin tsakakóya je naxinandále Niná nga kʼia sʼuí Pentecostés nga nó 33 kitsjoale xá choʼnda jebi je Jesús, nga je tsjoále kjoankjíntokon xi tsʼe Niná je choʼndale xi ngikʼa. Kʼoatisʼin koanjinná nga je choʼnda jebi jé tsoyanile ngatsʼi je chjotale Cristo xi ya koai ngʼajmi je xi tjíobatio fitsʼiakjoanni tje̱n nó 33. Xi ijngosani, kʼoatisʼin koanjinná nga tijeni choʼnda jebi nga jngó jngó xi bʼaile kjoankjíntokon xi tsʼe Niná, kʼoa nga kʼia nó 1919 kitsjoale xá Jesús choʼnda jebi nga kisikʼéjnaʼnda “ngayije tsojmile”, xi tsonile, ngayeje jmeni xi tjínle i̱ Sonʼnde. Tonga kʼianga jengisa nda kichotʼayajin  xi tʼatsʼe jebi kʼoa nga kinijé kaonile je nganʼiole Niná, ngisa nda koanjinná josʼin tínchja̱ni choa̱ jebi kʼoa machjénní nga si̱kʼantjaiyaa josʼin koankjainná (Prov. 4:18). Chótʼayajinla je choa̱ jebi kʼoa kataʼyala jósʼin bʼakaotʼaná tsanda ñá, ni ya ngʼajmi tjínná kjoachoya kʼoa ni i̱ Sonʼnde kuiyoaa.

4-6. Ánni kʼoabixónsíñá nga je choa̱ xi tʼatsʼe choʼnda xi nʼiotʼakon kʼia fitsʼiani nga bitjoson nga jefaʼato nó 1914.

⁴ Tjíosa kʼa bersíkulo xi faʼaitʼa ya Mateo 24 jñani bakó nga tsín tsa kʼia nga sʼuí Pentecostés nga nó 33 kitjoson je én xi kui tínchja̱ni tʼatsʼe choʼnda xi nʼiotʼakon, xi nda be xá, nga kui nichxin xi tiyoaa ndʼaibi tíbitjoson. Kataʼyala ánni nga kʼoabixónsíñá.

⁵ Je choa̱ jebi, xi tʼatsʼe choʼnda xi nʼiotʼakon, kʼoati kui tínchja̱ni je choa̱ xi sʼe̱ kʼianga kjoaʼaí Jesús, xi tsonile, kʼianga jetíjna, “kʼoa nga kjoetʼa [xi chon] sonʼndebi” (Mat. 24:3). Je xi tso ya Mateo 24:4 saʼnda 22 jao kʼa bitjoson. Kʼiaa kitjoson títjon tje̱n nó 33 saʼnda nó 70. Kʼoa xi majaoni ngisa tse tínchja̱ni, kʼoa kui nichxin xi tiyoaa ndʼai tíbitjoson. A kui xi tsonile jebi nga kʼoati jao kʼa kuitjoson je choa̱ xi tsakʼéjna Jesús tʼatsʼe choʼnda xi nʼiotʼakon. Mai.

⁶ Fitsʼiakjoanni Mateo 24:29, je én xi kitso Jesús kui tínchja̱ni jmeni xi koa̱n nichxin xi tiyoaa ndʼaibi (tʼexkiai Mateo 24:30, 42, 44). Kʼianga kinchja̱ni tʼatsʼe kjoañʼai xi nʼio tse kʼoakitso nga je chjotasonʼnde skoee “je ʼndíle chjota xi kjoaʼaíjinni yojbi ya ngʼajmi”. Xijekoan, kʼoasʼin tsakʼénele je chjotale xi koatio nichxin xi totífikjetʼa nga tje̱nyatokon katabatio, kitsole: “Tsín tsa ʼyao jme ora nga kjoaʼaí Naino [...], nga̱ je ʼndíle chjota kjoaʼaí kui ora kʼia nga tsín tjínjinno”. * Kʼianga jekʼoakitso jmeni xi koa̱n nichxin xi tiyoaa ndʼaibi kʼiaa kinchja̱ni tʼatsʼe choʼnda xi nʼiotʼakon. Kuinga kʼoabixónsíñá nga je choa̱ jebi kʼiaa fitsʼiani nga bitjoson nga jefaʼato nó 1914, kʼianga jefitsʼia nichxin xi totífikjetʼa. Ánni kʼoabixónsíñá.

7. Jméni xi kiskonangi je xíngiaa kʼianga kitsʼiani nga kisʼexkó je trigo kao jñá xi tsín nda, kʼoa ánni.

⁷ Tikjaʼaitsjenlai kʼianga i̱ kitso Jesús: “ʼYá ni tsokʼoa je choʼnda xi nʼiotʼakon, xi nda be xá”. Nichxinle je pastro alikui ʼya xi kui kiskonangi. Tojosʼin tsaʼyaa kjoaʼmiya xi jaʼato, je pastro nʼio nkjín choa̱ tsakakó kʼoa saʼnda kitsjoale nganʼiotsje je chjotale Cristo xi ngikʼa. Jebi kui xi tsakakó nga kui nganʼiotsjele Niná kisixákao (Hech. 5:12). Kuinga tsín ʼya xi kui kiskonangisíni ʼyáni xi kitsjoale xá Jesús nga koandiaale ʼndíbarréle. Tonga nga nó 1914 alikui titsaʼyanile. Nó jebi kʼiaa kitsʼia nga kisʼexkó je trigo kao jñá xi tsín nda kʼoa kʼiaa kicho nichxin nga kinikinyátʼaxinle xínkjín (Mat. 13:36-43). Kʼianga kitsʼiani nga kisʼexkó trigo kao jñá xi tsín nda nʼio nkjín chjotandiso kisʼe xi kʼoakitso nga ñaki chjotale Cristo ma. Kʼoa kuinga i̱ tso xi kiskonangisíni je xíngiaa: jósʼin jchanile ʼyáni xi ñaki chjotale Cristo ma, xi koai ya ngʼajmi, xi trigo sʼin tsoyanile. Tikuini choa̱ xi tsakʼéjna Jesús tsakakó. Je chjotale Cristo xi tjoéjin nga ya koai ngʼajmi jéní xi kiskoé kjoankjíntokon xi tsʼe Niná.

8. Ánni nga tojesíni xi ya koai ngʼajmi je xi ya tjíojin je choʼnda xi nʼiotʼakon.

⁸ Je choʼnda xi nʼiotʼakon koa̱n yaa tjoéjinni je chjotale Cristo xi tjío i̱ Sonʼnde xi ya koai ngʼajmi. “Naʼmi xi ngʼa xále” ʼmile kʼoa jé kisʼenele nga kuinchja̱ni xi tʼatsʼe Niná xi kisiʼisenle (1 Ped. 2:9). Kuinga je choʼnda jebi koakoyasínile ndsʼe̱ jotjínni xi tʼatsʼe Niná (Mal. 2:7; Apoc. 12:17).

9. A ngatsʼiní je chjotale Cristo xi ya koai ngʼajmi xi choʼnda xi nʼiotʼakon ma. Kʼoalasi.

⁹ A ngatsʼiní je chjotale Cristo xi ya koai ngʼajmi xi choʼnda xi nʼiotʼakon ma. Mai. Ali tsa ngatsʼijin nga tjíobatíonda kjoankjíntokon xi tsʼe Niná xi tíbʼaile je chjotale Cristo  xi tjío ngakjijnda Sonʼnde. Je xi ya koai ngʼajmi, xi trigo tsoyanile, tjíojin je xi siervo ministerial ma kʼoa kao xi chjotajchínga sʼin tjío. Ndsʼee jebi yaa bakóya ya jtín jña tjío kʼoa bakóyason xki̱ ndʼia xki̱ ndʼia kʼoa nʼio tsjoánganʼiole jmeni xi bʼéndajin je xi tjío ya jña tje̱n tísʼendiaanile xále Niná jngo tjíjtsa Sonʼnde, tonga ali tsa jejin batíonda kjoankjíntokon xi tsʼe Niná, xi bʼaile je chjotale Cristo. Xi ijngosani, kʼoati tjío tichjaa je xi ya koai ngʼajmi xi tsínkʼia kui xá sʼin nga je kuitsoyale je jtín (1 Cor. 11:3; 14:34).

10. ʼYáni je choʼnda xi nʼiotʼakon, xi nda be xá.

¹⁰ Tonga ʼyáni tsokʼoa je choʼnda xi nʼiotʼakon, xi nda be xá. Tojoná kisʼin Jesús nga kisikjen chjotankjín nga tojngo jao chjotale kisichjén, kʼoati sʼin tojngo jao mani je ndsʼee xi ya koai ngʼajmi xi ya tjíojin choʼnda jebi, xi kʼoasʼin tjíobatíonda kʼoa tjíotsjoá je kjoankjíntokon xi tsʼe Niná nichxin nga jetíjna je Cristo. Nichxin xi tiyoaa ndʼai, je choʼnda jebi yaa tjíosíxá ya jña tje̱n tísʼendiaanile xále Niná jngo tjíjtsa Sonʼnde. Choʼnda jebi jéní Cuerpo Gobernante xi tsʼe Testigole Jeobá. Ninga tsín tojngo mani xi ya tjíojin choʼnda jebi, je choa̱ xi kisichjén Jesús tojngo choʼnda nchja̱ni. Kui xi tsonile, nga tojngo sʼín yaole je Cuerpo Gobernante kʼianga jme xi tso.

11, 12. 1) Jñánile nga jao xá xi bʼaile je choʼnda xi nʼiotʼakon, xi nda be xá. 2) Kʼiáni tsakʼaile xá je choʼnda xi nʼiotʼakon nga tsjoále kjoankjíntokon xi tsʼe Niná je choʼnda xi ngikʼa, kʼoa ʼyáni xi kitjoejin.

¹¹ Machjénní nga kataʼyaa nga je choa̱ xi tsakʼéjna Jesús tʼatsʼe choʼnda xi nʼiotʼakon, xi nda be xá, jao xá xi tsín mangóson bʼaile. Xi títjon, jé sʼenele nga tsjoále chjotale Jesús kjoankjíntokon xi tsʼe Niná, kʼoa xi majaoni, jé mantsja ngayeje tsojmile je xi nai ma. Mani nga kʼia bitjoson choa̱ jebi nichxin xi totífikjetʼa, nga jao xá xi bʼaile choʼnda jebi kʼiaa bʼaile nga jefaʼato nó 1914, kʼianga jetsakʼaile xá Cristo.

¹² Kʼiáni kitsjoale xá Jesús je choʼnda xi nʼiotʼakon nga je tsjoále kjoankjíntokon xi tsʼe Niná je choʼndale xi ngikʼa. Kʼianga jchaa jebi, si̱kjaʼaitsjenla jmeni xi koan nga nó 1914 kʼianga kitsʼiani nga kisʼexkó je trigo kao jñá xi tsín nda. Tojosʼin jetsaʼyaa, nga kui nichxin nʼio nkjín jtín kisʼe xi kʼoakitso nga chjotale Cristo ma. Jñánile jtín xi kiskoejin Jesús, xi kitsjoale xá nga choʼnda xi nʼiotʼakon koan. Kʼiaa tsaʼyale jebi kʼianga jaʼai je Jesús kao Nʼaile kʼianga jaʼaikotʼa je yo̱ngo̱ xi tsín matsen xi tsʼe Niná, xi tsonile,  josʼin tjínndajinle Niná nga jchaxkón, jebi kʼiaa kitsʼiani nga nó 1914 kʼoa kʼiaa jetʼani nga tífitsʼia nó 1919 (Mal. 3:1). * Nʼiojin tsjoa koanle nga tsabe je xi tjíokotʼaya Biblia ninga tochoa mani, xi tjíobakó nga nʼio tsjoake Jeobá kʼoa kao je Énle. Ninga kʼoalani, tojo koanchjén nga kinindaya jñani chasale. Tonga nangitokon koan kʼoa kitsjoaʼnde nga kinindaya kʼoa nga kinitsje jokjitse nga kichotʼayakao (Mal. 3:2-4). Je Chjota xi kotʼaya Biblia tsakʼin jéní xi ñaki trigo kitsoyanile. Kʼoa kʼianga nó 1919 je Jesús kʼiaa kiskoejin kʼa je ndsʼee jebi, xi nda be jotso Énle Niná, nga kui koa̱n je choʼnda xi nʼiotʼakon, xi nda be xá, kʼoa jé tsakánele nga tsjoále kjoankjíntokon xi tsʼe Niná je choʼnda xi ngikʼa.

13. ʼYáni xi kʼoati tíbʼaile kjoankjíntokon xi tsʼe Niná, kʼoa ánni.

¹³ ʼYáni xi bʼaile je kjoankjíntokon xi tsʼe Niná. Kʼianga sʼa kitsʼia nichxin xi totífikjetʼa ñaki toyaa koai ngʼajmi ngatsʼi xi tsakʼaile. Tonga xijekoanni, kʼoati ya koanjngokao je chjotankjín xi kjaʼaí barré ʼmile. Chjota jebi ngisa nkjín mani tikʼoajinni xi ya koai ngʼajmi, tonga tojngo jtín mani nga tjíofitjenngile Cristo (Juan 10:16). Je xi ya koai ngʼajmi kao je barré xi ngikʼa kui tjíosíchjén jmeni xi kʼiakjoan “nga fichó choa̱le” batíonda je choʼnda xi nʼiotʼakon. Kʼoa jókjimani je Cuerpo Gobernante, xi tsonile, je choʼnda xi nʼiotʼakon. Kʼoati machjénle tsanda je kjoankjíntokon xi tsʼe Niná, kuinga tije tjíokjoeni nga jngó jngó jmeni xi tjíobatíonda. Tjíobakó kjoanangitokon nga be nga kʼoati machjénle kjoankjíntokon xi tsʼe Niná joni ngatsʼi chjotale Cristo xi ngikʼa.

14. 1) Jmé xá xi nʼio tse kisʼenele je choʼnda xi nʼiotʼakon, kʼoa jméni xi kʼoati ya maxki̱kao. 2) Jmé xi tsakájinkon Jesús je choʼnda xi nʼiotʼakon, xi nda be xá. (Chótsenlai rekuadro xi tso: “Tonga tsa je choʼnda xi tsʼen...”.)

¹⁴ Je Jesús nʼio tse xá xi tsakánele je choʼnda xi nʼiotʼakon, xi nda be xá. Nichxin kjoatse, jngo xi choʼnda ma jé sʼenele nga síkuinda ngatsʼi choʼnda xi ngikʼa, xi tjínle je naile (Luc. 12:42). Kʼoatisʼinni je choʼnda xi nʼiotʼakon, xi nda be xá, jé kjinele nga síkuinda ngatsʼi je choʼndale Jeobá. Kʼoati kui xá kjinele nga síkuinda je tsojmi xi tjínle Cristo, kʼoa síkuindaa josʼin tíʼmiyason, nga tjíosatíonda jmeni xi faʼa ya kjoajtíntse kʼoa nga tíbitjo je xo̱n xi Biblia yʼangini xi machjénná kʼianga ʼmiyasoán, nga satío kjoajtínná kʼoa kao nga toñá chotʼayá. Ngatsʼiñá nga machjénná kjoankjíntokon xi tsʼe Niná, xi títsjoá choʼnda jebi.

15, 16. Kʼiáni nga sintsja Jesús je choʼnda jebi ngayeje tsojmile.

¹⁵ Kʼiáni tsjoále Jesús je xá xi majaoni je choʼnda xi nʼiotʼakon, kʼianga koanele “ngayije tsojmile”. Je Jesús i kitso: “Jó tondale je choʼndabe, xi naile koa̱nsjaile kʼia nga kjoaʼaí nga kʼoatísʼín. Xi kjoakixi xi xinno, nga je naile sikʼéjnaʼnda ngayije tsojmile” (Mat. 24:46, 47). Testo jebi kʼoatso nga je Jesús kʼia tsjoále xá kʼianga kjoaʼaí kʼoa skoe̱ “nga kʼoatísʼín” je choʼnda jebi, nga ñaki kʼiakjoan choa̱le títsjoá kjoankjíntokon xi tsʼe Niná. Kui xi tsonile jebi nga tsín tsa toñatje̱n kʼoaile nga jao xá xi kitso Jesús. Jósʼin kʼoa kʼiáni nga sintsja Jesús je choʼnda jebi ngayeje tsojmile. Kʼianga jchaa xi tʼatsʼe jebi jao koya tjínni xi tjínnele nga kataʼyaa: kʼiáni kjoaʼaí je Jesús, kʼoa jmé tsojmi xi sintsja je choʼnda xi nʼiotʼakon.

¹⁶ Kʼiáni kjoaʼaí je Jesús. Yaa bakóyaná je bersíkulo xi faʼaitʼa ya kapítulo 24 xi tsʼe Mateo. Kʼianga “kjoaʼaí” tso én xi síchjén bersíkulo jebi kui nchja̱ni nga jo Jues sʼin kjoaʼaí je Jesús nga kjoaʼaísíkjeson je chjotatsʼen kʼianga kuichokjetʼa jmeni xi chon sonʼnde (Mat. 24:30, 42, 44). * Kʼianga kjoaʼaí tso én xi kisichjén Jesús nga tsakʼéjna choa̱ xi tsʼe choʼnda xi nʼiotʼakon, kui xokitsole kʼianga kjoaʼaí nga tísʼejna kjoañʼai xi nʼio tse.

17. Jñánile “ngayije tsojmile” je Jesús.

¹⁷ Jñánile “ngayije tsojmile” je Jesús. Ali tsa tokuijin je tsojmi xi tjíole i̱ Sonʼnde xokitsole, kʼoati kui je xi tjínle ya ngʼajmi. Je Jesús kʼoati nʼio ngʼa xá tjínle ya ngʼajmi, i kitso: “Ngayije kjoatéxoma kitsʼaina ngʼajmi, kʼoa i̱ sonʼnde” (Mat. 28:18; Efes. 1:20-23). Je xi tsojmi kitsole kʼoati kui kjoatéxoma xi tsakʼaile tje̱n nó 1914 nga Rey sʼin tíjna kʼoa kui jebi xi kʼoati tsjoále je chjotale xi ya koatexomakao ya ngʼajmi (Apoc. 11:15).

18. Ánni nga ñaki tsjoa sʼe̱sínile Jesús nga sintsja ngayeje tsojmile je choʼnda xi nʼiotʼakon.

 ¹⁸ Jmé xi tsoyaná jebi. Kʼianga jo Jues sʼin kjoaʼaí Jesús kʼianí nga tísʼejna je kjoañʼai xi nʼio tse, skoee nga je choʼnda xi nʼiotʼakon ñaki kʼiakjoan tjíotsjoále kjoankjíntokon xi tsʼe Niná je choʼndale xi ngikʼa. Je choʼnda xi nʼiotʼakon, kʼiaa kʼoaile xá jebi kʼianga jekoai ya ngʼajmi kʼianga kʼoati rey koa̱n nga koatexomakao Cristo.

19. A ngisa chjíle je kjoatjao xi kʼoaile je choʼnda xi nʼiotʼakon ya ngʼajmi tikʼoajinni xi kʼoaile xi ngikʼa xi kʼoati ya koai ngʼajmi.

¹⁹ A ngisa chjíle je kjoatjao xi kʼoaile je choʼnda xi nʼiotʼakon ya ngʼajmi tikʼoajinni xi kʼoaile xi ngikʼa xi kʼoati ya koai ngʼajmi. Majain. Ninga tochoa mani xi kʼoatsakʼinle nga jngo kjoanda kʼoaile ya ngʼajmi kʼoati koa̱n so̱kole kjoanda jebi je xi ngikʼa. Si̱kjaʼaitsjenla jme xi kitsole Jesús je xi tejngo pastrole, je xi kixi kitʼale, nitje̱n nga kjesa nikʼienjin (tʼexkiai Lucas 22:28-30). Kʼoakitsole nga nʼio tse kjoanda tsjoále kʼiatsa kixi koaitʼale. Kʼoati rey koa̱n nga koatexomakao ya ngʼajmi. Kʼianga jekoanskanni kʼoakitso nga ngatsʼi je chjotale xi ya koai ngʼajmi, xi jngo siento kao ñachanño jmi mani, kʼoati yáxile koatioson kʼoa ya koatexomakao (Apoc. 1:1; 3:21). Ya Mateo 24:47 kʼoati tso nga je Jesús kʼoakitsole je chjota xi tojngo jao mani, xi ya tjíojin je choʼnda xi nʼiotʼakon, nga sintsja ngayeje tsojmile. Tonga je xi kʼoaile kjoanda jebi ali tsa tojejin choʼnda xi nʼiotʼakon, ngatsʼiní je xi jngo siento kao ñachanño jmi mani xi nʼio ngʼa xá kʼoaile ya ngʼajmi kao Cristo (Apoc. 20:4, 6).

20. Jmé xá kiskoejinni Jesús je choʼnda xi nʼiotʼakon, xi nda be xá, kʼoa jméni xi tiyondaa nga sʼiaan.

²⁰ Je Jesús kʼoatisʼin tísíchjén je choʼnda xi nʼiotʼakon, xi nda be xá, josʼin kisichjén je chjotale kʼianga kisikjen je chjotankjín: nga tojngo jao chjotale kisichjén nga kisikjen je chjotankjín. Kui xá kiskoejinni choʼnda jebi nga tsín jme xi katachale choʼndale xi ngikʼa nichxin fetʼa xi tiyoaa ndʼaibi, nga kʼiakjoan tsjoále je kjoankjíntokon xi tsʼe Niná “nga fichó choa̱le”, je xi koai ya ngʼajmi kao xi koatio i̱ Sonʼnde. Nʼio bʼailee kjoanda nga kʼoatjíosʼín. Jósʼin koakoá nga chjí ʼyaa je choʼnda xi nʼiotʼakon, xi nda be xá. Kʼiaa nga kʼoainganʼiolee josʼin tjíobándiaa (Heb. 13:7, 17).