1. Jméni xi chon ya naxinandá Jerusalén kʼianga kicho Nehemías. (Chótsenlai sén xi faʼaitʼa ibi.)

JMÉNI xi chon ya Jerusalén kʼianga kicho ijngokʼa Nehemías kʼianga jejaʼato choatse nó 443 nga kjesa chʼajin nó 1. Je chjota xi tjío Jerusalén kui tjíofáoyani jmeni xi kjima ya naxinandá. Jngo chjota xi nʼio ʼyale, xi xin naxinandále, jngo ʼnde tsakʼaile jña tíjna yo̱ngo̱le Niná. Je chjota levita tjíotsjionkon je xále. Je xi chjotajchínga ma ya naxinandá, negosio tjíosʼín kʼianga xoto ʼndele nga je koatio choa̱ nga kataʼyaxkón je Niná. Kʼoa nʼio nkjín chjota israelita xi je tjíobixankao je yánchjín xi xin naxinandále (Neh. 13:6).

2. Jókoanni nga naxinandátsje koansíni je naxinandá Israel.

² Je naxinandá Israel, ñaki xá kitjoejinni nga naxinandále Niná koa̱n. Kʼianga nó 1513 nga kjesa chʼajin nó 1, je chjota israelita ñaki kao kjoatsjoa kʼoakitso nga kʼoasʼin josʼin nga mele je Jeobá, i kitso: “Ngayeje je én xi tínchja̱ Jeobá tiyondaníjin nga si̱tjosuinjin” (Éx. 24:3). Nga kʼoakitso, je Niná tsje sʼin tsabekon naxinandá jebi, xi tsonile, tsakʼasjetʼaxin nga naxinandále koa̱n. Nʼio tse kjoanda kisʼele. Ñachan nó nga koanskanni, je Moisés i kitsole naxinandá jebi: “Ji jngoní naxinandá xi tsje sʼin tijnai ngixko̱n Jeobá Nináli. Kʼoa jiní xi kʼoasʼin kiskoejinli je Jeobá Nináli nga naxinandále koai̱n, jngo naxinandá xi tsín mangóson je naxinandá xi tjío i̱ tʼanangi” (Deut. 7:6).

3. Jósʼin tjío ngixko̱n Niná je chjota judío nga koanjaoni kʼa kicho Nehemías ya Jerusalén.

³ Je naxinandá Israel alikuini kisitjoson jmeni xi kitso. Ningalani tsakatio kʼa xi kixi kitʼale je Niná, me ngatsʼi nga ngisa kui kini nga tsje sʼin jchale ʼndele nga kui kʼoasʼin josʼin mele Niná. Kʼianga koanjaoni kʼa kicho Nehemías ya naxinandá jebi, tokʼoa jela jngo siento nó tjínle nga kinikitjoni ya Babilonia je chjota judío xi kixi koan, kʼianga kʼoasʼin skoe̱xkón ijngokʼani Niná josʼin nga mele ya Jerusalén. Tonga je naxinandá Israel alikui tinanda tjíosísinngáni xi tʼatsʼe Niná.

4. Jñánile nga ño koya xi chótʼayá xi koasenkaoná nga tsje sʼin kuiyoaa ngixko̱n Niná.

⁴ Joni tsa je chjota israelita, je Niná kʼoati tsje sʼin bekon naxinandá xi tíjnale ndʼaibi. Je Jeobá kisikatíotʼaxin je chjotale Cristo xi ya ngʼajmi koai kʼoa kao je chjota xi “nkjín mani” nga je sixále (Apoc. 7:9, 14, 15; 1 Cor. 6:11). Je chjota israelita alikui  titsje sʼin tsakationi ngixko̱n Jeobá, alikui mená nga kʼoati katamaa tsanda ñá. Jméni xi sʼiaan nga tsín kʼoakatamaa. Jméni xi koasenkaoná nga tosi tonda tsje sʼin kuiyoaa ngixko̱n Jeobá kʼoa nga tosi tonda tsjoáná kjoanda nga si̱xálee. Ño koya xi faʼaitʼa ya kapítulo 13 tsʼe Nehemías chótʼayá i̱ kjoaʼmiya jebi. Xi títjon, alikui je si̱miyoaa chjota xi chʼao sʼín. Xi majaoni, kʼoainganʼiolee je naxinandále Niná. Xi majanni, kui títjon si̱kʼéjnaa xá xi tsʼe Niná. Xi mañoni, likʼia si̱chajiaan nga chjotale Cristo maa. Jngó jngóla chótʼayajiaan nga ño koya jebi.

5, 6. ʼYáni xi Eliasib kʼoa xi Tobías tsakʼin, kʼoa ánni nga nʼio miyo koansínile xínkjín.

⁵ (Tʼexkiai Nehemías 13:7, 8.) * Alikui choa ñʼai tíjna nga tsje sʼin biyoaa nga̱ kui xi chʼaotjín kʼoasʼín je chjota xi tiyojinlee. Si̱kjaʼaitsjenla tʼatsʼe Eliasib kao Tobías. Je Eliasib naʼmi ngʼajko̱ koan. Je Tobías yaa kitje̱nni chjota ammonita, kʼoa tochale je kisixále chjotaxá xi tsakʼejna ya naxinandá Persia, xi tsakatéxomale naxinandá Judea. Nga títjon, je Tobías kʼoa kao miyole tsakatiochjoale je Nehemías nga tsakʼéndaya je xjáo xi kjindai ya Jerusalén (Neh. 2:10). Kʼoa xi ijngosani, je chjota ammonita alikui tiʼndele nga ya kjoaʼasʼen ya yo̱ngo̱le Niná (Deut. 23:3). Kʼoa ánni nga kʼoakisʼinsíni je naʼmi ngʼajko̱ Eliasib, nga jngo ʼnde kitsjoasínile je Tobías ya jña tíjna yo̱ngo̱.

⁶ Je Tobías nʼio miyo koanle je Eliasib. Je Tobías kʼoa kao tile xi Jehohanán tsakʼin yánchjín judía chixankao, kʼoa nʼio nkjín chjota judío xi nda kinchja̱ni tʼatsʼe Tobías (Neh. 6:17-19). Xi ijngosani, je Manasés xi tindaile koanni Eliasib, jé chixankao je tsotile Sanbalat, xi tíbatéxoma ya Samaria xi kʼoati ya nʼio kisixákao je Tobías (Neh. 13:28). Kʼianga kʼoasʼin nʼio ndale xínkjín, je Eliasib tsakui nichxin kuinga kitsjoaʼndenile Tobías jmeni xi kisʼin. Tonga je Nehemías kʼianga nʼio kixi kitʼale je Jeobá kisikʼatsao nditsián ngayeje tsojmi xi tjíole je Tobías.

7. Jósʼin kʼianga tosi tonda tsje sʼin koatio ngixko̱n Jeobá je xi chjotajchínga sʼin tjío kao je chjotale Cristo xi ngikʼa.

⁷ Nga naxinandále Niná maa, tjínnele nga kixi koanngíntʼalee Jeobá tikʼoajinni toʼyani. Kʼianga tsje sʼin kuiyoaa ngixko̱n, nʼio machjén nga si̱tjosoán kjoatéxomale. Kʼoa kuinga tsín koa̱n nga je xi xíngiaa mani ngisa chʼa̱ʼénsínilee tikʼoajinni jotso je Biblia. Je xi chjotajchínga sʼin tjío ya jinjtín kui koaitjenngintsjai jotso je kjoatéxomale Jeobá, alikui tsa totsʼe kjoafaʼaitsjen sichjén (1 Tim. 5:21). Tjínnele nga sikuinda yaole nga tsínkui kʼoasʼin jmeni xi tsín nda sikatío ngixko̱n Niná (1 Tim. 2:8).

8. Jméni xi tjínnele kuenta sʼiaan tʼatsʼe chjota xi nimiyoaa ñá xi jetsakʼaitʼale yaoná je Jeobá.

⁸ Nikʼiajin si̱chajiaan nga “je miyo xi tsín nda, jé xi síkitsón xi nda tjín” (1 Cor. 15:33). Tsakui nichxin tjíokʼa je xi xíngiaa mani xi likui nda kjoafaʼaitsjen tsjoáná. Je Eliasib nʼio nda choa̱ tsakʼéjnale tsakai je chjota judío nga nʼio nda kitsjoanganʼiole je Nehemías nga tsakʼéndaya je xjáo xi kjindai ya Jerusalén (Neh. 3:1). Tonga tochan bijbi tsʼantjaiya nga kʼoasʼin je kisimiyo je Tobías kʼoa kao xi kjaʼaí chjota, kʼoa nga koanskanni saʼnda kui kʼoakisʼin je xi jndí sʼin kisikʼéjna ngixko̱n Jeobá. Je miyo xi nda sʼín kʼoatsoná nga kui kʼoasʼiaan je xi tʼatsʼe Niná, jolani nga kʼoéxkiaa je Biblia, nga koanngián je kjoajtín kʼoa nga kʼuínyasoán je énnda chjotse. Tsí kjoaixi nga nʼio tsjoachaa je xíngiaa xi tsjoánganʼioná nga kui kʼoanʼia jmeni xi mele je Niná.

9. Jókjima ya yo̱ngo̱ nga kicho ijngokʼa Nehemías, kʼoa jókitso, ʼyálani xi tjínle jée nga kʼoakjima.

⁹ (Tʼexkiai Nehemías 13:10-12.) * Kʼianga kicho  ijngokʼa Nehemías ya Jerusalén, aliʼya xi titsojmi tjíobichókaoni ya yo̱ngo̱. Nga kʼoakoan, je chjota levita kisikatío je xá xi tjínle ya yo̱ngo̱ kʼoa yaa kisíxá ya jinxjoele. Je Nehemías kʼoakitso nga je chjota xi tjíobatéxomale naxinandá tjínle jée nga kʼoakjima. Tsakui nichxin kuinga tsín tsakʼéxkó nga jngoya xi te ya mani je tsojmi xi tsjoá je chjota israelita kʼoa tsakuije̱ nga tsín ya yo̱ngo̱ kichokao josʼin kisʼenele (Neh. 12:44). Je Nehemías kʼoasʼin tsakʼéndajin nga katamaxkó ijngokʼa tsojmi jebi, kʼoa kiskoejin kʼa chjota xi kisikuinda jña xinyá tsojmi ya yo̱ngo̱ kʼoa xi kisikuinda josʼin tsʼabí.

10, 11. Jósʼin koa̱n kʼoainganʼioá je xá xi kjima xi tsʼe Jeobá.

¹⁰ Jméni xi bakóyaná jebi. Kui síkjaʼaitsjenjinná nga koa̱n kʼoailee tsojmi xi tjínná je Jeobá (Prov. 3:9). Kʼianga bʼai i̱natjián je tao̱n xi machjén tokui tibʼailee jmeni xi titsʼeni Jeobá (1 Crón. 29:14-16). Tsakui nichxin kʼoasʼin si̱kjaʼaitsjeen nga tsín kʼoakoa̱nná nga tse kʼoee, tonga tsa kʼoatjín tokoán koaan kʼoee ninga toʼi̱natjín (2 Cor. 8:12).

¹¹ Jngo familia xi jin mani ʼndíxtile, ñandia nga xki̱ xomana kinchja̱le jngo ndsʼee kao chjoónle nga kisikjen ya niʼyale. Nkjín nó nga kʼoakisʼin, kʼoa je ndsʼee kao tichjaa xi kʼoasʼin kinikjen jejchínga kʼoa precursor especial sʼin tjíosíxá. Je xi na̱ ma kʼoakitso nga ninga te mani nga kjen koaan ngi jaosa koakjen. Kʼoa ninga toñandia kisikjen nga xki̱ xomana, nʼiojin tsjoa kisatiole je ndsʼee kao tichjaa nga kʼoakinikao. Tse kjoanichikontʼain kisokole familia jebi nga kʼoakisʼin, nga̱ jmeni xi tsakʼéyanajmí je ndsʼee tsakinyakao je ʼndíxtile nga koantaja kjoamakjainle. Kʼoa xijekoan, ngatsʼi je ʼndíxtile kʼoati kui xá kiskoé xi nʼio tse nixálee Jeobá.

12. Jmé choa̱ xi nʼio nda batío je ndsʼee xi chjotajchínga sʼin tjío kao xi siervo ministerial ma.

¹² Ijngosa koya xi bakóyaná je choa̱le Nehemías kuinga je ndsʼee xi nyatítjonle je jtín, jé títjon batío choa̱ nga tsjoánganʼiole je naxinandále Jeobá. Nga kʼoasʼín ndsʼee jebi nʼio binyakao xi ngikʼa. Jé choa̱le pastro Pablo fitje̱nngi je xi chjotajchínga sʼin tjío. Je Pablo nʼio kitsjoanganʼio xi tʼatsʼe xále Jeobá kʼoa kitsjoa kjoafaʼaitsjen josʼin koa̱n tsjoánganʼio je ndsʼee xi tʼatsʼe tao̱n kʼoa kao tsojmi xi tjínle (1 Cor. 16:1-3; 2 Cor. 9:5-7).

13. Jókisʼin kʼa chjota judío kʼianga tsín tsabexkón nichxin nga xoto.

¹³ (Tʼexkiai Nehemías 13:15-17.) * Kʼiatsa nʼio  makjaojinná je tsojmi xi tjín i̱ Sonʼnde, je kjoamakjainná tobijbi kjuinroajen. Ya Éxodo 31:13 kʼoatso kʼianga je chjota israelita kui kisikjaʼaitsjenle kʼianga xoto nga naxinandá tsjele Niná ma. Nichxin jebi kui xá kisʼejnani nga je Jeobá skoe̱xkón jotjín mani nga tjíoʼya yaniʼya nga jngó jngó familia, nga kʼoetsʼoa kʼoa nga sikjaʼaitsjenjin jotso je kjoatéxomale Niná. Tonga nichxin nga tsakʼejna Nehemías, tjíokʼa xi tokisixá kʼianga xoto tojo sʼín nga kjaʼaí nichxin. Alikui xále Niná títjon kisikatío. Kʼianga tsabe kjoa jebi je Nehemías, tsakʼaonsje ya naxinandá je chjota xi negosio tjíosʼín xi xin naxinandále kʼoa kʼoakitso nga katasʼechjoa xo̱ntjoale naxinandá kʼianga jekjimaʼña jngo nichxin tongini kʼianga xoto.

14, 15. 1) Jókoa̱n kʼiatsa to tao̱nla kuijnyá. 2) Jósʼiaan nga koa̱n kuitjásʼeen kjoanikjáyale Niná.

¹⁴ Jméni xi bakóyaná je choa̱le Nehemías. Jngo koya xi bakóyaná kuinga tsín koa̱n nga to tao̱nla kuijnyá. Kʼiatsa kʼoasʼiaan, tochale likui kʼoakji si̱xálee Niná jokji bichó nganʼioná kʼoa tsakui nichxin saʼnda jao sʼe̱ ni̱ma̱ná, kʼoa ngisa tsa nʼio tsjoachaa je xá xi nʼia. Tonga si̱kjaʼaitsjenjiaan jmeni xi kitso Jesús nga tsín koa̱n jao nai sʼe̱ná (tʼexkiai Mateo 6:24). Je Nehemías kisʼele tao̱n, tonga jméni xi ngisa kisikʼayale nichxin kʼianga tsakʼejna ya Jerusalén (Neh. 5:14-18). ʼNdele nga negosio sʼin kao chjota tirio kʼoa tsa kao xi ngikʼa chjota xi kʼoati negosio sʼín, tosa je ndsʼe̱ kitsjoanganʼiole kʼoa tsakʼasjetsje jaʼaínle Jeobá. Tikʼoasʼinni ndʼaibi, je xi chjotajchínga sʼin tjío kʼoa kao xi siervo ministerial ma kui xá sʼín jmeni xi binyakao je jtín, kʼoa je ndsʼee nʼio tsjoake nga kʼoasʼín. Jmé kjoanda xi sʼele je jtín nga kʼoasʼín je ndsʼee xi nyatítjon. Sʼe kjoatsjoacha, kjoanyʼán, kʼoa ndsʼee be nga síkuinda je xi nyatítjon (Ezeq. 34:25, 28).

¹⁵ Ninga tsín kʼoaʼminá ndʼaibi nga jchaxkoán nga xoto, je pastro Pablo kʼoakitso nga “tojo tíjnanile naxinandále Niná ngijngo nichxin xi ma nikjáya”. Kʼoa kitso: “Toʼyanibe xi kʼoasʼin jejaʼasʼen kjoanikjáya xi tsʼe [Niná], kʼoati je kisikjáyani tʼa xále josʼin Niná kisikjáyani xi tʼatsʼe” (Heb. 4:9, 10). Ñá xi chjotale Cristo maa koaan kuitjásʼeen nichxin nikjáyale Niná kʼiatsa si̱tjosonlee kʼoa kʼoainganʼioá nga katabitjoson jmeni xi tjínndajinle. Ji, kʼoa kao familiali, a kui títjon tinikatío xi tʼatsʼe Niná, tobʼelañá, nga chotʼayajtíon énle Niná ya niʼyano, nga mangíon kjoajtín kʼoa nga ʼmiyason. Tsakui nichxin machjén nga nʼio kuiyoaa kʼoa tsín kʼoaiʼndee ninga jokuitsoná je nainá kʼoa kao chjota xi ñatje̱n nixá, ngisa tsa tsín sasénle nga kui títjon nikʼéjnaa xi tʼatsʼe Niná. Kʼiatsa kʼoasʼiaan, jngoyale kʼoéchjoá xo̱ntjoa kʼoa kuichonsjee chjota tirio, ánni nga kui títjon si̱kʼéjnasíñá xi tʼatsʼe Niná. Nga jekisitsjená je Niná machjénní nga chjónangilee yaoná: “A tibakoña josʼin tifikoa yaona nga kui xále Jeobá tisikʼéjna títjoan” (Mat. 6:33).

16. Jméni xi kisʼin je chjota israelita, xi me tokui kisichani kjoanda xi kisʼele nga naxinandá tsjele Niná koan.

¹⁶ (Tʼexkiai Nehemías 13:23-25.) * Nichxinle Nehemías, je chjota israelita jé tjíobixankao yánchjín xi xin naxinandále. Kʼianga kicho títjon Nehemías ya Jerusalén, kʼoakitsole je xi chjotajchínga sʼin tjío kʼoa kao xi ngikʼa chjota judío nga firma katasʼín je xo̱n jñani tsjoá énle nga tsín je kuixankao je yánchjín xi kjaʼaí niná bʼétsʼoale (Neh. 9:38; 10:30). Tonga xi jejaʼato nó, je chjota israelita jé chixankao yánchjín xi xin naxinandále kʼoa tome kisicha kjoanda xi kisʼele nga naxinandá tsjele Niná koan. Kʼoa je xti xi kisʼele yánchjínle alikui koanle tsakʼéxkia kʼoa kinchja̱ én hebreo. Kʼoa nga jekoa̱njchínga xti jebi, “chjota israelitaña” a kuitso. Axo kʼoakuitso nga chjota asdodita, ammonita kʼoa moabita kitje̱nni. Jósʼin koa̱njinnile jotjínni Kjoatéxomale Niná kʼianga  tsín male én hebreo. Jósʼin skoe̱ni je Jeobá kʼoa jósʼin je sixánile ʼndele nga je sixále niná ndiso xi bʼétsʼoale je na̱le. Koanchjén nga kjitʼanangi kisʼendajin kjoa jebi kʼoa je Nehemías kjitʼanangi tsakʼéndajin (Neh. 13:28).

17. Je xi xijchá ma, jósʼin koa̱n kuinyakao je ʼndíxtile nga miyole Jeobá katama.

¹⁷ Kʼoati sʼiaan jokisʼin Nehemías nga tsín kiskoyakao nga tsakʼéndajin jmeni xi chon, ánni nga chjotale Cristo koa̱nsíni je ʼndíxtiná kʼoa ñaki kʼoasʼin koakosíni yaole nga kui ma. Jon xi xijchá mao, chjónangilao yaono: “A male je ʼndíxtina én xi ñaki tsje, xi tsonile, a be jotjínni énle Niná kʼoa a nchja̱ni xi tʼatsʼe. Kʼianga nchja̱najmí, a bakó nga je nganʼiotsjele Niná tjíosíxákao axo kui bakó nga je nganʼiole sonʼnde tjíosíxákao” (Sof. 3:9). Ali nikinroajenjion tokon kʼiatsa ʼyao nga chasale ʼndíxtino jñani sindaya yaole. Tobʼelañá, kʼiatsa mená nga kjaʼaí én koa̱nná, tse nichxin machjén kʼoa ngisa tsa nkjín koya jme xi kʼoetʼaná. Nʼio tse jmeni xi bʼetʼale je ʼndíxtino i̱ Sonʼnde. Tsejta katamao kʼoa kʼianga chotʼayajtíon tinyakao nga miyole Jeobá katama. Nkjínsa koya tjín josʼin koa̱n kuinyakao (Deut. 6:6-9). Kʼoatʼinlao jme kjoanda xi tje̱nkao nga tsín kʼoanʼia josʼín je xi ya tjíojin sonʼndele Na̱i (Juan 17:15-17). Tʼenelao yaono nga ñaki katabichókajin ni̱ma̱le jme xi ʼmilao.

18. Ánni nga jesíni xi xijchá ma xi ngisa koa̱n kuinyakao je ʼndíxtile nga katatsjoátʼale yaole je Jeobá.

¹⁸ Xijekoa̱nni, jé ʼndíxti xi kuitsoni tsa je Niná sixále kʼoa tsa mai. Tonga nʼio nkjín koya josʼin koa̱n kuinyakao je xi xijchá ma. Machjén nga nda choa̱ katabatíole, nga ndakjoan kʼoakuitsole jmeni xi tsín koa̱n kʼoasʼin, kʼoa nga kʼoakuitsole josʼin kuichotsjoá tsa jme xi sʼin. Jonño xi xijchá mao xi koa̱n kuinyakao je ʼndíxtino nga katatsjoátʼale yaole je Jeobá. Jé nganʼiono machjénle nga chjotale Cristo koa̱n kʼoa nga ñaki kʼoasʼin koaikao yaole ngantsjai. Kʼoa ngatsʼiñá nga machjénná nga si̱kuindaa yaoná ánni nga tsín si̱chasíñá je najñoná, xi tsonile, jokjoaan kʼoa jotso je kjoatéxoma xi mangíntjenngiaa, xi bakó nga chjotale Cristo maa (Apoc. 3:4, 5; 16:15).

19, 20. Jméni xi sʼiaan kʼianga kjoaʼaítsjenle Niná xi tʼatsaan kʼoa nga sichikontʼainná.

¹⁹ Je profeta Malaquías, xi kʼoati kʼia tsakʼejna nga tsakʼejna Nehemías i kitso: “Jngo libro kisʼetsʼiakao nga kichji [...] jñani kisʼetʼa jaʼaínle je xi kʼoasʼin tjíotsokjónke Jeobá kʼoa xi kʼoasʼin síkjaʼaitsjen je jaʼaínle” (Mal. 3:16, 17). Je Niná alikʼia sichajin je xi kʼoasʼin tsokjónke kʼoa xi tsjoake jaʼaínle (Heb. 6:10).

²⁰ Je Nehemías i kitso nga tsakʼétsʼoale Niná: “Tikjaʼaitsjennái, ji Ninána, kʼoa tichikontʼainnái” (Neh. 13:31). Je jaʼaínná kʼoati ya sʼe̱tʼa ya libro xi kijnale Jeobá joni tsa jaʼaínle Nehemías kʼiatsa tosi tonda tsín je si̱miyoaa chjota xi chʼao sʼín, tsa kʼoainganʼiolee je naxinandále Niná, tsakui títjon si̱kʼéjnaa xá xi tsʼe Niná kʼoa tsa tsín si̱chajiaan nga chjotale Cristo maa. Je pastro Pablo i kitso: “Chótʼao yaono nga tijonnio, tsa nda tiyokao xi makjainno” (2 Cor. 13:5). Kʼiatsa tosi tonda kʼoénelee yaoná nga ya kuiyojiaan je naxinandá xi kisitsje Jeobá, kjoaʼaítsjenle xi tʼatsaan kʼoa sichikontʼainná.