JE Biblia itso: “Je xti jngo kjoatjao xi tʼatsʼe Jeobá tínroani; jngo kjoatjao xi nʼio chjíle je ʼndí xi majcháya tsʼoa̱ na̱le” (Sal. 127:3). Kʼoa kuijin nga kʼoasikji tsjoa satíoni kon je ndsʼee kʼoa kao tichjaa kʼianga tsin ʼndíxtile.

Ningalani tse kjoatsjoa tje̱nkao nga jngo ʼndí tsin, tonga kʼoati tse xá kitjenkao. Kʼianga nda koa̱njchínga jngo ʼndí kʼoa nga tsín nanda chʼin katasʼele, tjínnele nga nda koa̱nsinle. Kʼoa kʼoatisʼin tíjna xi tʼatsʼe kjoamakjainle. Kʼianga koa̱ntajasa kjoamakjainle tjínnele skótʼaya énle Niná kʼoa nga koandiaale xijchále. Je xijchále, tjínnele kjitʼa kuitsoyale je kjoafaʼaitsjen xi faʼaitʼa ya Biblia (Prov. 1:8). Tonga kʼiáni tjínnele kʼoetsʼiakao nga kuitsoyale kʼoa jósʼin koa̱n kuitsoyale.

Kataʼyala jme xi jaʼatojin jngo chjota xi Manóah tsakʼin xi ya kitje̱nni ntje̱le Dan. Chjota jebi yaa tsakʼejna ya ʼnde xi Zorá tsakʼin ya naxinandá Israel. Ñandia jngo ánkjele Jeobá kʼoakitsole chjoónle nga jngo ʼndí sʼe̱le ningalani ʼndi̱ (Juec. 13:2, 3). Nʼiojin tsjoa koanle je Manóah kao chjoónle, tonga tochale kʼoati nʼio koankjaojinle josʼin sijchá je ʼndí xi sʼe̱le. Je Manóah tsakʼétsʼoale Niná kʼoa i kitsole: “Jngo kjoanda sijéle Jeobá. Tʼiain kjoanda, tikasén ijngokʼanáijin je chjotale Niná xi kixi xi saje kanikasáin kʼoa katabakóyanajin josʼin si̱jcháijin je ʼndí xi jtsín” (Juec. 13:8). Nga jao chjota jebi nʼio tsakʼénele yaole nga nda kisijchá ʼndíle kʼoa nga tsakakóyale je Kjoatéxomale Jeobá, kʼoa tse kjoanichikontʼain tsakʼaile, nga̱ je Biblia itso: “Nga jeki nichxin, je nganʼiole Jeobá jaʼasʼenjinle Sansón”. Je Sansón, xi jues koan ya naxinandá Israel, nʼio nkjín koya jmeni xi kisʼin kao nganʼiole Niná (Juec. 13:25; 14:5, 6; 15:14, 15).

Kʼiáni tjínnele kʼoetsʼiakao je xi xijchá ma nga kuitsoyale énle Niná xtiʼndíle. Je Biblia kʼoatso nga je Eunice, xi na̱le koanni Timoteo, kʼoa kao Loida, xi majchále koanni, kʼoasʼin kitsoyale “je xo̱n Escritura xi tsʼe Niná” “saʼnda nga ʼndí” kji je Timoteo, xi tsonile, saʼnda nga sʼa ʼndílee (2 Tim. 1:5; 3:15). Jebi kui bakóyaná nga sʼa nʼio ʼndí kji je Timoteo nga tsakʼinyale xi tʼatsʼe Niná.

Je ndsʼee kʼoa kao tichjaa nʼio nda sʼín kʼianga síjéle Jeobá nga katabándiaale josʼin sijchá ʼndíxtile saʼnda nga sʼa ʼndí kjoan kʼoa nga tongini bationda josʼin kuitsoyale énle Niná. Ya Proverbios 21:5 itso: “Jngo chjota xi tongini nda bʼéndajin jme xi sʼín, nʼio ndasʼin bichótsjoá”. Je xi xijchá ma tjínnele tongini koationda nga kjesa tsinjin ʼndíle. Saʼnda koaan jngo xo̱n kʼoetʼa jme xi koa̱nchjénle ʼndíle. Tonga kʼoati nʼio machjén nga sikjaʼaitsjen jmeni xi sʼin kao ʼndíle xi tʼatsʼe Niná. Kʼianga jejtsín ʼndíle kjoan kʼoetsʼiakao nga kuitsoyale xi tʼatsʼe Jeobá.

Jngo libro xi kui nchja̱ni josʼin majchínga je xtiʼndí kʼoatso nga ngisa kjenndiaa nga kʼia sakóyale kʼianga sʼa jngo jao sále, nga̱ kʼiaa nga ngisa ngotjo síxáni je xokoajko̱. Kuinga nʼio chjísínile nga je xi xijchá ma kʼia kʼoetsʼiakaoni nga kuitsoyale je kjoafaʼaitsjen xi tsʼe Niná kʼianga sʼasa nʼio ʼndí kjoan je ʼndíxtile.

Jngo tichjaa xi precursora sʼin tísíxá itso xi tʼatsʼe tsotiʼndíle: “Fikaoña nga fixinyasoan saʼnda nga sʼa jngo sále. Ningalani me tsín tsabe jña fikoa nga sʼa ʼndí kji, tonga kuijin xi nʼio tsakasenkao. Kʼianga jejao nóle jetoje tsjoále tratado je chjota”.

Nʼio ndasʼin bichótsjoá nga kʼia ʼmiyalee énle Niná je ʼndíxti kʼianga sʼa ʼndí kjoan. Tonga nkjín xijchá xi kʼoatso nga tsín tsa choa ñʼai male nga kʼoasʼín.

Je xtiʼndí toxá jtijonni kʼoa ndi̱toon masile. Kʼoa jebi nʼio ñʼai male xi xijchá ma. Tjín xtiʼndí xi tjínla xi tíkotsenle kʼoa xi mangotjoni jetitʼaxin tíkotsenngáni. Kʼoa toxá kʼoasʼínni, nga̱ tosʼa tjíobe jme xi tjín Sonʼnde. Jósʼin koa̱n kuinyakao nga tsín ndi̱to̱n katamasile kʼianga tjín xi bakoyalao.

Kataʼyala jokitso Moisés ya Deuteronomio 6:6, 7, kitso: “Je én jebi xi kʼoasʼin tibʼenele ndʼaibi tjínneli ya kʼoéjnajin ni̱ma̱li; kʼoa tjínneli nga koakoya kjitʼalai je ʼndíli kʼoa nga kui cho̱bayaño kʼianga tijnai niʼyali, kʼianga ndiaa titomjeyai, kʼianga sojnai kʼoa kʼianga bisotjain”. Testo jebi kui xi bakó nga je xi xijchá ma tjínnele nga ntsjaintsjai kuitsoyale je ʼndíxtile. Je xtiʼndí kʼoasʼin mangóson joni tsa jngo yá xi tosʼa kjimangʼa xi tjínnele ntsjaintsjai sʼe̱jtenngile nandá. Tosi̱kjaʼaitsjenla jebi: Ñá xi jekoanjchíngaa ngisa nda sʼejinná tsa jmeni kʼianga kjitʼa kʼoaʼminá, kʼoa a tokjoaʼmi je xtiʼndí.

Kʼianga koa̱n koakoyalao énle Niná je xtiʼndíno, tjínnele chʼa̱sjeʼalao nichxinno. Tonga xíngiaa nʼio ñʼai male nga kʼoasʼín, nga̱ nichxin xi tiyoaa ndʼaibi nʼio tse xá tjínle. Je pastro Pablo kitsjoa kjoafaʼaitsjen kʼianga nda si̱chjén je nichxinná ánni nga kuitjosonsíniná je xá xi kjinená xi tsʼe Niná (Efes. 5:15, 16). Jméni xi koa̱n sʼiaon. Jngo ndsʼee xi chjotajchínga sʼin tíjna nʼio ñʼai male tsakai nga bitjosonle je xá xi kjinele ya jinjtín kʼoa kao xá xi tsʼe kʼoa nga sísinle je ʼndítsotile xi sʼa tísíjchá. Kʼoa je chjoónle ndsʼee jebi, xi precursora regular  sʼin tísíxá, kʼoati me tsín maʼale tsakai. Jósʼin tsakʼasjeʼa je nichxinle nga tsakakóyale énle Niná je ʼndítsotile. Je ndsʼee itso: “An kʼoa kao chjoónna nyaon nyaon bʼexkia choalaijin Je xo̱nna xi bʼéyanajmí jotso Biblia kʼoa kao foyeto Examinando las Escrituras diariamente nga kje fisixájian. Kʼoa kʼianga nikájnafaijin kʼoati bʼexkiasa ngotjolaijin. Kʼoati mangínkoaijin nga mangínkʼinyasuinjin. Likui menajin nga tokʼoasʼin si̱kʼatuijin nichxin jebi nga sʼasa ʼndí kji ʼndítsotinajin”.

Mená nga nda chjota katama je ʼndíxtiná kʼianga jekoa̱njchínga. Tonga je xi ngisa mená kuinga tsjoake katama Niná ya jinni̱ma̱le, kʼoa kuinga kʼoasʼin nichjinesíñá (Mar. 12:28-30).

Ya Salmo 127:4 itso: “Joni flecha xi yʼatontsja jngo chjota xi nʼio taja, kʼoasʼin mangóson je xti xi sʼele chjota xi sʼa xti”. I̱ testo jebi kʼoasʼin ningósonkao je ʼndíxti joni flecha xi yʼatontsja jngo chjota. Je chjota xi male basén flecha tjínnele ndakjoan koasen, nga̱ likui tikoa̱n sikinroani nga jekabasén. Kuinga tjínnesínile je xi xijchá ma nga kjitʼa kuitsoyale énle Niná je xtile, ánni nga kjoaʼasʼenjinsíni kjoafaʼaitsjenle kao ni̱ma̱le, nga̱ je ʼndíxti tochoatse batiokao xijchále.

Kʼianga kinchja̱ni pastro Juan xi tʼatsʼe je chjotale Cristo, xi jo xtile sʼin tsabekon, i kitso: “Tsínna kjoajin xi ngisa sʼe̱na kjoatsjoa joni tsa jebi, nga nrʼoenia nga je xtina kao kjoakixi tjíomani” (3 Juan 4). Kʼoa je ndsʼee kao tichjaa kʼoati kji tsjoa male ndʼaibi kʼianga be je xtile nga ya tjíotsomaya je ndiaa xi kixi.