1. 1) Jméni xi me tokjitʼa chotʼayá ya kjoajtínná. 2) Kʼoa jósʼin basenkaoná nga kʼoasʼin kjitʼa chotʼayá.

KʼIANGA chotʼayai je Xo̱n xi Bájinkonná, a sakʼoa i̱si: “Jelaná sa kichotʼayá jebi”. Tsa jekjoatse nga ʼmi kjoajtín xi satíole je testigole Jeobá, ʼyajin nga tjín jmeni xi me tokjitʼa chotʼayá. Tobʼelañá, me tongantsjai nga sakóyaná tʼatsʼe Chjotaxále Niná, tʼatsʼe kjoabʼechjíntjaile Cristo, tʼatsʼe nga ʼmiyasoán kʼoa tsakuije̱ tʼatsʼe kjoamakjain kao kjoatsjoacha. Kʼianga kjitʼa chotʼayajiaan tʼatsʼe jebi basenkaoná nga taja sʼejna kjoamakjainná kʼoa nga kʼoanʼia jotso je Énle Niná, nga tsín tobʼejintokoán (Sant. 1:22).

2. 1) Kʼianga kjoatéxoma tso ya Biblia jméni xotsole. 2) Ánni nga tsín mangósonsíni je kjoatéxomale Niná kao kjoatéxomale chjotasonʼnde.

² Kʼianga kjoatéxoma tso ya Biblia nkjín koya tínchja̱ni, tínchjani kjoatéxoma, kjoafaʼaitsjen, kʼoa kao jmeni xi bájinkonná. Je Jeobá tsjoále kjoatéxoma je naxinandále. Kjoatéxoma jebi alikui mangóson kao kjoatéxoma xi bʼasje je chjotasonʼnde nga tokjitʼa tjíobʼantjaiya kʼoa me tongantsjai kjimachjotseya. Je kjoatéxomale Jeobá ñaki koaan si̱nʼiotʼaa ngantsjai. Kjoaixiní nga kitsjoa kjoatéxoma je Niná nichxin kjoatse xi tsín timachjénni nga koaitjenngi je choʼndale nichxin xi tiyoaa ndʼaibi. Tonga ali tsakuijin xi tsonile tsa tsín nda kisatio je kjoatéxoma jebi, nga̱ je xi kiski Salmo i kitso: “Je kjoatéxomali ñaki kixi tokʼia saʼndani” (Sal. 119:144).

3, 4. 1) Jméni xi sakʼoa tje̱nkao je kjoatéxomale Jeobá. 2) Jmé kjoanda xi kisʼele je chjota israelita tsa kisitjosonle Jeobá.

³ Je kjoatéxomale Jeobá sakʼoa kui tje̱nkao nga tongini bájinkonná. Je profetale Niná ngotjo ngosa tsakájinkonni je naxinandá Israel. Tobʼelañá, kʼianga tojeme kjoaʼasen ya ʼNde jña tsakʼinle nga kʼoaile, je Moisés i kitsole: “Tikuindao yaono ánni nga tsín  chʼa̱nachasínile ni̱ma̱no kʼoa tsín kuinyatʼaxinsíño, kʼoa kjaʼaí Niná kʼoétsʼoasínilao kʼoa kuinyalao xkóno, kʼoa je kjoajtile Jeobá ñaki kjoaʼaíneno” (Deut. 11:16, 17). Ya Biblia nʼio nkjín kjoafaʼaitsjen xi machjénná faʼaitʼa, xi kitsjoale Jeobá je naxinandále nichxin kjoatse.

⁴ Nʼio nkjín kʼa nga kʼoakitsole Jeobá je chjota israelita nga katatsokjónke, nga katasítjosonle kʼoa nga katabʼasjetsje jaʼaínle (Deut. 4:29-31; 5:28, 29). Je Jeobá kʼoakitsole nga nʼio tse kjoanichikontʼain tsjoále tsa kʼoasʼin (Lev. 26:3-6; Deut. 28:1-4).

5. Ánni nga tsakasenkaosíni Jeobá je rey Ezequías.

⁵ Kʼianga kjoañʼai tsakatiojin je chjota israelita je Jeobá likui kisichajin jmeni xi kitsole. Tobʼelañá, kʼianga kichone Judá je rey Senaquerib kʼoa kʼoakitso nga kjoaʼale xále je rey Ezequías nga tíbatéxoma, je Jeobá jngo ánkje kisikasén. Nga tojngo nitje̱n, je ánkjele Jeobá jngo siento kao ñokan kaoni aon jmi chjota kjoajchán asirio kisikʼien, kʼoa je Senaquerib ñaki tokʼoasakji nga kini ya niʼyale (2 Rey. 19:35; 2 Crón. 32:21). Ánni nga tsakasenkaosíni Jeobá je rey Ezequías. Kuinga kixi kitʼale kʼoa nga kisitjoson kjoatéxomale (2 Rey. 18:1, 5, 6).

6. Jósʼin tsakakó je rey Josías nga je Jeobá kisinʼiotʼa.

⁶ Ijngosa rey xi kʼoati kisitjoson kjoatéxomale Jeobá jé Josías. Kʼianga tosʼa jin nóle ñaki kui kʼoakisʼin xi kixi tíjna ngixko̱n Jeobá (2 Crón. 34:1, 2). Je Josías tsakakó nga kisinʼiotʼa je Jeobá kʼianga tsakjaʼáxin je xkóson xi kisʼe ya naxinandá kʼoa nga tsakasenkao chjota nga je Jeobá tsakʼétsʼoa ijngokʼale. Kʼoa nga kʼoakisʼin, je Jeobá ali tsa tojejin Josías xi kisichikontʼain kʼoati kisichikontʼain je naxinandá (tʼexkiai 2 Crónicas 34:33). *

7. Jmé kjoa xi tsakatiojin je chjota israelita kʼianga tsín kisitjoson kjoatéxomale Jeobá.

⁷ Je chjota israelita ali tongantsjai nga kisitjoson jme xi kitsole Jeobá. Jokji jaʼato nó nʼio nkjín kʼa nga tsín kisitjosonle. Kʼianga kinroajen kjoamakjainle “nga i̱ nga ján [...] [kitjenngi] xi tokjaʼaí kjoafaʼaitsjen”, tojo kitso je pastro Pablo (Efes. 4:13, 14). Tojosʼin tsakájinkon  Niná, kjoañʼai tsakatiojin kʼianga tsín kisitjoson je kjoatéxomale (Lev. 26:23-25; Jer. 5:23-25).

8. Jósʼin mangósoán kao chjota israelita.

⁸ Jósʼin mangósoán kao chjota israelita. Ñá kʼoati bʼainá kjoafaʼaitsjen kao kjoabichakjáya tojo koantʼain je chjota israelita (2 Ped. 1:12). Kʼianga bʼexkiaa je Énle Niná síkjaʼaitsjenjinná je kjoatéxomale. Kʼoa tiʼndená nga ñá chjoéjiaan tsa ni̱tjosoán jmeni xi tso Jeobá kʼoa tsa tokui kʼoasʼiaan josʼin mená (Prov. 14:12). Kataʼyala ánni nga koa̱n si̱tjosonsínilee je Jeobá kʼoa jósʼin koasenkaoná tsa kʼoasʼiaan.

9. Kʼianga tsakʼetsoma ya ʼndekixí je chjota israelita, jósʼin tsakakóle Jeobá nga kisikuinda.

⁹ Kʼianga tosʼa kitjo je chjota israelita ya Egipto, nga ki ya ʼndekixí, je Jeobá alikui tongini kʼoakitsole jokjoansʼin koandiaale kʼoa josʼin sikuinda xi ñachan nó kʼoétsoma. Tonga nkjín kʼa tsakakóle nga koa̱n je sinʼiotʼa kʼoa nga koa̱n koa̱nkjainle jme xi kitsole. Je Jeobá jngo yojbi kisichjén kʼianga nichxin kʼoa jngo lʼí kisichjén kʼianga njio nga tsakándiaale ya ʼndekixí kʼoa nga tsakakóle nga je tísíkuinda (Deut. 1:19; Éx. 40:36-38). Kʼoati kitsjoale jme xi koanchjénle. “Alijme xi kichale. Kʼoa je najñole alikui je, kʼoa je ndso̱ko̱ alikui kitjoya.” (Neh. 9:19-21.)

10. Jósʼin tíbándiaale Jeobá je naxinandále nichxin xi tiyoaa ndʼaibi.

¹⁰ Ñá kʼoati jeme kuitjásʼeen sonʼnde chjotse. A kʼoabʼé tokoán nga títsjoáná Jeobá jmeni xi machjénná nga kuinje̱ngilee yaoná kʼianga kjoaʼaí kjoañʼai xi nʼio tse (Mat. 24:21, 22; Sal. 119:40, 41). Kjoaixiní nga tsín tsa yojbi kʼoa tsín lʼí tísíchjén ndʼaibi je Jeobá nga tíbándiaaná kʼianga kuitjásʼeen ya sonʼnde chjotse, tonga je naxinandále tíbasenkaoná nga tje̱nyatokon tibiyoaa. Tobʼelañá, sa nʼio sa nʼio síkjaʼaitsjenjinná nga nʼio machjén nga si̱tajasaa kjoamakjainná kʼianga kʼoéxkiaa je Biblia, nga chótʼayajtían énle Niná ya niʼyaná, nga koanngián kjoajtínná kʼoa nga kʼuínyasoán. A tinitjosonñá. A kʼoasʼin tibʼendajiaan jmeni xi nʼia kʼianga katabitjosonná jebi. Kʼiatsa kʼoasʼiaan kʼoasʼin ni̱tajañá kjoamakjainná nga̱ kui xi koasenkaoná kʼianga koa̱n kuitjásʼeen sonʼnde chjotse.

11. Jósʼin bakó je Jeobá nga mandosinle nga nda kuiyoaa.

¹¹ Je kjoafaʼaitsjen xi tsjoáná naxinandále Niná tje̱nyatokon síkatíoná, tonga kʼoati basenkaoná nga kui xi ndatjín kʼoanʼia nga nyaon nyaon. Tobʼelañá, kʼianga tsínkui nʼio mangíntjenngiaa tao̱n kʼoa nga tomaniná josʼin biyoaa basenkaoná nga tsín nʼio nikjaojiaan. Kʼoati bʼainá kjoafaʼaitsjen xi binyakaoná nga nda kjoan najño xi chʼa̱kjá, nga nda sóyoaa, jme kjoasʼetsaojin xi chjoéjiaan kʼoa nga koa̱nná chjoéjiaan jokji tje̱n chótʼayá kjoachjine sonʼnde. Kʼoati binyakaoná je kjoafaʼaitsjen xi bʼainá tʼatsʼe josʼin si̱kuindaa Ndʼia jña chotʼayá, niʼyaná kʼoa tsa karroná nga tsín jme kjoaxkón katasokóná. Kʼoati ʼmináje̱ jósʼin tongini kuiyondaa kʼiatsa jme xi koa̱n. Kjoafaʼaitsjen jebi kui xi bakó nga nʼio mandosinle Jeobá nga nda kuiyoaa.

12. 1) Jméni xi nkjín kʼa kʼoakitsole Jesús je chjotale. 2) Jméni xi ñaki kiskajin ni̱ma̱le Pedro. 3) Jósʼin tjínnele koasenkaoná je choa̱ xi tsakʼéjna Jesús.

¹² Je chjotale Cristo xi títjon tsakatio kjitʼa kinikjaʼaitsjenjinle je kjoatéxomale Niná. Je Jesús nkjín kʼa kʼoakitsole je chjotale jokji chjíle nga nangitokon katama. Tonga ali tsa to énjin xi kinchja̱, ñaki kao choa̱ tsakakóle josʼin koako kjoanangitokon. Kʼianga tojeme nikʼien, kisikatíoxkó je chjotale nga tsakjen kʼianga tsakʼéjna sʼuí Paxko. Kʼianga tjíokjen, je  Jesús tsakasenndo kʼoa tsakanéjon ndso̱ko̱ je chjotale. Xá jebi jé kʼoasʼín jngo chjota xi choʼnda ma (Juan 13:1-17). Nga kʼoakisʼin Jesús ñaki kitsaojin ni̱ma̱le je pastrole. Je pastro Pedro tsabe kʼianga tsakʼéjna choa̱ jebi je Jesús, kʼoa nga jejaʼato kante nó, kʼoakitsole je ndsʼe̱ nga katasʼele kjoanangitokon (1 Ped. 5:5). Je choa̱ xi tsakʼéjna Jesús tjínnele koasenkaoná ngatsʼiaa nga nangitokon koaan kao xíngiaa (Filip. 2:5-8).

13. Jókitso Jesús, jméni xi nʼio machjén nga katasʼená.

¹³ Ijngosa koya xi kjitʼa kʼoakitsole Jesús je chjotale kuinga nʼio machjén nga taja katasatío kjoamakjainle. Kʼianga tsín koanle je chjotale nga tsakjaʼáxin je na̱i xi tíjnajinle jngo ti, i kitsole Jesús: “Ánni nga jinjin likui koansíninajin nga kichʼasjexinlaijin na̱ibe xi ndajin. Kʼoa Jesús kitsole: Kui nga tochoa makjainno. Xi kjoakixi xi xinno, tsa nda makjainno, nda tsa tochoa tjín joni tsa jngo na̱xi̱nle mostasa xi ʼndí nakjoan [...] nijmejin xi tsín koa̱nno” (Mat. 17:14-20). Jokji tse tsakʼejnakao chjotale, je Jesús kʼoasʼin tsakakóyale nga nʼio chjíle je kjoamakjain (tʼexkiai Mateo 21:18-22). Kʼoa ñá, a kui xá mangínñá kjoajtínná kao kjoajtíntsená nga si̱tajaa kjoamakjainná. Kʼianga mangián kjoajtínná ali tsa tokuijin nga tsjoa fáya tokoán, kʼoati kuinga kʼoasʼin bakoñá nga je Jeobá ninʼiotʼaa yaoná.

14. Ánni nga nʼio chjísínile ndʼaibi nga kui kjoatsjoacha katasʼená je kjoatsjoacha xi kisʼele Cristo.

¹⁴ Ya Escrituras Griegas Cristianas nʼio nkjín kjoatéxoma faʼaitʼa tʼatsʼe josʼin koakolee kjoatsjoacha xíngiaa. Je Jesús kʼoakitso nga je kjoatéxoma xi majaoni xi ngisa chjíle kuinga kʼoasʼin tsjoacha katamaa xíngiaa josʼin tsjoachaa yaoná (Mat. 22:39). Je Santiago, xi ndsʼe̱jon koan Jesús, “kjoatéxoma xi ngʼa” kitsole (Sant. 2:8). Kʼoa je pastro Juan i kitso: “Ngatsʼio ʼndíndsʼe, likui kjino kjoatéxoma chjotse, tojé kjoatéxoma jchínga xi tíjnano saʼnda nga koankjain títjonno. [...] Ngijngokʼa kjingánino kjoatéxoma chjotse” (1 Juan 2:7, 8). Jókitsonile nga “kjoatéxoma jchínga” kitso. Kui xokitsole je kjoatéxoma xi tso nga tsjoacha katamaa xíngiaa. Kuinga kjoatéxoma jchínga ʼmini nga̱ tokʼoa jenkjín nó kitsjoa je Jesús. Tonga kʼoati chjotse ʼmile nga̱ tjínnele tosi tonda koakole kjoatsjoacha xínkjín kʼianga kjoa kjoaʼatojin kʼoa saʼnda tsjoántjai kjoabijnachonle xi totʼatsʼe xínkjín. Nga chjotale Cristo maa, tsí kjoaixi nga nʼio bʼé kjoanda nga kʼoasʼin nikjaʼaitsjenjinná jokji chjíle nga tsjoacha koaan xíngiaa kʼoa nga tsín kʼoasʼiaan josʼín je chjota nga to yaole fini.

15. Jmé xá jaʼaini Jesús i̱ Sonʼnde.

¹⁵ Je Jesús nʼio koanndosinle chjota.  Kisindaya xi chʼin tjínle kʼoa kisikjaʼáyale kʼien. Tonga ali tsatokuijin xá jaʼaini Jesús nga chjota sindaya. Kui xá jaʼaini nga kuitsoyale xi tʼatsʼe Niná nga̱ kui xi tondiaa kuinyakao chjota. Ánni. Kuinga je chjota xi kisindaya kao xi kisikjaʼáyale koanjchínga kʼoa kʼien ngindia, tonga je xi kinrʼoé én xi kitsoya Jesús kisʼele kjoachoya nga koa̱n koatio tokʼia saʼndani (Juan 11:25, 26).

16. Jókji jetíʼmiyason Énle Niná nichxin xi tiyoaa ndʼaibi.

¹⁶ Je xá xi tsakʼétsʼiakao Jesús nga kitsoyason jetífison ngakjijnda Sonʼnde ndʼaibi. Kʼoa i kitsole chjotale: “Tangíon, tinyaʼao ngatsʼi naxinandá, tikinjao chjota tʼatsʼan” (Mat. 28:19). Je chjotale kʼoakisʼin kʼoa kʼoati tinʼia tsanda ñá ndʼaibi. Tsʼato ñato miyón mani je testigole Jeobá xi tsʼato jao siento kao kante naxinandáyʼai tjíotsoyason xi tʼatsʼe Chjotaxále Niná, kʼoa miyón mani chjota xi tjíotsoyale Biblia. Jebi kui xi bakó nga nichxin fetʼa tiyoaa ndʼaibi.

17. Jmé kjoafaʼaitsjen xi kitsjoale chjotale Cristo je Pablo kao Pedro.

¹⁷ Je kjoatéxomale Niná nʼio tsakinyakao je chjotale Cristo xi títjon tsakatio nga taja kisatio kjoamakjainle. Kʼianga tíjnaʼya ndo̱yá je pastro Pablo i kitsole Timoteo: “Nda tʼejintakuin jo tso je én xi nda, xi an kinoʼyanái” (2 Tim. 1:13). Nʼiojin kitsjoanganʼiole Timoteo én jebi. Kʼoa je pastro Pedro kʼianga kʼoakitsole je chjotale Cristo nga katasʼele kjoaka, kjoatsjoacha kʼoa nga katakjoéxkó yaole, i kitsole: “Sikjaʼaitsjen ntsjaino je kjoabi, nda tsa jeʼyao, nda tsa jetiyonʼiojinlao je kjoakixi” (2 Ped. 1:5-8, 12).

18. Jókisatio kon je chjotale Cristo kʼianga kinikjaʼaitsjenjinle je kjoatéxomale Niná.

¹⁸ Je xo̱nkarta xi kiski je Pablo kao Pedro kui faʼaitʼa “je én xi kotse tsakáyakon je chjota xi tsje tsakatio, xi kinchja̱ya tʼatsʼe Niná” (2 Ped. 3:2). A koanjtile je chjotale Cristo nga kʼoasʼin kinikjaʼaitsjenjinle kjoatéxomale Niná. Mai, nga̱ bení nga kui xá tjíobándiaanile Niná nga tsjoake kʼoa nga mele nga tosi tonda katasʼele “kjoandale [Niná] kʼoa kjoafaʼaitsjenle Nainá Jesucristo xi tsakʼasjentjainá” (2 Ped. 3:18).

19, 20. Ánni nga koa̱n koa̱nkjainsíniná nga nʼio ndasʼin tíbándiaaná je Jeobá, kʼoa jósʼin basenkaoná jmeni xi síkjaʼaitsjenjinná.

¹⁹ Ndʼaibi, nʼio nkjín koya tjínni anni nga koa̱n koa̱nkjainsíniná nga nʼio ndasʼin tíbándiaaná Jeobá kao Énle xi tjítʼa ya Biblia (tʼexkiai Josué 23:14). * Ya Biblia kʼoatsoná jmeni xi tísʼín je Niná xi kao chjotasonʼnde jokji tífaʼato nó. Ngayeje xi tjítʼa kui xá kichjini nga ñá koasenkaoná (Rom. 15:4; 1 Cor. 10:11). Kʼoati faʼaitʼa én xi tongini kinokjoa, xi tíbitjoson nichxin xi tiyoaa ndʼai. Én jebi nkjín nó tongini kisʼejintokoán. Kui síkjaʼaitsjenjinná nga sítjosonntsjai Jeobá jmeni xi tongini kʼoatso. Tobʼelañá, kʼoakitso nga miyón chjota xi je Jeobá kʼoetsʼoale nga jetíbichókjetʼa nichxin, kʼoa jetíbitjoson én jebi (Is. 2:2, 3). Kʼoati kitso nga sa chʼao sa chʼao koa̱nchon sonʼnde kʼoa kʼoakjima. Kʼoa kʼoati tíbitjoson je én xi kitso Jesús kʼianga kʼoasʼin tíʼmiyason je énle Niná jngo tjíjtsa Sonʼnde (Mat. 24:14).

²⁰ Je Niná nʼio nkjín choa̱ títsjoáná nga koa̱n si̱nʼiotʼaa. A makjainná jmeni xi tso je Jeobá. Jngo tichjaa xi Rosellen ʼmi itso: “Kʼianga ñaki je Jeobá kisinʼiotʼa, ngisa tsaʼbe nga tsakasenkaona kʼoa nga kitsjoanganʼiona”. Kʼoati koasenkaoná tsanda ñá nga kuinóʼyá jotso je kjoatéxomale Jeobá.