1. 1) Jósʼín je chjota kʼianga bʼaile kjoafaʼaitsjen, kʼoa ánni. 2) Jósʼín jngo chjota xi ngʼakon kʼianga bʼaile kjoafaʼaitsjen.

JE CHJOTA kjaʼaí kjaʼaí sʼín kʼianga jme xi ʼmile. Tjínkʼa xi ngotjo sítjosonni kʼianga jme xi tsole jngo chjota xi ngisa ngʼa tíjnale, tonga tsín sítjosonle jngo chjota xi mangóson kʼoa tsa ngisa nangi tíjna tikʼoajinni je. Kʼoati kjaʼaí kjaʼaí satío kon kʼianga bʼaile kjoafaʼaitsjen. Tjínkʼa xi ba male, xi soa male, kʼoa tjínkʼa xi ñaki kao kjoatsjoa sítjoson jme xi ʼmile kʼoa kʼoasʼín jokji tje̱n bichó nganʼiole. Ánni nga kʼoamasíni. Jngo koya xi bʼetʼaná kui je kjoangʼatokon. Je kjoangʼatokon bʼénjiojin kjoafaʼaitsjenle chjota kʼoa kui xosíkao nga tsín sítjosonni kjoafaʼaitsjen xi bʼaile (Prov. 16:18).

2. Ánni nga ʼyachjísíñá je kjoafaʼaitsjen xi nroatʼa Énle Niná ñá xi chjotale Cristo maa.

² Ñá xi chjotale Cristo maa ʼyachjíñá je kjoafaʼaitsjen xi bʼainá, ngisa tsa ya Biblia yʼangini. Je kjoatéxomale Jeobá síchjinená nga̱ basenkaoná nga tsínkui tsaojiaan xi chʼao sikaoná. Jolani nga tsín to tao̱n nʼio kjuintjenngiaa, nga tsín kjoachajngi jtsaojiaan, nga tsín droga si̱koaa kʼoa nga tsín toxkia si̱koaa xán (Prov. 20:1; 2 Cor. 7:1; 1 Tes. 4:3-5; 1 Tim. 6:6-11). Kʼoa ndatjío ni̱ma̱ná nga̱ nitjosonñá je kjoatéxomale Jeobá (Is. 65:14).

3. Jósʼin chjénngilee jokisʼe kon je salmista.

³ Kʼianga tosi tonda miyole koaan je Nʼainá xi tíjna ngʼajmi tjínnele nga tosi tonda si̱tjosoán kjoatéxomale. Kʼoati katasʼe tokoán jokisʼe kon salmista, i kitso: “Kuenta sʼian tokʼia saʼndani je kjoatéxomali, nga̱ kui xi tsjoa bʼé ni̱ma̱na” (Sal. 119:111). A tsjoa sʼená nga nitjosoán kjoatéxomale Jeobá axo sakʼoa ñʼai maná. Kʼiatsa sakʼoa ñʼai maná nga nitjosoán alikui koa̱n si̱kinroajeen tokoán. Koaan kʼoakʼoé  tokoán nga kjoanda tsaanñá jmeni xi tsoná Jeobá. Janla koya kataʼyaa jme xi koasenkaoná.

4. Jméni xi kisʼin ngantsjai je David.

⁴ Je rey David sakʼoa nda tsakʼejna kʼoa sakʼoa mai, tonga ñaki je Jeobá kisinʼiotʼantsjai yaole. Kitso: “Ji Jeobá, ji bʼetsʼoale kao ngayeje ni̱ma̱na. Ninána, ji sinʼiotʼale” (Sal. 25:1, 2). Jmé xi tsakasenkao David kʼianga kʼoasikji nʼiotʼa koanni je Jeobá.

5, 6. Jótso Biblia, jókji miyo koanle David je Jeobá.

⁵ Nʼio nkjín chjota xi tokʼia bʼétsʼoale Niná nga kjoa tjínle. Tikjaʼaitsjenlai tsa jngo miyo tíjnali xi tokʼia nchja̱li tsa tao̱n kʼoa tsa jme xi machjénle. Chanjin kʼoasʼin si̱kjaʼaitsjain nga tsínni ñaki miyoli ma. Tonga je David alikui kʼoakisʼin. Jokji tse tsakʼejna tsakakó nga ñaki tsjoake koan je Jeobá kʼoa nga ñaki je kisinʼiotʼantsjai yaole kʼianga nda tsakʼejna kʼoa kʼianga mai (Sal. 40:8).

⁶ Je David i kitso kʼianga tsakʼasjejeya je Jeobá kʼoa nga kitsjoale kjoanda: “Ji Jeobá, Ninánajin, li tomakji jeya tíjna jaʼaínli jngo tjíjtsa sonʼnde, je kjoajeyali nʼio ngʼa tíjnale ngʼajmi” (Sal. 8:1). A machoyali jokji miyo koanle David je Niná. Je David ñaki tokʼoakoanle jokji jeya tíjna je Jeobá kʼoa kuinga tsakʼasjengʼasíni tsʼajnda nichxin (Sal. 35:28).

7. Jósʼin basenkaoná nga bʼetsʼoaa.

⁷ Tojo kisʼin David, kʼoati machjén nga ntsjaintsjai chja̱kaonajmiá je Jeobá ánni nga ngisa koa̱nnʼiotʼasíñá. Je Biblia itso: “Tichriantʼalao Niná, kʼia kʼoati je sichriantʼano nga jon” (Sant. 4:8). Kʼianga bʼetsʼoalee Niná ngisa machriantʼalee kʼoa tsjoáná je nganʼiotsjele (tʼexkiai 1 Juan 3:22).

8. Ánni nga tsín tikui tima én si̱chjénsíñá nga kʼoétsʼoaa.

⁸ Kʼianga bʼetsʼoalai Niná, a tikui tima én nichjénni ngantsjai. Kʼiatsa jaon, koaan títjon kjoanla tikjaʼaitsjen ngotjui jmeni xi meli kʼuínlai. Tobʼelañá, a nda sʼe̱le tsa jngo miyoná kʼoa tsa jngo xíngiaa tsa tikui tima én chja̱kaoñá ngantsjai nga tsaojiaan. Tsa kʼoasʼiaan chanjin likui tikjuinrʼoéniná. Kjoaixi nga tsín kʼoasʼin je Jeobá, likui kʼoasjengi je kjoabʼetsʼoale choʼndale xi kixi tjíofitʼale tsa ñaki kao ni̱ma̱le tjíobʼétsʼoanile, tonga machjén nga tsín tikui tima én si̱chjénñá nga chja̱koaa.

9, 10. 1) Jméni xi koa̱n kʼuínlee Jeobá kʼianga kʼoétsʼoalee. 2) Jméni xi koasenkaoná nga ngisa nda kʼoétsʼoalee Jeobá.

⁹ Tsa mená nga si̱chriantʼalee je Jeobá likuijin tsa to énkjitia chja̱koaa. Kʼianga ñaki ni̱ma̱ná kjuinroajinni xi kʼuínlee ngisa koa̱nchriantʼalee kʼoa ngisa koa̱nnʼiotʼaa. Jméni xi koa̱n kuixoán kʼianga kʼoétsʼoaa. Je Biblia itso: “Tojmenibe xi machjénno, tijélao Niná, tʼetsʼoalao, kʼoa tʼailao kjoanda. Kʼoasʼin katasʼejinle Niná jme xi nijáo” (Filip. 4:6). Koaan kʼoakuínlee Jeobá tojmeni xi kjimaná kʼoa tsa jmenije̱ xi bele tokoán nga chʼaosʼin sikʼéjnaná ngixko̱n.

¹⁰ Nʼio tse xi kuitsoyaná kʼiatsa chótʼayajiaan je kjoabʼetsʼoa xi tsakatío je choʼndale Niná xi faʼaitʼa ya Biblia (1 Sam. 1:10, 11; Hech. 4:24-31). Je libro xi tsʼe Salmos nʼio nkjín kjoabʼetsʼoa faʼaitʼa, kʼoati faʼaitʼa canción xi je Jeobá kijndale, jñani nkjín koya faʼaitʼa josatío tokoán, jolani nga nʼio ba maná kʼoa tsa nʼio tsjoa sʼená. Kʼiatsa chótʼayajiaan je kjoabʼetsʼoa jebi koasenkaoná nga ngisa nda kʼoétsʼoalee Jeobá.

11. Ánni nga machjénsíni nga si̱kjaʼaitsjenjiaan kjoafaʼaitsjen xi faʼaitʼa ya Biblia.

¹¹ Je David i kitso: “Je kjoatéxomale Jeobá ñaki kʼoatjín, síchjine je xi tsín nkjín kon” (Sal. 19:7). Ninga tsín jme xi maná, kʼiatsa si̱tjosoán kjoatéxomale Niná chjine koaan. Tonga ya Biblia faʼaitʼa kʼa kjoafaʼaitsjen xi tjínnele si̱kjaʼaitsjenjiaan kʼiatsa mená nga kixi koanngíntʼalee Jeobá kʼianga kjoa kuitjátojiaan. Tobʼelañá, kʼiatsa si̱kjaʼaitsjenjiaan kjoatéxomale Jeobá kixi koanngíntʼalee kʼianga che̱n sa̱tíobasenná ya ndʼiaskuela kao ya tʼaxáná. Kʼoati koasenkaoná nga si̱tjosoán kjoatéxomale Niná xi tʼatsʼe njín kʼoa nga tsín kjoa polítika kuinójiaan yaoná. Basenkaoná nga maná chjoejiaan jokjoan najño xi chʼakjá kʼoa josoyoaa. Kʼianga koa̱nchoyaná josʼin síkjaʼaitsjen Niná xi tʼatsʼe jebi, koasenkaoná nga tongini kuiyondaa josʼiaan kʼiatsa kui kjoa kuitjátojiaan kʼoa nga tsín kjoa jtsaojiaan (Prov. 15:28).

12. Jmé kjoachjonangi xi si̱kjaʼaitsjenjiaan kʼianga si̱tjosoán je kjoatéxomale Jeobá.

¹² Nga tichoyalee nga kuitjoson jmeni xi tso je Niná, a tibakoñá nga ninʼiotʼaa yaoná je Niná kʼoa a tje̱nyatokon tiyoaa. Tobʼelañá, a ñaki makjainná nga jeme si̱kjeson je Babilonia xi nʼioje. A ñaki makjainná nga sʼe̱ kjoanichikontʼain nichxin xi sʼa nroa, jolani nga i̱ kuiyoaa ngantsjai nichxin i̱ Sonʼnde kʼianga ʼndenaxó jekoa̱n, a tojo kʼoasʼin makjainná josʼin koankjainná nga sʼa kichotʼayá. A tojo kao kjoatsjoa ʼmiyasoán, kʼoa a tsín bʼaiʼndee nga jme xi bʼéchjoaná nga nixálee Niná. A tojo chjí ʼyatokoán je kjoachoya xi tjínná xi tʼatsʼe kjoafaʼáya, nga kuitjotsje jaʼaínle Jeobá kʼoa nga jchale nga toje xi tiʼndele nga koatexoma. Kʼiatsa si̱kjaʼaitsjenjiaan kjoachjonangi jebi koasenkaoná nga “kuenta sʼia[a]n tokʼia saʼndani” je kjoatéxomale Jeobá (Sal. 119:111).

13. Ánni nga tjínkʼasíni jmeni xi tsín koanjinle je chjotale Cristo. Jngola choa̱ tʼejnai.

¹³ Tsakui nichxin tjínkʼa jmeni xi tsín majinyejená kʼianga bʼexkiaa je Biblia nga̱ kje bichójin nichxin nga sikʼéjnatsen je Jeobá. Je Jesús nkjín kʼa kʼoakitsole je pastrole nga kjoañʼai kjoaʼa kʼoa nga kuiyá (tʼexkiai Mateo 12:40 kao 16:21). Tonga je pastrole alikui koanjinle. Kʼiaa saʼnda koanjinle kʼianga jejaʼáyale Jesús kʼoa nga jetsakakóle yaole nga̱ kʼiaa “kiskoʼaiʼndele kjoafaʼaitsjenle, jméni nga koa̱nchoyasínile xi tjíotʼa xo̱n Escritura” (Luc. 24:44-46; Hech. 1:3). Kʼoati tsín koanjinle nga ya ngʼajmi tje̱n koatexomani je Chjotaxále Niná, kʼiaa saʼnda koanjinle nga jetsakʼaile nganʼiotsje kʼianga kisʼejna sʼuí Pentecostés nga nó 33 (Hech. 1:6-8).

14. Kʼianga tosʼa tífitsʼia siglo XX, jmé choa̱ xi nʼio nda kisikatíoná je ndsʼee kʼianga tsínni kitjoson jme xi kiskoyale.

¹⁴ Kʼianga tosʼa tífitsʼia siglo XX, je chjotale Cristo kʼoati tsín nda koanjinle jmeni xi koa̱n nichxin xi totífikjetʼa (2 Tim. 3:1). Tobʼelañá, kʼianga nó 1914 tjínkʼa xi kʼoasʼin koankjainle nga tiʼakʼia koaini ya ngʼajmi. Kʼoa kʼianga tsín kitjoson jme xi tjíokoyale, ijngokʼa nʼio nda kiskotʼayajin je Énle Niná kʼoa kʼiaa tsabe nga tjínnele kʼuínyason je énnda chjotse (Mar. 13:10). Kuinga je Joseph F. Rutherford, xi tíbándiaa xále Niná nga kʼia, i̱ kitsosíni nga kisʼejna kjoajtíntse ya Cedar Point (Ohio, Estados Unidos) kʼianga nó 1922: “!Koeni, je Rey jetíbatéxoma! Kʼoa jonño xi koanngíkaoson én. Kuinga, kʼoatixónsíño,  kʼoatixón, kʼoatixón nga jetíbatéxoma je Rey”. Saʼnda nga kʼia, kui xi nʼio ʼyanile je testigole Jeobá nga kʼoasʼin tsoyason je “énnda xi tʼatsʼe kjoatéxomale ngʼajmi” (Mat. 4:23; 24:14).

15. Jósʼin basenkaoná nga nikjaʼaitsjenjiaan josʼin tíbasenkao Jeobá naxinandále.

¹⁵ Kʼianga nikjaʼaitsjenjiaan josʼin tsakasenkao Jeobá naxinandále nichxin kjoatse kʼoa josʼin tíbasenkao ndʼaibi ngisa makjainná nga ñaki kuitjoson jmeni xi tso tʼatsʼe nichxin xi sʼa nroa. Je kjoatéxomale Jeobá kʼoati basenkaoná nga ñaki kao kjoatsjoa choyalee nga kuitjoson jmeni xi tongini kitso Jeobá kʼoa ñaki makjainná nga kʼoakoa̱n.

16. Jmé kjoanichikontʼain xi sʼená kʼianga ñaki kao ni̱ma̱ná nixánilee Jeobá.

¹⁶ Je Jeobá Nináná nʼio tjínle nganʼio kʼoa nʼio síxá. Je salmista i kitso: “ʼYáni xi kʼoakji nganʼio tjínle joni ji Jah. Je ndsai nʼio taja, ngakixili tíbitjongʼa” (Sal. 89:8, 13). Je Jeobá alikʼia nga jyó tíjna, kʼoa nʼio bechjí jmeni xi nʼia xi totʼatsʼe Chjotaxále. Bení nga nʼio nixá xi choʼndale maa, xi xʼin, xi yánchjín, xi xti kao xi jejchínga, alikui tojyó tiyoaa (Prov. 31:27). Jé Jeobá chjenngilee kʼoa nʼio nixá xi tʼatsʼe. Nʼio nda sʼe tokoán nga ñaki kao ni̱ma̱ná nixánilee Jeobá, kʼoa je Jeobá kʼoati nʼio nda sʼele nga síchikontʼain je xá xi tinʼia (tʼexkiai Salmo 62:12). *

17, 18. Ánni nga kʼoabixónsíñá nga ngisa manʼiotʼaa Jeobá kʼianga bakoá kjoamakjainná. Jngo choa̱ tʼejnai.

¹⁷ Jósʼin manʼiotʼasaa Jeobá kʼianga  bakoá nga tjínná kjoamakjain. Si̱kjaʼaitsjenla jme xi jaʼatojin je chjota israelita nga sʼa jaʼasʼen ya ʼNde jña tsakʼinle nga kʼoaile. Je Jeobá kʼoakitsole je naʼmi xi yʼa je kaxa̱ jña kixinya je kjoa xi kisʼendajin nga katafi saʼnda nga kuichokinyájin ndso̱ko̱ xongá Jordán. Tonga nga kicho je chjota israelita, je xongá ñaki jenʼio koanje, nga̱ kui kjibʼa je jtsí xi bʼa nga cha̱nndoá. Jókisʼin je chjota israelita. A yaa tsakationdai xongá kʼoa a kiskoya jotjín xomana saʼnda nga jaʼajen je nandá. Mai, jé Jeobá kisinʼiotʼa yaole kʼoa kisitjoson jme xi kitsole. Jókoan. Je Biblia kʼoatso nga xi jetsakinyajin nandá je naʼmi xi yʼa kaxa̱ jña kixinya je kjoa xi kisʼendajin, je nandá alikui tijaʼani kʼoa jña nya je naʼmi, ya ngabasenle xongá, kixí koanchon josaʼnda nga jaʼato je naxinandá Israel (Jos. 3:12-17). Nʼiojin tsjoa koanle kʼianga tsabe nga kisatechjoale je nandále xongá. Ngisajin tikoantajangáni kjoamakjainle xi kao Jeobá. Kuinga koantajani kjoamakjainle nga̱ kisitjoson jme xi kitsole Jeobá.

¹⁸ Kjoaixiní nga tsín tikjoaxkón batíoni ndʼaibi je Jeobá kʼianga basenkao choʼndale, tonga síchikontʼain jmeni xi nʼia nga nixálee. Kui nganʼiotsjele síchjén nga tsjoánganʼioná kʼianga ʼmiyasoán je énle jngo tjíjtsa Sonʼnde. Kʼoa Jesucristo, je xi títjon Testigole Jeobá, kʼoakitsole chjotale nga koasenkao kʼianga kuitsoyason. Kʼianga jejaʼáyale i kitsole: “Tangíon, tinyaʼao ngatsʼi naxinandá, tikinjao chjota tʼatsʼan [...]. Koeni an tijnakaono nga jon ngantsjai nichxin, saʼnda nga kjoetʼa sonʼndebi” (Mateo 28:19, 20). Nʼio nkjín testigole Jeobá, xi tsín nanda tso kon tsakai nga fákao chjota, tonga tjíobe nga je nganʼiotsjele Jeobá tsjoále kjoanʼiojin (tʼexkiai Salmo 119:46 * kao 2 Corintios 4:7).

19. Jméni xi tsín jao katasʼená ninga tsín tinanda kʼoamaniná nga nixálee Jeobá.

¹⁹ Tjín kʼa je ndsʼee kao tichjaa xi tsín tinanda kʼoamanile nga síxále Jeobá nga chʼin tjínle kʼoa tsakuije̱ nga jejchínga. Tonga koaan kʼoakʼoe kon nga je “Nʼai[ná] xi tsʼe kjoamatakon, kʼoa Niná xi tsʼe ngayije kjoanijetakon” be josʼin tiyoaa nga jngó jngoá (2 Cor. 1:3). Je Jeobá bechjí ngayeje jmeni xi nʼia kʼianga nixálee. Alikui si̱chajiaan nga je xi kuitjontjainilee yaoná kuinga sʼe̱ná kjoamakjain tʼatsʼe kjoabʼechjíntjaile Cristo kʼoa nga kʼoasʼiaan jokji tje̱n bichó nganʼioná nga si̱xálee (Heb. 10:39).

20, 21. Jósʼin koakoá nga ninʼiotʼaa je Jeobá.

²⁰ Nga ʼyaxkoán je Jeobá kui xi tsonile nga nichjén je nichxinná, tsojmi xi tjínná kao nganʼioná jokji tje̱n kʼoamaná. Kʼoa mená nga ñaki kao ni̱ma̱ná si̱tjosoán je xále nga kʼuínyasoán je énle (2 Tim. 4:5). Tsjoa sʼená nga binyakoaa xíngiaa nga katabe jokjoantjínni xi tʼatsʼe Niná (1 Tim. 2:4). Kʼianga ʼyaxkoán kʼoa chʼasjengʼaa je Jeobá nda biyoaa ngixko̱n (Prov. 10:22). Kʼoa jebi kui xi basenkaoná nga ngisa ninʼiotʼaa Niná (Rom. 8:35-39).

²¹ Tojosʼin tiʼyaa, kʼianga koa̱nkjainná nga nʼio ndasʼin tíbándiaaná je Jeobá machjénní nga kʼoétsʼoalee, nga si̱kjaʼaitsjenjiaan josʼin kisitjoson énle nichxin kjoatse kʼoa josʼin sitjoson nichxin xi sʼa nroa. Kʼoati machjén nga koakoá nga tjínná kjoamakjain. Kʼiatsa si̱tjosoán jme xi síkjaʼaitsjenjinná Jeobá kuiyoñá tokʼia saʼndani.