1, 2. 1) Jóma kʼianga nikjaʼaitsjeen tʼatsʼe jngo miyoná kʼoa nokjoañá xi tʼatsʼe. (Chótsenlai sén xi faʼaitʼa ibi.) 2) Jmé tʼatsʼeni xi chótʼayá i̱ kjoaʼmiya jebi.

KʼIANGA nikjaʼaitsjeen tʼatsʼe jngo miyoná kʼoa nokjoañá xi tʼatsʼe ngisa nʼio mamiyosaa. Kʼoakjoánti maa xi kao Jeobá. Kuilakji je David kʼianga kiskoʼnda cho̱ nga sʼa xti, nʼio nkjín kʼa nga tsabe nga kijna fate fate je niño ya ngʼajmi kʼoa kisikjaʼaitsjenjin jokji nganʼio tjínle je Niná, i kitso: “Kʼianga kotsen jochon ya ngʼajmi, je xi ndsai kinindani, je sá kao je niño xi ji kinindai, ʼyáni je chjotasonʼnde kʼianga kuenta tinʼiani, kʼoa ʼyáni je chjota nga kʼoasʼin nikuindani” (Sal. 8:3, 4). Kʼoa je pastro Pablo kʼianga kinchja̱ni tʼatsʼe josʼin kisitjoson Jeobá jmeni xi tjínndajinle xi tʼatsʼe je chjotale Cristo xi ya koai ya ngʼajmi i kitso: “Li tokʼoakji tse tjín kjoachjinele kao kjoaʼisentakonle Niná” (Rom. 11:17-26, 33).

² Kʼianga ʼmiyasoán nikjaʼaitsjenñá xi tʼatsʼe Jeobá kʼoa nokjoañá xi tʼatsʼe. Kʼianga kʼoanʼia ngisa mamiyosaa je Jeobá. Nʼio nkjín xi precursor sʼin tjíosíxá xi tjíobe nga ngisa kjimatsjoakesa je Niná kʼianga kʼoasʼin nʼio tjíotsoyason. Kʼiatsa jekʼoasʼin tinixái kʼoa tsa tosʼa tibʼenelai yaoli nga kuichotjenngi kjoanda jebi, tikjaʼaitsjenjin jósʼin koasenkaoli nga ngisa koa̱nmiyosai je Jeobá kʼianga ngisasa tse nichxin kʼuínyasuin. Kʼiatsa jekʼoasʼin tinixái koaan chjónangilai yaoli: “Jmé xi koasenkaona nga tosi tonda precursor koa̱n”. Kʼiatsa kje kʼoasʼin tinixájin koaan chjónangilai yaoli: “Jmé xi koasenkaona nga precursor sʼin sixá”. Chótʼayajinla kʼaa josʼin mamiyosaa je Niná kʼianga precursor sʼin nixá.

3. Jósʼin basenkaoná kʼianga nokjoañá tʼatsʼe je kjoanichikontʼain xi kjoaʼaíkao je Chjotaxále Jeobá.

³ Ngisa machriantʼasalee je Jeobá kʼianga nokjoañá tʼatsʼe je kjoanichikontʼain xi kjoaʼaíkao je Chjotaxále. Jmé testo xi  ngisa nichjain kʼianga ʼmiyasuin. Tochale kui nichjain Salmo 37:10, 11; Daniel 2:44; Juan 5:28, 29 kʼoa tsakuije̱ Apocalipsis 21:3, 4. Kʼianga ʼmiyalee je chjota jmeni xi tso testo jebi kʼoati faʼaitsjenná tsanda ñá nga “ngayije xi kjoanda” kao “ngayije kjoatjao xi ñaki nda” yaa tínroani tʼatsʼe je Nináná Jeobá. Kʼoa jebi ngisa basenkaoná nga machriantʼasalee (Sant. 1:17).

4. Kʼianga ʼyaa josʼin tjío je chjota nga tsín ñaki tsjoa tjíole kʼoa nga tsín jme kjoachoya tjínle, ánni nga ngisa chjí ʼyasíñá je kjoanda xi bakóná Jeobá.

⁴ Ngisa chjí ʼyaa je Énle Niná kʼianga ʼyaa nga tsín ñaki tsjoa tjíole je chjota xi tsín kotʼaya kʼoa nga tsín jme kjoachoya tjínle. Je chjota xi tsín kotʼaya Énle Niná alikui tjíoʼmiyale jmeni xi sʼin nga ñaki nda koatio. Nʼio nkjín xi makjaojinle josʼin koatio nichxin xi nroaján kʼoa lijme kjoachoya tjínle. Mele skoe̱ jmé xá tjíoni i̱ Sonʼnde tonga saʼnda tsín be jotso je Énle Niná, ninga je chjota xi nʼio sísin ya relijiónle. Yaa mangósonkao je chjota xi tsakatio nichxin kjoatse ya naxinandá Nínive (tʼexkiai Jonás 4:11). * Kʼianga ngisasa tse nichxin nikʼayaa nga ʼmiyasoán ngisa ʼyaa nga tsín mangóson josʼin tiyoaa ñá ngixko̱n Niná kʼoa josʼin tjío je chjota xi tsaojiaan nga ʼmiyasoán (Is. 65:13). Tonga je Jeobá ali tsa tojejin choʼndale xi títsjoále jmeni xi machjénle nga nda koatio ngixko̱n, kʼoati tíbasenkao toʼya chjotani xi mele kʼoa jngo kjoachoya tísíkʼéjnabasenle (Apoc. 22:17).

5. Kʼianga ʼmiyalee Énle Niná je chjota, jósʼin tsjoánganʼioná kʼianga kjoa bitjatojiaan.

⁵ Kʼianga ʼmiyalee Énle Niná je chjota, basenkaoná nga tsín nʼio nikjaojiaan je kjoa xi kʼoati bitjatojiaan tsanda ñá. Jngo precursora xi Trisha ʼmi ñaki tsabe nga kʼoama kʼianga kitsjion xínkjín je xijchále. Tichjaa jebi kʼoatso nga nʼioxó kisikjaojin kjoa jebi. Ñandiaxó kʼianga nʼio ba tjínle kʼoa mexóle tosikjáya tsakai, tonga tosaxó estudio kitsjoále jan xtiʼndí xi nʼio tse kjoa tjíofaʼatojin. Je nʼaile xtiʼndí jebi tokʼoaxósʼin kitsjionkon, kʼoa je ti xi majchínga totaonxó tsabe je xtiʼndíndsʼe̱. Je tichjaa jebi itso: “Ngisani nʼio tse kjoa tjíofaʼatojin xtiʼndí jebi tikʼoajinni an. Kʼianga kixinyale Énle Niná ñaki tsʼantjaiya sénle kʼoa ñaki tsjoa koanle. Nʼio kitsjoanganʼiona nga kui nichxin je xtiʼndí jebi, jejin kisichjén Jeobá nga tsakasenkaona”.

6, 7. 1) Jósʼin matajasa kjoamakjainná kʼianga ʼmiyalee Énle Niná je chjota. 2) Jósʼe tokoán xi tʼatsʼe kjoachjine xi tsjoá Niná kʼianga ʼyaa josʼin bʼantjaiya je chjota xi bakoyalee.

⁶ Ngisa matajasa kjoamakjainná kʼianga ʼmiyaa je Énle Niná. Kʼianga nichxinle Pablo tsakatio kʼa chjota judío xi tsakakóya tʼatsʼe Niná, tonga chjota jebi alikuini kisitjoson jmeni xi kitsoya. Je Pablo i kitso xi tʼatsʼe chjota jebi: “Jiʼni xi bakoyalai xi kjaʼaí, a tsín ʼmiyalai yaoli” (Rom. 2:21). Tonga nichxin xi tiyoaa ndʼaibi, je xi precursor sʼin tjíosíxá nʼio nda choa̱ tjíobatío. Xíngiaa jebi ngisa nkjínsa chjota bakóyale Énle Niná. Tonga tsa mele nga nda koakoya, tjínnele nga tongini skótʼaya jmeni xi kuitsoya nga ñandia ñandia, kʼoa sakʼoa machjén nga batiotsʼinya jmeni xi kjonangile chjota. Jngo precursora xi Janeen ʼmi itso: “Kʼianga ñandia ñandia xinyale chjota Énle Niná ngisa nda sʼeya jkoa tsanda an kʼoa ngisa bichókajin ni̱ma̱na. Kʼoa yaa nroani nga sa mataja sa mataja je kjoamakjainna”.

⁷ Ngisa chjí ʼyatokoán je kjoachjine xi tsjoá Niná kʼianga ʼyaa josʼin bʼantjaiya je chjota xi bakoyalee nga sítjoson je kjoafaʼaitsjen xi faʼaitʼa Biblia (Is. 48:17, 18). Tonga kʼoati basenkaoná tsanda ñá nga tosi tonda si̱tjosoán jmeni xi tso je Biblia. Kʼoati bixoán jokitso jngo precursora xi Adrianna ʼmi. I kitso: “Kʼianga to kjoafaʼaitsjenle fini chjota, sakʼoa ñaki tokjoa batiojin. Tonga kʼianga kui fitje̱nngi je kjoachjine xi tsjoá Jeobá, kjitʼanangi bʼantjaiya kʼoa ngisa nda batio”. Kʼoa jngo precursor  xi Phil ʼmi kʼoati i̱ tso: “Ñaki tiʼbeña josʼin tísíkʼantjaiya Jeobá je chjota xi jekjoatse mele sikʼantjaiya yaole tsakai”.

8. Jósʼin basenkaoná kʼianga ñatje̱n ʼmiyasoán kao je ndsʼee kʼoa kao tichjaa.

⁸ Ngisa tjonganʼioná kʼianga ñatje̱n ʼmiyasoán kao je ndsʼee kʼoa kao tichjaa (Prov. 13:20). Mani nga ngisa tse nichxin tsoyason je xi precursor ma, ngisa nkjín ndsʼee kao tichjaa xi ñatje̱n fitsoyason. Tsjoánganʼiole xi ngikʼa, tonga kʼoati bʼainganʼiole tsanda je (Rom. 1:12; tʼexkiai Proverbios 27:17). * Jngo precursora xi Lisa ʼmi itso: “Ya jñani sixá ñaki maxinkonke xínkjín chjota kʼoa ñaki tojmeni xi sʼín tojoni nga ngisa ngʼa koatiole xínkjín. Nyaon nyaon sʼe énndiso kʼoa tokjaʼaíngá tso éntsʼen xi síchjén chjota”. Je tichjaa jebi itsosa: “Sakʼoa kjoasoa síkatíojinná kʼoa besinná josʼin mangínkoaa yaoná xi choʼndale Niná maa. Tonga kʼianga ñatje̱n fixinyasoan kao je ndsʼee kʼoa kao tichjaa ñaki tjonganʼiona. Ñaki tsjoa tjínna nga bichoña niʼyana nga jemaxon, ningalani nʼio kabijtana”.

9. Jósʼin sʼejna je kjoabixanle xi jechixán kʼianga precursor sʼin síxá nga jao.

⁹ Ngisa nʼio sʼejna je kjoabixanle xi jechixán kʼianga precursor sʼin síxá nga jao (Ecl. 4:12). Je tichjaa xi Madeline ʼmi xi precursor sʼin tjíosíxá kao xʼinle itso: “Je xʼinna kʼoa kao an ñaki kui chobayanijin je kjoanda xi sokónajin nga ʼmiyasuinjin kʼoa tsakuije̱ jmeni xi machoyanajin kʼianga bʼexkiaijin je Biblia xi machjénnajin kʼianga bakoyasuinjin. Nga jngó jngó nó faʼato nga precursor sʼin tinixáijin, kjimachriantʼasalaijin xíngijin”. Kʼoa je tichjaa xi Trisha ʼmi kʼoati i̱ tso: “Alikui tao̱n chobatiyanijin nga̱ kʼoasʼin tjínndajinnajin nga tsín tao̱n kjoéntʼainjin yaonajin. Kʼoa nga tikuini nichxin bitjuijin nga ʼmiyasuinjin, ñatje̱n mangínnijin nga mangínchonlaijin je chjota xi bʼailaijin estudio kʼoa kao xi tosʼa mangínchon ijngokʼalaijin. Kui  jebi xi tíbasenkaonajin nga kjimachriantʼasalaijin xíngijin kʼoa kao je Niná”.

10. Jméni xi ma kʼianga ʼyaa josʼin basenkaoná je Jeobá kʼoa josʼin tsjoáná jmeni xi nijélee kʼianga kui títjon nikʼéjnaa je xá xi tsʼe.

¹⁰ Ngisa manʼiotʼasaa je Jeobá kʼianga kui títjon nikʼéjnaa je xá xi tsʼe, kʼianga ʼyaa josʼin basenkaoná kʼoa josʼin tsjoáná jmeni xi nijélee. Kjoaixiní nga ngatsʼi xi je Jeobá síxále bení nga basenkao kʼoa tosi tonda sínʼiotʼa. Tonga je xi precursor sʼin tjíosíxá bení nga tjínnele sinʼiotʼa yaole je Jeobá tsa mele nga tosi tonda precursor koa̱n (tʼexkiai Mateo 6:30-34). Jngo ndsʼee xi Curt ʼmi precursor sʼin tísíxá kʼoa sakʼoa je fingajaole je superintendente xi tsʼe circuito. Je ndsʼee jebi ñandia kʼoatsakʼinle nga jngo jtín koaisíxatʼa xi jao ora basenla kjin tíjna. Tonga tochoasa gasolina nyale je karrole, tokui xi kuichoni ya jtín jña koai, kʼoa ngi jinla nichxin cha nga koa̱nchjíle ya tʼaxále. Chan kʼoasʼin kisikjaʼaitsjen tsa tsínni nda kisʼin nga koanjyole nga ya koai jtín jebi. Tonga tsakʼétsʼoale Jeobá kʼoa ki, kʼoa jé kisinʼiotʼa nga tsjoále jme xi koa̱nchjénle. Kʼianga toje tjíofi jngo tichjaa kinchja̱le teléfono xi kʼoakitsole nga tjín xi tsjoále. Jmé xi kitsjoale. Tao̱n kitsjoakjoatjaole kʼoa kʼoakjoantjín kitsjoale jotjín chatʼasale nga koa̱n koai. Je ndsʼee jebi itso: “Kʼianga kjitʼa kʼoamatʼeen ñaki ʼyañá nga je Jeobá xi basenkaoná”.

11. Jmé kjoanichikontʼain xi tjíosʼele je xi precursor sʼin tjíosíxá.

¹¹ Je xi precursor sʼin tjíosíxá kʼoatso nga tse kjoanichikontʼain tjíosʼele nga kʼoasʼin tosi tonda tjíosíchriantʼale Niná kʼoa nga tsesa tjíosíxále (Deut. 28:2). Ninga kʼoalani, kʼoati sakʼoa ñʼai male. Ánni. Kuinga kʼoati kjoa faʼatojin ngatsʼi je choʼndale Niná xi totʼatsʼe nga kʼoasʼin tsakajngijée je Adán. Tjíokʼa ndsʼee kao tichjaa xi síkatío choatse je xá xi tsʼe precursor kʼianga jme kjoa faʼatojin. Tonga alikui kʼoakoa̱n tsa tongini si̱kjaʼaitsjeen josʼiaan. Kʼoa ninga jekjoa tibitjatojiaan sakʼoani ma sʼendajin ánni nga tsín si̱kʼéjnasíñá xá jebi. Jmé xi koasenkao je xi precursor sʼin tjíosíxá nga tosi tonda kʼoasʼin sixá.

12, 13. 1) Jmé xi koa̱n sʼin tsa jngo precursor xi ñʼai kjimale tíbichótjenngi jotjín ora tjínnele kuitsoyason. 2) Ánni nga tjínnesínile nga nyaon nyaon kʼoéxkiaa Biblia, nga kjitʼa chótʼayá kʼoa nga si̱kjaʼaitsjenjiaan jmeni xi chotʼayá.

¹² Me ngatsʼi je precursor nga tse xá tjínle. Tsakui nichxin ñʼai male nga bitjosonle ngayeje xá xi tjínle. Kuinga tjínnesínile nga nda kʼoendajin josʼin sichjén nichxinle (1 Cor. 14:33, 40). Jmé xi koa̱n sʼin tsa jngo precursor xi ñʼai kjimale tíbichótjenngi jotjín ora tjínnele kuitsoyason. Koaan sikjaʼaitsjenjin josʼin tísíchjén je nichxinle (Efes. 5:15, 16). Koaan skónangile yaole: “Jókji tse nichxin sikʼayale nga tobʼetsaojian. A koaan kʼoendajian josʼin sichjén nichxinna. A koaan kʼoendajian jokji tse sixá”. Ngatsʼiñá nga ʼyaa nga sakʼoa totjín totjenni xi tse nichxin fáʼaná. Kuinga nʼio machjénsíni nga je xi precursor sʼin tjíosíxá nga kjitʼa sikjaʼaitsjen josʼin tjíosíchjén nichxinle kʼoa nga kʼoendajin jmeni xi koa̱n sʼin.

¹³ Je precursor kʼoati tjínnele nyaon nyaon kʼoexkia Biblia, nga kjitʼa skótʼaya kʼoa nga sikjaʼaitsjenjin jmeni xi kotʼaya. Machjénní nga katamale josʼin koatekjáyale yaole nga tsín totjín totjenni kjoa xi kjoaʼale nichxinle kʼoa nga tosa kui kʼoasʼin josʼin tjínndajinle (Filip. 1:10). Cha̱niyala jkoaa jngo precursor xi kabʼajndale nichxin nga katsoyason. Xi jebichó niʼyale, kui mele skótʼaya xi kjoaʼa ya kjoajtín. Tonga ʼndele nga kui títjon kʼoasʼin, kuikjoanla bʼéxkia tsa jme xo̱n kabichóle. Xijema, sa kui computadorale bʼétʼaʼíngále nga kotʼa tsa jme correo kabichóle, kʼoa kʼoati síkasén tsanda je. Xijema, sa kui kotsenngále tsa jengisa choa chjíle jngo tsojmi xi mele koatse. Toʼima jejao ora tíjnatʼale computadorale nga be, kʼoa saʼnda kjeni kotʼayajin xi kjoaʼa ya kjoajtín. Ánni nga kʼoamasíni. Si̱kjaʼaitsjenla je chjota xi ñaki kui xále nga síská. Kʼiatsa mele nga tosi tonda siská tjínnele sikuinda yaole.  Kʼoa kʼoakjoánti tjínni xi tʼatsʼe je precursor, kʼianga tosi tonda kʼoasʼin sixále Niná, tjínnele nda kʼoendajin josʼin skótʼaya Énle Niná nga̱ kui xi tsjoánganʼiole (1 Tim. 4:16).

14, 15. 1) Ánni nga machjénsíni nga tokatamanile josʼin sijchá yaole je precursor. 2) Jmé xi tjínnele sʼin jngo precursor kʼianga sakʼoa kui kjoaʼatojin kjoa xi ñʼai tjín.

¹⁴ Je ndsʼee kʼoa kao tichjaa xi tse chókjoale nga precursor síxá, tomanile josʼin síjchá yaole. Je Jesús kʼoakitsole je chjotale nga kui títjon katasíkatío xi tʼatsʼe Niná (Mat. 6:22). Kʼianga tsakʼejna je Jesús i̱ Sonʼnde tokoannile josʼin kisijchá yaole ánni nga tsín jme xi tsakatéchjoasínile nga kitsoyason. Kʼoa kuinga i̱ kitsosíni: “Je ni̱nda̱ tjínle ngijao, kʼoa je nise xi símangʼa tjínle tjé, tonga je ʼndíle chjota tsínle ʼndejin jña sikjáya” (Mat. 8:20). Je precursor xi kui choa̱le Jesús fitje̱nngi tjínnele sichoyale yaole nga ngisa tse nichxin kjoaʼale tsa nkjín tsojmi sʼe̱le, nga̱ nichxin fikao nga makuinda je tsojmi.

¹⁵ Je ndsʼee kʼoa kao tichjaa xi precursor sʼin síxá, bení nga tsín tsa totsʼejin nganʼio nga tjínle kjoanda jebi. Bení nga tʼatsʼe Niná tínroani tojme xá xi tjíosʼín xi tʼatsʼe. Kuinga tjínnesínile nga ñaki je Jeobá sinʼiotʼa yaole kʼiatsa mele nga tosi tonda sʼe̱le kjoanda jebi (2 Cor. 4:7). Kjoaixi nga toxá sakʼoa kjoaʼatojinni kjoa xi ñʼai koa̱nle (Sal. 34:19). Tonga nga kui kjoa kjoaʼatojin tjínnele koasjai je ndiaale Jeobá. Machjénní nga tsjoáʼnde nga je Jeobá katabasenkao, ʼndele nga kui sikʼéjna je xá xi tsʼe precursor (tʼexkiai Salmo 37:5). * Kʼianga skoe̱ josʼin koasenkao je Nʼainá xi tíjna ngʼajmi, ngisa koa̱nchriantʼasale (Is. 41:10).

16. Jmé xi tjínneli xi sʼiain kʼiatsa meli nga precursor koai̱n.

¹⁶ Kʼiatsa meli nga kʼoati sʼe̱li je kjoanichikontʼain xi sʼele je xi precursor sʼin síxá, tʼeyanajmílai je Jeobá (1 Juan 5:14, 15). Chja̱kao kʼai je xi jekʼoasʼin tjíosíxá. Tʼendajin jósʼin nga koa̱n precursor sʼin si̱xái. Kʼoakisʼin je ndsʼee xi Keith ʼmi kʼoa kao Erika, xi chjoónle ma. Nga jao ñaki nyaon nyaon síxá tsakai bʼajnda nichxin. Kʼoa nga chriankʼia chixán jngo niʼya kʼoa jngo karro chjotse tsakatse. Itso nga jao: “Kʼoasʼin kinikjaʼaitsjainjin nga kui xi tsjoa kʼoe tokuinjin, tonga toxitsjoani”. Kʼianga tsakichonsje jñani síxá je ndsʼee jebi, tosa precursor auxiliar koan, kʼoa itso: “Ijngokʼa ñaki tsjoa kisʼena nga kixinyasoan nga precursor koan”. Kʼoa yaa kisimiyo jngo ndsʼee kʼoa kao chjoónle xi kʼoati precursor sʼin tjíosíxá nga jao. Kʼoa nʼio tsakinyakao nga koanchoyale nga nʼio tse kjoatsjoa sokóná nga tomaniná josʼin nijchá yaoná kʼoa nga precursor sʼin nixá. Jmé xi kisʼin je Keith kʼoa kao Erika. Itso: “Jngo xo̱n kichjitʼaijin josʼin menajin si̱xásalaijin je Niná kʼoa yaa tsakjatʼaijin refrigerador, kʼoa kjoan tsakʼechoa̱níjin jñanile xi jetibichotjenngijin”. Kʼoa xijekoanni, kui jebi xi tsakasenkao nga precursor koan nga jao.

17. Jmé kjoanda xi so̱koli kʼiatsa precursor koai̱n.

¹⁷ A kʼoati koa̱n precursor sʼin si̱xái. Jméni xi koa̱n sʼiain kʼiatsa bele tokuin nga kjesa kʼoakoa̱njinli nga kʼoasʼin si̱xái. Tʼenelai yaoli jokji tje̱n kuicho nganʼioli nga ngisa tse kʼuínyasuin. Kʼiatsa kʼoasʼiain, ngisa koa̱nchriantʼalai je Jeobá. Tʼetsʼoalai je Jeobá nga katabándiaali kʼoa nda tikjaʼaitsjenjin jmeni xi koa̱n sʼiain. Tsakuini nichxin jchai nga tokuini xi tjínneli sʼiain nga nda kʼoéndajin josʼin tinichjain nichxinli kʼoa josʼin tinijchái yaoli. Kʼiatsa koa̱n nga precursor koai̱n ngisa nʼio chjíle je kjoatsjoa xi sʼe̱li tikʼoajinni tsa jmeni xi ni̱kʼéjnai nga kʼoasʼin si̱xái. Ñaki jchaní jokji tsjoa sʼe tokoán nga ngisa tse nichxin nikʼayalee je xále Niná kʼoa nga binyakoaa chjota, tikʼoajinni jokji tsjoa maná nga kʼoanʼia je xi toñá mená (Mat. 6:33). Ngisa tse nichxin sʼe̱li nga si̱kjaʼaitsjain xi tʼatsʼe Jeobá kʼoa nga kuinókjoani xi tʼatsʼe. Kʼoa kui xi koasenkaoli nga ngisa nʼio koa̱ntsjoachasai je Jeobá kʼoa nga kjoáyatsjoai ni̱ma̱le.