Jeme tjóxin je kjoachjaʼatokon
Cha̱niyalai jkui tsa tsín tijme kjoachjaʼatokon tjínni jñani tijnai, tsa tsín kjoatsʼen, kjoajchán, chʼin, kʼoa tsín jme kjoaxkón faʼaine chjota. Tikjaʼaitsjenlai tsa nyaon nyaon kʼianga bisotjain lijme kjoanikjaojin tjínli xi tʼatsʼe tao̱n, liʼya xi tibʼasjengini xínkjín, kʼoa tsín tiʼya xi totaon skoe̱nili. Tsakui nichxin kʼoasʼin nikjaʼaitsjain nga tsínkʼia kʼoakoa̱n. Kjoaixiní nga nijngojin chjota kʼoa nijngojin jtín xi tsʼe chjotaxá xi koa̱nle kʼoendajin je kjoa xi tiyojiaan. Tonga je Niná kʼoatso nga kjoaʼaxin je kjoachjaʼatokon xi tjín, jolani xi faʼaitʼa kjoaʼmiya xi kafaʼato. Kataʼyala jmeni xi tso Niná nga sʼin.
JNGO CHJOTAXÁ XI ÑAKI KIXI KOATEXOMA
“Kʼianga tjíosa chjotaxá xokjoan je Niná xi tíjna ngʼajmi jngo chjotaxá koasennda xi nikʼiajin tjóxin. Chjotaxá jebi ali tsa tikjaʼaíjin naxinandá koa̱nntsjani. Ñaki sichaoní kʼoa kjoaʼaxinní ngatsʼi chjotaxá xokjoan, kʼoa jé kʼoéjna tokʼia saʼndani.” (Daniel 2:44.)
Je Chjotaxále Niná yaa ngʼajmi tje̱n koatexomani. Kʼoa je xi rey sʼin tíjna jé Jesucristo. Kʼoa jé kʼoéjnangajaole je chjotaxá xi tjío ndʼaibi ánni nga kʼoakoa̱nsíni josʼin mele Niná i̱ tʼanangi jokjima ya ngʼajmi (Mateo 6:9, 10). Je Chjotaxále Niná kʼoéjna tokʼia saʼndani, aliʼya chjotaxá sonʼnde kʼoéjnayangajaole, jé koatexomantsjai “Jesucristo xi Nainá kʼoa xi tsakʼasjentjainá”, kuinga ñaki koa̱n koa̱nkjainsíniná nga sʼe̱ kjoanyʼán (2 Pedro 1:11).
TJÓXIN JE RELIJIÓN NDISO
“Nga̱ tijeni Satanás síkʼantjaiya yaole joni tsa jngo ánkje xi síʼisen. Kʼoasʼin nga likui síxkón tjín tsa kʼoati je xi síxále síkʼantjaiya yaole joni tsa xi síxále xi kjoakixi. Kʼoa xi fetʼale kʼoakoa̱n josʼin xále.” (2 Corintios 11:14, 15.)
Je relijión ndiso jchale nga tʼatsʼe Na̱i tínroani. Tjóxin ngayeje relijión ndiso xi tjín sonʼnde. Liʼya xi tikui relijiónle sitoánntjaini kʼoa tsín tiʼya xi njín kʼoejtenni. ʼYani xi tsjoake je “Niná xi tíjnakon, xi ñaki Niná” ñaki tojngo kjoamakjain sʼe̱le kʼoa “kao ni̱ma̱le kʼoa kao kjoaʼyaxkón xi ñaki kʼoatjín” kʼoetsʼoanile. Ñaki kjoanyʼán xi sʼe̱ kʼoa jtín sʼin koatio je chjota (1 Tesalonicenses 1:9; Efesios 4:5; Juan 4:23).
ALIKUI TICHJOTAJÉE KOA̱NÑÁ
“Niná kʼoéjnakao. Chjotanaxinandále koa̱n. Tijéni Niná Ninále koa̱n. Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male, nga je kjoa xi títjon jejaʼato.” (Apocalipsis 21:3, 4.)
Jé Jesús sichjén Jeobá kʼianga sitjoson én jebi, nga̱ jé Jesús xi kitsjoantjai kjoabijnachonle xi totʼatsʼe chjotasonʼnde (Juan 3:16). Kʼianga jetíbatéxoma Jesús, je chjota ñaki chjotatsje koa̱n. Alikui tisʼeni kjoachjaʼatokon, nga̱ “Niná kʼoéjnakao” je chjota kʼoa “kʼoejon ngayije ndáxko̱n”. Je jée kao kjoachjaʼatokon jeme kjoaʼato. “Je xi kixi tsʼee koa̱n i̱ sonʼnde, kʼoa i koatioson ngantsjai nichxin.” (Salmo 37:29.)
TJÓXIN JE ESPÍRITU XI CHʼAO KJOAN
“Je [Jesucristo] tsakʼétʼanʼio je cho̱toánbe, je ye̱jchábe, xi tikuini na̱i xi Satanás. Jngo jmi nó kisʼetʼanʼio. Kisikʼatjensʼen ndi̱tja̱n xi tixʼa̱jinsén, kʼoa tsakʼéchjoajchxo. Tsakasénjon seyo, jméni nga tsín tikʼoanachasínile naxinandá.” (Apocalipsis 20:2, 3.)
Tjóxin ngayeje jmeni xi sʼín je Na̱i kao ánkje tsʼenle kʼoa sʼe̱tʼanʼio kʼoa yaa sikʼatsaoya ya “ndi̱tja̱n”, xi tsonile, nga tsín tijme xi koa̱n sʼinni. Alikui tikoa̱nnile nga je koanentsja je chjota. Nʼiojin ndasʼin kuiyoaa kʼianga tsín tije Na̱i kao ánkje tsʼenle josikaoniná.
JE NICHXIN FETʼA XI TIYOAA NDʼAIBI KUICHOKJETʼANÍ
“Je nichxin xi kjoetʼa” kʼiaa kuichokjetʼa nga kjoetʼa je kjoañʼai xi nʼio tse. Je Jesús kitso: “Nga̱ kʼia nʼio tse sʼe̱ kjoañʼai xi tsín tsa kʼoakoan saʼnda nga totsʼinle kjoa, saʼnda ndʼai, nikʼiajin kʼoakoa̱nngáni” (Mateo 24:21).
Nisañandiajinla kʼoasikji kjoañʼai sʼe jokoa̱n kʼianga sʼe̱jna je kjoañʼai jebi, kʼoa kʼiaa kjoetʼa nga kjoaʼaí je kjoajchántsele “Niná xi batéxoma[le] ngayije”, xi Armagedón ʼmi (Apocalipsis 16:14, 16).
Ngatsʼi chjota xi kui tsjoake xi kixi tjín ñaki koyale nga katafetʼa jmeni xi chon sonʼnde xokji. Kataʼyala jngo joá jme kjoanichikontʼain xi sʼe̱ kʼianga koatexoma je Chjotaxále Niná.
NʼIO TSESA XI SʼIN NINÁ
“Jo nkjín mani chjota” xi ya koatio jngo sonʼnde chjotse jñani sʼe̱ kjoanyʼán: Je Énle Niná kʼoatso nga “jo nkjín mani chjota” xi kuinje̱ngi kʼianga kjoaʼaí je kjoañʼai xi nʼio tse kʼoa yaa koatio ya sonʼnde chjotse jñani tokui sʼe̱ xi kixi tjín (Apocalipsis 7:9, 10, 14; 2 Pedro 3:13). Ngatsʼi xi ya koatio kʼoakuitso nga jé Jesucristo, je “ʼNdí barréle Niná, xi faʼáxin jéele chjotasonʼnde” tsjoále kjoabitjontjai (Juan 1:29).
Je kjoachjine xi tsjoá Niná nʼio koasenkaoná: Ya sonʼnde chjotse, “ñaki kui kjoankjíntokonle Jeobá sʼe̱ ngakjijnda sonʼnde” (Isaías 11:9). Je kjoachjine xi tsjoáná Niná koasenkaoná nga nʼio ndasʼin kuiyokoaa xíngiaa kʼoa nga koa̱nná si̱kuindaa Sonʼnde. Je Niná itso: “An, Jeobá, anña Nináli, je xi kʼoasʼin bakóyali ánni nga ji xi nda kuijnasíni, je xi kʼoasʼin síkasényali ya ndiaa xi tjínnele kuitómjeyai” (Isaías 48:17).
Je xíngiaa xi jekʼien kjoaʼáyanile: Kʼianga tsakʼejna Jesús i̱ Sonʼnde kisikjaʼáyale je miyole xi Lázaro tsakʼin (Juan 11:1, 5, 38-44). Nga kʼoakisʼin Jesús kui tsakakó jmeni xi sʼin nga jekoatexomale Sonʼnde (Juan 5:28, 29).
Sʼee kjoanyʼán kao kjoakixi tokʼia saʼndani: Kʼianga koatexoma Cristo alikui tisʼeni kjoa xi tsín kixi tjín. Je Jesús be jotjío ni̱ma̱ná kʼoa skoe̱ní jokjoan chjota xi kixi kʼoa jokjoan xi mai. ʼYani xi tsín sikʼéjna xi chʼaotjín alikui koa̱n kʼoéjna ya sonʼnde chjotsele Niná (Salmo 37:9, 10; Isaías 11:3, 4; 65:20; Mateo 9:4).
Nʼio nkjín én xi tongini kinokjoa xi kʼoatso jokji kjoanichikontʼain sʼe̱ nichxin xi nroaján, tonga to jngo jaola kaʼyaa ibi. Kʼianga jekoatexoma Chjotaxále Niná i̱ Sonʼnde kjoanyʼán sʼe̱ ngantsjai (Salmo 37:11, 29). Kʼoa ngayeje jmeni xi síkjaʼákonná tjóxinní. Je Niná itso: “Koeni an sichjotse ngayije [...,] je énbi ndaní, kʼoa kjoakixiní” (Apocalipsis 21:5).
