1, 2. Jósʼin bʼetʼaná josʼin síjcháná je xijcháná kʼoa jochon ya ʼnde jña tinijchá yaoná.

JOSʼIN síjcháná je xijcháná kʼoa jochon ya ʼnde jña tinijchá yaoná bʼetʼaná ngatsʼiaa. Kʼoa yaa nroani josoyoaa, jokjoan tsojmi xi chinee kʼoa josʼin mangínkoaa yaoná.

² Ningalani chjíle nga maná chjoéjiaan jmeni xi chinee kʼoa josoyoaa, tonga tjínsa xi ngisa nʼio chjíle. Tobʼelañá, kʼianga sʼa ʼndí kjoaan, ʼmiyaná jmeni xi koa̱n kʼoasʼiaan kʼoa jmeni xi tsín koa̱n kʼoasʼiaan. Tonga kjaʼaí kjaʼaísʼin nikjaʼaitsjeen xi chjotaa. Jmeni xi chjoejiaan sakʼoa ya chʼangiñá tsa tsjoáʼndená kjoafaʼaitsjenná kʼoa tsa mai. Je Biblia kʼoatso nga je chjota “toxá jeni nga kʼoasʼín jo tso kjoatéxoma” (Rom. 2:14). Tonga tsa tsín faʼaitʼa jngo kjoatéxoma ya Biblia xi bʼéchjoaná jmeni xi mená sʼiaan, a koaan tokʼoasʼiaan josʼin beni chjota ya ʼndená kʼoa jmeni xi ndatjín kʼoa jmeni xi chʼaotjín tsole, tojosʼin tsakʼinyaná kʼianga sʼa ʼndí kjoaan.

3. Ánni nga tsín koa̱n jetokʼoasʼiansíñá jmeni xi ndatjín kʼoa jmeni xi chʼaotjín tsole chjota.

³ Ya Biblia jao koya bakóyaná anni nga tsín koa̱n kʼoasʼiansíñá xi choʼndale Niná maa. Xi títjon itso: “Jngo ndiaa kijna xi kixi male je chjota, tonga ndiaa jebi to kjoabiya bichókaoni nga jemani” (Prov. 16:25). Mani nga chjotajée maa, ngantsjai nichxin nga saténgiaa jonʼia (Prov. 28:26; Jer. 10:23). Xi majaoni, je Biblia kʼoatso nga je Na̱i jé “niná xi tsʼe sonʼndebi”, xi tsonile, tʼatsʼe tínroani jmeni xi ndatjín kʼoa jmeni xi chʼaotjín tsole chjota kʼoa kao jmeni xi nʼio kʼoasʼín chjota (2 Cor. 4:4; 1 Juan 5:19). Kʼiatsa mená nga nda kuiyoaa ngixko̱n Niná kʼoa nga sichikontʼainná tjínnele kui koanngíntjenngiaa je kjoafaʼaitsjen xi faʼaitʼa ya Romanos 12:2 (tʼexkiai).

4. Jméni xi chótʼayá i̱ kjoaʼmiya jebi.

⁴ Nʼio chjíle jmeni xi bakóyaná ya Romanos 12:2  kʼoa jan koya tjínni xi chótʼayá i̱ kjoaʼmiya jebi. Xi títjon, ánni nga tjínnesínile nga si̱kʼantjaiyaa yaoná. Xi majaoni, jméni xi tjínnele si̱kʼantjaiyaa. Kʼoa xi majanni, jmé xi koasenkaoná nga ñaki kʼoantjaiya kjoaixiaa.

5. ʼYáni xi ngisa bakinle jmeni xi tso ya Romanos 12:2.

⁵ Kʼianga kiski pastro Pablo je xo̱nkarta xi Romanos ʼmi kʼiala nga nó 56. Ali tsa toʼyajin chjota xi kiskile, jé kiskile je chjotale Cristo xi ya ngʼajmi koai (Rom. 1:7). Kʼoa jé xokitsole nga katasíkʼantjaiya yaole kʼoa nga tsín kʼoasʼin katafikao yaole “jo tjín kjoa sonʼndebi”. Jméni xi “kjoa sonʼndebi” kitsole Pablo. Kui jmeni xi kisʼin chjota xi tsakatio ya Roma, jolani tsa je kostumbre xi kisʼele, josʼin kikao yaole, jotsakjayo kʼoa jmeni xi ndatjín kitsole kʼoa jmeni xi chʼaotjín kitsole. Ánni nga “ali kʼoajinsʼin mangínkao yaono” kitsosíni Pablo. Kuinga tjíosakʼa je chjotale Cristo xi tjío ya Roma nga kui nichxin xi tojo kʼoasʼin fikao yaole kʼoa xi tojo kʼoasʼin síkjaʼaitsjen joni tsa je chjota xi tsín kotʼaya Énle Niná nga kʼia. Jósʼin tsakinle nga kʼia je chjotale Cristo je xi “kjoa sonʼndebi” kitsole Pablo.

6, 7. Jméni xi nʼio ñʼai koanle je chjotale Cristo xi tsakatio ya Roma nichxin kjoatse.

⁶ Je chjota xi tʼaxin naxinandále xi bichókotsen jochon ndʼaibi ya Roma, bení je yo̱ngo̱ xi to xjáolesa tjío, je tsjó, je xkóson kʼoa kao jmesani xi kisinda je chjota romano nichxin kjoatse, xi jejmi nó tjínle. Jebi kui síchoyaná josʼin kisijchá yaole je chjota romano kʼoa josʼin tsabexkón ninále. Kʼoa je libro xi kui nchja̱ni josʼin tsakʼétsaojin je chjota romano kʼoatso nga kinikján chjota ninga kao cho̱, nga kitokanacha karreta xi tsʼe kjoajchán, nga tokjaʼaíngá tjín xi kʼoakisʼinchoya kʼoa nga tokjaʼaíngá tso músika xi kisikjane, xi saʼnda kjoajndí kitjenkao. Ya Roma kʼoati nʼio kisʼe tao̱n, je xi koanmele sasajin koannyináni (Rom. 6:21; 1 Ped. 4:3, 4).

⁷ Ninga nʼio nkjín yo̱ngo̱ tsakʼénda kʼoa nʼio nkjín niná tsakʼétsʼoale je chjota romano, alikui ñaki nda kitʼale je niná xi tsakʼétsʼoale. Nʼio nkjín kostumbre kisʼele jonga kisʼin, jolani kʼianga kitsin xtile, kʼianga chixan kʼoa kʼianga tjín xi kʼienle. Ñaki tokui nʼio kitjenngi kostumbre jebi. Nʼiojin ñʼai koanle je chjotale Cristo nga kui nichxin, nga̱ nʼio nkjín xi kui koanjchíngakao kostumbre jebi kʼianga sʼa ʼndí kjoan. Kʼoa kuinga tjínnesínile nga ñaki tsʼantjaiya jokjoan kʼiatsa mele nga ñaki chjotale Cristo koan. Kʼoa tosi tonda tsʼantjaiya jokjoan ninga jekisʼenngindá.

8. Ánni nga kʼoati nʼio ñʼai masíniná nichxin xi tiyoaa ndʼaibi ñá xi ñaki chjotale Cristo maa.

⁸ Kʼoa nichxin xi tiyoaa ndʼaibi kʼoati nʼio ñʼai maná xi ñaki chjotale Cristo maa, nga̱ kui espíritu xi tsʼe sonʼnde kijna ngakjijnda (tʼexkiai Efesios 2:2, 3 kao 1 Juan 2:16). Nga nyaon nyaon kui tísʼejnabasenná jmeni xi tsjoake chjota, jotjío kjoafaʼaitsjenle, jmeni  xi ndatjín tsole kʼoa jmeni xi chʼaotjín tsole. Tsa tsín si̱kuindaa yaoná chanjin kʼoati kʼoakjoaan jokjoan je chjota. Kuinga machjénsíni nga si̱tjosoán je kjoafaʼaitsjen xi kitsjoa je pastro Pablo kʼianga kitso: “Ali kʼoajinsʼin mangínkao yaono jo tjín kjoa sonʼndebi. Katabʼantjaiyao yaono”. Jméni xi sʼiaan kʼianga ñaki kʼoantjaiyaa jokjoaan.

9. Jméni xi sʼín je chjota nga ma fisʼenngindá.

⁹ Kʼianga kotʼaya Énle Niná je chjota kʼoa sítjoson jmeni xi tso sa machriantʼa sa machriantʼale je Jeobá. Yaa bakóni kʼianga síkʼantjaiya josʼin fikao yaole, nga síkʼéjna je relijión ndiso, nga bʼénele yaole nga síkʼantjaiya jokjoan tsakai kʼoa nga kjenngile jokjoan je Cristo (Efes. 4:22-24). Nʼio tsjoa maná nga nkjín jmi chjota xi kʼoasʼín nga xki̱ nó, xijema kʼiaa tsjoátʼale yaole Niná kʼoa fisʼenngindá. Nʼiojin tsjoa male je Jeobá (Prov. 27:11). Tonga a tokui jebi xi tjínnele sʼin jngo chjota.

10. Jngo chjota xi jetísíndaya yaole, jmésani xi tjínnele sʼin kʼianga ñaki kʼoantjaiya jokjoan.

¹⁰ Kʼianga ñaki kʼoantjaiya jokjoan jngo chjota, ali tsa toyajin tje̱n tíjna nga sindaya yaole. Jngo libro kijna xi kui bakóya josʼin tsoyanile én xi nroatʼa ya Biblia kʼoa kʼoatso nga je én xi “katabʼantjaiyao yaono” tso ya Romanos 12:2, kʼoati kui kitjenkao nga ñaki nichjotseyaa kʼoa nikʼantjaiyaa je kjoafaʼaitsjenná, tonga kao nganʼiotsjele Niná. Jebi kui xi bakóná nga je chjotale Cristo ali tsa tokuijin xi tjínnele sikʼéjna tsa jmeni xi chʼaotjín kisʼin ngasʼa kʼoa tsa tsín tichʼao tso én kuinchja̱ni kʼoa tsa tsín tisichajngini. Tjíokʼa chjota xi tsín be jotso Biblia xi kʼoati bʼéchjoale yaole kjoa jebi. Jósasʼin tjínnele kʼoantjaiya je chjotale Cristo.

11. Tojo kitso je pastro Pablo, jméni xi tjínnele si̱chjotseyandaa kʼianga ñaki kʼoantjaiyaa jokjoaan.

¹¹ Je pastro Pablo kitso: “Katabʼantjaiyao yaono nga koa̱nchjotseyanda ngijngokʼani kjoafaʼaitsjenno”. Je én xi kjoafaʼaitsjen tso kui xotsole nga kʼoasʼin maná nikjaʼaitsjeen. Tonga ya Biblia kʼoati kui xotsole jmeni xi nikjaʼaitsjeen, jotjío tokoán kʼoa nga chosonnilee kʼianga jme xi nʼia. Kʼianga kiski je Pablo je xo̱nkarta xi tsʼe Romanos kʼoati kisikʼaxki̱ je chjota xi kui kisʼele “kjoafaʼaitsjen xi nʼio chʼao tjín”, xi ñaki kui kisʼele “tojo tjín jko̱ya kjoatsʼen” tjín, kao “kjoachʼaondai, kjoa xi chʼao tjín, [...] kjoaxintakon, [...] xi síkʼen kʼen, kjoabixkan” kʼoa “kao kjoachʼanacha” (Rom. 1:28-31). Kuijin nga kʼoakitsonile je pastro Pablo je chjotale Cristo nga ñaki katasíkʼantjaiya yaole kʼoa nga katasíchjotseyanda je kjoafaʼaitsjenle, nga̱ tjíokʼa xi ñaki kui kjoa jebi koanjchíngakao kʼianga sʼa ʼndí kjoan.

12. 1) Jósʼin síkjaʼaitsjen chjota nichxin xi tiyoaa ndʼaibi. 2) Jméni xi koa̱n kʼiatsa tsín si̱kuindalee yaoná josʼin síkjaʼaitsjen chjota.

¹² Nichxin xi tiyoaa ndʼaibi, kʼoati kjoan je chjota tojo kitso je Pablo nichxin kjoatse. Tsakui nichxin kʼoasʼin síkjaʼaitsjen nga tsínkjoan machjén nga jme kjoatéxoma xi koaitjenngi josʼin koaikao yaole. Tjín  maestro kʼoa kao xijchá xi totsjoáʼnde kjitele je xti jmeni xi sʼín. Chjota jebi kʼoasʼin bakóya nga ñá xi kuixónñá jmeni xi ndatjín kʼoa jmeni xi chʼaotjín. Kʼoasʼin síkjaʼaitsjen nga tsínkjoan ñaki ʼyaa jmeni xi ndatjín kʼoa jmeni xi chʼaotjín. Saʼnda je chjota xi kʼoatso nga makjainle xi tʼatsʼe Niná kʼoatso nga koa̱n kʼoasʼin tojosʼin mele, nga tsín tjínnele sitjoson kjoatéxomale Niná (Sal. 14:1). Kʼiatsa tsín si̱kuindalee yaoná kʼoati koakinná tsanda ñá xi ñaki chjotale Cristo maa josʼin síkjaʼaitsjen chjota. Tsakui nichxin likui tisi̱tjosonñá jmeni xi tso naxinandále Niná, kʼoa tsa saʼnda totjín totje̱nni kjoa xi koa̱njtininá. Kʼoa tochale kʼoakuixoán nga tsín tje̱n ndiaale jmeni xi ʼminá xi tʼatsʼe josʼin kʼoétsaojiaan, xi tʼatsʼe Internet kʼoa xi tʼatsʼe skuelangʼa.

13. Ánni nga tjínnesínile si̱kjaʼaitsjenjiaan jotjín jinni̱ma̱ná.

¹³ Jméni xi sʼiaan kʼiatsa tsín mená nga tosi tonda kʼoasʼin koanngínkoaa yaoná “jo tjín kjoa sonʼndebi”. Tjínnele si̱kjaʼaitsjenjiaan jótjío tokoán, jónʼia kʼianga jme xi bitjatojiaan, jméni xi mená kuichotjenngiaa kʼoa jméni xi ndatjín kʼoa jméni xi chʼaotjín ʼmilee. Mani nga tsín be xíngiaa jotjín jinni̱ma̱ná, tsakui nichxin kʼoakuitsoná nga nda tinixálee Jeobá, tonga toñákjoán xi ʼyaa tsa jekisikʼantjaiyaná jokjoaan jmeni xi tso je Biblia kʼoa tsa tosi tonda tísíkʼantjaiyaná (tʼexkiai Santiago 1:23-25).

14. Jméni xi koasenkaoná nga jchaa jmeni xi tjínnele si̱kʼantjaiyaa jokjoaan.

¹⁴ Kʼianga ñaki kʼoantjaiya kjoaixiaa, tjínnele si̱kʼantjaiyaa jokjoaan ya jinni̱ma̱ná kʼoa kui machjénná jmeni xi kuichojin saʼnda ni̱ma̱ná. Jméni xi koasenkaoná nga kʼoasʼiaan. Jé Biblia. Kʼianga chotʼayá Biblia, ʼyañá josʼin mele Jeobá nga koa̱nkjoaan. Kʼoa josʼin nikjaʼaitsjeen tʼatsʼe jmeni xi bakóya Biblia yaa bakoñá jmeni xi tjín jinni̱ma̱ná. Kʼoa jebi kui xi basenkaoná nga ʼyaa jméni xi tjínnele si̱kʼantjaiyaa kʼianga kʼoasʼiaan “jmeni xi Niná mele” (Rom. 12:2; Heb. 4:12).

15. Jméni xi síkʼantjaiya Jeobá kʼianga síndayaná.

¹⁵ (Tʼexkiai Isaías 64:8.) * Je choa̱ xi kisikʼéjna je profeta Isaías nʼio chjíle jmeni xi bakóyaná. Ñá kʼoasʼin mangósoán joni tsa niʼnde xi tii mandani, kʼoa je Jeobá kʼoasʼin mangóson joni jngo chjota xi tii sínda. Je Jeobá ali tsakuijin síkʼantjaiya jokjoaan xi tosonngʼa nga ngisa ndasʼin katamatseen. Je xi síkʼantjaiya kuiní jotjín jinni̱ma̱ná. Kʼianga bʼaiʼndee nga síndayaná, joxi bʼaiʼndelee nga síkʼantjaiya jotjín jinni̱ma̱ná, xi tsonile, basenkaoná nga nikʼantjaiyaa jotjín tokoán kʼoa josʼin nikjaʼaitsjeen. Kʼoa kui jebi xi koasenkaoná nga tsínkui katabakinná jmeni xi chon i̱ Sonʼnde. Jméni xi sʼín Jeobá kʼianga síndayaná.

16, 17. 1) Kʼianga ñaki nda makjoan je tii xi sínda chjota, jósíkao je niʼnde xi síchjén. 2) Kʼoalasi nga jao koya josʼin síkʼantjaiyaná je Énle Niná.

¹⁶ Kʼianga ñaki nda koa̱nkjoan je tii, kui machjén je niʼnde xi ñaki nda. Tonga je chjota xi kui sínda jao koya josíkao je niʼnde xi tii mandani. Títjon kjoanla sítsje je niʼnde, kʼoa xijema kʼiaa síndá ánni nga koa̱n koa̱nndasíni je tii.

¹⁷ Je chjota xi tii sínda nandá síchjén nga tosʼa sítsje je niʼnde, tonga kʼoati kui síchjén nga síndá je niʼnde ánni nga ma kʼoasíkásíni je tii josʼin nga mele. Je Énle Niná kʼoati jao koya josʼin síkʼantjaiyaná tsanda ñá. Xi títjon, basenkaoná nga tsín tikʼoasʼin nikjaʼaitsjenñá josʼin nikjaʼaitsjeen kʼianga kje ʼyajián je Niná. Kʼoa xi majaoni, basenkaoná nga ñaki kʼoamakjoaan josʼin mele (Efes. 5:26). A tsí kjoaixi nga kjitʼa  kʼoaʼminá nga nyaon nyaon kʼoéxkiaa Biblia kʼoa nga tsín si̱chaa kjoajtínná, nga̱ kʼoati ya sakóyaná je Énle Niná. Ánni nga kjitʼa kʼoaʼmisíniná. Kuinga tsa nitjosoán jebi, joxi tibʼaiʼndelee je Jeobá nga katasíndayaná (Sal. 1:2; Hech. 17:11; Heb. 10:24, 25).

18. 1) Kʼiatsa mená nga kjoaʼasʼenjin saʼnda ni̱ma̱ná je Énle Niná, ánni nga machjénsíni nga si̱kjaʼaitsjenjiaan jmeni xi chotʼayá. 2) Jméni xi koa̱n chjónangilee yaoná.

¹⁸ Tonga tsa mená nga ñaki kʼoantjaiyaa jokjoaan ali tsa tokuijin xi machjén nga ntsjaintsjai kʼoéxkiaa kʼoa chótʼayá Biblia. Nkjín chjota xi kʼoati nʼio nda be jotso Biblia nga̱ kʼoati bʼéxkia, kʼoa sakʼoa tsaojin kʼaa kʼianga ʼmiyasoán. Saʼnda tjínkʼa chjota xi nkjín testo tjíojinkon. * Tonga sakʼoa likuini basenkao josʼin síkjaʼaitsjen kʼoa josʼin fikao yaole. Jmésani xi tjínnele sʼin chjota jebi. Kʼianga ñaki kʼoantjaiya jokjoan, tjínnele tsjoáʼnde nga kjoaʼasʼenjin saʼnda jinni̱ma̱le je Énle Niná (Gál. 6:6). Kuinga nʼio machjénsíni nga kʼoati chʼa̱sjeʼaa nichxin nga si̱kjaʼaitsjenjiaan jmeni xi chotʼayá. Chjónangilee yaoná jebi: “A tjínjngo tokoan nga nʼio chjíle jmeni xi kjimajinna xi tʼatsʼe Énle Niná. Kʼianga kʼoasʼin nʼio nda tíbasenkaona josʼin tisijchá yaona, a tsíkui xi tsonile nga ñaki kʼoatjín josʼin tíʼmiyana Énle Niná. Xi ijngosani, a sikjaʼaitsjenjinña josʼin tjínnele kjuítjenngia jmeni xi sakóyana, axo kʼoasʼin sikjaʼaitsjen nga tokui xi tjínnele sʼian nga koakoyale xi kjaʼaí. A ñaki tsen mana nga kʼoati an xotsona je Jeobá”. Kʼiatsa si̱kjaʼaitsjenjiaan xi tʼatsʼe jebi, ngisasa nʼio koa̱nchriantʼalee je Jeobá. Ngisa tsjoacha koaan. Kʼianga kuichokajin ni̱ma̱ná jmeni xi chotʼayá ngisa kʼoénelee yaoná nga si̱kʼantjaiyaa yaoná jñani machjénná (Prov. 4:23; Luc. 6:45).

19, 20. Jñánile kjoafaʼaitsjen xi faʼaitʼa Biblia xi tjínnele si̱tjosoán kʼiatsa mená nga tse kjoanichikontʼain sʼe̱ná.

¹⁹ Kʼiatsa ntsjaintsjai kʼoéxkiaa Énle Niná kʼoa si̱kjaʼaitsjenjiaan jmeni xi tso, koasenkaoná nga kʼoasʼiaan jokitso pastro Pablo. I kitso: “Jekichjaʼaxinlao yaono je ni̱ma̱ xi jchínga kao kjoa xi kisʼin. Jekichjóao je ni̱ma̱ xi chjotse, xi jekjimachjotseya kao kjoafaʼaitsjen xi kjoakixi” (Col. 3:9, 10). Kʼiatsa koa̱nchoyaná kʼoa si̱tjosoán jmekjoanni xi tso je Biblia, koa̱nchjotseya jonga kjoaan, kʼoa kui xi koasenkaoná nga tsín kʼoanachaná je kjoamañale Na̱i.

²⁰ Je pastro Pedro jngo kjoafaʼaitsjen kitsjoa, kitso: “Joni ʼndíxtindʼé li nitjosonjinlao kjoachi̱nga̱no joni ngasʼa”. Kʼoa xijekoan kʼoati kitso nga tsje sʼin koanngínkoaa yaoná tojmeni xi sʼiaan (1 Ped. 1:14, 15). Kʼiatsa ñaki kʼoénelee yaoná nga jngokʼa si̱kʼantjaiyaa je kjoafaʼaitsjen xi kisʼená ngasʼa kʼoa kao jokisatio tokoán, kʼoa ñaki si̱kʼantjaiyaa jokjoaan, tse kjoanichikontʼain sʼe̱ná tojosʼin kuitsoyaná je kjoaʼmiya xi fini.