Je Biblia tsjoá kjoafaʼaitsjen jmeni xi koa̱n sʼin xi jechixan kʼianga nda koatiokao xínkjín. Kjoafaʼaitsjen jebi basenkao nga ngisa nda chjota ma, ánni nga ngisa nʼio sʼejnasíni kjoabixanle. Kʼoati basenkao nga faʼáxinle yaole je xi tsín nda síkatío. Kʼoa bakóyale josʼin kjoakao xínkjín ánni nga ñaki nda koatiosíni. Kjoafaʼaitsjen jebi nʼio nda binyakao nga̱ yaa tínroani tʼatsʼe Jeobá je xi tsakʼéjnabasen kjoabixan. (Tʼexkiai Colosenses 3:8-10, 12-14.)

Je xi jechixan tjínnele skoe̱xkónngañá xínkjín. Kʼianga je xi xʼin kʼoa kao je xi chjoón sítjoson je xá xi tsakánele Niná nga jngó jngó ñaki nda batiokao xínkjín. (Tʼexkiai Colosenses 3:18, 19.)

Tosi tonda koatiokao xínkjín kʼiatsa tsjoakengañá xínkjín. Je Niná bakóyaná jósʼin koakoá kjoatsjoacha. Je Niná kʼoa kao ʼNdíle jésa xi ngisa nda choa̱ batíoná josʼin koakoá kjoatsjoacha. (Tʼexkiai 1 Juan 4:7, 8, 19.)

Kʼiatsa je xʼin kʼoa kao je chjoón kʼoasʼin skoe̱kon kjoabixanle nga jngo kjoatjao xi tʼatsʼe Niná tínroani alikui sikatío xínkjín. Je Niná kui xi mele nga tondiaa koatiokao xínkjín xi jechixán ánni nga tsín kuixo̱yasíni je familia. Je Niná kʼoasʼin tsakʼéndajin nga tojngo koa̱n nga jao, nga tsjoánganʼiole xínkjín jmeni xi chale. Xi ijngosani, je Niná sénle kisikʼa je chjota kʼianga kisinda. Jebi kui xi tsonile nga koa̱n skénngile Niná josʼin nga tsjoake koa̱n xínkjín. (Tʼexkiai Génesis 1:27 kao 2:18, 24.)