1, 2. Jméni xi kisʼin je Jesús xi tʼatsʼe pastrole kʼianga jetsakʼéjna sʼuí Paxko nga nó 33.

KʼIANGA jekoannjio nga teño sá nisán nga nó 33, je Jesús kao chjotale tsakʼéjna sʼuí Paxko, je sʼuí xi síkjaʼaitsjenjinle nga tsakationdaí chjotajchíngale ya naxinandá Egipto. Tonga je chjotale Jesús jngo kjoandaí xi ngisa tse tíjna sʼe̱le, jngo kjoandaí xi kʼoéjna “ngantsjai”. Kʼianga koannyaonni, nga tikʼiani nga teño sá nisán, kinikʼien je maestrole, jé chjota kontrale kisikʼien. Tonga nga kʼoasʼin kinikʼien Jesús jngo kjoanichikontʼain jaʼaikao. Je njín tsje xi kʼoasʼin tsakʼéjten Jesús kui xi koasenkao je chjotasonʼnde nga ndaí koatiole jée kao kjoabiya (Heb. 9:12-14).

² Kʼianga tsín cha̱jinná jokji kjoatsjoacha tsakakó nga kʼoasʼin kitsjoa yaole, je Jesús jngo kjoabichi tsakʼéjna kʼoa kui kisʼejnangajaole sʼuí Paxko. Jngo nioxtila xi tsínle naʼyo̱san kisixkoa̱, kitsjoale nga tejngo pastrole xi kixi kitʼale, kʼoa kitsole: “Jebi yaona ní xi tsjoa xi tʼatsaon, kʼoatʼiaon kuibi jméni nga nda kʼoéjintakonsínináo [...], kʼoatisʼin kisʼin kao je cho̱tsín, kitso: Je cho̱tsínbi jé ní xi kjoachjotse xi bʼendakoa kao njínna xi xíjten tʼatsaon” (Luc. 22:19, 20).

3. 1) Jméni xi koan kʼianga jekʼien je Jesús. 2) Jmé xi chjónangilee yaoná tʼatsʼe kjoabʼetsʼoa xi tsakʼéjna Jesús xi faʼaitʼa ya kapítulo 17 xi tsʼe Juan.

³ Nga kʼia, je kjoasʼendajin xi kisʼele Niná kao naxinandá Israel toje tíbichókjetʼa. Jngo kjoasʼendajin chjotse kisʼejnayangajaole, kui kjoasʼendajin xi tsakʼénda Jeobá kao chjotale Jesús xi ya koai ngʼajmi. Je Jesús alikui mele nga kʼoati koa̱n je chjotale jokoan je naxinandá Israel. Je chjota israelita alikui jtín sʼin tsakatio kʼoa nga kʼoakisʼin chʼaosʼin tsakʼasje je jaʼaínle Niná (Juan 7:45-49; Hech. 23:6-9). Je Jesús kui xi koanmele nga ñaki jtín sʼin koatio je chjota  tje̱nngile ánni nga kuitjongʼasíni jaʼaínle Niná. Kuinga jngo kjoabʼetsʼoa xi nʼio naskánatso tsakʼéjnasíni, xi koa̱n kʼoexkia toʼya chjotani (Juan 17:1-26; chótsenlai sén xi faʼaitʼa ya jña fitsʼiani kjoaʼmiya jebi). Kʼianga chótʼayajiaan kjoabʼetsʼoa jebi, chjónangilee yaoná: “A kinrʼoé Niná je kjoabʼetsʼoa xi tsakʼéjna je ʼNdíle. A kʼoatisʼian jmeni xi tso je kjoabʼetsʼoa jebi”.

4, 5. 1) Jméni xi bakóyaná je én xi tsakʼétsʼiakaoni Jesús nga tsakʼétsʼoale Niná. 2) Jókisʼin Jeobá tʼatsʼe jmeni xi kisijé Jesús.

⁴ Je Jesús nʼio nkjín koya xi tʼatsʼe Niná tsakakóyale je chjotale kʼianga kui nitje̱n. Xijekoan, kiskotsen ngʼajmi kʼoa i kitso nga tsakʼétsʼoa: “Nʼai, je ora jejichoka, chʼa̱sjejeyai ʼndíli, jméni nga kʼoati ʼndíli kʼoasjejeyanili. Josʼin nga tsakʼailai kjoatéxoma xi tʼatsʼe ngatsʼi chjota, jméni nga tsjoásínile kjoabijnachon ngantsjai ngatsʼi xi tsakʼailai [...]. An tsʼasjejeyale i̱ sonʼnde. Jekisijngoa je xá xi ji tsakʼainái. Ndʼaibi Nʼai, kʼoasʼin chʼa̱sjejeyanái yatʼali nga ji, kao je kjoajeyabe xi kisʼena kʼia nga tsakatejnatʼale kʼia nga kje tsínjin sonʼnde” (Juan 17:1-5).

⁵ Je Jesús kui tsakʼétsʼiakaoni nga tsakʼétsʼoale Niná jmeni xi ngisa koanndosinle. Xi títjon, kuinga je kʼoaile kjoajeya je Nʼaile xi tíjna ngʼajmi. Kjoabʼetsʼoa jebi me mangóson jotso én xi fitsʼiani je Padrenuestro: “Nʼainajin [...], kataʼyaxkón jaʼaínli” (Luc. 11:2). Xi majaoni, jé chjotale kisijéntjai; kui xi mele nga tsjoále “kjoabijnachon ngantsjai”. Kʼoa xi majanni, kui kisijé jmeni xi mele; kui kisijéle Nʼaile nga tikʼoasʼin jeya katasíkʼéjnani josʼin tíjna nga kjesa mandajin ngayeje xi tjín ngʼajmi kao sonʼnde. Jókisʼin Jeobá. Ngisa tse kitsjoale je ʼNdíle jokji kisijé. Kui kitsjoale “jngo jaʼaín xi ngisa ngʼa kaoni tsa tsʼe ánkje” (Heb. 1:4).

6. Jméni xi tjínnele kisʼin je pastro kʼiatsa mele nga sʼe̱le kjoabijnachon ngantsjai, kʼoa jósʼin ʼyañá nga kʼoakisʼin.

⁶ Kʼianga tsakʼétsʼoa Jesús kʼoati kisikʼaxki̱ jmeni xi sʼiaan nga kʼoainá kjoabijnachon ngantsjai (tʼexkiai Juan 17:3). Kʼoakitso nga tosi tonda kataʼyaa Niná kʼoa kao Cristo. Jebi ali tsa tokuijin xi tsonile nga tokataʼyaa, kui xi tsonile nga kʼoasʼiaan jmeni xi kjimajinná. Je pastrole kʼoakisʼin kʼoa kuinga i̱ kitsosíni Jesús nga tsakʼétsʼoa: “Je én xi tsakʼainái kʼoasʼin kitsjoale, kʼoa jé kiskoé” (Juan 17:8). Tonga tsa mele nga sʼe̱le kjoabijnachon ngantsjai tjínnele nga tosi tonda kisikjaʼaitsjenjin je kjoatéxomale Niná kʼoa kisitjoson nga nyaon nyaon jokjitse tsakatio i̱ Sonʼnde. A kʼoakisʼin. Jaon. Kʼoa kuinga ʼyasíñá nga̱ je jaʼaínle yaa kisʼetʼa nga “tejao xjáoja̱ma̱” xi tsʼe Jerusalén chjotse (Apoc. 21:14).

7. Jmé xi tsoyanile nga ʼyaa je Niná, kʼoa ánni nga nʼio chjísínile.

⁷ Tjínkʼa je chjota xi én griego kotʼayason xi kʼoatso kʼianga je én xi “skoe̱li” tso ya Juan 17:3 kʼoati koa̱n “tjínneno nga tosi tonda jchao” sʼin kjoaʼatoya. Nga jao én jebi tikʼoasʼin tsoyanile kʼoa nʼio chjíle. Kuinga je én xi “skoe̱li” tso ya Biblia kui xi tsonile nga tosi tonda kataʼyaa Niná. Tonga kʼiatsa mená jchaa je Niná xi nʼio jeya tíjnale ngʼajmi kao sonʼnde, ali tsa tokuijin xi machjén nga kataʼyaa jme xi tjínndajinle kʼoa jokjoan. Machjénní nga tsjoacha katamaa kʼoa nga si̱miyoaa kʼoa nga kʼoati tsjoacha katamaa je ndsʼee. Je Biblia itso: “Je xi  tsín tjaoke, nikʼiajin tsabe Niná” (1 Juan 4:8). Kʼoa nga ʼyaa xi tʼatsʼe Niná kʼoati kui xi tsonile nga nitjosonlee (tʼexkiai 1 Juan 2:3-5). Nʼio tse kjoanda tjínná nga ya tiyojinlee je chjota xi be xi tʼatsʼe Jeobá. Tonga tsa tsín si̱kuindaa je kjoamiyo xi tjínná xi kao Jeobá si̱chañá, tojo koan je Judas Iscariote. Kʼoénelee yaoná nga tsín si̱chaa kjoamiyo jebi ánni nga kʼoaisíniná kjoabijnachon ngantsjai (Mat. 24:13).

8, 9. Jméni xi ngisa kisindosin je Jesús kʼianga kitsoyason, kʼoa jméni xi tsín kisasenle jotjíosʼín je chjota judío.

⁸ Kʼianga jebʼexkiaa je kjoabʼetsʼoa xi tsakʼéjna Jesús, xi faʼaitʼa ya kapítulo 17 xi tsʼe Juan, ʼyañá nga Jesús nʼio tsjoake koan je pastrole kʼoa kʼoati nʼio tsjoake koa̱n je xi chjotale koa̱n nga koa̱nskanni (Juan 17:20). Ninga kjoabitjontjai jaʼaikao je Jesús, je xi ngisa koanndosinle kuiní nga kuitjotsje jaʼaínle Niná. Saʼnda nga tsakʼétsʼiakao xále Niná kʼoa saʼnda nga kisikjetʼa, je Jesús tsakʼasjetsjee kʼoa tsakʼasjejeyaa je jaʼaínle Niná. Tobʼelañá, kʼianga tíjna ya ndʼia sinagoga ya Nazaret, kʼianga kitsoya jme xá jaʼaini, kui tsakʼéxkia je xo̱n xi tsʼe Isaías, kitso: “Jé Espíritule Nainá [Jeobá] tíjnakaona, nga̱ kitsjonjonna tʼatsʼe xá nga an nchjayajinle xi yo̱ma̱ je énnda”. Kisikʼaxki̱jin je jaʼaínle Nʼaile kʼianga tsakʼéxkia xo̱n jebi (Luc. 4:16-21).

⁹ Kʼianga kjesa faʼaijin Jesús i̱ Sonʼnde, je chjota xi nyatítjonle relijión tokʼoa jekʼoasʼin tjíobakóyale chjota nga tsín katasíchjén jaʼaínle Niná. Nʼiojin chʼao kisʼele je Jesús nga kʼoakisʼin je chjota judío. Je Jesús i kitsole je chjota xi nyatítjonle relijión: “Jaʼainía kao jaʼaínle Nʼaina, tonga jon likui chjoénáo. Tsa kjaʼaí xi kjoaʼaí kao [xi] titsʼeni jaʼaín, kʼoa tosa je chjóaoʼni” (Juan 5:43). Kʼoa kʼianga tojngo jao nichxinsa cha kʼianga si̱kʼien kʼoakitsole je Nʼaile jmeni xi ngisa nʼio chjí tsabe, kitso: “Chʼa̱sjejeyai jaʼaínli” (Juan 12:28). Je kjoabʼetsʼoa xi tichotʼayá, je xi tsakʼéjna Jesús, nkjín kʼa síkʼaxki̱ nga katabitjojeya jaʼaínle Nʼaile.

10, 11. 1) Jméni xi kisʼin je Jesús kʼianga kisikʼéjnatsenle je chjotale je jaʼaínle Nʼaile. 2) Ánni nga tibʼenesínilee yaoná nga tibʼejnatseen jaʼaínle Niná.

 ¹⁰ Je Jesús i kitso: “Je chjota xi tsakʼainái i̱ sonʼndebi, an tsakakosontsenle [jaʼaínli] jo kjoain nga ji. Tsi ní, kʼoa ji tsakʼainái. Kisikitjoson énli”. Kʼoa i kitsosa: “Likui tiʼi̱ tijnania i̱ sonʼndebi, tonga je i̱ tjío i̱ sonʼndebi”. Kʼoa kʼoakitsosale je Jeobá nga katasíkuinda je chjotale xi totʼatsʼe jaʼaínle (Juan 17:6, 11).

¹¹ Kʼianga kitsoyale Jesús je chjotale joʼmi je Nʼaile, ali tsa tokui kʼoakitsole joʼmi. Kʼoati tsakakóyale jmeni xi tje̱nkao jaʼaín jebi. Tsakakóyale jokjoan je Niná kʼoa josʼin bekonná (Éx. 34:5-7). Kʼoa nichxin xi tiyoaa ndʼaibi, je Jesús yaa tje̱n ngʼajmi tíbasenkaoniná nga tibʼejnatseen jaʼaínle Jeobá jngo tjíjtsa Sonʼnde. Ánni kʼoatinʼiasíñá. Kuiní nga nkjínsa chjota katamakjainle tongini nga kjesa nikjejin jmeni xi chon sonʼnde. Xijekoa̱n, je Jeobá kʼoasjentjai je xi testigole mani, xi kixi tjíofitʼale kʼoa nʼio ngʼa sʼe̱jna je jaʼaínle (Ezeq. 36:23).

12. Jméni xi jan koya machjénná kʼianga kuitjosonná je xá xi tsakʼétsʼiakao je Jesús.

¹² Je Jesús nʼio tsakʼénele yaole nga tsakakóyale je chjotale nga tsínkui katasíkinjele jñani sa̱téngi nga jngó jngó nga̱ kui xi kuinyakao nga sijngo je xá xi tsakʼétsʼiakao je Jesús. Je Jesús i kitsole Nʼaile: “Josʼin nga kinikasénnái nga an i̱ sonʼndebi, kʼoatisʼin kisikasén je chjotana i̱ sonʼnde”. Je kjoabʼetsʼoa xi tsakʼéjna jan koya kisikʼaxki̱ jmeni xi koasenkao chjotale nga kuitjosonle xá xi tsakánele. Xi títjon, kui kisijéle Nʼaile nga tsín i̱ Sonʼnde xi je Na̱i kjinentsja tsjónjin yaole je chjotale. Xi majaoni, kui kisijé nga katasítjoson je Énle Niná kʼoa nga ñaki tsje katabatio. Xi majanni, nkjín kʼa kisijéle Nʼaile nga jtín sʼin katabatio chjotale, josʼin tjío je nga jao. Nga jngó jngoá koaan chjónangilee yaoná: “A kʼoatisʼian nga jan koya xi kisikʼaxki̱ Jesús kʼianga tsakʼétsʼoale Niná”. Je Jesús bení nga tsa kʼoenele yaole je chjotale nga kʼoasʼin nga jan koya jebi, koa̱nkjainle je chjota kʼianga kuitsoyale (tʼexkiai Juan 17:15-21).

13. Jósʼin kisitjoson Jeobá kʼianga siglo I je kjoabʼetsʼoa xi tsakʼéjnale Jesús.

¹³ Kʼianga chotʼayajiaan jmeni xi tso je libro xi tsʼe Hechos yaa bakóyaná kʼianga kinrʼoé Jeobá jmeni xi kitsole je Jesús kʼianga tsakʼétsʼoale. Kʼiatsa ñá xi nda si̱kjaʼaitsjenjiaan, alikuijin ñʼai tíjna nga koa̱njaoya je jtínle Cristo xi kisatio nga siglo I. Nga̱ jtín jebi tjíojin chjota judío kao xi tsín judío, xi nyiná kao xi ma̱ tjío, xi choʼnda ma kʼoa kao xi nai ma. Tonga jtín sʼin tsakatio ngatsʼi kʼoa saʼnda kui kiningósonkao yaoná, kʼoa je xi jko̱ sʼin tsakʼejnale jé Jesús (Efes. 4:15, 16). Je Sonʼnde xi je Na̱i kjinentsja nʼio xkoa̱ya sʼin tjío je chjota, tonga je chjotale Jesús jtín sʼin tsakatio. Kuinga kʼoasʼin tsakationi nga je Jeobá kitsjoale nganʼiotsjele (1 Cor. 3:5-7).

14. Jósʼin tísítjoson Niná ndʼaibi jmeni xi kisijéle je Jesús kʼianga tsakʼétsʼoale.

¹⁴ Tonga kʼianga jekʼien je pastro alikui tijtín sʼin tsakationi je chjotale Cristo. Jé jaʼasʼenjin je chjota xi yátsʼi̱n tsakinyále Niná, kʼoa yaa kinroani nga kisʼe je jtín xi to kjoandiso tsakakóya, xi chjotale Cristo kitsole yaole (Hech. 20:29, 30). Tonga nga nó 1919, je Jesús kisikinyátʼaxinle relijión ndiso je chjotale xi ya koai ngʼajmi kʼoa kinchjamañale nga jtín sʼin katabatio (Col. 3:14). Kʼianga kʼoasʼin kitsoyason chjota jebi  ninga tochoa mani kisʼele kjoanichikontʼain kʼoa jetsʼato ñato miyón mani “xi kjaʼaí barré” xi ya tjíosíjngokao yaole kʼoa tojngo nyʼoá kjima. Chjota xi kjimaxkó tjíofaʼaini “ngatsʼi ʼnde, kao ntje̱, kao naxinandá, kao én” (Juan 10:16; Apoc. 7:9). Je Jeobá kinrʼoé jmeni xi kisijéle je Jesús kʼianga kitso: “Jméni nga kʼoasʼin skoe̱síni chjotasonʼnde nga ji kinikasénnái, kʼoa nga ji koantsjoachai nga je, josʼin nga kʼoati koantsjoachanái nga an” (Juan 17:23).

15. Jméni xi kisijé Jesús tʼatsʼe chjotale xi ya koai ngʼajmi.

¹⁵ Kʼianga teño sá nisán nga kjesa bʼéjnajin kjoabʼetsʼoale je Jesús, kitsjoale “kjoajeya” je pastrole, xi tsonile, jngo kjoasʼendajin tsakʼéndakao nga je koatexomakao ya ngʼajmi (Luc. 22:28-30; Juan 17:22). Kʼoa xijekoan, kʼiaa kisijéntjai, kitso: “Nʼai, kui xi mena, nga je chjota xi ji tsakʼainái, kʼoati ya koatiokaona jña nga an tijna, jméni nga kʼoasʼin skoe̱síni kjoajeyana xi ji tsakʼainái, nga̱ koantsjoachanái tongini nga kje sʼendajin sonʼnde” (Juan 17:24). Kʼoa ʼndele nga kjoaxintokon sʼe̱le je xi koatio i̱ Sonʼnde, tosa tsjoa tjíole nga tjíobinyakao je xi ya koai ngʼajmi. Jebi kui bakó nga jtín sʼin tjío je xi ñaki chjotale Cristo ma ndʼaibi.

16, 17. 1) Kʼianga jekisikjetʼa je kjoabʼetsʼoa xi tsakʼéjna Jesús, jméni xi kitso nga tosi tonda sʼin. 2) Jméni xi nʼio kʼoénelee yaoná nga sʼiaan.

¹⁶ Kʼianga to kjoandiso bakóya je relijión xi tjín sonʼnde, me ngatsʼi je chjota nga tsín makjainle kʼianga je Jeobá tíjna jngole naxinandá xi jtín sʼin tjío je chjotale kʼoa xi ñaki bexkon. Kʼoakjoánti koan kʼianga siglo I, kʼoa kuinga i̱ tsosíni je én xi kisikjetʼani Jesús kʼianga tsakʼéjna kjoabʼetsʼoale: “Nʼai xi tjínli kjoakixi, chjotasonʼndebi likui tsabeli, tonga an tsaʼbele. Kʼoati je chjotanabi tsabe nga ji kinikasénnái. Je chjotabi an tsakakosontsenle [jaʼaínli] jo kjoain nga ji. Tojo kʼoalasʼin koakosontsen ngisale, jméni nga sʼe̱sínile kjoatsjoacha, josʼin nga koantsjoachanái, kʼoa an koatejnajian ni̱ma̱le” (Juan 17:25, 26).

¹⁷ Nijngojinla chjota xi koa̱nle kʼoakuitso tsa tsín tísítjoson Jesús jmeni xi kitsole Nʼaile kʼianga tsakʼétsʼoale. Jé ngʼajko̱ tíjnale je naxinandále Niná kʼoa tíbasenkaoná nga tibʼejnatseen je jaʼaínle Nʼaile kao jmeni xi mele. Tosi tonda kjuintjenngiaa josʼin tíbándiaaná, kʼoa ñaki kao kjoatsjoa si̱tjosoán je xá xi tíbánená nga kʼuínyasoán kʼoa nga chjotale si̱koaa je chjota (Mat. 28:19, 20; Hech. 10:42). Tosi tonda jtín sʼin kuiyoaa. Tsa kʼoasʼiaan, tinitjosonñá jmeni xi kisijé je Jesús kʼianga tsakʼétsʼoa, chʼa̱sjejeyañá je jaʼaínle Niná kʼoa tsjoa sa̱tío tokoán ngantsjai nichxin.