Je libro xi títjon faʼaitʼa je Biblia, xi Génesis ʼmi, itso: “Nga sʼa kitsʼia, Niná kisinda ngʼajmi kao sonʼnde” (Génesis 1:1). Kʼianga jekisinda Niná je tsojmintje kʼoa kao cho̱, kʼiaa kisinda je Adán kao Eva, je chjota xi títjon tsakatío. Je Adán kao Eva alikui koanngóson kao cho̱, nga̱ je Niná kʼoasʼin kisinda nga kʼoati koa̱n koako jme xi tjínle je Niná, jolani tsa kjoatsjoacha. Kʼoati kitsjoale kjoandaí nga koa̱n je skoéjin jme xi sʼin. Kuinga ñaki je yʼasíni yaole jme xi sʼin. Tsa kisitjosonlani jokitsole Niná, koanjin tsakatio ngantsjai kʼoa chjotajchíngalejin koan ngatsʼi chjota xi kitse i̱ Sonʼnde, nyʼánjin tjío kʼoa ñaki chjotatsjejin ngatsʼi, jokjoansʼin koanmele Niná.

Tonga jngo ánkje xi tsakʼanachale je chjota. Kʼoa Satanás tsakʼin, xi tsonile, jngo “xi bʼejnachjoa”. Ánkje jebi, jngo ye̱ kisichjén nga tsakʼanachale Eva. Kʼoakitsole nga ngisa nda kʼoéjna tsa tsín sitjosonle Niná. Je Adán kao Eva koankjainle jme xi kitso je Na̱i kʼoa tsakinyatʼaxinle Niná. Kʼianga kʼoakisʼin, kisicha je kjoanda xi tjínle tsakai nga koa̱n koatio ngantsjai nichxin kʼoa kui kisikakinná je jée kao kjoabiya.

Je Niná tiʼakʼia kʼoakitsoni josʼin kʼoendajin kjoa jebi, josʼin tsjoále kjoanda je xtile Adán nga koa̱n koatio ngantsjai nichxin. Kʼoakitso nga jngo ntje̱, xi tsonile, jngo chjota, xi sikʼien je Na̱i kʼoa kjoaʼaxin je kjoachjaʼatokon xi jaʼaikao je Na̱i, Adán kao Eva (Génesis 3:15). ʼYáni ntje̱ jebi. Kʼiaa tsaʼyale nga jeki nichxin.

Kʼoa je Na̱i tosi tonda koanmele nga kisikitsónjin jme xi tsakʼéndajin je Niná, je jée kao kjoatsʼen ngotjo tsangabasonni Sonʼnde. Kʼiaa jngo jtsínʼio kisikasén Niná xi kisikjesonni chjotatsʼen jebi. Kʼoakitsole je Noé, xi kixi kitʼale, nga jngo kaxa̱je katasínda jñani nga kuinje̱ngile yaole je kʼoa kao yaniʼyale, kʼoa kao cho̱ xi ya sikʼasʼen.

Nga jekicho jngo nó nga tsakʼa jtsínʼio, je Noé kao yaniʼyale kitjoni kaxa̱. Nga kʼia, jechon tsjetsje Sonʼnde, tonga kjesa faʼaijin je ntje̱ xi kitso Niná.

(Yaa yʼangini Génesis 1 saʼnda 11, Judas 6, 14 kao 15 kao Apocalipsis 12:9.)