Tjínkʼa chjota xi kʼoasʼin síkjaʼaitsjen nga ngisa nda koatio kʼiatsa tsjión xínkjín, kʼoa tjínkʼa xi mele nga tosi tonda koatiokao xínkjín tonga alikui ma josʼín tsa kaile xi ijngo. Ninga kʼoalani, me ngatsʼi je xi kʼoasʼin tsjion xínkjín nga kʼiani be nga ngisani ñʼai batio nga jekatsjion xínkjín. Kʼiatsa chriansʼa kinjuin je chjoónli kʼoa tsa xʼinli, kʼoajinti ʼyai nga kuisa jebi xi ngisa nʼio ñʼai male je xi tsjión xínkjín. Chótʼayajinla kʼaa je kjoafaʼaitsjen xi tsjoá Biblia xi koasenkaoli kʼiatsa jekinjio xíngio.

Je chjota nʼio síkijtajin yaole xi tʼatsʼe tao̱n, nga ʼndíxti tjíosíjchá kʼoa nga toje tjío male, kʼoa alikui ndi̱to̱n nda sʼe kon kʼianga jetsjion xínkjín. Jngo ʼndíkʼienchjoón xi psicóloga koan xi Judith Wallerstein tsakʼin kʼoakitso nga ninga jekjoatse kitsjion xínkjín chjota tojo kʼoasatío kon nga totaon kaʼya nga tokanjiotokon. Kʼoa je chjota xi kui kjoa tjíojin kʼoatso nga tsín kixi jme xi matʼain, nga to kjoaba tjín sonʼnde kʼoa nga toje tjío male.

 KJOAFAʼAITSJEN XI KOASENKAOLI:

• Ali nijejinlai tokuin, kʼoasi jomali. Tsakui nichxin chʼao chali je chjota xi tsakijnakoai. Kʼoa ninga chʼaosʼin tsakiyokao je xíngio, tsakui nichxin nʼio aon mali nga tsínni kʼoasʼin tsakiyo josʼin kichoyalai nga kuiyokao xíngio (Proverbios 5:18). Alikui chʼaotjín nga kʼoaʼmilee xi kjaʼaí jomaná, nga̱ ya Biblia kʼoatso nga “tjín nichxin nga chjiʼndá” (Eclesiastés 3:1, 4).

• Ali nikjinjin. Alijme xi koa̱nle kʼiatsa meli nga toji kuijnai kʼianga chjíʼndái, tonga alikui ndatjín tsa tokʼoasʼianntsjai (Proverbios 18:1). Kui tʼeyanajmílai xi ngikʼa jmeni xi ndatjín. Kʼiatsa tokui kʼoasíʼndai jme xi koanli, ningalani kʼoatjín, tochale tosa tosikjinli je miyoli. Kʼiatsa jmeni xi nʼio tjínle kjoandosin xi tjínneli sʼiain nga jekanjio xíngio, je tijélai nganʼio jngo chjota xi nʼio manʼiotʼai.

• Tikuindai yaoli. Kʼianga kʼoasʼin tsjion xínkjín chjota sakʼoa ya nroani nga presiónle mi kʼoa nga kui bʼatsenle xi migraña ʼmi. Kʼiatsa kui kjoa tijnajin, nda tichi, tʼiain ejercicio kʼoa nda sojnafai (Efesios 5:29).

• Tʼetsoai tsojmi xi tsín koa̱nchjénli kʼoa xi kao kjoajti sikjaʼaitsjennili je xi tsakijnakoai, tonga tatiotjoai tsa jme xo̱n kjioli xi nʼio chjíle. Koaan koatiotjaolai ʼndíxtili tsa jmeni, jolani tsa foto xi tsʼe kjoabixanno.

• Alikuijin síkinjeli kjoafaʼaitsjen xi síkinroajen tokoán. Je Olga, xi kʼoasʼin kitsjion je xʼinle nga tsakʼanachale, itso: “Ñaki toʼikixinntsjaile yaona: Jméni xi tjínle chjoón jebi xi tsínna an”. Tonga je Olga tsabe nga to kjoaba bʼejnajin nga kui síkjaʼaitsjen xi tsín ndatjín (Proverbios 18:14).

  Nʼio nkjín xi bʼétʼaxo̱n jmeni xi síkjaʼaitsjen nga̱ binyakao nga nda sʼe kjoafaʼaitsjenle. Kʼiatsa meli kʼoasʼiain, kui tʼetʼaxuin je kjoafaʼaitsjen xi koasenkaoli kʼoa ali tsakuijin bʼetʼai jmeni xi tsín koasenkaoli (Efesios 4:23). Jaola choa̱ kataʼyaa.

  Kjoafaʼaitsjen xi tsín ndatjín: “An kisʼena jée nga kʼoasʼin tsakʼanachana je xi tsakatejnakoa”.

  Kjoafaʼaitsjen xi ndatjín: “Ningalani saténgia alikui koa̱n kui koase̱nngini yaole nga kʼoasʼin kitsjionna”.

  Kjoafaʼaitsjen xi tsín ndatjín: “Ñaki tokjoatjaoni jotjín nó tsakatejnakoa chjota jebi, likuilani je tsakatejnakoa tsakai”.

  Kjoafaʼaitsjen xi ndatjín: “Ngisajin nda sʼe̱ tokoan tsa sichajian jmeni xi koan kʼoa kui kuenta sʼian jmeni xi sʼa nroa”.

• Alikuijin kuenta nʼiai jmeni xi sikiʼaonli xi kuitsoli chjota. Tjínkʼa xíngiaa kʼoa tsa je xi miyoná mani xi mele nga kuinyakaoná, tonga sakʼoa kui kʼoatsoná je én xi nʼio síkiʼaonná kʼoa xi tsín ndatjín. Tobʼelañá, tsa i̱ kuitsoli: “Likui bakinli je chjota xi tsakijnakoai”. “Je Niná jtike nga tsjion xínkjín je chjota.” * Je Biblia itso kjoafaʼaitsjen xi tsjoá: “Ali kuentajin nʼiai ngayeje jmeni xi tso je chjota” (Eclesiastés 7:21). Je Martina, xi jejao nó tjínle nga kitsjion xínkjín, itso: “ʼNdele nga kui kuenta sʼian je én xi sikiʼaonna, tosa bʼenele yaona nga kʼoasʼin sikjaʼaitsjen josʼin síkjaʼaitsjen je Niná. Je kjoafaʼaitsjenle ngisa ngʼa tíjna tikʼoajinni tsaan” (Isaías 55:8, 9).

• Tʼetsʼoalai Niná. Je Niná kʼoatsole je choʼndale nga je katasíkʼami ngayeje jmeni xi síkjaojin, kʼoa ngisa tsa jmeni xi nʼio ñʼai kjimale (1 Pedro 5:7).

Juliana, xi tejngo nó tsakʼejnakao je xʼinle itso: “Kʼoakixinle je xʼinna nga katabʼejna. Tonga kʼianga jekisikʼéjnana síxkónkji koanjtina kʼoa kʼoati koanjtike je chjoón xi kikao”. Nʼio nkjín chjota xi tojo jtike xínkjín ninga jenkjín nó nga kitsjion xínkjín. Ninga kʼoalani, sakʼoa machjén nga kjitʼa fáonajmí kʼiatsa ʼndíxti tjínle.

KJOAFAʼAITSJEN XI KOASENKAOLI:

• Nda jchatokuin je xi tsakijnakoai. Kʼiatsa jme xi kʼoéndajion, tokuikjoan cho̱bayaño kʼoa tongotjo chja̱kaonajmío xíngio. Kʼianga kʼoasʼín xi jekitsjion xínkjín ngisa nyʼán batio (Romanos 12:18).

• Alikuijin nichjain je én xi síkiʼaonná. Ya Biblia jngo testo faʼaitʼa xi nʼio basenkaoná kʼiatsa yaoná tinijtilee. Itso: “Toʼyani xi síkʼéjnatjao énle tjínle kjoankjíntokon” (Proverbios 17:27). Tonga tsa jetokjaʼaí tibixón nga tichobanajmío koaan tosa i̱sí: “Tosikjaʼaitsjenla kʼoa skan chobanajmiá”.

• Tʼenelai yaoli nga tsín tikui sójinni tʼatsʼe chjota xi chixankoai. Tobʼelañá, tʼatsʼe chjotaxá, tʼatsʼe tao̱n kʼoa tsa tʼatsʼe chjinexki.

Je María kʼoatso jmeni xi koan kʼianga jekitsjion xʼinle, je tsotiʼndíle ñaki tokiskiʼndántsjai kʼoa kisongingile yaole. Kʼoa je tsotiʼndíle xi majchínga alijo kitso jotjín kon xi je, tonga kʼoati likui tikʼoakisʼinni josʼínntsjai. Nʼio machjén nga kuisenkoai je ʼndíxtili. Tonga tsakui nichxin likui sin tjínli kʼoa tsínli nichxin nga je kuisenkoai.

KJOAFAʼAITSJEN XI KOASENKAOLI:

• Kʼoatʼinlai je ʼndíxtili nga kʼoakatatsoli jotjío kon, ninga sakʼoa tokjaʼaí kuitso (Job 6:2, 3).

• Nga jngó jngóño nga si̱tjoson jmeni xi kjineno. Tsakui nichxin machjénli nga ʼya xi chja̱kaonajmí nga nda katasʼe tokuin kʼoa tsakui nichxin mele kuinyakaoli je ʼndíxtili, tonga likui ndatjín nga je ʼndíxti si̱jélai nganʼio jme kjoa xi tijnajin (1 Corintios 13:11). Ali tsa jejin ʼndíxtili nikʼami jotjín tokuin kʼoa ni koa̱njinla je sikʼatoyano én.

• Tojo kʼoasʼin katabatio je ʼndíxtino josʼin tjío. Ndatjín nga tojo ya koatio ya ʼnde jñani tjíontsjai kʼoa nga tojo kʼoasʼin josʼín ngantsjai. Tonga xi ngisasa nʼio machjén kuinga tojo kʼoasʼin koanngíntjenngio jmeni xi tjínndajinno xi tʼatsʼe Niná, jolani nga bʼexkiao je Biblia kʼoa nga chotʼayajtíon ya niʼyano (Deuteronomio 6:6-9).

Melissa, xi xjaʼaonjngo nó tsakʼejnakao je xʼinle itso: “Alikui mena nga kʼoakoa̱ntʼen tsakai. Tonga nga kʼoasʼin kisikjaʼaitsjen nga tsín koa̱nna sikʼantjaiya jmeni xi koan ngisa ndatjín tokoan”. Tojosʼin tiʼyaa, koaan nda sʼe̱ kon xi jekitsjion xínkjín.