Je Niná kʼoakitsole je Abrahán kʼianga je ntje̱ xi kinokjoani yaa kjoaʼaíni ntje̱le. Kʼoa totʼatsʼe ntje̱le koa̱nchikontʼainni je chjota xi tjín jngo tjíjtsa Sonʼnde (Génesis 22:18). Xijekoan, je Jacob xi tindaile koan je Abrahán yaa kikʼejna ya naxinandá Egipto. Yaa koannkjínya kʼoa naxinandá Israel tsakʼin nga jekoanni.

Kʼoa xijekoanni kʼianga jeya tjío, jngo faraón tsakʼejna xi tsʼen koan kʼoa choʼnda kisikao je chjota israelita. Tonga je Niná jé profeta Moisés kisichjén kʼianga tsakʼaonsje chjotale ya naxinandá Egipto kʼoa yaa kikao ya ndáchikon xi Ní ʼmi. Je Niná kisijaoya ndáchikon jebi. Xijekoan, kitsjoale kjoatéxoma je chjota israelita kʼianga koandiaale kʼoa nga sikuinda. Kʼoati ya maxki̱kao je xi Te kjoatéxoma kʼoa kʼoati kitsjoale kjoatéxoma jñani kʼoatsakʼinle nga cho̱ katatsjoátʼale Niná nga jchatʼa jéele. Je Moisés kʼoakitsole je chjota israelita kʼianga jngo profeta sikasén je Niná nga koa̱nskanni. Profeta jebi jéní ntje̱ xi kitso Niná nga kjoaʼaí.

Ño siento nó nga koanskanni, je Niná kʼoakitsole je rey David kʼianga je ntje̱ jebi koatexoma ngantsjai nichxin. Ntje̱ jebi jéní xi Mesías koa̱n, je xi Niná tsakasénnda nga kʼoasjentjai je chjotasonʼnde kʼoa xi ʼndenaxó sikao i̱ Sonʼnde.

Sa kisikʼéjnatsen sa kisikʼéjnatsenle Niná je rey David kʼoa kao profeta xi kjaʼaí ʼyani xi Mesías koa̱n. Nga jngó jngó kʼoakitso nga nʼio ndʼé koa̱n kʼoa nga nangitokon koa̱n. Kʼoa nga koatexoma, kjoaʼaxin kjinrá, kjoajchán kao kjoatéxoma xi tsín kixi. Ngatsʼi chjota nyʼán koatiokao xínkjín kʼoa kao je cho̱. Kʼoati tjóxin je chʼin, kjoachjaʼatokon kao kjoabiya, nga̱ tsín kʼoasʼin koanmele Niná nga kui sʼe̱. Kʼoa je chjota xi jekʼien kjoaʼáyanile, i koatio ijngokʼani i̱ Sonʼnde.

Je Niná jé profeta Miqueas kisichjén nga tongini kʼoakitso nga ya naxinandá Belén jtsín je Mesías. Kʼoa je profeta Daniel kʼoati tongini kʼoakitso nga si̱kʼien je Mesías. Tonga je Niná sikjaʼáyanile kʼoa Rey sʼin sikʼéjna ya ngʼajmi. Je Daniel kʼoati kitso nga je Mesías koatexoma kʼoa nga je kʼoéjnayangajaole ngatsʼi chjotaxá sonʼnde. Tonga, a kʼiakjoán jaʼai je Mesías tojo tso én xi tongini kinokjoa.

(Yaa yʼangini Génesis 22 saʼnda 50, Éxodo, Deuteronomio, 2 Samuel, Salmos, Isaías, Daniel, Miqueas kao Zacarías 9:9.)