1, 2. 1) Jóma je barré nga nda masinle. 2) Nichxin nga tsakʼejna Jesús, ánni nga nʼio nkjín chjota xi kʼoasʼin tsakatiosíni joni tsa barré xi tsínle xi koʼnda.

JE BARRÉ nʼio nda makjoan kʼianga nda síkuinda je xi koʼnda. Jngo xo̱n xi kui nchja̱ni josʼin makuinda je barré, kʼoatso nga jngo chjota xi tofisíkjen je barréle kʼoa likui sísinle, nga jefaʼato jngo jao nó jenʼio nkjín xi tjíomʼe kʼoa lijonisʼin machjénle. Tonga, nga nda masinle je barré nda makjoan.

² Kʼoati ma ya jinjtín. Kʼianga je xi chjotajchínga sʼin tjío nda sísinle je ndsʼee kao tichjaa nda batio ngatsʼi. Si̱kjaʼaitsjenla je Jesús nga koanmakená nga tsabe je chjotankjín “nga kʼoasʼin tjíotsaoba, kʼoa tʼaxin tjío, joni barré xi tsínle xi koʼnda” (Mat. 9:36). Ánni nga to kʼoasʼin tsakʼetsomasíni. Kuinga je xi kjinele nga kuitsoyale tsakai je kjoatéxomale Niná nʼio tsʼen koan kʼoa nʼio tsakʼénele je chjota nga kʼoakatasʼín jmeni xi saʼnda tsínni kʼoakisʼin je. ʼNdele nga kuinyakao kʼoa nga sikuinda je naxinandá, je chjota ngʼajko̱le relijión tosa nʼio tse xi kisijéle nga katasʼín, ñaki “chʼá xi ai” kisikʼami (Mat. 23:4).

3. Jméni xi kuenta katasʼín je xi chjotajchínga sʼin tjío josʼin síkuinda je jtín.

³ Je xi chjotajchínga sʼin tjío ndʼaibi nʼio tse xá kjinele. Je chjota xi tjíosíkuinda tsʼee Jeobá kao Jesús, je “xi nda koʼnda barré” (Juan 10:11). Je Jesús nʼio chjí be chjota jebi, saʼnda kitsjoantjai kjoabijnachonle xi totʼatsʼe kʼoa kao njínle “xi nʼio chjíle” tsakatseni (1 Cor. 6:20; 1 Ped. 1:18, 19). Je xi chjotajchínga sʼin tjío machjén nga kuenta katasʼín nga je xi séjnatítjonle jéní je Jesucristo, xi “nda koʼnda barré” kʼoa jé tsjoále kuenta josʼin sikuinda je chjotale (Heb. 13:20).

4. Jméni xi chótʼayá i̱ kjoaʼmiya jebi.

⁴ Jósʼin tjínnele skoe̱kon je choʼndale Niná je xi  chjotajchínga sʼin tjío. Ngatsʼi je xi tjío ya jinjtín kʼoaʼmile nga katasítjosonle je xi tjíobándiaale. Xi ijngosani, je xi chjotajchínga sʼin tjío kʼoaʼmile nga tsín je koatexomale je chjota xi Niná tsakánele nga sikuinda (Heb. 13:17; tʼexkiai 1 Pedro 5:2, 3). Jósʼin je xi chjotajchínga sʼin tjío nga tsín toje koatexoma nga koandiaale je jtín. Xi tsonile, jósʼin koandiaale je jtín nga tsín sikʼatone choa̱le josʼin sichjén je xá xi kitsjoale Niná.

5. Jméni xi tsoyaná xi tʼatsʼe Jeobá ya Isaías 40:11.

⁵ Je profeta Isaías i kitso xi tʼatsʼe Jeobá: “Tojo sʼín chjota xi cho̱ntje koʼnda kʼoasʼin skóʼnda barréle. Kao xjale kʼoexkóni je barréʼndí; kʼoa kʼoangʼa. Tobijbi koandiaale je xi sʼa ʼndí tjínle” (Is. 40:11). Je testo jebi kui bakóyaná nga je Jeobá síkuinda kʼoa sísinle je xi jetjíonroajen kjoamakjainle kʼoa kao xi nganʼio machjénle. Tojo sʼín jngo chjota xi barré koʼnda nga be jmeni xi machjénle nga jngó jngó barréle kʼoa tíjnanda nga sísinle jokjoan xi nganʼio machjénle, kʼoakjoánti sʼín je Jeobá nga kuenta tísʼín josʼin tjío nga jngó jngó je choʼndale kʼoa tsjoa sʼele nga basenkao. Kʼoa josʼín je xi koʼnda barré nga bʼangʼa kʼoa bʼéjtéjin najñole je barréʼndí xi sʼa katsin kʼianga machjénle. Je Jeobá, “je Nʼai xi tsʼe kjoamatakon”, kʼoatisʼin sikuindaná kʼoa tsjoánganʼioná tsa jme kjoa kuitjátojiaan kʼoa tsa jme xi koa̱nchjénna (2 Cor. 1:3, 4).

6. Jósʼin skénngi choa̱le Jeobá je xi chjotajchínga sʼin tjío nga sitjoson je xá xi kjinele.

⁶ Nʼio nda choa̱ bʼéjnale Jeobá je xi chjotajchínga sʼin tjío. Tojo sʼín je Jeobá, je xi chjotajchínga sʼin tjío kʼoatisʼin kuenta katasʼín josʼin tjío je choʼndale Niná. Kʼiatsa be je xi chjotajchínga sʼin tjío jme kjoa xi tjíofaʼatojin kʼoa tsa jme xi machjénle je choʼndale Niná kuinyakao kʼoa tsjoánganʼiole (Prov. 27:23). Kui xi tsonile, nga je xi chjotajchínga sʼin tjío tjínnele kjoakaonajmí je ndsʼee kao tichjaa. Ningalani tsín toje tjínnele skoe̱yeje josʼin tjíosíjchá yaole je xíngiaa, tonga kuenta sʼín jmeni xi be kʼoa jmeni xi nrʼoé ya jinjtín kʼoa ngasin nganda binyakao je xi jetjíonroajen kon (Hech. 20:35; 1 Tes. 4:11).

7. 1) Jókisʼin je chjota xi kisikuinda je choʼndale Niná nichxinle Ezequías kao Jeremías. 2) Jméni xi bakóyale je xi chjotajchínga sʼin tjío kʼianga tsín kisasenle Jeobá jokisʼin je chjota xi kisikuinda je naxinandále.

⁷ Si̱kjaʼaitsjenla jokisʼin je chjota xi kisikuinda je naxinandále Niná nichxinle Ezequiel kao Jeremías. Je Niná alikui kisasenle jokisʼin chjota xokjoan nga tsín nda kisikuinda je naxinandále. Je naxinandále yaa koanngóson joma je barré nga cho̱ tsoa kʼoa nga tocha nga tsín ʼya xi síkuinda. ʼNdele nga sikuinda tosa totaon tsabe kʼoa to yaole kini (Ezeq. 34:7-10; Jer. 23:1). Je Jeobá kʼoati tsín tísasénle je chjotatítjonle relijión xi tjín ndʼaibi nga̱ kʼoati tjíosʼín. Kʼoa kuinga nʼio chjísínile nga je xi chjotajchínga sʼin tjío, ñaki kao kjoatsjoacha katasíkuinda je choʼndale Niná.

8. Jósʼin skénngi choa̱le Jesús je xi chjotajchínga sʼin tjío kʼianga tsjoále kjoafaʼaitsjen je ndsʼe̱.

⁸ Nga kʼoasʼin chjotajée kitje̱nni je choʼndale Niná sakʼoa ñʼai majinle jmeni xi mele Jeobá. Tsakui nichxin likui Énle Niná kʼoangini jmeni xi sʼin kʼoa tsakui kʼoasʼinje̱ jmeni xi koako nga kje matajajin je kjoamakjainle. Jméni xi sʼin je xi chjotajchínga sʼin tjío nga kʼoama. Kui choa̱le Jesús koaitjenngi nga nʼio tsejta koan kao chjotale kʼianga kui tsakjaotiyani ʼyani xi ngisa ngʼa kʼoéjna. ʼNdele nga koa̱njtile, je Jesús tosa tosi tonda  kitsoyale kʼoa kitsjoale kjoafaʼaitsjen nga nangitokon katama (Luc. 9:46-48; 22:24-27). Kʼianga tsakanéjon ndso̱ko̱, jngo choa̱ tsakʼéjnale nga nangitokon katama. Kʼoa ndʼaibi, je xi chjotajchínga sʼin tjío kʼoati tjínnele nga nangitokon koa̱n (tʼexkiai Juan 13:12-15; 1 Ped. 2:21).

9. Jósʼin kisikixiyandale Jesús je chjota tje̱nngile.

⁹ Je Santiago kao Juan alikui kʼoasʼin kisikjaʼaitsjen josʼin kisikjaʼaitsjen je Jesús tʼatsʼe je xá xi tjínle jngo xi síkuinda je choʼndale Niná. Je Santiago kao Juan kui xi mele nga ngʼa xá sʼe̱le kʼianga koatexomakao Jesús. Tonga je Jesús i kitsole: “ʼYanío nga je chjotatítjonle chjota xi li judíojin síkʼéyongi chjotale tʼatsʼe kjoatéxomale, kʼoa je xi ngʼajko̱le nʼio bʼénele. Tonga jinle nga jon, likui kʼoakoa̱n, tosa toʼyanibe xi mele nga jeya kʼoéyojinno nga jon, katasíxále xikʼa” (Mat. 20:25, 26). Je pastro tjínnele nga tsakʼéchjoale yaole nga tsín je koatexomale ndsʼe̱, xi tsonile, nga tsín je kʼoakuitsontsjaile jmeni xi sʼin.

10. 1) Jósʼin mele Jesús nga katabekon je chjotale je xi chjotajchínga sʼin tjío. 2) Jmé choa̱ xi nʼio nda tsakʼéjna je pastro Pablo.

¹⁰ Je Jesús kui xi mele kʼianga je xi chjotajchínga sʼin tjío kʼoatisʼin katabekon je chjotale josʼin tsabekon je. Nga jo choʼnda sʼin katabatio ʼndele nga ngʼajko̱ sʼin koatiole je ndsʼe̱. Je Pablo tsakakó kjoanangitokon tojosʼin bakó je én xi kitsole je xi chjotajchínga sʼin tsakatio ya Éfeso, kitsole: “Nanda tjínjinno josʼin nga kikoa yaona kʼia nga tsakatejnakaono ngantsjai saʼnda nga jaʼasʼentítjoan i̱ Asia. Indanangi kisixále je Nainá”. Je pastro Pablo kui xi koanmele nga nangitokon katama je xi chjotajchínga sʼin tjío kʼianga kuinyakao je ndsʼe̱. Xijekoan i kitsole: “Ñaki kʼoasʼin tsakakono nga kjaínga tomachjén nga kʼoasʼin nixá nga kuinyakoaa xi tjíomʼe”, xi tsonile, je xi tjíosíkinroajen kon (Hech. 20:18, 19, 35). Kʼoa kʼianga kiskile je chjotale Cristo xi tjío ya naxinandá Corinto kʼoakitsole nga tsín naile mani, nga tsín je tjínnele kʼoenele jmeni xi koa̱nkjainle. Nga tosa kui xi kisʼin nga tsakinyakao je ndsʼe̱ nga ñaki kao kjoatsjoa sixále je Jeobá (2 Cor.1:24). Je pastro Pablo nʼio nda choa̱ tsakʼéjnale je xi chjotajchínga sʼin tjío ndʼaibi nga nangitokon katama kʼoa nga nda katasíxá.

11, 12. Jngo xi chjotajchínga sʼin tíjna, jósʼin koasenkao je ndsʼee kʼianga jmeni xi skoéjin.

¹¹ Je xi chjotajchínga sʼin tjío ya jinjtín machjénní nga “nda katafikao je én xi kjoakixi, josʼin tísakóya” (Tito 1:9). Tonga kao kjoaʼindajintokon kʼoakatasʼínni (Gál. 6:1). Jngo xi chjotajchínga sʼin tíjna, xi tjínle kjoafaʼaitsjen, alikui bʼénele je ndsʼe̱ jmeni xi sʼin. Tosa binyakao nga ya Biblia katabʼangini jmeni xi sʼin kʼoa nga kui katafini jokji tsjoake je Jeobá. Tobʼelañá, tsa jmeni xi nʼio tjínle kjoandosin xi sʼin je ndsʼee, je xi chjotajchínga sʼin tíjna koaan koakoyale jmeni xi tso je Biblia kʼoa tsamaije̱ je xo̱n xi bʼasje naxinandále Niná xi kui tínchja̱ni. Koaan kʼoakuitsole nga katasíkjaʼaitsjenjin josʼin kʼoéjna ngixko̱n Jeobá tʼatsʼe jme xi skoéjin. Kʼoati koa̱n kʼoakuitsole nga títjon kjoanla Niná katabʼétsʼoale nga katabándiaale tongini nga kjesa jme xi sʼínjin (Prov. 3:5, 6). Tonga nga jekʼoaile kjoafaʼaitsjen ndsʼee jebi, jé xi kuitsoni jmeni xi sʼin (Rom. 14:1-4).

¹² Je xi chjotajchínga sʼin tjío, kʼianga tsjoále kjoafaʼaitsjen kʼoa nga kuitsoyale je ndsʼee, kui sichjén jmeni xi tso je Biblia. Kuinga nʼio machjénsíni nga nda katabe jotso je Énle Niná kʼoa nga ñaki ya katabʼangini je kjoafaʼaitsjen xi tsjoá. Kʼoa kʼoasʼin koakoni nga tsín tífaʼatone  je kjoatéxoma xi kitsjoale Niná. Nga̱ tsín tsa jejin xi ngʼajko̱ tjíole je choʼndale Niná. Nga̱ jmeni xi skoéjin nga jngó jngó je ndsʼee jé Jeobá kao Jesús tsjoále kuenta (Gál. 6:5, 7, 8).

13, 14. Je xi chjotajchínga sʼin tjío, jósʼin koatiole choa̱ je choʼndale Niná.

¹³ Kʼianga jekʼoakitsole pastro Pedro je chjotajchínga xi tjío ya jinjtín nga tsín yaole katabʼasjengʼa ya jinle ndsʼe̱, kʼoakitsole nga tosa je katabatíole choa̱ (1 Ped. 5:3, TNM). Jósʼin koaitjenngi kjoafaʼaitsjen jebi je xi chjotajchínga sʼin tjío. Jaola koya kataʼyaa jmeni xi tjínnele sʼin je “xi mele xá nga sikuinda naxinandále Cristo”. Xi títjon, tjínnele nga “chjotaʼindatakon” katama kʼoa nga “male batéxoma[le] niʼyale”. Kʼiatsa jngo ndsʼee xi mele nga chjotajchínga sʼin kʼoéjna tjínnele “chjotaʼindatakon” koa̱n, xi tsonile, nga ñaki nda machoyale jmeni xi tso Biblia kʼoa nga tísítjoson. Kʼiatsa jmeni kjoa xi nʼio ñʼai tjín tífaʼatojin be josʼín kʼoa nda kjoanla síkjaʼaitsjenjin tongini nga kje jme xi sʼínjin. Xi majaoni, kʼiatsa familia tjínle machjénní nga nda koasentítjonle, nga̱ “je xi tsín tsa male batéxoma[le] niʼyale, jósʼin sikuinda naxinandále Niná” (1 Tim. 3:1, 2, 4, 5). Kʼianga tjíosítjoson jebi je xi chjotajchínga sʼin tjío, sínʼiotʼa ngatsʼi je ndsʼee xi tjío ya jinjtín.

¹⁴ Ijngosa koya xi sʼin je xi chjotajchínga sʼin tjío, kuinga je títjon katabatío choa̱ kʼianga kuitsoyason je Énle Niná. Je Jesús kʼoakisʼin, je xi ngisa títjon kisikʼéjna kʼianga jaʼai i̱ Sonʼnde kuinga kitsoyason je énnda chjotse. Xi ijngosani, kitsoyale je chjotale josʼin sitjoson xá jebi (Mar. 1:38; Luc. 8:1). Nichxin xi tiyoaa ndʼaibi, kʼoati nʼio tsjoa sʼele je xi jetsoyason nga bitjokao je xi chjotajchínga sʼin tjío, nga ñaki tsjoa tjíole nga kʼoasʼín xá jebi. Kʼoa je ndsʼee kʼoati kui choa̱ fitje̱nngi josʼin fákao chjota je xi chjotajchínga sʼin tjío. Kʼianga be je ndsʼee, nga je xi chjotajchínga sʼin tjío bʼasjeʼa nichxinle nga tsoyason ninga tse xá kjinele, kʼoati sʼín tsanda je. Je xi chjotajchínga sʼin tjío, kʼoati nʼio nda choa̱ batío nga nʼio nda kotʼaya jmeni xi faʼa ya kjoajtínná kʼoa nga tsjoá énle. Kʼoa nga tsjoánganʼio nga matsje kʼoa nga masinle je Ndʼia jña chotʼayá (Efes. 5:15, 16; tʼexkiai Hebreos 13:7).

15. Tikʼaxki̱la kʼai anni nga fisíxatʼasíni ndsʼee je xi chjotajchínga sʼin tjío.

¹⁵ Jngo chjota xi barré koʼnda kjitʼanangi sísinle tsa jngo barréle kamiʼaon kʼoa tsa jme xi kamale. Kʼoakjoánti tjínnele sʼin je xi chjotajchínga sʼin tjío kʼiatsa ʼya xi nganʼio machjénle ya jinjtín, kjitʼanangi sisinle. Je ndsʼee xi jejchínga kao xi tjíomʼe machjénle nga kuinyakao, tonga xi ngisa nʼio machjénle kuinga tsjoánganʼiole kao Énle Niná (1 Tes.  5:14). Kʼoa je xi sʼa xti, tsakui nichxin nʼio tse kjoa tjíofaʼatojin kʼoa machjénle nganʼio nga tsínkui katasíkinjele “kjoaskáyale xti” (2 Tim. 2:22). Je xi chjotajchínga sʼin tjío binyakao ngatsʼi xi tjío ya jinjtín kʼianga fisíxatʼa ya niʼyale. Kʼoa nga kʼoasʼín yaa beni jme kjoa xi tjíofaʼatojin je ndsʼee kʼoa kao Biblia tsjoánganʼionile. Kʼianga kjitʼanangi sʼendajin jngo kjoa, alikui matse.

16. Kʼianga jme xi bʼetʼale je ndsʼee xi tjío ya jinjtín, jméni xi tjínnele sʼin je xi chjotajchínga sʼin tjío.

¹⁶ Tonga tsa tse kjoa tíjnajin je ndsʼee kʼoa jexkón tíbʼejna ngixko̱n Niná, jméni xi sʼin je xi chjotajchínga sʼin tjío. Je Santiago i kitso: “A tíjnajinjngono xi tímʼen. Katanchja̱le chjotajchínga xi tsʼe chjotale Cristo, katabʼétsʼoantjai xi tʼatsʼe xi tímʼen, katasíkajon siti̱ kao jaʼaínle Nainá [Jeobá]. Tsa makjainná kʼia nga bʼetsʼoantje, kuitjontjai je xi tímʼen, kʼoa je Nainá sikisótjen. Tsa tsajngi jée, kʼoasʼin cha̱tʼale” (Sant. 5:14, 15). Tsakui nichxin tjín jme xi tíbʼetʼale jngo ndsʼee kʼoa likui jokuitsole je xi chjotajchínga sʼin tjío, tonga je xi chjotajchínga sʼin tjío tjínnele kjoan koasenkao ndsʼee jebi kʼianga sʼe̱jinle nga tjín xi kjimale. Kʼianga kʼoasʼin bʼétsʼoantjai je ndsʼee kʼoa nga binyakao nga nganʼio machjénle kʼoasʼin tjíobakóni nga ñaki kjimale tjíosíkuinda je choʼndale Niná xi kjinele (tʼexkiai Isaías 32:1, 2). *

17. Jmé kjoanda xi sʼe kʼianga je Jesucristo kjenngile je xi chjotajchínga sʼin tjío.

¹⁷ Kʼianga sítjoson je xá xi kjinele je xi chjotajchínga sʼin tjío, bʼénele yaole nga kjenngi choa̱le Jesucristo, je xi “nda koʼnda barré”. Kʼianga kʼoasʼin tsjoánganʼio je xi chjotajchínga sʼin tjío tosi tonda mataja kjoamakjainle je jtín kʼoa kixi fitʼale Niná. Jé Jeobá bʼailee kjoanda kʼoa chʼasjengʼaa nga tjínná xi síkuindaná nga̱ jéní xi séjnatítjon josʼin tísíkuindaná.