XI TÍNCHJA̱NI REBISTA JEBI: ÉNNDISO XI BʼÉCHJOANÁ NGA NICHRIANTʼALEE NINÁ
Énndiso xi bʼéʼma ʼyani je Niná
JOSʼIN MAKJAINLE CHJOTA
Jngo xo̱n kijna xi i̱ tso: “Je xi Trinidad ʼmi kui tsoyanile nga jan mani je Niná: je Nʼai, je ʼNdí kʼoa kao je Espíritu Santo; kʼoa nga tojngo mani nga jan” (Diccionario Akal crítico de Teología). Kʼoa ijngosa xo̱n xi i̱ tso: “Kʼoasʼin makjainle je chjota xi ya tjíojin relijión Católica, Ortodoxa, Anglicana kao Protestante” (Diccionario abreviado del cristianismo).
JE BIBLIA ITSO
Je Jesús je ʼNdíle Niná, alikuikʼia kʼoakitso tsa mangóson kʼoa tsa tijéni je Nʼaile. I kitso: “Nga̱ kʼoakixian nga kjuíkonle Nʼainá. Je Nʼainá ngisa títjon kaoni tsa an” (Juan 14:28). Kʼoa jngo chjotale xi i̱ kitsole: “Tifimikonle Nʼaina, kʼoati je Nʼaino, je Ninána, kʼoati Nináno” (Juan 20:17).
Kʼoa je espíritu santo ali jngojin niná. Tobʼelañá, je Biblia kʼoatso nga “kjaínga tokisʼejin ni̱ma̱le ngatsʼi [chjotale Cristo] je Espíritu Santo”. Kʼoa je Jeobá i kitso: “Je Espíritu Santona sikʼabísonle ngatsʼi chjota” (Hechos 2:1-4, 17). Jebi kui xi bakóná nga je espíritu santo ali tsa jngojin niná, kui nganʼio xi síchjén Niná xi kʼoaʼmi.
ÁNNI NGA MACHJÉNSÍNI NGA KATAʼYAA JEBI
Je xi Karl Rahner kʼoa kao xi Herbert Vorgrimler tsakʼin, xi Biblia kiskotʼayason, i kitso xi tʼatsʼe Trinidad: “Likuijin josʼin jchañá jmeni xi Trinidad ʼmi tsa tsín jesoa Niná kʼoejnatsen, kʼoa tsanda jekʼoejnatsen Niná tojo likuijin ñaki koa̱njinná jotjínni”. A koaan tsjoacha koaan tsa ʼyani xi tsín ñaki ʼyaa. Maijin. Kʼoakjoánsʼin tíjna xi tʼatsʼe Trinidad, kʼoa yaa nroani nga tsín tsjoake mani Niná je chjota.
Je Marco, xi jesa kabʼaxki̱, kʼoatso nga ñʼai koanle nga kisichriantʼale Niná nga kʼoasʼin tʼatsʼe Trinidad koankjainle. I kitso: “Kʼoasʼin kisikjaʼaitsjen nga bʼéʼma Niná jokjoan, kʼoa nga kʼoasʼín likui josʼin jchañá kʼoa likui josʼin koa̱nchriantʼanilee”. Tonga je Biblia kʼoatso nga je Niná ali “tsa kjin tíjnaná nga jngójngoá” (Hechos 17:27). Je Niná likui bʼéʼma jokjoan. Je Jesús kʼoakitso nga ñá ʼyañá je Niná xi ʼyaxkoán (Juan 4:22).
Je Marco itsosa: “Kʼianga koanjinna nga tsínni Trinidad je Niná koan kisimiyoa”. Kʼiatsa kʼoasʼin koa̱nkjainná nga ñaki tíjna je Jeobá ngisa choa ñʼai koa̱nná nga tsjoacha koaan. Je Biblia itso: “Je xi tsín tjaoke, nikʼiajin tsabe Niná. Jé Niná xi kjoatjaocha” (1 Juan 4:8).
