Ñandia nga tíjna Jesús ya Jerusalén kinchjani tʼatsʼe je Nʼaile xi tíjna ngʼajmi, kʼoa ñaki tsakʼéjnatseen nga ñaki to kjoandiso xi tjíosʼín je chjota xi nyatítjonle relijión nga kui nichxin (Juan 8:12-30). Jmeni xi kitso kui bakóyaná jósʼin jchañá tsa ñaki kʼoatjín jmeni xi tso chjota tʼatsʼe Niná. I kitso: “Tsa énna si̱kitjosonntsjao, jon nío xi ñaki chjotana. Jchanío xi kjoakixi, kʼoa je xi kjoakixi sikatíondaíno” (Juan 8:31, 32).

Jósʼin jchañá tsa kʼoatjín kʼoa tsa mai jmeni xi sakóyaná tʼatsʼe Niná. Je Jesús i kitso: “Tsa énna si̱kitjosonntsjao”, kui xi kitsonile kʼiatsa jme xi sakóyaná tʼatsʼe Niná koaan chjónangilee yaoná jebi: “A mangóson jmeni xi tíʼmiyana jmeni xi tsakakóya Jesús kʼoa kao jotso je Biblia”. Koaan kʼoati sʼiaan jokisʼin je chjota xi kinrʼoé jme xi kitsoya pastro Pablo. Jméni xi kisʼin. Nda kiskotʼajin je Énle Niná nga tsabe tsa kʼoatjín jme xi tsakʼinyale (Hechos 17:11).

Kʼoa kʼoati kisʼin je Marco, Rosa kao Raimunda, je xi jenása kanikʼaxkiaa. Kao testigole Jeobá kiskotʼaya Biblia. Jókisatio kon nga jetsabe jotjínni xi tʼatsʼe Niná.

Marco: Itso: “Je testigo xi tsakakóyanajin, Biblia kisichjén nga kitsoyanajin jme xi kichjonangilaijin an kʼoa kao chjoónna. Bijbi koantsjoachaijin je Jeobá kʼoa ngisa nʼio kisʼejna kjoabixannajin”.

Rosa: Itso: “Kʼoasʼin kisikjaʼaitsjen nga to kjoachjine sonʼnde nya je Biblia, xi kui bakóya jotso chjota ʼyani je Niná. Tonga nga jekiskotʼaya je Biblia ñaki yaani tsaʼbe jmeni xi kjonangile yaona tsakai. Ndʼaibi ñaki tjínjngo tokoan nga tíjna je Jeobá kʼoa nga ñaki koa̱n sinʼiotʼa”.

Raimunda: Itso: “Tsakʼetsʼoale Niná kʼoa kʼoakixinle nga mena skoe xi tʼatsʼe. Kʼoa xi koanskanni, kichotʼayaníjin Biblia kao xʼinna. Kʼoa koanjinnajin jokjoantjínni xi tʼatsʼe Jeobá. Nʼio tsjoa kisatio tokuinjin nga tsaʼyaijin jokjoan je Niná”.

Je Biblia ñaki síkʼéjnatsen nga tsínni kʼoatjín je énndiso xi sakóya tʼatsʼe Niná, kʼoa bakóya jokjoan. Kʼoa nga tʼatsʼe Niná kinroani, kʼoati basenkaoná nga ʼyaa “je kjoa xi Niná kitsjoakjoatjaoná”, xi tsonile, nga machoyaná jokjoantjínni xi tʼatsʼe Niná kʼoa jmeni xi tjínndajinle (1 Corintios 2:12). A meli jchai jotso Biblia xi tʼatsʼe Niná, jmeni xi tjínndajinle kʼoa jmeni xi sʼin nichxin xi nroaján. Koaan ya tje̱n www.pr418.com/mau si̱jéni tsa meli nga sa̱kóyali Biblia kʼoa tsamaije̱ koaan jngo testigole Jeobá kʼoakʼuínlai nga katabakóyali. Kʼiatsa kʼoasʼiain, kui xi koasenkaoli nga ñaki tsjoacha koai̱n je Niná.