Tjínkʼa chjota xi ñʼai male nga matsjoake Niná nga̱ kʼoasʼin síkjaʼaitsjen nga tsín koa̱n skoe̱ jokjoan, nga nʼio kjin tíjna kʼoa saʼnda kʼoatso nga nʼio tsʼen Niná. Itso kʼa chjota:

• “Ningalani kisijéle Niná nga katabasenkaona, tonga kʼoasʼin kisikjaʼaitsjen nga nʼio kjin tíjna. Alikui kʼoasʼin kisikjaʼaitsjen tsa kʼoaniti male Niná jomaná xi chjotaa.” (Marco, xi Italia tsʼe.)

• “Mena nga sixále Niná tsakai, tonga kʼoasʼin kisikjaʼaitsjen nga tsínkʼia skoe nga̱ nʼio ngʼa tíjna. Kʼoasʼin kisikjaʼaitsjen nga nʼio tsʼen kʼoa nga to kjoañʼai tsjoáná. Likuijin nda chjota Niná kixinña.” (Rosa, xi Guatemala tsʼe.)

• “Kʼianga sʼa ʼndí kjiʼe̱ kʼoasʼin koankjainna nga je Niná tokui kotsenle jñani chʼao nʼia ánni nga tsjoásíniná kjoañʼai. Xijekoan, kʼoasʼin kisikjaʼaitsjen nga tsín mandosinlee, josʼín tsa jngo chjotaxá xi tsínni ñaki mandosinle je chjota xi batéxomale.” (Raimunda, xi Canadá tsʼe.)

Kʼoa ji jósi, a tsín mandosinle je Niná xi tʼatsaan. Jokji nga tínroa nichxin, nkjín chjota xi makjainle tʼatsʼe Cristo xi kjonangile yaole xi tʼatsʼe jebi. Tobʼelañá, tje̱n nó 500 saʼnda chrianle nó 1500, me tongatsʼi xi chjotale Cristo kitsole yaole nga tsín tsakʼétsʼoale Niná. Ánni. Kuinga kitsokjonle. Je chjota xi Will Durant tsakʼin xi kui kiskotʼayason tʼatsʼe jebi kʼoakitso nga kui kʼoakisʼinni nga nʼio chjotajée sʼin tsabekon yaole kʼoa nga kʼoasʼin kisikjaʼaitsjen nga nʼio kjin tíjna je Niná kʼoa nga nʼio tsʼen.

Ánni nga kʼoasʼin síkjaʼaitsjensíni je chjota xi tʼatsʼe Niná. Jmékjoánni xi bakóya je Biblia. A tsjoacha koaan je Niná tsa ʼyalañá jokjoantjínni xi tʼatsʼe.