1, 2. Ánni nga kui síngósonkaosíni yaole Jeobá je chjota xi barré koʼnda.

JE Jeobá kʼoasʼin síngósonkao yaole joni tsa jngo chjota xi barré koʼnda (Ezeq. 34:11-14). Je choa̱ jebi kui bakóyaná jokjoan je Jeobá. Jngo chjota xi nʼio tsjoake barréle, nʼio mandosinle kʼoa nda síkuinda nga tsín jme xi katamale. Yaa fikoʼnda jñani nga nʼio tjín jñá kʼoa jñani nga tjín nandá (Sal. 23:1, 2); síkuindaa nga nichxin kao nga nitje̱n (Luc. 2:8); síkuindaa nga tsín tsa cho̱toán katabichónrʼoe (1 Sam. 17:34, 35); bʼangʼa je barré xi sʼa katsin (Is. 40:11); básjai je xi kacha kʼoa sísinle tsa jngo xi kamiʼaon (Ezeq. 34:16).

² Je chjota israelita nʼiojin nda koanjinle choa̱ jebi nga̱ kui xá kisʼin nga cho̱ kiskoʼnda kʼoa nga tsojmi tsakʼéntje. Nʼiojin nda be josʼin makuinda je barré kʼoa josʼin masinle. Kʼoati machjénle je chjota nga je Jeobá sikuinda kʼoa nga jé koandiaale (Mar. 6:34). Tsa tsín nda sʼe̱ndiaale kʼoa tsa tsín kuenta koa̱n je chjota tse kjoañʼai faʼá. Likui machoyale jmeni xi ndatjín kʼoa jmeni xi chʼaotjín, kʼoasʼin mangóson “joni tsa barré xi tsínle xi koʼnda” nga totjíotsaoba (1 Rey. 22:17). Je Jeobá nʼio tsjoake je choʼndale kʼoa tsjoále jmeni xi machjénle.

3. Jméni xi koakoyaná kjoaʼmiya jebi.

³ Ñá kʼoati ʼyaa nga je Jeobá ya mangóson jngo xi barré koʼnda. ʼYañá nga nda tísíkuinda je choʼndale nichxin xi tiyoaa ndʼaibi. Kuila kataʼyaa jósʼin tíbándiaaná kʼoa jósʼin tísíkuindaná je Jeobá kʼoa jméni xi koa̱n sʼiaan nga si̱tjosonlee.

4. Jmé xá xi tjínle Jesús nga tísíkuinda je naxinandále Jeobá.

⁴ Jé Jesús xi ngʼajko̱ sʼin kisikʼéjna Jeobá ya jinnaxinandále (Efes. 1:22, 23). Je Jesús “xi nda koʼnda barré” kʼoati sʼín joni tsa je Nʼaile. Tsjoake je barréle  kʼoa síkuindaa. Saʼnda kitsjoantjai yaole “xi totʼatsʼe barré” (Juan 10:11, 15). Je kjoabʼechjíntjaile Cristo nʼio tse kjoanichikontʼain jaʼaikaole je chjotasonʼnde (Mat. 20:28). Je xi mele Jeobá kuinga ngatsʼi “xi makjainle tʼatsʼe, likui cha̱, [...] tjínle kjoabijnachon ngantsjai” (Juan 3:16).

5, 6. 1) ʼYáni xi tsakinyánda Jesús xi sikuinda je barréle. 2) Jméni xi tjínnele sʼin je barré kʼianga sitjosonle je xi tsakinyánda je Jesús. 3) Ánni nga si̱tjosonsínilee je xi chjotajchínga sʼin tjío.

⁵ Jósʼín je barré nga nchja̱le je Jesucristo. Je Jesús i kitso: “Je barréna nrʼoé jta̱na, kʼoa an ʼbexkonnía, kʼoa fitjenngina” (Juan 10:27). Kʼianga kuinóʼyá je jta̱le Jesús kui xi tsoyanile nga kjuintjenngiaa josʼin tíbándiaaná, nga kʼoainganʼiolee je choʼndale xi tsakinyánda. Je Jesús kʼoakitso nga je pastrole kʼoa kao chjota tje̱nngile tosi tonda kʼoasʼin je xá xi tsakʼétsʼiakao, nga kuitsoyale kʼoa nga sikuinda je barréle (Mat. 28:20; tʼexkiai Juan 21:15-17). Kʼianga tsangabason je énnda chjotse kʼoa nga koannkjín je chjotale, je Jesús tsakinyándaa je chjotale xi nda be je Énle Niná nga sikuinda je jtínle (Efes. 4:11, 12).

⁶ Je pastro Pablo kʼoakitsole je xi nyatítjonle je jtínle Cristo xi kisʼejna ya Éfeso nga siglo l, nga kao nganʼiotsjele Niná kixinyandani nga kʼoasʼin sikuinda “naxinandále Nainá [Niná]” (Hech. 20:28). Je xi chjotajchínga sʼin tjío ndʼaibi ya jinjtín kʼoati kao nganʼiotsjele Niná tjoéjinni. Ánni kʼoabixónsíñá. Kuinga títjon kjoanla chotsenle tsa tjíosítjoson jotso je Énle Niná nga̱ kao nganʼiotsjele kichjini. Kʼoa kʼianga nitjosonlee je xi chjotajchínga sʼin tjío jé Jeobá kao Jesús tibakolee kjoaxkóntokon, je xi nda koʼnda barré (Luc. 10:16). Kʼoa kuinga machjénsíni nga si̱tjosonlee je xi chjotajchínga sʼin tjío. Tonga tjínsa anni nga si̱tjosonnilee.

7. Jósʼin binyakaoli je xi chjotajchínga sʼin tjío nga ngisa kjimamiyui je Jeobá.

⁷ Je xi chjotajchínga sʼin tjío kui Énle Niná síchjén kʼianga bándiaale kʼoa nga tsjoánganʼiole je ndsʼee. Tonga ali tsakuijin xá bándiaanile nga je kʼoakuitsole josʼin koatio (2 Cor. 1:24). Tokui xi sʼín nga tsjoále kjoafaʼaitsjen xi faʼaitʼa je Énle Niná nga nda skósonnile jmeni xi sʼin je ndsʼee, nga jtín koatio kʼoa nga katasʼe kjoanyʼán ya jinjtín (1 Cor. 14:33, 40). Ya Biblia kʼoatso nga je xi chjotajchínga sʼin tjío batiokontʼainná. Kuinga kʼoasʼínni nga mele nga chrian kuiyolee je Jeobá. Kʼianga be tsa jngo ndsʼee kʼoa tsa jngo tichjaa xi tsín nda tífikao yaole kʼoa tsa “jngo xi tokakajinská jée”, tjíondaa nga binyakao (Gál. 6:1, 2; Jud. 22). Kʼoa kuinga nʼio ndatjínsíni nga si̱tjosonlee je ndsʼee xi bándiaaná (tʼexkiai Hebreos 13:17).

8. Jósʼin síkuinda je xi chjotajchínga sʼin tjío je choʼndale Niná.

⁸ Je pastro Pablo xi kʼoati chjotajchínga sʼin tsakʼejna, i kitsole je ndsʼe̱ xi tsakatio ya naxinandá Colosas: “Chótsaon nga niʼyajin xi kʼoanachano kao kjoachjine xi tokjoandiso xi tsínjme chjíle, josʼin mangale chjota, josʼin tjíoma síkjitjosonle yaole jo tso kjoale sonʼnde, tonga likui jo tso Cristo” (Col. 2:8). Je én jebi kui bájinkonná anni nga nʼio ndatjínsíni nga kuinyañoaa je kjoafaʼaitsjen xi ya Biblia nroatʼa xi tsjoáná je xi chjotajchínga sʼin tjío. Je ndsʼee jebi síkuindaa je choʼndale Niná kʼiatsa ʼya xi mele nga kʼoanachale. Je Pedro kʼoakitso nga sʼe̱ je profeta ndiso kʼoa kao “chjotandiso xi koa̱koya” xi koa̱nmele nga katabajngijée je choʼndale Niná (2 Ped. 2:1, 14). Je xi chjotajchínga sʼin tjío ndʼaibi, kʼoatisʼin síkuindaná.  Je ndsʼee jebi jenʼio tjínle kjoafaʼaitsjen josʼin nijchá yaoná. Xi ijngosani, kʼianga kjesa kui xá bʼaijinle kʼoasʼin tsakakó nga nda majinle je Énle Niná kʼoa nga jetjínle kjoachjine nga koa̱nle kuitsoya je xi kixi tíjna (1 Tim. 3:2; Tito 1:9). Jméni xi binyakao nga nda bándiaale je choʼndale Niná. Kuinga jekoantaja kjoamakjainle, nga kosonnile josʼín kʼoa nga tjínle kjoachjine xi tsʼe Biblia.

9. Jósʼin bándiaale kʼoa bakóyale Jesús je jtínle nichxin xi tiyoaa ndʼaibi.

⁹ Je Jeobá jé jtínle síchjén nga bakóyale kʼoa nga bándiaale je chjotale Cristo xi tjío jngo tjíjtsa Sonʼnde. Je xo̱n xi bʼainá xi Énle Niná faʼaitʼa nʼio nkjín kjoafaʼaitsjen tsjoáná xi ya Biblia tjoéni. Xi ijngosani, je naxinandále Jeobá sakʼoa jesoa kʼoatsole je xi chjotajchínga sʼin tjío jmeni xi sʼin, síkasénle tsa karta kʼoa tsamaije̱ jé superintendente xi tsʼe circuito síchjén. Kui ngayeje jebi tísíchjén Jesús nga tíbándiaaná.

10. Jósʼin kuinyakao je xi chjotajchínga sʼin tjío je xi jetsakinyaxinle naxinandále Niná.

¹⁰ Jé xi chjotajchínga sʼin tjío kjinele nga sikuinda ngatsʼi xi tjío ya jinjtín, kʼoa ngisa je xi jetjíonroajen kjoamakjainle kʼoa kao xi jée kabajngi (tʼexkiai Santiago 5:14, 15). Tjínkʼa je ndsʼee xi jetsakinyaxinle naxinandále Niná kʼoa xi tsín tikʼoatjíosʼínni je xále Niná. Jósʼin  jngo xi chjotajchínga sʼin tíjna nga koasenkao. Kʼoenejinle yaole nga tsjoánganʼiole nga katabichokʼejnajin ijngokʼanile je jtín. Je Jesús i kitso: “Likui mele Nʼaino xi tíjna ya ngʼajmi nga cha̱ jngo xi je ʼndíxtibi” (Mat. 18:12-14).

11. Ánni nga ñʼai ma kʼasínile je ndsʼee nga sítjosonle je xi chjotajchínga sʼin tjío.

¹¹ Je Jeobá kao Jesús ñaki tsjení, tonga xi tjíobánele xá nga katasíkuinda je jtínle chjotajéení. Kuinga sakʼoa ñʼai ma kʼanile je ndsʼee nga sítjosonle. Tsakui nichxin saʼnda i̱ kuitso: “Kʼoatisʼin chjotajée joni tsa an. Ánni nga je kʼoakuitsosínina josʼian”. Kjoaixiní nga chjotajée je xi chjotajchínga sʼin tjío. Tonga alikui koa̱n nga kui chótsenlee jñani sakʼoa saténgi.

12, 13. 1) Jókisʼin kʼa je chjota xi xá kitsjoale Jeobá. 2) Ánni nga kisʼetʼasíni ya Biblia jñani nga tsín nda kisʼin je chjota xi xá kitsjoale Jeobá.

¹² Je Énle Niná ñaki batíotsenní je jée xi kisokole je chjota xi kisichjén Jeobá ngasʼa. Chjota jebi jé tsakándiaale naxinandále Niná. Tobʼelañá, je David rey koan kʼoa jé tsakaséntítjonle naxinandá Israel. Ninga kuilani xá kisʼele, kitsjoaʼndele yaole nga jée kiskajin, kisichajngi kʼoa saʼnda kisikʼien je xʼinle je chjoón xi kisichajngikao (2 Sam. 12:7-9). Si̱kjaʼaitsjenla je pastro Pedro. Ningalani nʼio tse xá tsakʼaile ya jinjtínle Cristo nga siglo l, kʼoati nkjín kʼa kisatengi (Mat. 16:18, 19; Juan 13:38; 18:27; Gál. 2:11-14). Nijngojin chjota xi tsje tjíobatío saʼnda nichxinle Adán kao Eva, tojékjoán Jesús xi tsje koan.

¹³ Ánni nga koanmesínile Jeobá nga ya kisʼetʼa ya Biblia jñani nga tsín nda kisʼin je chjota xi xá kitsjoale. Kuinga ya bakóni nga koa̱nle sichjén je chjotajée nga koandiaale je naxinandále. Kʼoatísʼín saʼnda ngasʼa je Jeobá. Kʼoa kuinga tsín ndatjínsíni tsa tokui chótsenlee jña saténgi kʼoa tsa chʼa̱sjengiaa je xi xá yʼa. Je Jeobá mele nga jchaxkoán kʼoa nga si̱tjosonlee ndsʼee jebi (tʼexkiai Éxodo 16:2, 8). *

14, 15. Jméni xi bakóyaná josʼin tsakándiaale naxinandále Jeobá nichxin kjoatse.

¹⁴ Nʼio machjén nga si̱tjosonlee je xi tjíobándiaaná ndʼaibi. Si̱kjaʼaitsjenla ʼyani xi kisichjén Jeobá kʼianga tsakándiaale naxinandále kʼianga kjoa jaʼatojin. Kʼianga kitjoni ya Egipto je chjota israelita, je Jeobá jé Moisés kao Aarón kisichjén nga tsakándiaale. Kʼianga tsʼangile yaole nga kichone xi mani te kjoañʼai kʼoatsakʼinle nga jngo kjoabichi katabʼéjna nga jekoa̱nnjio kʼoa nga njínle barré katasíkajon ya ndai xo̱ntjoa ndʼiale. Ali tsa jngojin jta̱ kinrʼoéle ya ngʼajmi xi kʼoakitsole jmeni xi sʼin. Jé Moisés kʼoakitsole je chjotajchíngale naxinandá jmeni xi sʼin kʼoa je naxinandá kinrʼoéle je chjotajchínga jebi (Éx. 12:1-7, 21-23, 29). Nga kui nichxin, jé Moisés kʼoa kao chjotajchínga kisikʼatoyale naxinandá jotso je kjoatéxomale Niná. Kʼoa nichxin xi tiyoaa ndʼaibi, je xi chjotajchínga sʼin tjío kʼoati kui xá tjínle.

¹⁵ Tsakui nichxin faʼaitsjenná jñani kʼoatso je Biblia nga ánkje kʼoa kao chjotasonʼnde kisichjén je Jeobá nga tsakándiaale je choʼndale nga tsakʼasjentjai. Nga kʼoakisʼin, je Jeobá kitsjoaxále choʼndale nga je kinchja̱ngajaole kʼoa kʼoakitsole je naxinandá jmeni xi sʼin nga  tsín kuiyá. Alikui jao sʼená nga kʼoati sʼin je Jeobá kʼianga kjoaʼaí je Armagedón. Je xi chjotajchínga sʼin tjío ndʼaibi tjínnele nga nʼio nda sikuinda yaole nga tsín sikʼatone choa̱le jmeni xi sʼin kʼianga kʼoasʼin xá yʼa, nga̱ jé Jeobá kʼoa kao naxinandále tjíongajaole.

16. Jmé énni xi machjén nga kuinóʼyá.

¹⁶ Je naxinandále Jeobá tojngo jtín mani kʼoa tojngo mani xi tísíkuinda, jé Jesucristo (Juan 10:16). Je Jesús kʼoakitsole chjotale nga ya tje̱n tíjnakao “ngantsjai nichxin, saʼnda nga kjoetʼa sonʼndebi” (Mat. 28:20). Jósʼin tíbitjoson én jebi. Nga Rey sʼin tíjna je Jesús ya ngʼajmi, jé kjinentsja ngayeje jmeni xi koa̱n nga si̱kje jmeni xi chonle sonʼnde je Na̱i. Tsa mená nga ya kuiyojinlee naxinandále Niná machjénní nga kuinóʼyá je én xi kʼoatsoná jñanile je ndiaa xi kjuinyaa. Je én jebi kui jmeni xi ʼminá xi kao nganʼiotsjele Niná kichjini xi faʼaitʼa ya Biblia kʼoa kao jmeni xi tsole Jeobá kao Jesús je xi chjotajchínga sʼin tjío (tʼexkiai Isaías 30:21 * kao Apocalipsis 3:22).

17, 18. 1) Jméni xi xkón tjíole je choʼndale Niná. 2) Jméni xi tsín jao tjínná. 3) Jméni xi chótʼayá ya kjoaʼmiya xi ijngo.

¹⁷ Je pastro Pedro kʼoakitso nga je Na̱i kʼoatísʼín “joni tsa xa xi tíbaté, tísíkʼótjindai[ná], tíbásjai ʼya xi ski̱ne” (1 Ped. 5:8). Tojo sʼín joni tsa xa xi nʼio baole kʼoatísʼín je Na̱i, tísíkʼótjindaile je choʼndale Niná, kui tíkoyale nga skénʼndó je xi tjíotsjionkon yaole kao je xi tjíosíkjinle je jtín. Kʼoa kuinga nʼio machjénsíni nga tosi tonda ya kuiyojinlee je naxinandále Niná kʼoa chrian kuiyolee je Jeobá, je xi tísíkuindaná (1 Ped. 2:25). Apocalipsis 7:17 kʼoatso nga je xi kʼoangi kʼianga kjoaʼaí je kjoañʼai xi nʼio tse, je Jesús “je Barré [...], jé xi ska̱nindiaale jña títjo nandá xi tíjnakon. Niná sitsjejon ngayije ndáxko̱n xi tsʼe xko̱n”. Nʼio naskánatjín kjoachoya jebi.

¹⁸ Je xá xi kjinele je xi chjotajchínga sʼin tjío ya jinjtín nga síkuinda je choʼndale Niná nʼio chjíle. Jméni xi sʼin chjotajchínga jebi nga nda sikuinda je chjotale Jesús. Kui chótʼayá ya kjoaʼmiya xi ijngo.