1, 2. 1) Ánni nga nʼio machjénsíni nga kʼoétsʼoantsjé. 2) Jméni xi chjónangilee yaoná xi tʼatsʼe kjoabʼetsʼoa.

JNGO chjota xi manjio kisixá itso: “Kʼianga ngisa nʼio ñʼai maná nga bijnachoaan kʼiaa nga toje tínroasʼesén”. Kʼoajin tibe je chjota xi njio síxá nga kʼoama. Jebi yaa mangóson je nichxin xi tiyoaa ndʼaibi, nga̱ je nitje̱n, xi tsonile, xi chonle sonʼnde je Na̱i jeme fetʼa (Rom. 13:12). Kʼoa nʼio xkón tíjna kʼiatsa tsín tje̱nyatokon kuiyoaa. Nʼio machjén nga nda kjoafaʼaitsjen katasʼená kʼoa nga kʼoétsʼoantsjé (1 Ped. 4:7).

² Nga kui nichxin jebi tiyoaa, machjénní nga chjónangilee yaoná: “Jókji kjoandosin tsjoale nga bʼetsʼoa. A nkjín koya josʼin bʼetsʼoa. A bʼetsʼoantsjaiña. A bʼetsʼoantjaiña xi kjaʼaí axo to yaona sijéntje. Kʼoa jókji koasenkaona nga kʼoetsʼoa kʼianga kuitjontjaile yaona”.

3. Kʼoalasi jósasʼin koa̱n kʼoétsʼoaa.

³ Je pastro Pablo kʼianga kiskile chjota Éfeso, kʼoakitso nga nkjín koya josʼin katabʼétsʼoale je Niná (Efes. 6:18). Tsí kjoaixi nga kui nijélee Jeobá kʼianga katatsjoáná jmeni xi machjénná kʼoa nga katabasenkaoná jme kjoa xi bitjatojiaan. Je Niná nrʼoéní kjoabʼetsʼoa jebi (Sal. 65:2). Tonga kʼianga bʼetsʼoaa kʼoati machjén nga chʼa̱sjengʼa Niná, nga kʼoailee kjoanda kʼoa nga nʼio kʼoétsʼoalee.

4. Ánni nga kjitʼa chʼa̱sjengʼasíñá Jeobá kʼianga bʼetsʼoalee.

⁴ Nkjín koya tjínni anni nga kui én si̱chjénsíñá xi bʼasjengʼa je Jeobá kʼianga kʼoétsʼoalee. Tobʼelañá, kʼianga nikjaʼaitsjenjiaan “je xále xi kao nganʼiole tsakʼéndani” kʼoa kao “jokji jeya tíjna” mená nga chʼasjengʼaa (tʼexkiai Salmo 150:2). * Nga jaon bersíkulo xi tsʼe Salmo 150 tejan kʼa  faʼaitʼa jñani kʼoatsoná nga chʼa̱sjengʼaa je Jeobá. Kʼoa ijngosa xi kiski salmo i kitso: “Ñato kʼa kʼianga jngo nichxin tibʼasjengʼale xi totʼatsʼe kjoatéxomakixili” (Sal. 119:164). Je Jeobá bakinle nga chʼa̱sjengʼaa. Kuinga kjitʼa chʼa̱sjengʼasíñá nga kʼoétsʼoalee.

5. Jósʼin basenkaoná nga bʼailee kjoanda Niná kʼianga bʼetsʼoaa.

⁵ Kʼianga bʼailee kjoanda je Jeobá kʼoati nʼio chjíle. Je Pablo i kitsole je chjotale Cristo xi ya tsʼe Filipos: “Ali kʼoajin mano. Tojmenibe xi machjénno, tijélao Niná, tʼetsʼoalao, kʼoa tʼailao kjoanda. Kʼoasʼin katasʼejinle Niná jme xi nijáo” (Filip. 4:6). Nʼio basenkaoná kʼianga bʼailee kjoanda je Niná kʼianga bʼetsʼoalee. Jósʼin basenkaoná. Kʼianga nichxin fetʼa tiyoaa ndʼaibi, je chjota xi tiyojinlee “niʼi̱tséjin tsjoá kjoanda” (2 Tim. 3:1, 2). Tsa tsín si̱kuindaa yaoná kʼoati koa̱nkjoaan jokjoan chjota jebi. Kʼianga bʼailee kjoanda Niná nga bʼetsʼoalee basenkaoná nga nda sʼe tokoán kʼoa nga tsín tokʼoa bixónʼndee nga tsín ndatjín jmeni xi kjimatʼeen (Jud. 16). Je xi séntítjon ya yaniʼya koaan koasenkao je ʼndíchjoónle kʼoa kao ʼndíxtile nga katatsjoá kjoanda kʼianga bʼétsʼoa.

6, 7. Jósʼin tíjna nga nʼio bʼetsʼoalee Jeobá, kʼoa kʼiáni nga nʼio kʼoétsʼoalee.

⁶ Nga nʼio bʼetsʼoaa kui xi tsonile nga nʼio kʼoaʼmilee Niná jmeni xi kjimaná. Kʼiáni nga koa̱n kʼoasʼin nʼio kʼoétsʼoalee Jeobá. Tobʼelañá, nga ʼya xi tjíofitjenngikená kʼoa tsakʼiaje̱ nga nʼio táo chʼin xi tjínná. Kʼianga kui kjoa tiyojiaan toxá nʼio bʼetsʼoanilee Niná. Tonga a tokʼiaa nga koa̱n kʼoasʼiaan.

⁷ Chótsenlalee josʼin tsakʼéjnachoa̱ Jesús je kjoabʼetsʼoa xi tsakʼéjna kʼoa kataʼyala jokitso xi tʼatsʼe jaʼaínle Niná, tʼatsʼe kjoatéxomale, xi tsonile Chjotaxále, kʼoa kao jmeni xi mele Niná (tʼexkiai Mateo 6:9, 10). Je sonʼnde jebi ñaki to kjoatsʼen kijnakitse, kʼoa je chjotaxá sonʼnde alikui kjimale nga tjíotsjoále je chjota jmeni xi machjénle. Kʼoa kuinga nʼio machjénsíni nga nʼio kʼoétsʼoalee je Nʼainá xi tíjna ngʼajmi nga katabitjotsje jaʼaínle kʼoa nga je Chjotaxále katafaʼáxin je Na̱i nga je kjinentsja Sonʼnde. Kʼoati machjén nga nʼio kʼoétsʼoalee Niná nga kʼoakatama josʼin mele i̱ Sonʼnde joni ya ngʼajmi. Kʼoati machjén nga tje̱nyatokon kuiyoaa kʼoa nga nkjín koya josʼin kʼoétsʼoalee Niná.

8, 9. Ánni nga tsín koa̱n jokuixónsíñá nga kʼoasʼin tsakjayofe je Pedro kʼoa kao pastro xi ngikʼa ya ʼnde jña Getsemaní ʼmi.

⁸ Je pastro Pedro kʼoakitsole je chjotale Cristo nga katabʼétsʼoantsjai, tonga je alikui kʼoakisʼin nga títjon. Jé jngo chjotale Jesús xi tsakajnafe kʼianga tíbʼétsʼoa Jesús ya ʼnde jña Getsemaní ʼmi. Je Jesús tongini i̱ kitsole: “Tiyochonʼndao, kʼoa tʼetsʼoao”. Tonga je chjotale alikui kʼoakisʼin (tʼexkiai Mateo 26:40-45).

⁹ A kjitʼanangi kʼoakuixoán nga likui nda kisʼin je Pedro kʼoa kao pastro xi ngikʼa nga kʼoasʼin tsakjayofe. Tsa si̱kjaʼaitsjenjiaan, nga kui nichxin jenʼio kijtale. Nga̱ jé tsakatíonda jmeni xi koanchjénle nga tsakʼéjna sʼuí Paxko. Kʼoa xijekoan, je Jesús kui tsakʼéjna je xi Kjoabichile Nainá ʼmi, xi sikjaʼaitsjenyani chjotale xi tʼatsʼe kjoabiyale nga koa̱nskanni (1 Cor. 11:23-25). “Kʼia nga jekise tʼatsʼe Niná, ki ya nindo Olivos”, kʼoa kjin kini ndso̱ko̱  nga kitjoni ya Jerusalén (Mat. 26:30, 36). Kʼoa nga ki, tsakui nichxin jetsʼato basennitje̱n. Tsa yalani tiyokoaa ya ʼnde Getsemaní, tochajinle kʼoati kisoyofé. ʼNdele nga jokuitsole Jesús je pastrole, tosa kʼoakitsole nga je espíritu tíjnanda tonga je yaoná tsínle nganʼio.

10, 11. 1) Jméni xi chan koanjinle Pedro kʼianga kʼoasʼin tsakajnafe ya ʼnde Getsemaní. 2) Jméni xi bakóyali jokoan je Pedro.

¹⁰ Je Pedro koanjinle nga tsín nda kisʼin nga kʼoasʼin tsakajnafe ya ʼnde Getsemaní. Je Jesús tongini i̱ kitso: “Ngatsʼio nga jon, kʼoasʼin tsao̱tʼaxion xi tʼatsʼan kui nitje̱nbi”. Kʼoa je Pedro i kitso: “Nda tsa kʼoasʼin tsao̱tʼaxin ngatsʼi xi tʼatsi, an nikʼiajin ska̱tʼaxian”. Kʼianga jekʼoakitsole Jesús nga jan kʼa kʼoeʼmatʼain yaole, je Pedro tosi tonda i̱ kitso: “Nda tsa [...] kuiyákaole, likui koatejnaʼmakaole” (Mat. 26:31-35). Tojo kitso Jesús, je Pedro jan kʼa tsakʼéʼmatʼain yaole. Kʼianga tsabe nga kʼoakisʼin “ali tokʼoakji kiskiʼndá” (Luc. 22:60-62).

¹¹ Je Pedro chan koanjinle nga tsín kixi tíjna nga toñá ninʼiotʼaa yaoná kʼoa likui tikʼoakisʼinni. Kʼoa kuijin kjoabʼetsʼoa xi nʼio tsakasenkao. Nga̱ saʼnda jé kitsjoa kjoafaʼaitsjen xi tso nga kʼoétsʼoantsjé. A kʼoatinʼia jotso kjoafaʼaitsjen xi kitsjoa. A kjitʼaa bʼetsʼoaa nga bakoá nga Jeobá tinʼia kuenta ngantsjai (Sal. 85:8). Tonga kʼoati si̱kjaʼaitsjenjiaan jokitso je pastro Pablo: “Je xi síkjaʼaitsjen nga nʼio kixi tíjna, katasíkuinda yaole nga tsín ska̱” (1 Cor. 10:12).

12. Ánni nga nʼio nda choa̱ tsakʼéjnasíniná je Nehemías.

¹² Si̱kjaʼaitsjenla xi tʼatsʼe Nehemías, xi ya kisixákao je rey Artajerjes xi tsakatéxoma ya naxinandá Persia nga siglo V nga kjesa chʼajin nó 1. Je Nehemías jngo choa̱ xi nʼio nda tsakʼéjna nga nʼio tsakʼétsʼoale je Jeobá. Nkjín nichxin tsakʼejnanchjan kʼoa tsakʼétsʼoale je Niná xi tíjna ngʼajmi, xi totʼatsʼe je chjota judío xi tsakatio ya Jerusalén (Neh. 1:4). Kʼianga je rey Artajerjes kiskonangile ánni nga nʼio ba tjínnile kʼoa jmeni xi mele, je Nehemías kjoan tsakʼétsʼoale je Niná (Neh. 2:2-4). Jósʼin kichomani nga kʼoakisʼin. Je Jeobá  kinrʼoé kjoabʼetsʼoale kʼoa tsakʼasjentjai je naxinandále (Neh. 2:5, 6). Ngisajin nʼio koantajasa je kjoamakjainle Nehemías kʼianga kinrʼoéle Jeobá je kjoabʼetsʼoa xi tsakʼéjnale.

13, 14. Jméni xi sʼiaan nga ñaki taja katasʼejna kjoamakjainná kʼianga bʼetʼaná je Na̱i nga mele sikinroajen tokoán.

¹³ Kʼianga kjitʼa bʼetsʼoaa tojo kisʼin je Nehemías, ngisa matajasa je kjoamakjainná. Je Na̱i nʼio tsʼen kʼoa kʼiakjoan bʼetʼaná nga kjoa tijnajiaan. Tobʼelañá, tsa chʼin tíbʼetʼaná kʼoa tsa tínroajen tokoán, tochale kʼoasʼin si̱kjaʼaitsjeen nga nʼio tochoa tinixálee je Niná jotjín ora nikʼasʼeen nga jngo sá. Kʼoa tsakui nichxinje̱ kui nʼio nikjaʼaitsjeen jmeni xi koantʼeen ngasʼa. Je Na̱i kui xi mele nga kʼoasʼin si̱kjaʼaitsjeen nga tsín jme chjíná, kʼoa kʼianga kʼoasʼe tokoán kʼiaa básjaile je Na̱i josʼin sikinroajen kjoamakjainná. Tonga tsa bʼetsʼoantsjé taja sʼe̱jna kjoamakjainná. Kʼoa si̱kjaʼaitsjeen nga je kjoamakjainná jngoyale “je ki̱cha̱ xi bájchxochjoa yaon[á]” kʼoa koaan si̱kjitsʼoaa “je flecha xi títi xi tsʼe na̱i” (Efes. 6:16).

¹⁴ Kʼiatsa kʼoétsʼoantsjé, ñaki tiyondajián kʼiatsa jngo kjoa kjoaʼaínená kʼianga chótʼayakao kjoamakjainná. Jméni xi sʼiaan kʼiatsa jmeni xi kʼoetʼale kjoamakjainná. Si̱kjaʼaitsjenjiaan jokisʼin je Nehemías kʼoa tokjoan je Jeobá kʼoétsʼoalee, nga̱ tokao je nganʼiole nga koa̱n si̱kinjenilee je xi sʼe̱jnabasenná kʼoa nga chókjoakaoná.

15. Jméni xi koa̱n chjónangilee yaoná kʼianga kʼoétsʼoantjé xi kjaʼaí.

¹⁵ Je Jesús tsakʼétsʼoantjai je Pedro  nga tsín katanroajen kjoamakjainle (Luc. 22:32). Epafras, jngo chjotale Cristo xi kʼia tsakʼejna nga siglo I, kiskenngi choa̱le Jesús kʼoa nʼio tsakʼétsʼoantjai je ndsʼe̱ xi tjío ya naxinandá Colosas. Kʼoa je Pablo i kitsole nga kiskile: “Síxítíyantsjaile yaole xi tʼatsaon nga bʼétsʼoantjaino, jméni nga nʼio nda koa̱nsínino, nga ñaki nda si̱tjosonsínilao ngayije xi mele Niná” (Col. 4:12). Nʼio ndatjín nga chjónangilee yaoná jebi: “A bʼetsʼoantjaiña je ndsʼee xi tjío jngo tjíjtsa Sonʼnde. A kjitʼaa bʼetsʼoantje je xi kjoaxkón tjíojin. Kʼiáni nga sa kisijéntje je ndsʼee xi nʼio tse xá kjinele i̱ jinjtínle Jeobá. A chriansʼaa nga tsakʼetsʼoantje je ndsʼee kao tichjaa xi tjío i̱ jinjtín xi kjoañʼai tjíofaʼatojin.

16. A binyakao xíngiaa nga bʼetsʼoantjé.

¹⁶ Kʼianga bʼetsʼoantjé xíngiaa nʼio binyakao (tʼexkiai 2 Corintios 1:11). Ninga tsín tsa tokui nga kjuinrʼoéni je Jeobá nga nʼio nkjín choʼndale tjíobʼétsʼoantjai tsa ʼyani. Tonga, kuenta tísʼín jokji kjimandosinná xíngiaa kʼoa nrʼoé kjoabʼetsʼoaná. Kuinga chjí jchatokonsíñá je kjoanda xi tjínná nga bʼetsʼoantjé xi kjaʼaí. Tojo kisʼin je Epafras, kʼoati kʼoétsʼoantjé je ndsʼee kʼoa kʼoasʼin koakoñá nga kjimandosinná xi tʼatsʼe. Tsa kʼoasʼiaan tsjoa sʼe̱ tokoán, nga tongisa nda “nga kʼoee kaoni tsa nga chjoé” (Hech. 20:35).

17, 18. Jósʼin basenkaoná nga bʼetsʼoantsjé.

¹⁷ Nga kjesa kʼoatsojin Pablo nga jetífaʼato nitje̱n kʼoa nga “jenroachrian nichxin” i kitso: “Kʼoati ʼyaa jme nichxinni ndʼaibi, nga je kui ora nga kuisótjenlee nijñáná. Nga̱ ndʼaibindai ngisa tíjnachrianná nga kuitjo̱ntjé kaoni tsa kʼia nga títjon koankjainná” (Rom.13:11, 12). Je sonʼnde chjotsele Niná jenʼio tíjnachrian kʼoa sa chrian sa chrian tíjna nga kuitjo̱ntjé. Alikui kʼoaiʼndee nga je xi chon sonʼnde kʼoenjiojinná kʼoa kʼoechjoaná nga chja̱kaonajmiá kʼoa nga kʼoétsʼoalee je Jeobá. Tosa kʼoétsʼoantsjé nga̱ kui xi koasenkaoná nga nda koanngínkoaa yaoná josʼin tiʼyaxkoán Niná saʼnda nga kjoaʼaí je nichxinle (2 Ped. 3:11, 12). Tsa kʼoasʼiaan, koakoñá nga tje̱nyatokon tiyoaa kʼoa nga ñaki makjainná nga jeme kjoetʼa je xi chon sonʼnde xi tiyoaa ndʼaibi. Kuinga machjénsíni nga kʼoétsʼoantsjé (1 Tes. 5:17). Tojo kisʼin je Jesús, chʼa̱sjeʼaa nichxin kʼianga kʼoétsʼoalee Jeobá nga toñá tiyoaa. Kʼoa nga kʼoétsʼoalee ali tsa toxitso xiská kuinókjoaa. Kʼiatsa nda kʼoétsʼoalee koa̱nchriantʼasalee (Sant. 4:7, 8). Nʼio tse kjoanda tjínná nga ma bʼetsʼoaa.

¹⁸ Je Énle Niná itso: “Kʼia nichxinle nga tsʼamje i̱ sonʼndebi, Cristo tsakʼétsʼoa, kʼoa kisijé nganʼio, kiskiʼndía. Kʼoasʼin kitsjoatʼale je xi koanle tsʼasjentjaini ya kjoabiya. Kitsakjonke nda tsabexkón Niná, kui nga kinoʼyanile” (Heb. 5:7). Je Jesús nʼio tsakʼétsʼoale Nʼaile kʼoa kixi koan saʼnda nga kinikʼien. Kʼoa nga kʼoakisʼin, je Jeobá kisikjaʼáyanile kʼoa jngo kjoanda kitsjoale ya ngʼajmi: kjoabijnachon xi tsín tifetʼani. Tsa kʼoétsʼoantsjé tsanda ñá, kʼoati kixi kjuintʼalee je Nʼainá xi tíjna ngʼajmi ninga chótʼayakao kjoamakjainná kʼoa ninga jme che̱n xi sa̱tíobasenná kʼoa kʼoati kuichotjenngiaa je kjoabijnachon xi tsínkʼia fetʼa.