XI TÍNCHJA̱NI REBISTA JEBI: ÉNNDISO XI BʼÉCHJOANÁ NGA NICHRIANTʼALEE NINÁ
Énndiso xi tso nga tsʼen je Niná
JOSʼIN MAKJAINLE CHJOTA
Je xo̱n catecismo xi síchjén chjota católico kʼoatso nga je chjota xi nʼio tse jée bajngi toyaa fisénndiaa ni̱ma̱le ya jña lʼí títi kʼoa yaa faʼá kjoañʼai ngantsjai nichxin (Catecismo de la Iglesia Católica). Tjíokʼa je xi nyatítjonle relijión xi kʼoatso nga je xi ya fi jña lʼí títi ñaki jngokʼa kjin batiole Niná.
JE BIBLIA ITSO
“Je chjota xi jée bajngi... kuiyání.” (Ezequiel 18:4.) Kʼoa “je xi jekʼien nijmejin xi tibeni” (Eclesiastés 9:5). Kʼiatsa lijme xi tibeni je xi jekabiya, jósʼin ya kjoaʼani kjoañʼai ni̱ma̱le ya jña lʼí títi.
Je én hebreo kʼoa kao én griego xi “ʼnde jña títi” sʼin síkʼatoya kʼa Biblia, kui tsoyanile jña tjíosíkjáya je kʼien. Tobʼelañá, kʼianga chʼin kiskatʼale je Job i kitso nga tsakʼétsʼoale Niná: “Tongisajin nda tsa yala Seol si̱kʼéjnaʼmanái” (Job 14:13). Je Job kui xi koanmele nga kuiyá ánni nga ya sikjáyasíni ya tsjó, ali tsakuijin xi koanmele nga kjoañʼai kjoaʼa.
ÁNNI NGA MACHJÉNSÍNI NGA KATAʼYAA JEBI
Kʼianga kʼoasʼin makjainná nga tsʼen je Niná kui xosíkaoná nga tsín machriantʼanilee. Jngo chjoón xi Rocío ʼmi xi México tsʼe i kitso: “Kʼianga sʼa ʼndí kjiʼe̱ kʼoasʼin tsakʼinyana nga jngo ʼnde tíjna jña lʼí tíbʼájnga̱. Ñaki nʼio kitsokjonle je Niná, alikui koankjainna tsa nda chjota. Kʼoasʼin kisikjaʼaitsjen nga to jtile ngantsjai kʼoa nga nʼio tsʼen”.
Jmeni xi bakóya je Biblia xi tʼatsʼe Niná kʼoa kao josʼin tjío xi jekʼien kui xi tsakasenkao je Rocío nga kisikʼantjaiya je kjoafaʼaitsjenle, kʼoa itso: “Ñaki koantjaana nga tsaʼbe nga mandosinle je Niná xi tʼatsaan, nga tsjoakená kʼoa nga koa̱n kʼoati tsjoake̱ koa̱n tsanda an. Ndʼaibi kʼoasʼin ʼbekoan joni jngo nʼai xi síkuinda je xtile kʼoa xi mele nga ndasʼin koatio” (Isaías 41:13).
Nʼio nkjín chjota xi tokui nga bexkónní Niná nga tsín mele ya koai ya jñani lʼí títi. Tonga je Niná alikui mele tsa tokui nga jchaxkónñá nga nokjonlee. Je Jesús i kitso: “Katamatsjoachai tsokʼoa je Nainá Nináli” (Marcos 12:29, 30). Xi ijngosani, kʼianga ʼyaa nga tsínkui kʼoasʼín Niná jmeni xi tsín kixi tíjna, ngisa sʼejngo tokoán nga ñaki kixi tíjna kʼianga sikjeson chjotatsʼen. Koaan kʼoakuixoán jokitso je Elihú je xi miyole koan Job nga kitso: “Je xi ñaki Niná kjin tíjnale nga kui kʼoasʼin xi chʼaotjín, kʼoa nga kui kʼoasʼin xi tsín kixi tíjna je Niná xi ngisasa tse nganʼio tjínle” (Job 34:10).
