Jngo cartel xi i̱ tso én tjítʼa: “A tsí ngisa nda tijnai nga tsín makjainli tʼatsʼe Niná. Miyón mani chjota xi ngisa nda tjío.” Cartel jebi jé kisikasénjna je chjota xi tsín makjainle nga tíjna Niná. Chjota jebi kʼoasʼin makjainle nga tsín Niná kʼoa nga tsín machjénná.

Tonga kʼoati tjín je chjota xi kʼoatso nga makjainle xi tʼatsʼe Niná tonga alikuini kuenta sʼín. Je arzobispo xi Salvatore Fisichella ʼmi i kitso tʼatsʼe chjota xi ya tjíojin relijiónle: “Tsa ʼyalani xi skoe̱ná alikuijin koa̱nkjainle nga chjotale Cristo maa, nga̱ kʼoasʼin timangínkoaa yaoná josʼín je xi tsín makjainle tʼatsʼe Niná”.

Tjínkʼa chjota xi tsín ale nga tʼatsʼe Niná sikjaʼaitsjen, nʼio kjin tíjna Niná male. Sakʼoa tokʼia básjai kʼianga machjénle, tojo choʼnda sʼin bekon je Niná.

Kʼoa tjínkʼa chjota xi tsín makjainle tsa machjén jmeni xi tsoya relijiónle. Kʼoa tsamaije̱ likui sítjoson jmeni xi ʼmiyale. Tobʼelañá, je chjota católico xi Alemania tsʼe, tsʼato basen mani xi kʼoasʼin makjainle nga tsín chʼaotjín kʼianga tobatiokao xínkjín je chjota, ninga kʼoaʼmile ya yo̱ngo̱le nga tsín ndatjín kʼoa nga batéchjoa ya Biblia (1 Corintios 6:18; Hebreos 13:4). Kʼoa ali tsa tojejin chjota católico xi kʼoasʼín. Je xi nyatítjonle xi kjaʼaí relijión kʼoati tokʼoamale nga be kʼianga tsínni sítjoson chjotale jmeni xi ʼmiyale.

Kʼoa kuinga chjonangisínilee yaoná: “A machjénná je Niná”. Jokji tínroa nichxin tjín chjota xi sakʼoa kui kjonangile yaole. Kʼiaa saʼnda kinroatsʼiani jebi nga tsakatio je chjotajchínganá xi títjon. Kʼianga koa̱njinná tsa machjénná je Niná, kuila chótʼayajiaan jmeni xi tso Biblia, ya libro xi tsʼe Génesis.