Kʼianga sá diciembre ñaki tokui matsen ngakjijnda Sonʼnde je sén kao xkóson xi tsʼe Jesús kʼianga sʼa kitsin jñani jngo kaxa̱ xi kjenya cho̱ kijnaya. Tonga, a tojo ʼndílee ndʼaibi je Jesús... * Kuila cho̱bayañá josʼin tjínnele si̱kjaʼaitsjeen jokji je Jesús. Kataʼyala jokoan ya chrian Belén kʼianga njion jñani tjío je chjota xi koʼnda cho̱.

Toxijña jngo ánkje koantsen jñani tjío je chjota xi koʼnda cho̱, kʼoa kitsole: “Katsinno [...] jngo xi kʼoasjentjaino xi Cristo je Nainá”. Kʼoa xijekoan kʼoakitsole kʼianga jekuichokotsenle skoee nga je Jesús “tjítsʼójin najñobale” kʼoa yaa “kijnaya kaxa̱ xi kjenya cho̱”. Xijekoan, nʼiosa nkjín ánkje koantsen kʼoa tsakʼasjengʼa Niná.

Jósʼe̱ tokuin kʼiatsa kuinóʼyalanilai je ánkje nga tjíobʼasjengʼa je Niná... Je chjota xi koʼnda cho̱ nʼio tsjoa koanle, kʼoa kitso: “Tjían saʼnda Belén, kʼoa kataʼyaa jebi xi kjima”. Kʼoa nga kicho yaa tjío je “María kao José kao ʼndíbe xi tíkijnaya kaxa̱ xi kjenya cho̱”.

Xijekoan, kichosa chjota xi kjaʼaí ya Belén, jñani tjío je María kao José. Kʼianga kʼoakitsole je chjota xi koʼnda cho̱ jmeni xi koan ñaki tokoanxkónle. A tsjoa sʼeli ji nga ʼmiyasali xi tʼatsʼe Jesús... Tsjoa maná ngatsʼiaa xi tsjoachaa je Niná. Kataʼyala ánni nga nʼio tsjoa koansínile chjota jebi nga kisʼejinle kʼianga jekitsin je Jesús. Tonga títjon kjoanla kataʼyaa jmeni xi koan kʼianga sʼa tíjnatoje je María.

Jngo nichxin, je ánkje xi Gabriel ʼmi kichokonle je María kʼoa kʼoakitsole nga jngo ʼndí sʼe̱le. Kʼoakitsole nga nʼio ngʼa kʼoéjna ʼndí jebi kʼoa nga “ʼndíle Niná xi nʼio ngʼa tíjna” kʼuínle. Xijekoan, kʼoakitsole nga rey koa̱n ʼndí jebi kʼoa nga je koatexoma tokʼia saʼndani.

Je María kiskonangile je ánkje jókoa̱nnile nga jngo ʼndí sʼe̱le nga̱ tsín ʼya chjota tíbʼéjnakao. Je  ánkje Gabriel kʼoakitsole nga je “nganʼiole Niná xi nʼio ngʼa tíjna” kjoaʼaínele kʼoa nga je ʼndí xi sʼe̱le ñaki tsjení kʼoa “ʼndíle Niná kʼuín”. Tokʼoamaná jme xi kisʼin je Jeobá. Kiskoé je kjoabijnachonle ʼNdíle xi ya tíjna ngʼajmi kʼoa yaa kisikʼéjnaya yatsʼoa̱ María. ʼNdí jebi yaa koanjcháya tsʼoa̱ María joma ngatsʼi je xtiʼndí nga ya majcháya tsʼoa̱ je na̱le.

A ʼyaní nga je sén xi batío chjota kʼianga Navidad jan mani xi reyes magos tsole síkatíotʼale Jesús... Tonga alikui ñaki kʼoakoan kʼianga kitsin je Jesús. Ali tsa jejin xi reyes magos ʼmi xi kichokotsenle je Jesús, jéní chjota xi niño kotʼason, kʼoa je Jeobá alikui sasénle jme xi sʼín chjota jebi. Jméni xi koan kʼianga kicho chjota jebi. Je Biblia itso: “Jaʼasʼen ya ndʼia, tsabe je ʼndíbe kao María je na̱le”. Kʼianga kicho chjota jebi alikui tiʼndíleeni je Jesús kʼoa alikui tiya kijnayani kaxa̱ xi kjenya cho̱, jngo ndʼia tjíoʼyakao José kʼoa kao María.

A ʼyaní jokoanni koansjaile chjota jebi jñani tíjna je Jesús... Kui kitjenngile xi joniño kji. Tonga kʼianga kjesa ya fikaojin ya Belén, je “niño” jebi yakjoanla kikao ya Jerusalén, jñani tíjna je rey Herodes. Kʼoa Biblia kʼoatso nga je rey Herodes mele skoe̱ jñani tíjna Jesús ánni nga sikʼiensíni. ʼYáni xi kisikʼatsen “niño” jebi kʼianga ya kinrʼoeni je rey Herodes chjota xokjoan... Ali jejin Niná, jéní je Na̱i, nga̱ je xi jtike je Niná.

Je Na̱i kui xi mele nga kʼoasʼin katamakjainle chjota nga tojo ʼndílee kji ndʼaibi je Jesús. Tonga tikjaʼaitsjain nga je ánkje Gabriel kʼoanákitsole María nga je Jesús “koatexoma” kʼoa nga je “kjoatéxomale likui kjoetʼa”. Je Jesús rey sʼin tíjna ya ngʼajmi kʼoa jeme sikjeson ngatsʼi je xi kontrale Niná ma. Je Jesús rey sʼin tíjna ndʼaibi kʼoa kui jebi xi kʼuínyalee je chjota.