Je chjinexki xi kotʼajin jotjío kjoafaʼaitsjenle chjota kʼoatso nga tjínsa xi machjénle kʼianga tsjoa sa̱tío kon. Kʼoa yaa ʼyañá nga kʼoatjín nga̱ je chjota básjai jmeni xi mele kuichotjenngi. Tjínkʼa xi kʼoasʼin síchjén nichxinle nga tjín xi sínda, nga tjín xi síkjane kʼoa tsakui kotʼayasonje̱ tʼatsʼe naxó kao tʼatsʼe cho̱. Tonga alikuini nda satío kon ninga kʼoasʼín.

Tonga je chjota xi bʼéxkia Biblia bení kʼianga machjénná xi tʼatsʼe Niná. Je kapítulo xi fitsʼiani je libro xi tsʼe Génesis kʼoatso kʼianga je Niná kisinda je chjota, nga kjitʼa tsakjákaonajmí kʼoa nga miyo tsakjáo (Génesis 3:8-10). Je chjota alikui kʼoasʼin koannda nga toje kʼoa̱ yaole, machjénle xi tʼatsʼe je Niná. Kʼoa je Biblia nkjín kʼa kʼoatso nga machjénná xi tʼatsʼe Niná.

Tobʼelañá, je Jesús i kitso: “Jó tondale je xi baole, kʼoa xi fatile kjoa xi kjoakixi, nga̱ koa̱nski” (Mateo 5:6). Én jebi kui xi bakó nga tjínnele jchaa xi tʼatsʼe Niná kʼianga tsjoa sʼe̱ tokoán. Je Jesús i kitso: “Ali tokao nioxtila kʼoéjnakonni chjota, tonga kao ngayije én xi nchja̱ni tsʼoa Niná [Jeobá]” (Mateo 4:4). Kʼianga “én xi nchja̱ni tsʼoa Niná” tso testo jebi, kui xi tsonile, nga machjénná je kjoafaʼaitsjenle Niná kʼoa kao kjoatéxomale xi faʼaitʼa ya Biblia kʼoa kui xi koasenkaoná nga tsjoa sʼe̱ tokoán. Janla koya kataʼyaa.

Nichxin xi tiyoaa ndʼai, nʼio nkjín mani je chjota xi tsjoá kjoafaʼaitsjen tʼatsʼe josʼin kuiyokoaa xíngiaa, nga tsjoacha koaan xíngiaa, tʼatsʼe familia, josʼin kʼoéndajiaan kjoa, josʼin tsjoa sʼe̱ tokoán kʼoa jme xá tiyoñá Sonʼnde. Tonga je xi ngisa nda kjoafaʼaitsjen tsjoá xi tʼatsʼe jebi jéní je Jeobá, je Niná xi kisindaná.

 Tobʼelañá, tsa jngo cámara kʼoa tsa jngo computadora kuindái, kuijin xi meli nga je xi kisinda tsojmi jebi nga jngo xo̱n kijnatʼale jñani kʼoatso josʼin koa̱nchjén. Je Biblia yaa mangóson xo̱n jebi, kʼoa tsʼení je Niná xi kisindaná kʼoa yaa kʼoatsoná josʼin nga nda kuiyoaa. Xo̱n jebi kʼoatsoná jme xá koanndañá kʼoa jmeni xi sʼiaan nga nda kuiyoaa.

Joni tsa jngo xo̱n xi nʼio nda kasʼenda, je Biblia kʼoatsoná jmeni xi sikiʼaonná kʼoa jmeni xi tsín nda sikatíoná. Tsakui nichxin ngisa choa ñʼai koa̱nná nga si̱tjosoán je kjoafaʼaitsjen xi tsjoá chjota. Tonga tsí ngisa nda koasenkaoná je kjoafaʼaitsjen xi tsjoáná je xi kisindaná nga tsín kjoa jtsaojiaan kʼoa nga nda kuiyoaa.

Kʼoa ningalani bándiaaná je Jeobá kʼoa kʼoatsoná jmeni xi sʼiaan, alikui kjoanʼio bʼénená nga si̱tjosoán. Je Jeobá tsjoakená kʼoa mele nga koasenkaoná, kuinga i̱ tsosíniná: “An, Jeobá, anña Nináli, je xi kʼoasʼin bakóyali ánni nga ji xi nda kuijnasíni, je xi kʼoasʼin síkasényali ya ndiaa xi tjínnele kuitómjeyai. Kʼiatsa koasenñolani je kjoatéxomana, ñaki nyʼánjin sʼin kuijnai joni tsa jngo xongáje kʼoa je kjoakixili ñaki jo xóle ndáchikonjin koa̱n” (Isaías 48:17, 18). Kʼiatsa koanngíntjenngiaa je kjoafaʼaitsjen xi tsjoáná je Niná nda kuiyoaa. Tojosʼin tiʼyaa, machjén nga jchaa je Niná kʼianga tsjoa sʼe̱ tokoán.

Tjínkʼa chjota xi kʼoatso nga tsín machjénle Niná kʼoa nga tsín makjainle xi tʼatsʼe. Kʼoasʼin síkjaʼaitsjen nga tsín kʼoasikji kjoa sʼe̱ná kʼiatsa tíjnalani je Niná. Tobʼelañá itso: “Ánni nga kjoañʼai faʼásíni je xi nda chjota. Ánni nga kʼoasikji xtiʼndí tsinsíni xi yo̱ma̱ kjoan. Ánni nga kʼoasikji kjoa sʼesíniná”. Alikui chʼaotjín nga kui chjonangiaa jebi, tonga tsa kʼuínyaná jotjínni ñaki sʼe̱jngojin tokoán. Kʼoa nga tsín je Niná kjoánelee jmeni xi chʼaotjín matʼeen, kuila chótʼaa jotso je Énle xi tʼatsʼe kjoa jebi.

Ya kapítulo 3 xi tsʼe Génesis kʼoatso kʼianga je Na̱i jngo ye̱ kisichjén kʼianga kʼoakitsole je chjota xi títjon tsakatio nga tsín katasítjosonle Niná. Je Niná kʼoakitsole nga kuiyá tsa kui ski̱ne je tole yá xi tjínle kjoankjíntokon xi ndatjín kao xi chʼaotjín. Je Na̱i i kitsole Eva: “Likui kuiyáo. Je Niná bení kʼianga je nichxin nga kui chi̱nao tjóxʼángi xkon kʼoa koa̱nngósonño kao Niná, nga jchao xi ndatjín kao xi chʼaotjín” (Génesis 2:16, 17; 3:4, 5).

Kʼianga kʼoakitso je Na̱i ali tokuijin xi kitso kʼianga ndiso Niná, kʼoati kui xi kitso nga likui nda tíbatéxoma. Kʼoakitso nga ngisa nda koatio je chjota kʼiatsa je sitjosonle ʼndele nga Niná sitjosonle. Jósʼin sʼe̱ndajin kjoa jebi. Je Jeobá kitsjoaʼnde nga katafichxinle kjoa jebi kʼoa nga  kataʼyale tsa kjoaixi jmeni xi kitso je Na̱i kʼoa tsa mai. Kitsjoaʼndele je Na̱i kao chjota xi je kitʼale kʼianga katabakó tsa ngisa nda koatio chjotasonʼnde nga tsín Niná koandiaale.

Jósʼin nikjaʼaitsjain ji xi tʼatsʼe jebi. A ngisa ndatjío je chjota kʼianga toje yʼa yaole kʼoa nga toje tjíobatéxomale xínkjín. Totikjaʼaitsjenlai jokji kjoachjaʼatokon tjín, nga totaon tjíoʼya chjota, chʼin xi tjín, kjoabiya, kjoatsʼen, nga tsín nda fikao yaole chjota, nga síkjeson xínkjín kʼoa nga kjoajchán batío. Ngayeje jebi kui xi kjoañʼai tjíosíkjaʼá je chjota kʼoa kui bakó nga tsín nda tjíobatio kʼianga toje yʼa yaole. Je Biblia kʼoatso nga tsín je Niná xosíkao chjota nga kʼoasikji kjoa tjínnile, itso: “Je chjota tjíobatéxomale xínkjín nga tjíosíkiʼaon” (Eclesiastés 8:9).

Tojosʼin tiʼyaa, tsí kjoaixi nga machjén kʼianga kuijnyísjee Niná ánni nga kataʼyasíñá jmeni xi chjonangilee je yaoná kʼoa josʼin sʼe̱ndajin kjoa xi tjín.

Saʼnda nichxin kjoatse je chjota alikui mele nga chʼin sʼe̱le, nga koa̱njchínga kʼoa nga kuiyá. Nʼio tse nichxin síkʼaya je chjota, tse tao̱n síkjeya kʼoa yaa tjíosíkjejin nganʼiole nga tjíobásjaile josʼin kjoaʼaxin kjoa jebi, tonga toxitsjoani. Tjínkʼa chjota xi ndáxka̱ tsakʼi xi kʼoasʼin koankjainle nga koa̱nxtiya tsakui skʼuí kʼoa nga koatio ngantsjai nichxin, tonga alikuini kʼoakoan.

Je Niná kui xi mele nga tsjoa katasatío kon je chjota. Kʼoasʼin tjínndajinle kʼianga sʼa kisinda kʼoa tojo kʼoasʼin síkjaʼaitsjen saʼnda ndʼaibi (Génesis 1:27, 28; Isaías 45:18). Kʼoa ʼyañá nga ñaki bitjoson jmeni xi tso je Jeobá (Isaías 55:10, 11). Je Biblia kʼoatso kʼianga ʼndenaxó sikao Sonʼnde, nga kʼoasichon ijngokʼani jochon je ʼnde xi kisicha Adán kao Eva. Kʼoa je libro xi Apocalipsis 21:4 itso: “Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male, nga je kjoa xi títjon jejaʼato” Jméni xi sʼin Niná kʼianga katabitjoson én jebi. Kʼoa jmé kjoanda xi so̱koná nga kʼoakoa̱n.

Je Jesucristo, je ʼNdíle Niná, kʼoakitsole je chjotale nga katabʼétsʼoa nga katabitjoson josʼin mele je Nʼaile. Nʼio nkjín chjota xi be kʼoa xi bʼéxkia kjoabʼetsʼoa xi padrenuestro ʼmi, itso: “Nʼainajin xi tijnai ngʼajmi, kataʼyaxkón jaʼaínli. Katjinroa kjoatéxomali. Kʼoakatasʼín josʼin nga meli, joni ya ngʼajmi kʼoatisʼin i̱ sonʼnde” (Mateo 6:9, 10). Je kjoatéxomale Niná, xi tsonile, Chjotaxále Niná, kui sichjén je Jeobá nga kjoaʼaxin je kjoa xi tjíobajngi chjotaxá sonʼnde kʼoa nga jngo sonʼnde chjotse kjoaʼaíkao jñani ñaki kjoatéxomakixi sʼe̱ (Daniel 2:44; 2 Pedro 3:13). * Tonga kʼoati machjén nga tjín xi sʼiaan tsanda ñá. Jméni xi sʼiaan.

 Je Jesucristo kʼoakitso jmeni xi sʼiaan kʼoa ali tsa ñʼaijin tíjna, kitso: “Jé xi kjoabijnachon ngantsjai, nga kʼoasʼin skoe̱li xi tojngo ji Niná xi ñaki kjoakixi, kʼoa skoe̱ Jesucristo je xi kinikasáin” (Juan 17:3). Tojo tso testo jebi, totʼatsʼení je Jeobá nga koa̱n kuiyoaa tokʼia saʼndani ya sonʼnde chjotse. Jósʼin nikjaʼaitsjain ndʼai, a machjénná je Niná. Tojosʼin tiʼyaa, nʼio machjénná.

Nichxin kjoan jao jmi nó ján, ya ʼnde xi Areópago ʼmi xi nchja̱ni ya naxinandá Atenas, je pastro Pablo i kitsole je chjota griego xi ya tjío kʼianga tsakjákaoni xi tʼatsʼe Niná: “Jé tsjoáná kjoabijnachonná, kʼoa nga chjenjta, kʼoa kao ngayije tsojmi”. Kʼoa xijekoan kitsosale: “Totʼatsʼení nga tiyoaa, nikjaan, kʼoa tiyochoán, josʼin nga kʼoati kitso kʼa chjotachjineno: Kʼoati ñá [xtile] Niná nía” (Hechos 17:25, 28).

Je én xi kitsole Pablo je chjota xi ya Atenas tsʼe ñaki kʼoatjín. Je Niná xi kisindaná jé tsjoáná je ntjao̱ xi chjenjtá je tsojmi xi chinee kʼoa kao nandá xi ʼyoá. Tsa tsín tsjoáná Niná tsojmi jebi alikuijin kuiyochoán. Tonga, ánni nga tojo síkuindasíni Niná je chjota ninga tsín faʼaitsjenle xi tʼatsʼe. Je Pablo itso: “Jméni nga koaasjaini Niná, tsa koa̱nle, josʼin nga so̱kole joni tsa xi xka̱ kji xi skánjonʼnde nga koaasjai. Tonga kjoakixi nga tsín tsa kjin tíjnaná nga jngójngoá” (Hechos 17:27).

A meli nga jchasai xi tʼatsʼe Niná. A meli jchai jmeni xi tjínndajinle kʼoa jmeni kjoafaʼaitsjen xi tsjoáná kʼianga nda sʼe̱ tokoán ndʼaibi kʼoa tokʼia saʼndani. Tsa jaon, chja̱kaonajmí je chjota xi kitsjoali rebista jebi kʼoa tsamaije̱ chjílai je xi sínda rebista jebi. Tsjoa sʼe̱le nga koasenkaoli.