1, 2. Jméni xi tjíosíkjaʼaitsjen je pastro nga kjesa fikaojin Jesús ya Jerusalén.

KIJNA tsjetsjee ngʼajmi kʼoa sáʼndí kijna nga kʼia. Je chjota xi síkuinda naxinandá tsabe nga sáʼndí kijna kʼoa je naʼmi kʼoati kisʼejinle kʼoa kʼoakitso nga jekitsʼia sá nisán. Xijekoan, kisʼetsee lʼí kʼoa kikao én chjota nga jekitsʼia sá nisán. Je pastrole Jesús kuijin tjíosíkjaʼaitsjen nga jemachrianle sʼuí Paxko kʼoa nga jetjínnele koai Jesús ya Jerusalén tsa mele kʼia kuicho nga kjesa fitsʼiajin je sʼuí.

² Je Jesús kao chjotale yaa tjío ya Perea nga kʼia (ya xingoa xongá Jordán) kʼoa tokʼoatjínsa nga tjíofikao Jesús ya Jerusalén (Mat. 19:1; 20:17, 29; Mar. 10:1, 32, 46). Nga jefitsʼia sá nisán, to teño nichxin faʼato kʼoa kʼiaa sʼejna sʼuí Paxko, kʼianga 14 sá nisán, nga jekantjai je tsʼuí.

3. Ánni nga katamandosinsíniná kʼiani kisʼejna je sʼuí Paxko.

³ Je Kjoabichile Nainá kʼiaa sʼejna nga kisʼejna je sʼuí Paxko. Kʼoa nó jebi kʼiaa kʼoakaole nga 14 sá abril nga jeska̱ntjai je tsʼuí. Nichxin jebi nʼio bechjí je chjotale Cristo kʼoa kao chjota xi mele nga nda koatio ngixko̱n Niná. Ánni. Kuinga je Jesús xokitso tojo tso ya 1 Corintios 11:23-25: “Jesús kiskoé nioxtila je nitje̱n kʼia nga kichanitʼa. Kʼia nga jekitsjoa kjoanda, kisixkoa̱ya, kʼoakitso: Chjóao, ticho. Jébi yaona xi kʼoasʼin maxkoa̱ya tʼatsaon. Kʼoatʼiaon jebi nga kjoaʼaítsjenno xi tʼatsʼan. Kʼoatisʼinni kiskoé je cho̱tsín”.

4. 1) Jméni xi chjónangilee yaoná tʼatsʼe kjoanikjaʼaitsjenya xi tsʼe kjoabiyale Cristo. 2) Jósʼin ʼyanile kʼiani nga tjínnele sʼe̱jna je Kjoanikjaʼaitsjenya xi tsʼe kjoabiyale Cristo (chótsenlai je rekuadro xi tso:  “Nga kjoaʼaítsjenya kjoabiyale Cristo nó 2014”).

⁴ Kʼoajinti meli ji nga kʼuín kʼianga sʼe̱jna je kjoanikjaʼaitsjenya xi kitso Jesús. Kjoanikjaʼaitsjenya jebi xki̱ nó sʼejna. Kuinga ndatjínsíni nga  chjónangilee yaoná: “Jméni xi sʼian nga tje̱n koatejnanda nga sʼe̱jna kjoanikjaʼaitsjenya xi tsʼe kjoabiyale Cristo. Jméni xi koa̱nchjén. Jókoa̱n. Kʼoa jósʼin tjínnele skoekoan je kjoanikjaʼaitsjenya jebi kao tsojmi xi koa̱nchjén”.

5. Jméni xi kitsole Jesús je chjotale nga katabatíonda kʼianga kʼoejna sʼuí Paxko.

⁵ Kʼianga kʼoakitsole Jesús je chjotale nga katabatíonda jme xi koa̱nchjénle nga kʼoejna sʼuí Paxko, alikui kʼoakitsole tsa síxkón katasíchon. Tokuijin xi koanmele Jesús nga tsje chon ʼnde xi katabásjai kʼoa nga tiʼnde (tʼexkiai Marcos 14:12-16). Je chjotale tsakajngi je tsojmi xi koanchjénle, kao nioxtila kʼoa kao bino. Kʼianga jetsakʼéjna je sʼuí Paxko, je Jesús kui kisikʼaxki̱ je nioxtila kao bino. Kui nga jao koya tsojmi jebi xi kisichjén Jesús.

6. 1) Jméni xi kitso je Jesús tʼatsʼe nioxtila kʼianga jetsakʼéjna sʼuí Paxko. 2) Jmé nioxtilani xi machjén nga nikjaʼaitsjenya je kjoabiyale Cristo.

⁶ Je pastro Mateo, xi ya tíjna nga tsakʼéjna kjoabichi jebi i kitso nga koanskanni: “Jesús kiskoé nioxtila, kisichikontʼain, kisixkoa̱, kitsjoale chjotale, kʼoakitso: Chjóao, ticho” (Mat. 26:26). Je nioxtila xi kisichjén alikui naʼyo̱san tjínle, kʼoakjoan jokjoan xi machjén nga sʼejna sʼuí Paxko (Éx. 12:8; Deut. 16:3). Nioxtila jebi alijme xi sʼejin, to skoa̱n trigoní, tsínle naʼyo̱san kʼoa tsínle na̱xa̱. Nga tsín jme xi tjínjin, kixí makjoan kʼoa tongotjo maxkoa̱ni. Nichxin xi tiyoaa ndʼaibi, je chjotajchínga xi tjío ya jinjtín kʼoatsole tsa ʼyani nga katasínda nioxtila jebi, nga to skoa̱n trigo kao nandá katasíchjén kʼoa nga i̱natjín siti̱ katasíkaya xjoa̱ jña sichjánya. (Tsa tsín skoa̱n trigo, koaan tsa skoa̱n xi tsʼe arron, cebada, najmé kʼoa tsa jmesa arinani xi koa̱nchjén.)

7. Jmé binoni xi kisichjén Jesús kʼoa jñánile xi koa̱n koa̱nchjén nga faʼaitsjenya je kjoabiyale.

⁷ Je pastro Mateo kitsosa: “[Jesús] kiskoé jngo cho̱tsín, kitsjoa kjoanda, kitsjoale, kitso: Tʼio ngatsʼio” (Mat. 26:27, 28). Je xi kiskoé Jesús jéní cho̱tsín xi tjía bino (ali tsa nandále totseejin xi kisichjén, nga̱ jenkjín sá jaʼato nga kisʼexkó  totsee nga kʼia). Ningalani tsín bino kisʼe nga tsakʼéjna títjon sʼuí Paxko je chjota israelita ya Egipto, je Jesús alikui kʼoakitso tsa tsín koa̱n sʼio bino. Saʼnda kui kisichjén nga tsakʼéjna je Kjoabichile Nainá. Kuinga kui nichjénsíñá ndʼaibi. Tonga jmé binoni xi machjén. Je njínle Jesús alijme xi kisʼejin. Kuinga je bino xi kui kitsoyanile alikui xán kʼoa alijme xi kisʼejin. Koaan koa̱nchjén tojñanile binojko, je xi saténa ya tienda, jolani tsa beaujolais, borgoña kʼoa tsa quianti kʼoa tsakuije̱ xi toñá bʼendaa.

8. Ánni nga nʼio mandosinsíniná josʼin tsoyanile je nioxtila kao bino.

⁸ Je pastro Pablo kʼoakitso nga ngatsʼi je chjotale Cristo tjínnele kʼoejna je Kjoabichile Nainá. Je xi tjío ya Corinto i kitsole: “Nainá kitsjoana tikui xi tsakakoyano nga jon: Je Nainá Jesús kiskoé nioxtila [...]. Kʼia nga jekitsjoa kjoanda, kisixkoa̱ya, kʼoakitso: Chjóao, ticho. Jébi yaona xi kʼoasʼin maxkoa̱ya tʼatsaon. Kʼoatʼiaon jebi nga kjoaʼaítsjenno xi tʼatsʼan” (1 Cor. 11:23, 24). Kuinga kʼoanʼiasíñá saʼnda ndʼai ñá xi chjotale Cristo maa, xki̱ nó nikjaʼaitsjenyá je kjoabiyale Cristo kʼoa nʼio mandosinná josʼin tsoyanile je nioxtila kao bino.

9. Jósʼin makjain kʼale chjota tʼatsʼe nioxtila xi kisichjén je Jesús.

⁹ Nʼio nkjín chjota xi kʼoatso nga ñaki yaole Cristo mʼóya je nioxtila, nga i̱ kitso Jesús: “Jebi yaonaní”. Kʼoa kuinga kʼoasʼin makjainsínile nga je nioxtila kui mʼóya je yaole Cristo. Tonga alikui tsa kʼoatjín josʼin makjainle. * Je yaole Jesús yaa tíjna ya jñani tjío je pastrole, kʼoa kʼoati ya tjío je nioxtila xi tsínle naʼyo̱san xi tsakjen. Kuinga kʼoabixónsíñá  nga kui xi kitsonile Jesús nga totsoyanile je nioxtila, tojo kitso nga tsakatío xi kjaʼaísa choa̱ (Juan 2:19-21; 4:13, 14; 10:7; 15:1).

10. Jósʼin tsoyanile je nioxtila xi machjén nga sʼejna Kjoabichile Nainá.

¹⁰ Je nioxtila xi tjíobasen kʼoa xi tsakjen je pastrole Jesús kui kitsoyanile je yaole Jesús. Je chjotale Cristo kʼoasʼin koankjain choatsele nga je nioxtila kui tsoyanile je chjotale Cristo xi ya koai ya ngʼajmi, xi “yaole Cristo” tsole ya Biblia. Kuinga kʼoasʼin koankjainnile nga je Jesús kisixkoa̱ nioxtila kʼoa nga nijngojin nindale kinixkoa̱ kʼianga kinikʼien (Efes. 4:12; Rom. 12:4, 5; 1 Cor. 10:16, 17; 12:27). Tonga nga koanskanni koanjinnile nga kʼoatso je Énle Niná nga kui yaole Jesús xi nioxtila tsoyanile. Je xi tsakjaʼá “kjoañʼai” kui yaole Jesús kʼianga kisʼetʼa yá. Kʼoa kuinga je nioxtila xi machjén nga sʼejna Kjoabichile Nainá kui tsoyanile yaole Jesús, je yao xi “tsakʼa xi tsaan jée” (1 Ped. 2:21-24; 4:1; Juan 19:33-36; Heb. 10:5-7).

11, 12. 1) Jméni xi kitso Jesús tʼatsʼe bino. 2) Jósʼin tsoyanile je bino xi machjén nga sʼejna Kjoabichile Nainá.

¹¹ Kʼianga ʼyaa josʼin tsoyanile je nioxtila ngisa majinná jmeni xi kitso Jesús tʼatsʼe bino. Je Biblia itso: “Kʼoatisʼinni kiskoé je cho̱tsín, koanskanni nga jetsakjen, kitso: Je cho̱tsínbi jé kjoachjotse xi sʼenʼio kao njínna” (1 Cor. 11:25). Kʼianga cho̱tsín kitso Jesús kui xokitsole je bino xi tjía. A jé bino xi njín tsakʼóya. Mai. Tokitsoyanile je njín xi kʼoasʼin tsakʼéjten Jesús.

¹² Je xo̱n xi kiski Marcos itso én xi tjítʼa xi tsʼe Jesús: “Jebi njínna ní xi tsʼe kjoachjotse xi kisʼenʼio, xi xíjten xi tʼatsʼe nkjín chjota” (Mar. 14:24). Jé njínle Jesús “xi xíjten xi tʼatsʼe xi nkjín chjota, jméni nga cha̱tʼanile jéele” (Mat. 26:28). Kuinga je bino kui tsoyanile je njínle Jesús. Xi totʼatsʼe njínle koaan kuitjontjé, koaan jchatʼa je jéená (tʼexkiai Efesios 1:7).

13. Jméni xi ma nga sʼejna je Kjoanikjaʼaitsjenya xi tsʼe kjoabiyale Cristo.

¹³ Kʼiatsa tosʼa kʼuín títjuin nga sikjaʼaitsjenya je kjoabiyale Cristo je testigole Jeobá, jméni xi koa̱n ya jñani sʼe̱jna. Ya ʼnde jñani sʼe̱jna tsje chon kʼoa nda chon. Tsakui nichxin sa̱tío kʼa naxó, tonga alikui síxkón koa̱nchon joni tsa sʼuí tíbitjo. Jngo ndsʼee xi chjotajchínga sʼin tíjna kuitsoya jmeni xi tso je Biblia tʼatsʼe kjoanikjaʼaitsjenya jebi. Je kjoanokjoaya xi sʼe̱jna koasenkaoná ngatsʼiaa nga katamajinná kʼoa nga jchachjiá nga kʼoasʼin kʼien Cristo xi tʼatsaan nga tsakʼéchjíntjainá ánni nga koa̱n kuiyochonsíñá (tʼexkiai Romanos 5:8-10). Kʼoati kuitsoya nga jao koya kjoachoya xi síkʼaxki̱ ya Biblia xi kʼoaile je chjotale Cristo.

14. Jñánile nga jao koya kjoachoya xi ʼmiya nga sʼe̱jna Kjoanikjaʼaitsjenya xi tsʼe kjoabiyale Cristo.

¹⁴ Jngo koya kjoachoya xi tjínle je chjotale Cristo kuinga ya koatexomakao kʼa ya ngʼajmi. Totjíchoaa mani xi ya koai, kʼoa yaa maxki̱kao je pastro xi kixi kitʼale (Luc. 12:32; 22:19, 20; Apoc. 14:1). Je xi ijngo kjoachoya xi tjínle je chjotale Cristo kuinga i̱ koatio Sonʼnde ngantsjai nichxin kʼianga jeʼndenaxó koa̱n. Me tokui koyatsʼile je chjotale Cristo xi tjío ndʼaibi. Nga kʼia, kʼoakoa̱n josʼin mele Niná i̱ Sonʼnde tojo kjima ya ngʼajmi. Kʼoa kui jebi xi jekjoatse tjíosíjé je chjotale Cristo (Mat. 6:10). Ya Biblia kʼoatso jonaskásʼin koatio chjota jebi tokʼia saʼndani (Is. 11:6-9; 35:5, 6; 65:21-23).

15, 16. Jméni xi si̱kao je nioxtila kʼianga sʼe̱jna je Kjoabichile Nainá.

¹⁵ Kʼianga toje tífikjetʼa je kjoanokjoayale  je xi tínchja̱yajin, kʼoakuitso nga jekichoka orale nga kʼoasʼiaan jmeni xi kitsole Jesús nga katasʼín je pastrole. Tojoná sʼin jesa kanikʼaxkiaa jao koya tsojmi koa̱nchjén: je nioxtila xi tsínle naʼyo̱san kʼoa kao bino. Tsojmi jebi jngo yámixa̱ sa̱tíoson ya chrian jñani tínchja̱yajin je ndsʼee. Kʼoa ndsʼee jebi kui Biblia kʼoexkia kʼoa kʼoakuitso jmeni xi kitso kʼoa kisʼin je Jesús kʼianga tsakʼéjna títjon kjoabichi jebi. Tobʼelañá, je Mateo itso: “Jesús kiskoé nioxtila, kisichikontʼain, kisixkoa̱, kitsjoale chjotale, kʼoakitso: Chjóao, ticho, jebi yaona ní” (Mat. 26:26). Je Jesús kisixkoaa je nioxtila kʼoa kisikʼatole je pastrole xi tjíotʼale nga jao ngoa. Kʼianga kjoaʼaítsjenya je kjoabiyale Cristo nga 14 sá abril jchaní nga tjío je chxoa̱ xi tjíoya nioxtila xi tsínle naʼyo̱san.

¹⁶ Nkjín chxoa̱ koa̱nchjén ánni nga tsín tse kʼoachxinsíni nga kjoaʼatoya nioxtila jebi. Tokjoaʼatoyaní alijme xi si̱kao. Títjon kjoanla jngo kjoabʼetsʼoa sʼe̱jna kʼoa kʼiaa kjoaʼatoya nioxtila josʼin kisʼendajin. Nʼiojin tokʼa xi koakje̱n nioxtila jebi kʼoa tsamaije̱ nijngojin xi koakje̱n, tojo koan nga jaʼaitsjenya kjoabiyale Cristo nó 2013.

17. Jósʼin kjuintjenngiaa je choa̱ xi tsakʼéjna Jesús tʼatsʼe bino.

¹⁷ Xijekoa̱n, je xi tínchja̱yajin kui kʼoakuitso je én xi kiski Mateo jñani tso: “[Je Jesús] kiskoé jngo cho̱tsín, kitsjoa kjoanda, kitsjoale, kitso: Tʼio ngatsʼio. Jebi njínna ní xi tsʼe kjoachjotse xi kisʼenʼio, xi xíjten xi tʼatsʼe xi nkjín chjota, jméni nga cha̱tʼanile jéele” (Mat. 26:27, 28). Kʼoati títjon kjoanla jngo kjoabʼetsʼoa sʼe̱jna kʼoa kʼiaa kjoaʼatoya je cho̱tsín xi tjía bino.

18. Ánni nga nʼio chjísínile nga koanngián kʼianga kjoaʼaítsjenya je kjoabiyale Cristo ninga tokʼa kʼoa ninga nijngojin xi koakjen nioxtila kʼoa skʼuí je bino.

¹⁸ Tojo kitso je Jesús, tojékjoan xi koakje̱n nioxtila kʼoa skʼuí bino je xi ya koatexomakao ya ngʼajmi (tʼexkiai Lucas 22:28-30; 2 Tim. 4:18). Jebi kui xi tsonile nga me tsín ʼya xi kui koakje̱n kʼoa skʼuí, tosi̱kʼatoyañá. Ninga kʼoalani, nʼio chjíle nga koanngián, nga̱ kʼoasʼin bakoñá nga ʼyachjiá je kjoabʼechjíntjaile Cristo. Kʼianga sʼe̱jna kjoafaʼaitsjenya jebi koaan si̱kjaʼaitsjenjiaan jokji kjoanda tje̱nkao kjoabʼechjíntjaile Jesús. Tobʼelañá, tjínná kjoachoya nga ya kuiyojinlee je chjotankjín xi kuinje̱ngi kʼianga kjoaʼaí je kjoañʼai xi jemachrianle. Kʼoasʼin skoe̱konná Niná jotso én jebi: “Jetsakanéjon najñole, kʼoa je kisichxoa kao je njínle je Barré” (Apoc. 7:9, 14-17).

19. Jméni xi sʼiaan nga tongini kuiyondaa kʼianga sʼe̱jna je Kjoabichile Nainá kʼoa nga katabasenkaoná kjoanikjaʼaitsjenya jebi.

¹⁹ Jméni xi sʼiaan ñá xi testigole Jeobá maa jngo tjíjtsa Sonʼnde kʼianga tongini kuiyondaa nga kjoaʼaítsjenya kjoabiyale Cristo. Kʼianga chasa ijngo jao xomana, kʼoakʼuínlee ngatsʼi chjota nga katafikaoná nga sʼe̱jna kjoafaʼaitsjenya jebi. Kʼoa nga ijngo jaosa nichxin chale kui kʼoéxkiaa ya Biblia jmeni xi kisʼin Jesús kʼoa jmeni xi koan nga tikʼiani, nga nó 33. Tongini kuiyondaa ánni nga tsín jme xi kʼoechjoasíniná nga koanngián. Kʼoénelee yaoná nga xátí kuichoaa, tiʼani nga kjesa fitsʼiajin kjoajnda kao kjoabʼetsʼoa, ánni nga koa̱n si̱tiʼndasíñá je chjota xi kuicho kʼoa nga kuinóʼyayejesíñá jmeni xi sa̱kóya. Nʼio nda koasenkaoná kʼiatsa kuijnyísjee je testole Biblia xi kʼoexkia je ndsʼee xi kuinchja̱yajin. Kʼianga koanngián, koakoñá nga nʼio ʼyachjiá je kjoabʼechjíntjaile Jesús kʼoa nga nitjosoán jme xi kitso: “Kʼoatʼiaon jebi nga kjoaʼaítsjenno xi tʼatsʼan” (1 Cor. 11:24).