A meli nga ya si̱jchái yaoli, ji kʼoa kao familiali, jngo Sonʼnde jñani tsín je chʼin. A meli nga katatjoxin je kjoachjaʼatokon, kjoaʼaon kao kjoabiya. Kʼoakoa̱n nga kuichoka nichxin, je Niná kʼoatso nga kʼoakoa̱n. Kataʼyala jotso Apocalipsis 21:3-5 (tʼexkiai) josʼin kuitjoson én jebi.

“Niná kʼoejon ngayije ndáxko̱n xi tsʼe xko̱n.” (Apocalipsis 21:4.) Jméni xi “ndáxko̱n xi tsʼe xko̱n” tsole testo jebi. Ali tsakuijin xi bitjongi xkoaan kʼianga tsjoa tjínná kʼoa kao xi toxá síkaʼnyini xkoaan. Je xi kʼoejon Niná jéní ndáxkoaan xi bitjo kʼianga ba tjínná. Kʼoa ali tsa tokuijin xi kjoaʼaxin je Niná, saʼnda kjoaʼaxin je kjoaʼaon kao kjoachjaʼatokon xi síkjiʼndáná.

“Likui tisʼe̱ni kjoabiya.” (Apocalipsis 21:4.) Je xi ngisa aon maná kʼoa xi ngisa síkjiʼndáná kʼiaa nga jngo xíngiaa biya. Tonga je Jeobá kʼoasjentjai je chjota xi sitjosonle. Jósʼinnile. Kui kjoaʼaxin je jée xi kisikakinná je Adán, nga̱ kui jée jebi xi kjoabiya bichókaoná (Romanos 5:12). Je Jeobá kui kjoabʼechjíntjaile Jesús sichjén nga chjotatsje katama ijngokʼani je chjota. * Kʼoa xijekoa̱n, kʼiaa tjóxin je kjoabiya (1 Corintios 15:26). Kʼoa ngatsʼi chjota kʼoasʼin koatio josʼin tjínndajinle Niná saʼnda ngasʼa. Alikui tichʼin sʼe̱nile kʼoa koatio tokʼia saʼndani.

“Likui tisʼe̱ni [...] xi aon male.” (Apocalipsis 21:4.) Jméni xi tsín tisʼe̱ni tojo tso testo jebi. Jé xi aon bʼé ni̱ma̱ná, tokoán kʼoa kao jñani aonjon aontʼa ma yaoná. Totʼatsʼe jée xi kichʼá nga kʼoama kʼoa miyón mani chjota xi tsín nda biyole nga kjoaʼaon tjíojin kʼoa nga aonjon aontʼa yaole.

Jeme tjóxin je kjoabiya kao kjoaʼaon kʼoa alijme xi ndáxkoaan tisikjinroajenni. Tonga tsakui nichxin i̱sí: “Jñáni nga kʼoasʼin kuiyoaa, a yaa ngʼajmi”. Mai. Je én xi fitsʼiani én xi tichotʼayajiaan kʼoatso nga “je niʼyale Niná kijnajinle chjota” kʼoa je chjota i Sonʼnde tjío (Apocalipsis 21:3). Kʼoa je én xi kinchja̱ Niná kʼoatso nga “likui tisʼe̱ni kjoabiya”, kʼoa jñani kjoabiya tjín i Sonʼnde. Ya ngʼajmi alikʼia nga kjoabiya kisʼe, tonga i̱ Sonʼnde jaon, me tiʼa kisʼeni kjoabiya saʼnda nga sʼa koannda je chjota. Jebi kui xi bakóná nga i̱ Sonʼnde jñani nda kuiyoaa kʼianga kuitjoson je én xi kinchja̱ je Niná.

Je Jeobá mele nga koa̱nkjainná jmeni xi tso. Kʼianga jekisikʼaxki̱ kjoanichikontʼain xi sʼa kjoaʼaíkao, i kitso: “Koeni an sichjotse ngayije”. Kʼoa nga ñaki katamakjainná i kitsosa: “Chjí, nga je énbi ndaní, kʼoa kjoakixiní” (Apocalipsis 21:5). Kuinga kʼoaʼmisínilaijin nga kataʼyai jméni xi sʼiain, ji kʼoa kao xíngi, ánni nga ya kuiyojinsínilao je chjota xi skoe̱ nga kuitjoson én xi kinchja̱ je Niná.