1, 2. Jméni kjoanikjaʼaitsjenya xi tjínnele koa̱nndosinná ngatsʼiaa xi chjotale Cristo maa, kʼoa ánni.

JMÉNI xi xki̱ nó síkjaʼaitsjenjin chjota. Tsa jngo xi jechixan kʼoajin kuitso nga kui síkjaʼaitsjenya nichxin nga chixan. Kʼoa tjínjinkʼa chjota xi kʼoakuitso nga kui síkjaʼaitsjenya jme xi koan ngasʼa, jolani kʼianga tsakʼejnandaí je naxinandále. Tonga a ʼyaní nga jngo kjoanikjaʼaitsjenya xi jetsʼato jan jmi basen nó tísʼejna.

² Kjoanikjaʼaitsjenya jebi kuiní xi sʼuí Paxko sʼin ʼyale, kʼoa kui faʼaitsjenya nichxin nga tsakationdaí je chjota israelita kʼianga choʼnda sʼin tjío tsakai ya Egipto. Tonga jmeni xi koan kʼoati bʼakaotʼaná tsanda ñá. Tonga tsakui nichxin i̱sí: “Jé chjota judío xi sʼuí Paxko bʼasje, kʼoa an chjotale Cristoña, ali tsa judíojian. Ánni nga kui koa̱nndosinsínina”. Ninga kʼoalani, je Biblia itsoná: “Je paxkoná, xi je Cristo”, xi kʼoasʼin kitsʼaitʼa (1 Cor. 5:7). Kʼianga katamajinná jokji chjíle én jebi, kuila chótʼayá tʼatsʼe sʼuí Paxko xi tsakatío chjota judío kʼoa si̱ngósonkaola je kjoatéxoma xi tsakʼaile ngatsʼi je xi chjotale Cristo ma.

3, 4. Jósʼin kinroatsʼiani nga kisʼejna je sʼuí Paxko xi títjon.

³ Miyón chjota xi tjío jngo tjíjtsa Sonʼnde, ninga tsín judío kitje̱nni, xi be choa jmeni xi koan kʼianga kisʼejna títjon je sʼuí xi Paxko ʼmile. Tsakui nichxin ya tsakʼéxkia ya Biblia ya libro xi Éxodo ʼmi, kʼoa tsa ʼya xi tsakʼéyanajmíleje̱ kʼoa tsa mai jngo pelíkula kiskotsenle xi kui tínchja̱ni. A ʼyaní jmeni xi koan kʼianga kisʼejna títjon sʼuí Paxko.

⁴ Je chjota israelita jenkjín nó nga choʼnda sʼin tjío ya Egipto kʼianga kisikasén Jeobá je Moisés kao Aarón nga kʼoakitsole je faraón nga katasíkatíondaí je naxinandále. Tonga chjotaxá jebi koankaile, kʼoa je Jeobá te kjoañʼai kisikasénne naxinandá Egipto. Je kjoañʼai xi jetʼani, kʼien ngatsʼi je xi ʼndítjonle mani je chjota egipcio, kʼoa je faraón kʼiaa kitsjoaʼndele nga kitjo je  naxinandále Niná (Éx. 1:11; 3:9, 10; 5:1, 2; 11:1, 5).

5. Jméni xi kisʼin je chjota israelita kʼianga kjesa nikatíondaíjin. (Chótsenlai sén xi faʼaitʼa ya jña fitsʼiani kjoaʼmiya jebi.)

⁵ Tonga jméni xi títjon kisʼin je chjota israelita kʼianga kjesa nikatíondaíjin. Kʼianga cha̱nndoá nga nó 1513 nga kjesa chʼajin nó 1, nga sá abib, xi sá nisán tsakʼin nga koanskanni. Je Niná kʼoakitso nga je chjota israelita tjínnele kʼia koationdani nga 10 sá nisán, jmeni xi sʼin kʼianga 14 sá nisán. Je chjota israelita kʼiaa bʼéxki̱ nichxin kʼianga jekantjai Tsʼuí. Nga kui nichxin jebi, nga jngó jngó familia jngo barré kʼoa tsa jngo tindso kisikʼien kʼoa je njínle yaa kisikajon choa ya ndaixo̱ntjoa niʼyale (Éx. 12:3-7, 22, 23). Kʼoa xijekoan, kiskine je yao barré xi kisʼechján kao xka̱ kʼoa kao nioxtila xi tsínle naʼyo̱san. Je ánkjele Niná jaʼa ngakjijnda nangi Egipto kʼoa kisikʼien ngatsʼi je ʼndítjonle chjota egipcio, tonga je chjota israelita kisitjoson jmeni xi tsakʼinle kʼoa jé Niná kisikuinda. Xijekoan, kʼiaa tsakationdaí (Éx. 12:8-13, 29-32).

6. Ánni nga xki̱ nó tsakʼéjnasíni je sʼuí Paxko je chjota israelita.

⁶ Kʼoasʼin tsakationdaí je chjota israelita, kʼoa je Niná kʼoakitsole nga katasíkjaʼaitsjenya nichxin jebi kʼianga koa̱nskanni. Kitsole: “Kʼoa nichxin jebi kʼoasʼin tʼejintokon, kʼoa sʼuí kʼoéjnalao Jeobá nga kui nichxin, kʼoasʼin ngatsʼi je ntje̱no. Kjoatéxoma jebi sʼe̱jnaa tokʼia saʼndani”. Kʼoa kʼianga jefetʼa je sʼuí Paxko nga 14 sá nisán, ijngosa sʼuí fitsʼia xi ñato nichxin sʼejna. Ningalani tokʼia nga 14 sá nisán sʼejna je sʼuí Paxko, kʼoati Paxko ʼmile je sʼuí xi ngi ñato nichxin sʼejna (Éx. 12:14-17; Luc. 22:1; Juan 18:28; 19:14). Je chjota israelita kʼoatsakʼinle nga xki̱ nó kʼoejna je sʼuí Paxko (2 Crón. 8:13).

7. Jméni xi tsakʼéjna chjotse je Jesús kʼianga jetsakʼéjna je sʼuí Paxko xi tojetʼani.

⁷ Je Jesús kao pastrole chjota judío koan kʼoa kui kitjenngi je kjoatéxomale Moisés, kuinga xki̱ nó tsakatíosíni sʼuí Paxko (Mat. 26:17-19). Kʼianga jetsakʼéjna je sʼuí Paxko xi tojetʼani je Jesús kao chjotale, je Jesús jngo kjoabichi tsakʼéjna chjotse nga jekoanni xi kʼoasʼin xki̱ nó sikjaʼaitsjenya je chjotale. Kuiní je xi Kjoabichile Nainá ʼmi. Tonga jmé nichxinni sikjaʼaitsjenya kjoabichi jebi.

8. Jméni xi chjonangiaa kʼianga chotʼayajiaan xi tʼatsʼe sʼuí Paxko kao nga sʼejna Kjoabichile Nainá.

⁸ Je Jesús kʼiaa tsakʼéjna je kjoabichile Nainá nga jetsakʼéjna sʼuí Paxko kao chjotale. Tikui nichxin tsakatíoni nga jao. Je nichxin nga bʼéjna sʼuí Paxko je chjota judío xi tjín ndʼaibi alikui tikuini nichxin nga nikjaʼaitsjenyá ñá je kjoabiyale Cristo. Ánni nga tsín mangósonsíni. Kʼianga jchaa xi tʼatsʼe jebi, kui koasenkaoná jme kjoatéxoma xi kitsjoale Niná je chjota israelita josʼin kʼoejna sʼuí Paxko. Je Niná kʼoakitsole nga kʼianga 14 sá nisán sikʼien je barré, kʼoa kui nichxin jebi kitsʼia je sʼuí Paxko (tʼexkiai Éxodo 12:5, 6). *

9. Tojo tso Éxodo 12:6, jóchon kinikʼien je barré kʼianga kisʼejna sʼuí Paxko. (Chótsenlai rekuadro xi tso:  “Jmé orani nga kʼoakoan”.)

⁹ Je xo̱njchá xi kijna xi tsʼe chjota judío xi Biblia de Ferrara ʼmi, ya Éxodo 12:6 kʼoatso nga je barré tjínnele kʼia kinikʼien nga jekjimaʼña̱. Kʼoati kui én síchjén je Biblia xi kjaʼaí. Kʼoa je Biblia xi kisikʼatoya je xi Marcos Edery tsakʼin kʼoati tso nga kʼia kinikʼien barré nga jekjimaʼña̱. Kʼoa kjio Biblia xi kʼianga jekjimaʼña̱ tso, nga tíkantjai tsʼuí tso, kʼoa kao nga jekjimanjio tso. Tojosʼin  tiʼyaa, je barré kʼiaa kinikʼien nga jekantjai tsʼuí tonga nga kjesa manjiojin, kʼianga tífitsʼia 14 sá nisán.

10. Jótso kʼa chjota judío tʼatsʼe jochon kinikʼien je barré kʼianga sʼuí Paxko, kʼoa a yaa Biblia bʼangini je xi kʼoatso.

¹⁰ Nga koanskanni, tjínkʼa chjota judío xi kʼoasʼin kisikjaʼaitsjen nga nkjín ora kichomani nga kinikʼien ngatsʼi barré xi bichókao je chjota ya yo̱ngo̱. Kʼoasʼin makjainle nga je én xi faʼaitʼa ya Éxodo 12:6 nga jekjimaʼña̱ tso kui tínchja̱ni nga jetífikjetʼa nichxin nga 14 sá nisán, kʼianga jetíkantjai tsʼuí saʼnda nga jekjimanjio. Tonga tsa kʼialani kinikʼien je barré nga jekjimaʼña̱ kʼianga 14 sá nisán, jóchon tsakjen je chjota israelita nga tsakʼéjna sʼuí Paxko. Je maestro xi Jonathan Klawans ʼmi kʼoatso nga kʼiajinxó tsakjen nga 15 sá nisán. Tonga kʼoati tso nga tsín kʼoatsokixi je libro xi tsʼe Éxodo tsa kʼoakoan. Chjota jebi kʼoatso nga je xo̱n xi kjio xi kiski je chjota xi rabíno koan alikui kʼoatso jókoan nga kisatio sʼuí Paxko kʼianga kjesa nikixoyajin je yo̱ngo̱le Niná, nga nó 70.

11. 1) Jméni xi koan nga kisʼejna sʼuí Paxko nga nó 33. 2) Ánni nga nʼio jeya kisʼejnasíni nichxin nga xoto kʼianga 15 sá nisán. (Chótsenlai je nota.)

¹¹ Kʼianga kʼoatso chjota jebi, kʼiáni kisʼejna je sʼuí Paxko kʼianga nó 33. Kʼianga 13 sá nisán nga jemachrianle nichxin “kʼia nga machjén nga xíjten njínle je barré xi tʼatsʼe sʼuí”, je Cristo i kitsole je Pedro kao Juan: “Tangíon, tʼendao tʼatsaan paxko, jméni nga kuichisínía” (Luc. 22:7, 8). Chan “jichoka ora” nga tsakʼéjna sʼuí Paxko nga jekiskantjai Tsʼuí nga 14 sá nisán kʼianga xipe koannjio. Je Jesús tsakʼéjnaa sʼuí Paxko kao pastrole, kʼoa xijekoan, kʼiaa tsakʼéjna je Kjoabichile Nainá (Luc. 22:14, 15). Kʼianga kui nitje̱n je Jesús kindoa kʼoa kinijtsoʼa. Kʼoa jela nyisen nga 14 sá nisán kisʼetʼa yá kʼoa tikʼia kʼienni nga jekoanxon (Juan 19:14). Kuinga “je paxkoná, xi je Cristo”, xi kʼoasʼin kitsʼaitʼa, kʼiakjoán kʼien kʼianga nikʼien je barré xi tsʼe sʼuí Paxko (1 Cor. 5:7; 11:23; Mat. 26:2). Kʼoa xijekoan, tikuini nichxin jebi xi tsʼe 14 sá nisán kisʼeñe, tongini nga kjesa fitsʼiajin 15 sá nisán (Lev. 23:5-7; Luc. 23:54). *

12, 13. Jméni xi kisʼin je xtiʼndíle chjota israelita kʼianga kisʼejna je sʼuí Paxko.

¹² Ijngokʼala si̱kʼaxki̱ngáñá jmeni xi koan ya Egipto. Je Moisés kʼoakitsole je naxinandále  Niná nga katabʼasje je sʼuí Paxko tokʼia saʼndani. Kʼianga xki̱ nó kisʼejna sʼuí jebi, je xtile chjota israelita kuijin kiskonangile xijchále ánni nga kui sʼuí bʼéjnasíni (tʼexkiai Éxodo 12:26, 27; * Deut. 6:20-23). Kʼoasʼin tsabeni kʼoa kisʼejintokonni je xtiʼndí je sʼuí Paxko (Éx. 12:14).

¹³ Je xijchá kitsoyale je ʼndíxtile tʼatsʼe sʼuí Paxko kʼoa je xtile kʼoati kisʼin. Je xi kitsoyale kuinga síkuinda Jeobá je choʼndale. Je ʼndíxti koanchoyale nga ñaki tíjna je Niná, nga mandosinle je naxinandále kʼoa nga basenkao tsa nganʼiole machjénle. Kui jebi xi tsakakó je Jeobá kʼianga tsín kisikʼien je ʼndíxti tjonle chjota israelita “kʼianga kichokaone kjoañʼai je chjota egipcio”.

14. Xi tʼatsʼe je sʼuí Paxko, jméni xi koakoyale je ʼndíxtile je xi xijchá ma.

¹⁴ Nichxin xi tiyoaa ndʼaibi, je xi xijchá ma ali tsakui kjinele nga xki̱ nó xki nó kuitsoyale je ʼndíxtile tʼatsʼe sʼuí Paxko. Tonga, a ʼmiyalai ʼndíxtili jmeni xi bakóyaná je sʼuí Paxko, jolani nga kʼoasʼin síkuinda Niná je naxinandále. A ñaki tjíojngo kon je ʼndíxtili kʼianga tojo tísíkuinda Jeobá je choʼndale (Sal. 27:11; Is. 12:2). A ngasin nganda ʼmiyalai jmeni xi bakóyaná je sʼuí Paxko ʼndele nga to én kuinyandonai. Kʼiatsa kʼoasʼin kʼuínyalao ngisa koa̱nnʼiotʼasa je Jeobá.

15, 16. Jmésani xi bakóyaná tʼatsʼe Jeobá je libro xi tsʼe Éxodo ya kapítulo 12 saʼnda 15.

¹⁵ Jetiʼyaa kʼianga síkuinda Jeobá je choʼndale, tonga ali tsa tokuijin jebi xi bakóyaná tʼatsʼe sʼuí Paxko. Kʼoati bakóyaná nga bʼasjentjai Niná je choʼndale. Tikjaʼaitsjenlai jokisatio kon je chjota israelita kʼianga tsakʼaonsje Jeobá ya Egipto. Jngo yojbi kʼoa jngo lʼí tsakándiaale. Koaan jaʼatojin ya ndáchikon xi Ní ʼmi kʼianga jaʼatojinbasenle ndáchikon. Kʼianga jekicho ya ndainandá, ñaki xkon tsabeni nga ijngokʼa kinroane ndáchikon je chjota egipcio. Kʼoasʼin tsakationdaí nga kui nichxin. Kʼoa kuinga nʼio kitsjoasíni kjoanda kʼoa i kitso: “Sele je Jeobá [...]. Je naxín kao chjota xi tjíosonle yaa ndáchikon kamʼaonngindá. Je nganʼiona jéní Jah, nga̱ jéní xi kʼoasʼin bʼasjentjaina” (Éx. 13:14, 21, 22; 15:1, 2; Sal. 136:11-15).

¹⁶ A bisenkaoní je ʼndíxtili kʼianga ñaki kʼoabatío kon nga toje Jeobá xi male síkatíondaíná. Kʼianga jmeni xi nʼiai kʼoa jotso én xi nokjoai, a ñaki be je ʼndíxtili nga je Jeobá ninʼiotʼai. Nichxin nga chotʼayajtíon énle Niná ya niʼyano, koaan cho̱bayaño jmeni xi tso ya kapítulo 12 saʼnda 15 xi tsʼe Éxodo kʼoa kui kʼoatixón josʼin tsakʼasjentjai Jeobá je naxinandále. Kʼoa nga kjaʼaí nichxin kʼoati koa̱n chótʼayao jmeni xi bakóya Hechos 7:30-36 kʼoa tsa Daniel 3:16-18, 26-28. Ni sʼa xtiaa kʼoa ninga jejchíngaa alikui jao tjínná nga tojo kʼoasʼin sikatíondaíná je Jeobá nichxin xi nroaján  tojosʼin kisikatíondaí je naxinandále kʼianga nichxinle Moisés (tʼexkiai 1 Tesalonicenses 1:9, 10).

17, 18. Jméni xi bakóyaná josʼin koanchjén je njínle barré xi kinikʼien kʼianga kisʼejna sʼuí Paxko xi títjon.

¹⁷ Ñá xi ñaki chjotale Cristo maa alikui sʼuí Paxko chʼasjee tojo kisʼin chjota judío. Kuinga kui tsakʼéjnani je chjota judío kʼianga xki̱ nó nga kʼoatso je kjoatéxomale Moisés, tonga ñá ali tsa tikuijin kjoatéxoma mangíntjenngiñá (Rom. 10:4; Col. 2:13-16). Je xi nikjaʼaitsjenyá ñá kuiní kjoabiyale je ʼNdíle Niná. Ninga kʼoalani, tojo tse jmeni xi bakóyaná je sʼuí Paxko xi kisʼejnatítjon ya Egipto.

¹⁸ Je njínle barré xi kisikajon ya ndaixo̱ntjoa niʼyale, kui xi tsakʼasjentjai je ʼndíxti tjonle je chjota israelita. Ndʼaibi alikʼia nga cho̱ nikʼienlee je Niná. Tonga jngo kjoabʼechjíntjai tíjna xi ngisa nʼio chjíle xi koa̱n tsjoáná kjoabijnachon xi tsínkʼia fetʼa. Kʼianga kiskile je pastro Pablo “jña nga tjíojtín je xi ʼndítjon xi kʼoasʼin tjíotʼa jaʼaínle ya ngʼajmi”, kʼoakitso nga totʼatsʼe “je njín xi kichjojndibajon” xi tsʼe Jesús koa̱n koatiokonni ngantsjai chjotale (Heb. 12:23, 24). Kʼoa je chjotale Cristo xi koyale nga i̱ koatio Sonʼnde kʼoati totʼatsʼe je njínle Jesús nga kuitjontjainile yaole. Kuinga si̱kjaʼaitsjenjinsíñá nga “je Cristo tsakʼéchjíntjainá kao njínle. Kisichatʼa jéená nga kʼoasʼin tonʼio tse kjoanda xi tjínle” (Efes. 1:7).

19. Jósʼin sínʼio tokoán nga kʼoasʼin kitjoson je én xi tongini kinokjoa josʼin kinikʼien je Jesús.

¹⁹ Kʼianga kinikʼien je barré nga kisʼejna sʼuí Paxko, je chjota israelita nijngojinla nindale je barré kisixkoa̱ (Éx. 12:46; Núm. 9:11, 12). Jósʼin mangóson jebi kao je Jesús je “ʼndí barréle Niná”, xi kʼoasʼin kitsjoa kjoabijnachonle kʼianga tsakʼasjentjainá (Juan 1:29). Je Jesús jngo yá kinikʼientʼa kʼoa jao chjotaché xi kʼoati kinikao kʼoa jngó jngó ngoa kixinyandaile. Je chjota judío kʼoakitsole je Pilato nga katakjotʼaó ngʼasole nga jan ánni nga ngotjo kuiyásíni kʼoa nga tsín tojo ya kjiotʼasíni yá nga xoto nga 15 sá nisán, nga̱ jao sʼuí tsʼakaole nga kʼia. Je sondado kiskotʼaó ngʼasole nga jao chjotaché, tonga kʼianga kicho ya jñani kjitʼa yá Jesús “tsabe nga jekʼen. Likui kiskotʼaó ngʼasole” (Juan 19:31-34). Kui koanngóson jokinikao je barré xi nikʼien nga kisʼejna sʼuí Paxko. Barré jebi “tongʼiánle” jmeni xi koan nga 14 sá nisán nó 33 (Heb. 10:1). Kʼoati kui kitjoson xi tso ya Salmo 34:20, kʼoa jebi ngisa sínʼio tokoán nga bitjoson je Énle Niná.

20. Jméni xi tsín mangóson sʼuí Paxko kao je Kjoabichile Nainá.

²⁰ Tonga je sʼuí Paxko kʼoa kao je Kjoabichile Nainá alikui tsa ñaki mangóson. Kʼianga kʼoatsakʼinle je chjota israelita nga katabʼéjna je sʼuí Paxko alikui kui koanngóson jmeni xi kitsole je Cristo nga katasʼín je chjotale kʼianga sikjaʼaitsjenya je kjoabiyale. Ya Egipto, je chjota israelita kiskine je yaole barré xi kisikʼien tonga alikui tsakʼi je njínle. Kʼoa jebi alikui mangóson jmeni xi kitsole Jesús chjotale nga katasʼín. Kʼoakitsole nga je xi ya koatexomakao tjínnele nga koakjen je nioxtila kʼoa nga skʼuí je bino xi kui tsoyanile yaole kao njínle. Kʼoa kui jebi chótʼayá ya kjoaʼmiya xi ijngo (Mar. 14:22-25).

21. Ánni nga ndatjínsíni nga kataʼyaa tʼatsʼe sʼuí Paxko.

²¹ Je sʼuí Paxko xi tsakʼéjna je naxinandále Niná nʼio tsabechjí. Kʼoa nʼio tse xi bakóyaná sʼuí jebi nga jngo jngoá. Ningalani je chjota judío xi kʼoatsakʼinle nga katabʼéjintokon je nichxin jebi, kʼoati tjínnele jchaa ñá xi chjotale Cristo maa nga̱ nʼio tse xi bakóyaná je xi ya nroatʼa “ngayije xo̱n Escritura [xi tʼatsʼe] Niná jinroani” (2 Tim. 3:16).