1. Jméni xi sʼín je chjota, kʼoa ánni.

JE CHJOTA bʼéngikjoamaa jmeni xi chjí bekon. Tobʼelañá, je xijchá tsjoá nichxinle, tao̱nle kʼoa kao nganʼiole nga síjchá je ʼndíxtile. Je xti xi tsjoake nga tokanacha alikui tifikʼétsaojinkaoni je xti miyole nga̱ kui síkʼayale nichxinle nga bationda, kui xi mele nga ya koaitoka nga sʼejna Juegos Olímpicos. Kʼoa je Jesús kʼoati tse kjoama̱ tsakʼéngi jmeni xi koanndosinle. Tsa je xi kʼoasʼin koanmele koanjin kʼiatsa to yaole kisinyiná kʼoa tsa chixanje̱ kʼoa kisʼele xti. Tonga alikui kʼoakisʼin, kui ngisa kisikʼéjna títjon tʼatsʼe Chjotaxále Niná (Mat. 4:17; Luc. 9:58). Je chjotale Jesús kʼoati tse jmeni xi kisikatío xi totʼatsʼe Chjotaxále Niná, nga nʼio chjí tsabekon kitsjoa jmeni xi tjínle (Mat. 4:18-22; 19:27). Kʼoa ñá, jméni xi ngisa chjí ʼyatokoán.

2. 1) Jméni xi tjínnele sʼin ngatsʼi je chjotale Cristo. 2) Jmésani xá xi sʼín kʼa je ndsʼee.

² Je chjotale Cristo kʼoati bʼéngikjoama nga mele nda koatio ngixko̱n Jeobá kʼoa nga miyole koa̱n. Tobʼelañá, tjínnele nga kʼoasjeʼa nichxin kʼianga kʼoetsʼoale Niná, nga kʼoexkia Biblia, nga skótʼaya kao familiale, nga koai kjoajtín kʼoa nga kuitsoyason (Jos. 1:8; Mat. 28:19, 20; Heb. 10:24, 25). * Kʼianga kʼoasʼin chʼasjee nganʼio kʼoa nga síchikontʼainná je Niná, je xá xi tinʼia nga ʼmiyasoán sa kjimatse sa kjimatsee kʼoa sa nkjín sa nkjín chjota xi tjíofi ya “ndʼiale Jeobá ya jko̱nindo” (Is. 2:2). Kʼoa nʼio nkjín mani je ndsʼee kao tichjaa xi ya síxá jñani sʼenda Ndʼia jña chotʼayá, tjínje̱ xi kui xá tjíosʼín nga bʼéndajin jñani satío kjoajtíntse, tjín xi ya  tsjoánganʼio jñani kjoaxkón bichó kʼoa tjín xi ya Betel tjíosíxá. Nga kui xá jebi tinʼia, ali tsakuijin xi tsonile tsa jetjoéná kjoabijnachon xi tsínkʼia fetʼa, tonga machjénní nga kʼoasʼiaan nga katafison je xále Niná.

3. 1) Jósʼin basenkaoná nga bʼainganʼiolee je Chjotaxále Niná. 2) Jméni xi koa̱n chjónangilee yaoná.

³ Ngisa nʼio machjén ndʼaibi nga kʼoainganʼiolee je Chjotaxále Niná. Kʼoa nʼio tsjoa sʼená nga kʼoasikji nkjín xíngiaa xi ñaki ni̱ma̱le tjíonroajinni nga tjíosíxále je Jeobá (tʼexkiai Salmo 54:6). * Kʼiatsa kʼoati sʼiaan tsanda ñá, nʼio tsjoa satío tokoán saʼnda nga kjoaʼaí je Chjotaxále Niná (Deut. 16:15; Hech. 20:35). Tonga koaan chjónangilee yaoná nga jngó jngoá: “Jmésani xi koa̱n sʼian tʼatsʼe Chjotaxále Niná. Jósʼin tisichjén je nichxinna, tao̱nna, nganʼiona kʼoa kao jmeni xi mana sʼian. Jméni xi tsín koa̱n tsjionkoan”. Kuila chótʼayajiaan jmeni xi kitsjoatʼa je chjota israelita kʼoa jmeni xi bakóyaná nichxin xi tiyoaa ndʼai. Jebi koasenkaoná nga kao kjoatsjoa si̱xálee je Jeobá.

4. Jmé kjoanda xi kisʼele je chjota israelita kʼianga kitsjoatʼale kjoatjao je Niná.

⁴ Je naxinandá Israel cho kitsjoatʼale Niná kʼianga koan kichatʼale jéele kʼoa nga nda tsakatio ngixko̱n Jeobá. Tjín kjoatjao xi ñaki tjínnele kjoanʼio kitsjoa kʼoa tjínkʼa xi to kjoatsjoale kitsjoani (Lev. 23:37, 38). Je kjoatjao xi to kao kjoatsjoale kitsjoani ñaki jngokʼa saká. Kʼianga nʼio nkjín cho̱ kitsjoatʼa je chjota israelita kʼianí nga tsakʼaitʼale Niná je yo̱ngo̱ xi tsakʼénda Salomón (2 Crón. 7:4-6).

5. Jméni xi kisʼin Jeobá kʼianga koan kitsjoatʼale kjoatjao je chjota xi ma̱ tjío.

⁵ Je Jeobá bení nga tsín kʼoakoa̱nle je naxinandále nga tongóson kji tsjoá. Kʼoa je xi koanmele kuiní nga kʼoakji katatsjoá jokji tje̱n bichó nganʼiole. Je kjoatéxoma xi kitsjoa Jeobá kʼoatso nga cho̱ tsjoátʼa je chjota israelita kʼoa nga tokʼoejten je njínle cho̱ jebi. Jebi kui kitsoyanile je kjoanda xi kisʼele chjota nga koanskanni xi totʼatsʼe Jesús (Heb. 10:1-4). Je Jeobá kiskosonnile josʼin kisichjén je kjoatéxomale. Tobʼelañá, kʼianga jngo chjota israelita xi tsín kʼoakoanle nga jngo nra̱ja̱ kitsjoatʼa, je  Jeobá nda kisʼele kʼiatsa tójoo kitsjoatʼale ʼndele nra̱ja̱. Nga kʼoakisʼin je Jeobá, koan kitsjoa kjoatjao je chjota xi ma̱ tsakatio (Lev. 1:3, 10, 14; 5:7). Ningalani nda kisasenle Jeobá jokjoan cho̱ xi kao kjoatsjoa tsakʼaitʼale, tonga jao koya kisijé jmeni xi sʼin je xi kitsjoatʼale cho̱.

6. Jméni xi jao koya kisijéle Jeobá je xi kitsjoatʼale cho̱, kʼoa jókji chjíle nga kisitjoson kjoatéxoma jebi.

⁶ Xi títjon, je chjota xi kitsjoatʼale cho̱ je Jeobá tjínnele nga kui kitsjoa xi ngisasa nda kji. Tokuikjoán cho̱ xi ndakjoan xi kisasenle je Jeobá (Lev. 22:18-20). Kʼiatsa tímʼe je cho̱ kʼoa tsa likui nda kji alikui kisasenle. Xi majaoni, je xi kitsjoatʼa kjoatjao jebi tjínnele nga tsje tíjna josʼin kisijé je Jeobá. Kʼiatsa tsín tsje tíjna, títjon kjoanla kui kitsjoa je kjoatjao xi tsʼe jéele ánni nga nda tsakʼejnasíni ngixko̱n Niná (Lev. 5:5, 6, 15). Je kjoatjao xi tsakʼaitʼale Niná ali to kjoaskájin kitjenkao. Nga̱ je kjoatéxoma kʼoatso nga tjínnele kinikʼien je chjota xi tsín tsje tíjna kʼianga kiskine je cho̱ xi kao kjoatsjoa kitsjoatʼa, jolani, xi kitsjoatʼa nga nyʼán tsakatio ngixko̱n Niná (Lev. 7:20, 21). Tonga tsa tsje tíjna ngixko̱n Niná kʼoa tsa ñaki nda kji je cho̱ xi kitsjoatʼa ñaki tsjoa kisʼele kʼoa nda kisʼe kjoafaʼaitsjenle (tʼexkiai 1 Crónicas 29:9). *

7, 8. 1) Jótjío kon je ndsʼee xi tjíosíxále Niná. 2) Jméni xi koa̱n kʼoailee Jeobá ngatsʼiaa xi chjotale Cristo maa.

⁷ Nichxin xi tiyoaa ndʼai, nʼio nkjín ndsʼee kao tichjaa xi kao kjoatsjoa tjíosíxále Jeobá, kʼoa je Jeobá nʼio tsjoa sʼele. Je ndsʼee jebi kʼoati nʼio nda sʼele nga binyakao xi kjaʼaí. Jngo ndsʼee xi ya síxá jñani sʼenda Ndʼia jña chotʼayá kʼoa kao jñani kjoaxkón bichó kʼoatso nga nʼioxó tsjoa sʼele nga binyakao je ndsʼee. Itso: “Kʼianga ʼbe je nkjaín je ndsʼee nga nʼio tsjoa tjíole kʼoa tsjoá kjoanda nga jesʼenda Ndʼia jña chotʼayá, kʼoa tsakʼiaje̱ nga bʼainganʼiole nga jngo kjoaxkón kabichóne, nʼio tsjoa sʼená nga kʼoasʼin kabʼainganʼioá”.

⁸ Je naxinandále Jeobá básjaintsjaile josʼin tsjoánganʼio tʼatsʼe xá xi kjima xi tsʼe Niná. Kʼianga nó 1904, je Charles T.  Russell kʼoakitso nga tjínnele nga kʼoénelee yaoná ngatsʼiaa nga nda si̱chjén je nichxinná, tsojmi xi tjínná, tao̱nná, kʼoa jmesani xi tjínná nga chʼa̱sjengʼaa je Jeobá. Kʼianga bʼailee Jeobá jmeni xi tjínná nʼio tse kjoanichikontʼain tje̱nkao, tonga kʼoati machjén nga chʼasjee nganʼio (2 Sam. 24:21-24). Kuinga chjónangisínilee yaoná: “A koaan nga ngisa nda sichjén nichxinna, tao̱nna kao nganʼiona”.

9. Jmé kjoafaʼaitsjen xi kitsjoa Jesús ya Lucas 10:2-4 xi koa̱n si̱chjén.

⁹ Nichxinná. Nʼio tse nichxin machjén kʼianga tífaʼatoya xi kjaʼaí én kʼoa nga tíbitjo je xo̱n xi nichjén, nga sʼenda Ndʼia jña chotʼayá, nga satíonda je kjoajtíntse xi satíoná, nga bʼainganʼiole je xi kjoaxkón bichóne kʼoa jmesani xá xi tjín. Jméni xi sʼiaan nga nda ni̱chjén je nichxinná nga to kanño ora tjínle nga jngo nichxin. Kʼianga kisikasén Jesús je chjotale nga kikakóyason jngo kjoafaʼaitsjen kitsjoale. Kitsole: “Niʼyajin xi chjakao ya ndiaabe” (Luc. 10:2-4). Ánni nga kʼoakitsosíni Jesús. Kʼianga sítiʼnda xínkjín chjota nichxinle Jesús, ali tsa to jko̱jin mjénjenle xínkjín kʼoa tsa ntsja tsjoále xínkjín. Nʼio nkjín kʼa tsoakjá xínkjín kʼoa nʼio nkjín kʼa mjénjen jko̱, kʼoa saʼnda binyá xkóle. Nʼio tse nichxin kisikʼaya nga kʼoakisʼin. Ali tsakuijin xi kitso Jesús nga tsín ʼya xi katasítiʼnda chjotale; kui xi kitsonile nga choa nichxin tjínle kʼoa nga tjínnele nga nda sichjén, nga kui kʼoasʼin jmeni xi ngisa chjíle (Efes. 5:16). Koaan si̱chjén kjoafaʼaitsjen jebi kʼoa ngisa tse nichxin si̱kʼayalee je xále Niná.

10, 11. 1) Jósʼin machjén je tao̱n xi batioá. 2) Jósʼin koasenkaoná je kjoafaʼaitsjen xi faʼaitʼa ya 1 Corintios 16:1, 2.

¹⁰ Tao̱nná. Nʼio tse tao̱n machjén kʼianga tíbitjoson je xá xi tsʼe Niná. Nga xki̱ nó nkjín miyón dólar fe, xi machjénle je xi superintendente tjío, xi precursor especial sʼin tjíosíxá kʼoa kao je xi misionero ma. Fitsʼiakjoanni nó 1999 kjoan kanño jmi basen Ndʼia jña chotʼayá jekisʼenda ya naxinandá jñani tsín nanda jme xi tjínle ndsʼee, kʼoa jaon jmi kaoni ño siento cha xi sʼa sʼe̱nda. Xi ijngosani, nga xki̱ sá jngo siento miyón rebista Xo̱n xi Bájinkonná kao ¡Despertad! bitjo. Ngayeje je xi kanikʼaxkiaa kui kjimachjén tao̱n xi batío xíngiaa xi ni̱ma̱le nroajinni.

¹¹ Je pastro Pablo jngo kjoafaʼaitsjen kitsjoa xi koa̱nchjénná kʼianga kʼoai i̱natjián je tao̱n (tʼexkiai 1 Corintios 16:1, 2). Je Pablo kʼoakitsole je ndsʼe̱ xi tjío ya Corinto nga katabʼéjnatjao choa tao̱n kʼianga fitsʼia xomana ʼndele nga kui tsjoá xi tokanjengile nga jekafetʼa xomana. Nichxin xi tiyoaa ndʼai, kʼoati tongini chʼasjetʼaxián je tao̱n xi bʼejnaa jokji tje̱n kʼoamaná (Luc. 21:1-4; Hech. 4:32-35). Je Jeobá nʼio bechjí nga kʼoasʼin bʼainganʼioá.

12, 13. 1) ¿Jméni xi sakʼoa bʼéchjoaná nga tsín je xále Niná nichjénlee je nganʼioná kʼoa kao jmeni xi maná nʼia. 2) Jósʼin koasenkaoná je Jeobá.

¹² Nganʼioná kʼoa kao xá xi maná nʼia. Je Jeobá basenkaoná kʼianga tsʼe xá nichjénlee je nganʼioná kʼoa kao xá xi maná nʼia. Je Jeobá kʼoatso nga tsjoánganʼioná kʼiatsa tsínná nganʼio (Is. 40:29-31). Kʼoa tsa kʼoasʼin si̱kjaʼaitsjeen nga tjío xíngiaa xi ngisa nda koa̱nle sixá tikʼoajinni ñá, si̱kjaʼaitsjeen nga je Jeobá koaanle sichjinená, tojo kisikao je Bezalel kao Oholiab (Éx. 31:1-6; chótsenlai sén xi faʼaitʼa ya jña fitsʼiani kjoaʼmiya jebi).

¹³ Je Niná kʼoatsoná nga kʼoee jmeni xi tjínná (Prov. 3:27). Kʼianga kisʼendaya je yo̱ngo̱le Jeobá kʼoakitsole je chjota  judío nga katasíkjaʼaitsjenjin jmeni xi tjíosʼín (Ageo 1:2-5). Nga̱ to kjaʼaíla xá tjíosʼín kʼoa alikui kui xále Jeobá títjon tjíosíkatío. Kʼoa ñá machjén nga chjónangilee yaoná: “A kui xále Jeobá ngisa títjon tisikʼéjna. A koaan sikjaʼaitsjenjian jmeni xi tisʼian kʼoa ngisa tsjoanganʼioa je xá xi kjima tʼatsʼe Chjotaxále Niná nichxin fetʼa xi tiyoaa ndʼai”.

14, 15. 1) Jósʼin basenkaoná je choa̱ xi batío ndsʼee xi nʼio ma̱ tjío. 2) Jméni xi tjínnená sʼiaan.

¹⁴ Nʼio nkjín je ndsʼee xi ya tjíosíjchá yaole ya naxinandá jñani nʼio tse kjoa tjín kʼoa jñani nʼio ma̱ chon, kʼoa je naxinandále Niná binyakao ndsʼee jebi (2 Cor. 8:14). Ninga nʼio ma̱ tjío je ndsʼee nʼio tsjoa sʼele nga tsjoá. Nʼiojin tsjoa sʼele Jeobá nga kʼoasʼin kao kjoatsjoa tsjoáni jmeni xi tjínle (2 Cor. 9:7).

¹⁵ Jngo naxinandá xi tíjna ya Africa jñani nʼio ma̱ chon, tjínkʼa je ndsʼee xi bʼéchoa̱ choa̱ je nangile ya jñani bʼéntje tsojmi kʼoa je tao̱n xi sokóle nga majchá tsojmi jebi kui xi batío nga tsjoánganʼiole je xá xi kjima xi tʼatsʼe Chjotaxále Niná. Xi tiyani naxinandá jebi nʼio machjén nga jngo Ndʼia jña chotʼayá katasʼenda. Je ndsʼee xi ya tsʼe mele nga tsjoánganʼio, tonga kʼiakjoán kisʼenda kʼianga tísʼentje je tsojmi. Jókisʼin je ndsʼee. Kʼianga nichxin yaa kisixá jña tísʼenda Ndʼia jña chotʼayá kʼoa kʼiaa nga manjio fikʼéntje je tsojmile. Tokʼoamaná jokji tsakʼénele yaole ndsʼee jebi. Jme xi kisʼin kui síkjaʼaitsjenjinná jokisʼin je chjotale Cristo xi tsakatio ya Macedonia. Ningalani nʼio ma̱ tsakatio kʼoakitso nga katabʼaiʼndele nga kʼoati tsjoánganʼio (2 Cor. 8:1-4). Ñá kʼoati koa̱n kʼoee kjoatjao jokji tísíchikontʼainná je Jeobá, xi tsonile, tsa tse kʼoa tsa choa tjínná (tʼexkiai Deuteronomio 16:17). *

16. Jmé xi sʼiaan kʼianga katasasénle Jeobá jmeni xi bʼailee.

¹⁶ Kʼianga tjín xi bʼailee je Jeobá machjénní nga tsín kuinjíotokoán jmeni xi ngisa chjíle, jolani tsa familianá. Tojo kisʼin je chjota israelita, machjénní nga kui kʼoailee je Jeobá jmeni xi ñaki sasénle. Tobʼelañá, tsa kuinyakoaa xi kjaʼaí tonga kuinjíotokoán josʼin tjío je familianá kʼoa jme xi machjénle, likuijin sasénle Jeobá jme xi tibʼailee, nga̱ tsoyajinnile nga kui tibʼailee jmeni xi tsínná (tʼexkiai 2 Corintios 8:12). Ijngosa koya xi tsín kuinjíotokoán kui josʼin tiyoaa ngixko̱n Niná (1 Cor. 9:26, 27). Tsa kʼoasʼin kjuinkoaa yaoná jotso je kjoatéxoma xi faʼaitʼa ya Biblia nda sʼe̱ tokoán kʼianga jme xi kʼoailee je Jeobá, kʼoa je Jeobá kʼoati tsjoa sʼe̱le xi tʼatsaan.

17, 18. 1) Jótjío tokoán xi tʼatsʼe je ndsʼee xi tsjoá jme xi tjínle xi totʼatsʼe Chjotaxále Niná. 2) Jméni xi koa̱n si̱kjaʼaitsjenjiaan ngatsʼiaa.

¹⁷ Ngakjijnda sonʼnde tjín je ndsʼee kao tichjaa xi tsjoá nichxinle, nganʼiole kʼoa kao tao̱nle nga tsjoánganʼio je xá xi tsʼe Niná (Filip. 2:17). Nʼio ʼyachjiá je ndsʼee kao tichjaa jebi nga kʼoatjíosʼín. Kʼoati nʼio ʼyachjiá je yánchjínle kao ʼndíxtile je ndsʼee xi nyatítjonle je xále Niná nga kʼoasʼin tjíotsjoánganʼiole ndsʼee jebi.

¹⁸ Nʼio tse xá tjín xi tsʼe Niná. Kʼoétsʼoalee Jeobá kʼoa si̱kjaʼaitsjeen jmésani xi koa̱n sʼiaan nga si̱xálee. Kʼiatsa kʼoasʼiaan nʼio tse kjoanichikontʼain sʼe̱ná ndʼai kʼoa nichxin xi nroaján ngisa tse kjoanichikontʼain kʼoainá (Mar. 10:28-30).