Liʼya xi tsjoa sʼele kʼianga kui nchja̱ni xi tʼatsʼe kjoabiya nga̱ kjoaʼaon kitjenkao. Tonga ngatsʼiñá nga kjoabiya choʼndá kʼoa saʼnda tsín ñá tjínjinná nga faʼainená.

Alikui choyalee nga nʼainá kuiyá, tsa chjoónná, tsa xʼinná kʼoa tsa ʼndíná kuiyáje̱. Sakʼoa toxijña faʼainená kjoabiya kʼoa sakʼoa tse batioxkʼién xíngiaa. Tonga je kjoaʼaon xi biyojiaan alikui ndi̱to̱n tjoxin.

Je nʼaile Antonio jngo karro kisatetʼale kʼianga tje̱nya yandiaa. Je Antonio itso: “Kʼoamaná jokoa̱nná tsa tjín xi tíbʼéchjoanʼio niʼyaná kʼoa tífáʼaná je yobi̱le. Tsín tikʼia koa̱n kuitjásʼenñá. Tokuisa sʼeya jkoaa jochon kʼoa jokji je niʼyaná. Kʼoa ali tsa to nijñájin xi tíbʼainá. Kʼoa ninga toxokʼoakjimaná koa̱nná, alijme xi tima nʼiañá”.

Dorothy, je chjoón xi ya tsakʼejnajin relijión anglicana kʼoa xi énle Niná tsakakóya kʼianga taingo ya jngo ndʼiaskuela, ñachanñato nóle kʼianga kʼien je xʼinle. Ningalani tsín kʼoasʼin koankjainle nga toya fetʼa nga jebiyaa, alikui kisʼejngo kon kʼoa koanmele tsabe jokjoantjínni jmeni xi kiskonangile yaole. I kitsole je xi pastorle mani: “Jméni xi maná nga jebiyaa”. Je pastor kitso: “Aliʼya xi be. Kʼiajin jchaa saʼnda nga kuiyá”.

A kʼoatjín én jebi. A kʼiaa jchaa saʼnda nga jekuiyá, axo koaan jchaa ndʼaibi kʼiatsa tsín toya tje̱n fetʼa nga jebiyaa.