Ya Biblia síkʼaxki kʼa je chjota xi kisʼele nganʼio xi totaon tsabe je xi tsínle nganʼio. Tobʼelañá, je rey Acab, xi kʼia tsakatéxoma nga siglo X nga kjesa chʼajin nó 1, kui koanmele nangi jña kjintjele xka̱totsee je Nabot kao xtile. Je reina Jezabel kisikʼien Nabot kao xtile kʼoa tsakjáʼale nangile, kʼoa je rey Acab kitsjoaʼndele chjoónle nga kʼoakisʼin (1 Reyes 21:1-16; 2 Reyes 9:26). Ánni nga kitsjoaʼndesíni Niná nga je chjota xi tjínle nganʼio totaon tsabe je xi toxkia chjota.

Jngo koya anni kuinga Niná likui bʼéndiso (Tito 1:2, TNM). Ánni nga kʼoabixónsíñá. Kʼianga títjon, je Niná kʼoakitsole je chjota nga kuiyá kʼiatsa tsín sitjosonle kʼoa kʼoakoan. Saʼnda nga tsakajngijée je chjota xi títjon tsakatio, kjoabiya tichoʼndá ngatsʼiaa. Je kjoabiya xi títjon kisʼe yaa kinroani nga totaon tsaʼya jngo chjota. Je Caín totaon tsabe je Abel kʼoa kisikʼien (Génesis 2:16, 17; 4:8).

Saʼnda nga kʼoakoan, je Biblia kʼoatso nga “je chjota tjíobatéxomale xínkjín nga tjíosíkiʼaon” (Eclesiastés 8:9). Tobʼelañá, je Jeobá kʼoakitsole je chjota israelita nga je rey xi koatexomale totaon skoe̱, kʼoa nga kʼia koatejéetʼanile Niná (1 Samuel 8:11-18). Saʼnda je rey Salomón totaon tsabe je naxinandá (1 Reyes 11:43; 12:3, 4). Kʼoa tsakatio je rey xi ngisa nʼio chʼao koankjoan, joni tsa Acab. Tikjaʼaitsjenlai, kʼiatsa tsínlani kitsjoaʼnde Niná nga kʼoakisʼin chjota xokjoan, a tsí to énndiso tsakʼóya je énle.

Xi ijngosani, je Na̱i kʼoatso nga totjín xi sʼínnile chjota kʼianga Niná síxále (Job 1:9, 10; 2:4). Kʼiatsa ñaki tsínlani tsjoáʼnde Niná nga totaon jcha je choʼndale, jejin Na̱i kʼoasjenda. Kʼoa tsa kʼoati tsín tsjoáʼnde nga totaon jcha ngatsʼi je chjota, ngisajin chʼaosʼin je Niná. Kʼoajinsʼin sikjaʼaitsjen chjota nga tsín machjénle nga tjín xi koasenkao, nga koa̱nle toje koatexomale yaole. Tonga Biblia kʼoatso nga je chjota alikui bakinle nga je koandiaale yaole (Jeremías 10:23). Ngatsʼiaa machjénná nga je katabatéxomaná je Chjotaxále Niná, tojé xi koa̱nle kjoaʼaxin nga kʼoasʼin totaon be xínkjín chjota.

A kui xi tsonile nga tsín jme xi tísʼín je Niná nga totaon tjíoʼya je chjota. Mai. Jao koya tjínni jme xi tísʼín. Xi títjon, bʼéjnatseen tʼatsʼe chjota xi kʼoasʼín. Je Énle nʼio nda bʼéyanajmí jmeni xi kisʼin je Jezabel tojoni nga kinikʼien je Nabot. Ya Biblia kʼoati tsoya jña tínroani nga kʼoasʼín je chjota. Tʼatsʼení jngo xi tjínle nganʼio kʼoa alikui bakó yaole (Juan 14:30; 2 Corintios 11:14). ʼYáni. Jé Nai. Kʼianga kʼoasʼin bʼéjnatsen je Niná nga ʼya xi kʼoasʼín kʼoa nga kʼoatso jña tínroani kjoa jebi, basenkaoná nga tsín kʼoati katamakjoaan tsanda ñá kʼoa nga tsín si̱chaa kjoanda xi sʼa nroá.

Xi majaoni, je Niná kʼoatsoná nga kjoaʼaxin kjoa jebi. Kʼianga kʼoasʼin tsakʼéjnatsen jmeni xi kisʼin Jezabel kao Acab, kʼoa kao chjota xi kʼoati koankjoan, kʼoa nga kjoañʼai kitsjoale nga kʼoakisʼin, kui xi bakóná nga sijéle kuenta ngatsʼi je chjotatsʼen (Salmo 52:1-5). Xi ijngosani, je Niná kʼoatsole je chjota xi tsjoake nga jeme kjoaʼaxin je kjoatsʼen. * Kʼoa je Nabot kao xtile kjoaʼáyanile kʼoa yaa koatio jngo sonʼndenaxó jñani tsín tisʼe̱ni kjoa xi chʼaotjín (Salmo 37:34).