Je én xi tʼatsʼe Niná nroani nʼio chjíle, kʼoa je Biblia kui Énle Niná nya. Jmi miyón Biblia jekitjo kʼoa siento én tíbitjo. Xi ijngosani, je kjoachjine xi nroatʼa ya Biblia nʼio tse nganʼio tjínle, ñaki síkʼantjaiya josʼin tjío je chjota. (Tʼexkiai 1 Tesalonicenses 2:13 kao 2 Timoteo 3:16.)

Je Biblia tʼatsʼe Niná kinroani nga̱ ñaki nda tsoya jokoa̱n nichxin xi sʼa nroa. Je chjotasonʼnde alikui koa̱nle tongini kʼoakuitso jmeni xi koa̱n. Tobʼelañá, jngo copia koansjai xi tsʼe librole Isaías ya jngo ngijao ya chrian jñani kijna ndáchikon xi mar Muerto ʼmi. Copia jebi tsʼato jngo siento nó nga kjesa tsinjin Jesucristo kichji. Je én xi tjítʼa kʼoatso nga chan tosʼe̱jnakjitia je naxinandá Babilonia. Kʼoa én jebi kʼiaa kitjoson nga jekjoan nkjín nó jaʼato nga kʼien je Jesús. (Tʼexkiai Isaías 13:19, 20 kao 2 Pedro 1:20, 21.)

Jngo jmi kaoni jaonla siento nó koanjngoni je Biblia kʼoa ñachanla chjota kiski. Ñaki mangóson jme xi nchja̱ni kʼoa nijñajin kjántʼa jmeni xi tso. Ánni. Kuinga je Niná tsakándiaale je xi kiski. (Tʼexkiai 2 Samuel 23:2.)

Kʼianga tsakjákao chjota xi kiski Biblia, je Niná sakʼoa kisichjén ánkje, nijñá kʼoa sakʼoa sén tsakakóle. Je xi kisʼin Niná kuinga ya kjoafaʼaitsjenle chjota tsakʼéjnajin jmeni xi mele nga skí, tonga jéni chjota tsakásjai én xi kisichjén kʼianga kiski. (Tʼexkiai Apocalipsis 1:1; 21:3-5.)