1. Jméni xi maná nʼia nga kʼoasʼin koanndaa jokjoan je Niná.

JE CHJOTA sakʼoa i̱ tso: “Ñaki jelani nʼaile”. Kuinga kʼoatsoni nga je xijchále tjojin je ʼndíxti. Je Jeobá, je Nʼainá xi tíjna ngʼajmi, jé títsjoáná kjoabijnachon (Sal. 36:9). Kʼoa nga xtile maa kʼoati kjoan jokjoan je. Kʼoasʼin kisindaná jokjoan, kuinga masíniná nikjaʼaitsjeen, ma chjoejinsíñá jme xi nʼia kʼoa masíniná fasjee miyo (Gén. 1:26).

2. Ánni nga koa̱n miyoná koa̱nsíni Jeobá.

² Koaan miyoná koa̱n je Jeobá. Kuinga koa̱n koa̱nmiyosíñá nga̱ tsjoakená kʼoa nga̱ tjínná kjoamakjain xi tʼatsʼe kao tʼatsʼe ʼNdíle. Je Jesús i kitso: “Niná kʼoasʼin koantsjoake sonʼnde nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai” (Juan 3:16). Nʼio nkjín chjota xi tjíosʼele kjoanda nga miyole Jeobá kjima. Jaola choa̱ kataʼyaa.

3, 4. Jméni xi tsín koanngóson jokisʼin je Abrahán kʼoa kao je naxinandá Israel.

³ Je Jeobá i kitso xi tʼatsʼe Abrahán, xi chjotajchíngale koan chjota israelita: “Abrahán, je miyona” (Is. 41:8).  Kʼoa ya 2 Crónicas 20:7 kʼoati miyole Niná ʼmile je Abrahán. Ánni nga nʼio miyo koansínile Jeobá je Abrahán. Kuinga kisʼele kjoamakjain (Gén. 15:6; tʼexkiai Santiago 2:21-23).

⁴ Je ntje̱le Abrahán xi naxinandá Israel tsakʼin nga koanskanni kʼoati miyole Jeobá koan kʼoa Nʼaile koan kaoni. Tonga chan tsín timiyole Jeobá koanni. Ánni. Kuinga tsín tikisʼenile kjoamakjain jme xi kitsole Jeobá.

5, 6. 1) Jókoanni koanmiyui je Jeobá. 2) Jméni xi koa̱n chjónangilee yaoná.

⁵ Kʼianga sa jcha sa jchasai xi tʼatsʼe Jeobá ngisa koa̱nkjainsali xi tʼatsʼe kʼoa ngisa koa̱ntsjoachasai. Tikjaʼaitsjenlai kʼianga kinimiyui je Niná, nga tsaʼyai nga ñaki tíjna. Kʼoati tsaʼyai nga chjotajée maa ngatsʼiaa xi totʼatsʼe nga tsakajngijée je Adán. Koanjinli nga kjin tjíole Niná ngatsʼi chjota (Col. 1:21). Kʼoati tsaʼyai nga tsín kjin tíjnaná je Nʼainá xi tíjna ngʼajmi kʼoa nga mandosinle xi tʼatsaan. Kʼoa kʼianga tsaʼyai nga kitsjoa je ʼNdíle xi totʼatsaan kʼoa nga koankjainli nga je tsakʼéchjíntjainá, koanmiyoní je Niná.

⁶ Kʼianga nikjaʼaitsjeen nichxin xi jaʼatoján, machjén nga chjónangilee yaoná: “A ngisa kjimamiyosa Niná. A ñaki je sinʼiotʼa. Nga jngó jngó nichxin faʼato, a ngisa tsjoake̱ kjima”. Ijngosa chjota xi kʼoati miyole Jeobá koan, xi tsakʼejna nichxin kjoatse, jéní Gedeón. Kuila chótʼayá xi tʼatsʼe Gedeón ánni nga koa̱n chjénngisíñá choa̱le.

7-9. 1) Jméni xi koantʼain je Gedeón, kʼoa jósʼin kichomani. (Chótsenlai sén xi faʼaitʼa ya jña fitsʼiani kjoaʼmiya jebi.) 2) Jméni xi sʼiaan nga ngisa koa̱nmiyosaa je Jeobá.

⁷ Je jues Gedeón kʼiaa tsakʼejna kʼianga nʼio tse kjoa kisʼe ya naxinandá Israel, kʼianga jeya tjío je chjota israelita ya ʼNde jña tsakʼinle nga kʼoaile. Ya kapítulo 6 xi tsʼe Jueces kʼoatso kʼianga je ánkjele Jeobá kichokonle je Gedeón ya Ofrá. Nga kui nichxin, je chjota madianita totaon tjíobe chjota israelita. Kuinga tsín ya tísítsjesíni Gedeón je trigole ya jña kjintjele, yaa tísítsje jñani ʼma chon jñani ngotjo koa̱n sikatíoʼmani. Tokʼoakoanle nga tsʼatsen je ánkje kʼoa nga kitsole: “Ji xi tajajin kʼoa xi tjínli nganʼio”. Je Gedeón kiskonangile tsa kjoaixi nga koasenkao je Jeobá tojosʼin tsakasenkao je chjota israelita nga kisikatíondaí ya Egipto. Je ánkje kʼoakitsole nga je Jeobá koasenkao.

⁸ Je Gedeón kisikjaʼaitsjeen jósʼin koa̱n kʼoasjentjai “je [naxinandá] Israel ya yantsja je Madián”. Je Jeobá i kitsole: “Nga̱ an tijnakaole, si̱kinjelai je Madián josʼin si̱kinjelai tsa tojngo chjota” (Juec. 6:11-16). Tsakui nichxin tojo kisikjaʼaitsjenjin je Gedeón jósʼinnile nga kuinje̱le kʼoa kuinga jngo choa̱ kisijésínile je Jeobá. Josʼin tsakjákao je Jeobá kui bakó nga ñaki koankjainle Gedeón nga ñaki tíjna je Jeobá.

⁹ Jmeni xi koan ngisa kisitaja je kjoamakjainle Gedeón kʼoa ngisa kisichriantʼasale je Niná. Tsojmi tsakʼéndale je ánkje kʼoa kitsjoale. Kʼoa je ánkje, jé yá xi kitjonntsja kisikaoni je tsojmi, kʼoa je tsojmi kití. Kʼiaa tsabe je Gedeón nga ñaki je kjoaixi je ánkjele Jeobá xi tsakjákao. Kʼoa i kitso: “Jeobá xi batexomai ngakjijnda, kʼoasʼin kaʼbe nga̱ʼa nga̱ʼa je ánkjele Jeobá” (Juec. 6:17-22). Kʼianga kʼoakoan, a tosa tokoankjinle Niná je Gedeón. Mai. Tosa ngisa tsabesa xi tʼatsʼe Jeobá, nga̱ je sonxta xi tsakʼénda “Jeobá-salom” kitsole, kʼoa nga én hebreo “Kjoanyʼán je Jeobá” sʼin tsoyanile  (tʼexkiai Jueces 6:23, 24). * Kʼianga nikjaʼaitsjenjiaan jmeni xi sʼín je Jeobá nga nyaon nyaon xi tʼatsaan, ʼyañá nga ñaki miyoná mani. Kʼoa kʼianga kjitʼa bʼetsʼoalee ngisa nyʼán sʼe tokoán kʼoa ngisa mamiyosaa.

10. Tojo tso Salmo 15:3, 5, jméni xi síjéná je Jeobá kʼiatsa mená nga miyole koaan.

¹⁰ Kʼianga miyoná koa̱n je Jeobá, tjínnele kʼoasʼiaan jmeni xi síjéná. Ya Salmo 15, je David kʼoakitso jmeni xi machjén kʼianga ya kuijnaa ya ndʼianajñole je Jeobá, xi tsonile, nga miyoná koa̱n (Sal. 15:1). Jao koyala chótʼayá. Xi títjon, nga tsín énndiso kjoáne xíngiaa. Xi majaoni, nga chjotakixi katamaa. Je David kʼoakitso nga je xi ya bʼejna ya ndʼianajñole Jeobá jéní xi tsín “énndiso báne xi kjaʼaí” kʼoa xi tsín “tsjoáʼnde nga machjíʼmale nga taon kataʼya je xi tsín jme jée tjínle” (Sal. 15:3, 5).

11. Ánni nga tsín koa̱n énndiso kjoánesíñá xíngiaa.

¹¹ Ya Salmo 34:13 i kitso je David: “Chjénnʼioʼai je nijain tʼatsʼe xi chʼaotjín”. Kʼiatsa tsín si̱tjosoán én jebi kʼoa énndiso kjoáne xíngiaa alikuijin tindasʼin kuiyoñá ngixko̱n je Nʼainá xi tíjna ngʼajmi. Je xi énndiso síchjén jé Na̱i, je xi nʼio jtike je Jeobá. Je jaʼaín xi yʼa je Na̱i kʼianga én griego “xi énndiso báne” sʼin tsoyanile. Kʼianga chosonnilee jmeni xi bixoán tʼatsʼe xíngiaa basenkaoná nga tosi tonda miyole Jeobá maa. Kʼoa nʼio chjíle nga tsín je si̱kʼaxkiaa je ndsʼee xi xá tjínle ya jinjtín (tʼexkiai Hebreos 13:17 kao Judas 8).

12, 13. 1) Ánni nga chjotakixi katamasíñá ngantsjai. 2) Jósʼin bichótsjoá kʼianga chjotakixi maa.

¹² Je choʼndale Jeobá ʼyale nga ñaki chjotakixi. Je pastro Pablo i kitso: “Tʼetsʼoantjainajin, nga̱ nda ʼyatakuinjin nga nda kjoafaʼaitsjen tjínnajin, nga̱ menajin nga nda koangínkoaijin yaonajin ngayije kjoa” (Heb. 13:18). Kʼoa nga mená nga nda koanngínkoaa yaoná alikui totaon ʼyaa je ndsʼee. Kʼiatsa ya síxákaoná, nda nikoaa kʼoa kʼoatjín bʼechjílee jotjín kaʼmilee. Ñá xi chjotale Cristo maa alikui chʼanachalee je choʼndaná kʼoa toʼya chjotani. Kʼoa tsa ñá xi jngo ndsʼee tinixálee, alikui koa̱n nga kʼoasʼin si̱kjaʼaitsjeen nga tokuini nga ngóson sʼin makjainná nga tokʼoasʼiaan josʼin mená kʼoa nga síxkón katasíkaoná tikʼoajinni xi ngikʼa.

¹³ Kjitʼaa noʼyalee je chjota xi tsín Biblia kotʼaya nga nʼio ndasʼin síkʼaxki̱ je testigole Jeobá nga chjotakixi ma. Tobʼelañá, jngo xi séntítjonle tiendayʼai jñani saténa xi sʼendani niʼya kʼoakitso nga ñaki chjotakixi je testigole Jeobá, kitso: “Ñaki nitjosonño jmeni xi bixón” (Sal. 15:4). Kʼianga chjotakixi maa, tosi tonda miyole Jeobá maa kʼoa kʼoati bitjongʼa je jaʼaínle.

14, 15. Jósʼin kuinyakoaa je chjota xi masjainá nga ʼmiyasoán kʼianga miyole Jeobá katama.

¹⁴ Ninga makjainle xi tʼatsʼe Niná je chjota xi tsaojiaan kʼianga ʼmiyasoán, alikui kʼoatso tsa miyole Niná ma. Jósʼin koa̱n kuinyakoaa chjota jebi. Chótʼayasonla jmeni xi kitsole Jesús je chjotale xi jankan kao te mani kʼianga jao jao kisikasén nga kikakóyason. Kitsole: “Tojñale ndʼianibe xi kuitjásʼaon, títjonkjoanla kʼoatʼinlao: Nyʼán  katasʼele niʼyabi. Tsa tíjna yabe jngo xi nyʼán tjínkon, je kjoanixatʼano xi nyʼán tjín sʼejnale, tsa mai koainrʼoe ngindianino” (Luc. 10:5, 6). Kʼianga ndʼé nikoaa je chjota tsakui nichxin koa̱ntsjoake je énle Niná. Tsakui nichxin ya kjuinroani nga tsín tijtike koa̱nniná ʼyani xi tsín nchja̱ nga ʼmiyasonlee, tsakui nichxin lijo tikuitsoni nga kjuichochon ijngokʼalee.

¹⁵ Kʼianga tsaojiaan je chjota xi nʼio fitʼale relijiónle kao kostumbre xi kjántʼa jmeni xi tso je Biblia kʼoati ndʼé nikoaa. Ya kjoajtínná nʼio nda chjoeyaa je chjota xi bichó, xi mesale nga skoe̱ tʼatsʼe Niná xi nixálee. Chjota jebi sakʼoaa tsín ndatjío kon xi totʼatsʼe jmeni xi chon sonʼnde xokjibi. Ya rebista La Atalaya jñani “La Biblia les cambió la vida” tso nʼio nkjín choa̱ faʼaitʼa tʼatsʼe je chjota xi kisikʼantjaiya yaole.

16. Jmé xi sʼiaan nga miyole Jeobá koaan, kʼoa nga tojngo si̱xá kao je.

¹⁶ Je chjota xi ñatje̱n síxá nʼio mamiyole xínkjín. Ngatsʼiaa je xi jetsakʼaitʼalee yaoná je Jeobá jngo kjoanda tjínná nga miyole maa kʼoa nga tojngo tinixá kao je (tʼexkiai 1 Corintios 3:9). Kʼianga ʼmiyasoán kʼoa nga bʼailee estudio je chjota ngisa majinná jokjoan je Nʼainá xi tíjna ngʼajmi. Kʼoati ʼyaa josʼin basenkaoná je nganʼiotsjele nga bitjosonná xá jebi.

17. Jósʼin bakó je kjoajtíntse xi satíoná nga miyoná mani je Jeobá.

¹⁷ Kʼianga ngisa tse ʼmiyasoán ngisa machriantʼasalee je Jeobá. Nga̱ ʼyañá josʼin basenkaoná nga kʼoatinʼia je xá xi tsʼe kʼoa nga tsín tsjoáʼnde nga je chjota kontraná bʼéchjoale je xá jebi. Ijngosa koya xi síchriantʼaná je Jeobá kuinga tiʼyaa josʼin tíbándiaaná. Tosi̱kjaʼaitsjenla nga ntsjaintsjai títsjoáná kjoankjíntokonle. Jmeni xi faʼa ya kjoajtínná kui bakó nga tsjoakená je Jeobá kʼoa nga tíkotsenle jmeni xi machjénná kao kjoa xi tibitjatojiaan. Je xo̱n xi kisikasén jngo familia kʼianga kitsjoa kjoanda tʼatsʼe jme xi jaʼa kʼianga kisʼejna je kjoajtíntse xi jan nichxin itso: “Jmeni xi jaʼa ya kjoajtíntse ñaki kichokajin ni̱ma̱najin. Ñaki tsaʼyaníjin jokji tsjoakenajin Jeobá nga jngó jnguíjin, kʼoa jokji mele nga nda kuiyuijin”. Kʼoa kʼianga kisʼejna kjoajtíntse ya Irlanda, jngo ndsʼee kao chjoónle xi ya Alemania tsʼe kʼoakitso nga nʼio tsjoále kjoanda je ndsʼee nga nda kiskoeya kao nga kitsjoale jmeni xi koanchjénle. Kitso: “Tonga je xi nʼiosa bʼailaijin kjoanda jé Jeobá kʼoa kao Jesucristo. Jé tjíonchja̱ná nga ya kuiyojiaan je naxinandále xi ñaki jtín sʼin tjío, alikui tokʼoatso nga jtín sʼin kuiyoaa, ñaki  kʼoasʼin tiyoaa nga nyaon nyaon. Jmeni xi tsaʼyaijin nga tsangínjin kjoajtíntse jebi ya Dublín kui síkjaʼaitsjenjinnajin ngantsjai je kjoanda xi tjínná nga kʼoasʼin tojngo tinixálee je Nináná”.

18. Jméni xi koa̱n chjónangilee yaoná josʼin chjakaonajmiá je Jeobá.

¹⁸ Ngisa mamiyosalee xíngiaa kʼianga chobanajmiá. Nichxin xi tiyoaa ndʼaibi, je chjota ñaki tokui xá sʼín nga mensaje síkasén kʼoa nga síchjén je redes sociales ya Internet. Tonga jónʼia xi kao Jeobá je xi nʼio miyoná mani, a chjakaonajmíñá. Je Jeobá nrʼoéle je kjoabʼetsʼoaná (Sal. 65:2). A chʼasjeʼañá je nichxinná kʼianga chjakaonajmiá.

19. Jméni xi sʼiaan kʼiatsa ñʼai maná nga kʼoaʼmilee Jeobá jotjío jinni̱ma̱ná.

¹⁹ Tjínkʼa je choʼndale Jeobá xi ñʼai male nga kʼoatso jotjío jinni̱ma̱le. Tonga je Jeobá kui xi mele nga kʼoakʼuínlee jotjío jinni̱ma̱ná kʼianga kʼoétsʼoalee (Sal. 119:145; Lam. 3:41). Tonga tsa ñʼai maná nga kʼoabixoán jotjío tokoán je Biblia basenkaoná. Je pastro Pablo i kitsole je chjotale Cristo xi tsakatio ya Roma: “Likui ʼyaa jme xi si̱jé josʼin bakinle, tonga tijeni Espíritu Santo bʼétsʼoantjainá kao nga kjaínga totsené, nga tsín maná jo bixoán. Tonga je xi básjaijin ni̱ma̱ná, be je kjoafaʼaitsjenle Espíritu Santo, nga bʼétsʼoantjai chjotale Cristo josʼin nga mele Niná” (Rom. 8:26, 27). Kʼianga nikjaʼaitsjeen jotso je libro xi tsʼe Job, Salmos kao Proverbios basenkaoná nga kʼoaʼmilee je Jeobá jotjío jinni̱ma̱ná.

20, 21. Jósʼin tsjoánganʼioná je én xi kitso je Pablo ya Filipenses 4:6, 7.

²⁰ Kʼoa nga kui bitjatojiaan je kjoa xi ñʼai tjín, kjuintjenngiaa je kjoafaʼaitsjen xi kitsjoale je pastro Pablo je chjotale Cristo xi tsakatio ya Filipos: “Ali kʼoajin mano. Tojmenibe xi machjénno, tijélao Niná, tʼetsʼoalao, kʼoa tʼailao kjoanda. Kʼoasʼin katasʼejinle Niná jme xi nijáo”. Kʼiatsa chja̱kaonajmiá je Jeobá tsjoáná je nganʼio kʼoa sinʼiojin tokoán. Je pastro Pablo i kitsosa: “Je kjoanyʼántakonle Niná xi ñaki faʼatole ngayije kjoafaʼaitsjenle chjota, jé xi sikuinda ni̱ma̱no kao kjoafaʼaitsjenno nga̱ tiyokao Cristo Jesús” (Filip. 4:6, 7). Jchachjiá “je kjoanyʼántakonle Niná” nga̱ kui xi sikuinda je ni̱ma̱ná kao je kjoafaʼaitsjenná.

²¹ Kʼianga bʼetsʼoalee je Jeobá ngisa mamiyosaa. Kuinga kʼoétsʼoasínilee ngantsjai (1 Tes. 5:17). Tojosʼin kachotʼayá, tosi tonda si̱miyosaa je Niná kʼoa kʼoasʼiaan jmeni xi síjéná. Chʼa̱sjeʼaa nichxin nga si̱kjaʼaitsjenjiaan je kjoanichikontʼain xi títsjoáná je Nʼainá, je Nináná kʼoa je miyoná Jeobá.