1, 2. Jósʼin tsín mangósoán ninga tojngo familia maa kʼoa jósʼin nga tsín tongóson sʼin kichotʼayá je Énle Niná.

JÉ Jeobá xi kʼoasʼin tsakʼéndajin nga familia tjín (Efes. 3:14, 15). Kʼoa ninga tiyani familianá kjaʼaí kjaʼaí nʼia kʼoa kjaʼaí kjaʼaísʼin tiyoaa nga jngó jngoá. Tsakui nichxin tjío xi ya tsakatiokao xijchále saʼnda nga koanjchínga. Tsakui nichxin tjíokʼaje̱ xi chʼin kisikʼien je xijchále, tsa tjín xi koanle kʼoa tsa jme kjoaxkón kʼienjin. Kʼoati tjínkʼa xi saʼnda tsín tsabe je xijchále.

² Ngatsʼiaa xi ya tiyojiaan naxinandále Jeobá joxi tojngo familia mañá, tonga kjaʼaí kjaʼaísʼin tsaʼyañá je énle Niná nga jngó jngoá. Tsakui nichxin jekotʼaya Biblia xijcháli kʼianga kitsin kʼoa je kitsoyali saʼnda nga sʼa ʼndí tisui (Deut. 6:6, 7). Kʼoa tsakui nichxin kʼia tsakjákaoli je choʼndale Jeobá kʼianga tjíotsoyason kʼoa kʼoasʼin kichotʼayani Biblia (Rom. 10:13-15, TNM; 1 Tim. 2:3, 4).

3. Jméni xi mangósoán ngatsʼiaa.

³ Ninga tsín mangóson josʼin kichotʼayá je énle Niná kʼoa josʼin koanjchíngaa, tonga tjínní jmeni xi mangósoán. Ngatsʼiñá nga tsʼakaotʼaná je jée kao kjoabiya nga tsín kisitjosonle  Niná je Adán (Rom. 5:12). Ninga kʼoalani, kʼianga ñaki kixi timangíntʼalee je Jeobá koaan kʼoétsʼoalee nga̱ Nʼainá mani. Nichxin kjoatse, je naxinandále Niná koan i̱ kitso tojosʼin faʼaitʼa ya Isaías 64:8: “Ji Jeobá, jiní Nʼainajin”. Kʼoa je Jesús kʼianga tsakʼétsʼiakao kjoabʼetsʼoa xi tsakʼéjna i kitso: “Nʼainajin xi tijnai ngʼajmi, kataʼyaxkón jaʼaínli” (Mat. 6:9).

4, 5. Jméni xi chótʼayá xi koasenkaoná nga ngisa tsjoacha koaan je Nʼainá Jeobá.

⁴ Je Nʼainá xi tíjna ngʼajmi síkuindaná xi choʼndale maa nga kʼoasʼin ʼyaxkoán jaʼaínle. Je Jeobá itsoná: “Nga kʼoasʼin tsjoakena je [choʼndana], kʼoasjentjaiña. An sikuinda nga̱ be je jaʼaínna” (Sal. 91:14). Je Jeobá bʼasjentjai je naxinandále kʼoa síkuindaa nga tsín katanikjeson.

⁵ Kʼianga ngisasa tsjoacha koaan je Jeobá janla koya chótʼayá jokjoan. Xi títjon, jé tsjoáná xi machjénná. Xi majaoni, jé síkuindaná. Kʼoa xi majanni, miyoná mani. Kʼianga chótʼayá nga jngó jngó koya jebi si̱kjaʼaitsjenjinkaoñá je kjoamiyo xi tjínná kao Jeobá kʼoa jmeni xi koa̱n sʼiaan kʼianga ngisasa nda jchaxkoán. Kʼoati si̱kjaʼaitsjenjiaan jokji kjoanda sokóle je xi síchriantʼale (Sant. 4:8).

6. Jósʼin bakó je Jeobá nga tʼatsʼe nroani “ngayije xi kjoanda”.

⁶ Je Santiago i kitso: “Ngayije xi kjoanda, ngayije kjoatjao xi ñaki nda, nroani jangʼá, nroajenni Nʼainá xi tsakʼénda tsʼuí kao sá kao niño” (Sant. 1:17). Nga tiyochoán jenʼio tse kjoanda títsjoáná je Jeobá (Sal. 36:9). Kʼianga kʼoasʼin nichjén kjoabijnachonná nga Jeobá nixálee nʼio tse kjoanichikontʼain tjínná kʼoa kʼoati tjínná kjoachoya nga koa̱n kuiyoaa ngantsjai nichxin ya sonʼnde chjotse (Prov. 10:22; 2 Ped. 3:13). Tonga jósʼin kʼoakoa̱nni nga̱ jée kichʼá ngatsʼiaa kʼoa mʼeñá.

7. Jméni xi kisʼin je Jeobá kʼianga koa̱n nda kuiyo ijngokʼá ngixko̱n.

⁷ Je Jeobá nkjín koya josʼin tsjoáná xi machjénná. Tobʼelañá, tíbakóná kjoandale nga kʼoasʼin tsakʼasjentjainá. Chjotajée maa ngatsʼiaa nga̱ yaa kitje̱nñá je Adán (Rom. 3:23). Ninga kʼoalani, je Jeobá nʼio tsjoakená, kuinga kitsjoani jmeni xi koasenkaoná nga koa̱n nda kuiyo ijngokʼá ngixko̱n. Je pastro Juan kʼoatso jmeni xi kisʼin je Niná, itso: “Kʼoasʼin koanchoyale ni̱ma̱ná josʼin nga Niná tjaokená, nga̱ kisikasén i̱ sonʼndebi je ʼndíle xi tojngo mani, jméni nga kuiyochonsínía xi totʼatsʼe. Kʼuisʼin tjín xi kjoatjaocha: Ali kuijin nga ñá xi koantsjoachaa Niná, tonga je Niná xi koantsjoakená nga ñá. Kisikasén ʼndíle xi jéentjainá koanle” (1 Juan 4:9, 10).

8, 9. Jósʼin tsakakó Jeobá nichxinle Abrahán nga tsjoáná xi machjénná. (Chótsenlai sén xi faʼaitʼa ya jña fitsʼiani kjoaʼmiya jebi.)

⁸ Kʼianga siglo XIX nga kjesa chʼajin nó 1, je Abrahán kui tsakakó jmeni xi sʼin je Jeobá ánni nga sʼe̱sínile kjoabijnachon xi tsínkʼia fetʼa je chjota xi kixi koaitʼale. Hebreos 11:17 saʼnda 19 itso: “Kui nga koankjainle Abraham, kitsjoatʼa Isaac, kʼia nga kʼoasʼin kichotʼa. Je xi kiskoétjao kjoanisʼengi, kitsjoatʼa ʼndíle xi tojngo je. Kʼoasʼin tsakʼinle Abraham: Xi totʼatsʼe Isaac kʼoasʼin kʼoaili ntje̱ xi yʼa jaʼaínli. Kiskosonnile Abraham nga Niná koa̱nle sikjaʼáyanile chjota, nda tsa jekʼen. Kʼoasʼin kiskoé Isaac ngijngokʼani, joni tsa ngoyale xi jekʼen”. Tojo kisʼin je Abrahán nga tíjnanda nga tsjoátʼa ʼndíle tsakai, je Jeobá kʼoatisʼin ñaki tíjnanda nga kitsjoa je ʼNdíle kʼianga tsakʼasjentjai je chjotasonʼnde (tʼexkiai Juan 3:16, 36).

⁹ Ñaki tsjoajin koanle je Isaac kʼianga tsínni kinikʼien. Nʼiojin kitsjoale kjoanda je Niná nga jngo tindso kitsjoa xi kinikʼien ʼndele nga je si̱kʼien (Gén. 22:10-13). Kʼoa je Abrahán “Jeobá-yiré”, kitsole ʼnde  jebi kʼoa nga én hebreo je “Jeobá tsjoá” sʼin tsoyanile (Gén. 22:14).

10, 11. ʼYáni xi nyatítjon nga kʼoatjíosʼín je xá xi tjíosíkjaondani Niná je chjota, kʼoa jótjíosʼín.

¹⁰ Kʼianga nikjaʼaitsjenjiaan ngayeje jmeni xi títsjoáná je Jeobá, ʼyañá nga toje kjoabʼechjíntjaile Jesús xi koasenkaoná nga nda kuiyo ijngokʼá ngixko̱n. Je pastro Pablo kitso: “Nga jekinikjaʼaitsjainjin jebi, nga jngo xi kʼen xi tʼatsʼe ngatsʼi, kui tjíokʼenni ngatsʼi. Kʼoa kʼen xi tʼatsʼe ngatsʼi, jméni nga je xi tjíokon, likui tikoatiokonni xi titʼatsʼeni, tonga xi tʼatsʼe je xi kʼoasʼin kʼen, kʼoa xi kinikjaʼáyanile xi tʼatsʼe” (2 Cor. 5:14, 15).

¹¹ Je chjotale Cristo xi títjon tsakatio nʼio tsjoake koan Niná kʼoa nʼio tsabechjí nga Niná kisixále. Kʼoa kuinga ñaki tsjoa tjíosínile nga kiskoé je xá xi sikjaondani Niná je chjota. Nga kʼoasʼin tsakakóyason kʼoa nga chjotale Cristo kisikao je chjota, nʼio nkjín chjota xi nyʼán tsakatiokao je Niná. Miyole koanni kʼoa xijekoan xtile koanni ya ngʼajmi. Nichxin xi tiyoaa ndʼaibi, kʼoati kui xá tjíosʼín je chjotale Cristo xi ya tjínle kjoachoya ya ngʼajmi. Kʼoa nga je tjíoyangajaole je Niná kao Cristo, tjíotsjoále kjoanda je chjota xi ndʼé tjío kon nga katasíchriantʼale je Jeobá kʼoa nga choʼndale katama (tʼexkiai 2 Corintios 5:18-20; Juan 6:44; Hech. 13:48).

12, 13. Jósʼin koakoá nga bʼailee kjoanda je Jeobá nga nʼio nkjín koya jmeni xi títsjoáná.

¹² Kʼianga kʼoasʼin títsjoáná je Niná jmeni xi machjénná, ñá xi chjotale Cristo maa, xi i̱ tjínná kjoachoya i̱ Sonʼnde, kʼoati nʼio bʼailee kjoanda je Niná kʼoa kuinga binyakaosíñá je chjotale Cristo xi ya koai ngʼajmi nga tjíotsoyason. Kʼianga ʼmiyasoán kui Biblia nichjén kʼoa je Biblia kʼoati jngo kjoatjao xi kitsjoaná je Jeobá (2 Tim. 3:16, 17). Kʼianga maná nichjén je Énle Niná binyakaoñá je xíngiaa nga koa̱n koatio ngantsjai nichxin i̱ Sonʼnde. Tonga ali tsa tokuijin Biblia xi kitsjoaná je Jeobá kʼoati tsjoáná je nganʼiotsjele xi basenkaoná nga ʼmiyasoán (Zac. 4:6; Luc. 11:13). Je Anuario xi tsʼe testigole Jeobá nʼio nkjín choa̱ faʼaitʼa xi bakó jokji nda tíʼmiyason je énle Niná. Nʼio tse kjoanda tjínná nga kui xá tinʼia xi tíbʼasjengʼa je Nʼainá Jeobá, xi tsjoáná jme xi machjénná.

¹³ Kʼianga kʼoasʼin nʼio nkjín koya jmeni xi títsjoáná Jeobá, koaan chjónangilee yaoná: “A nʼio tibʼenele yaona nga tixinyasoan kʼianga koakole je Jeobá nga nʼio chjí ʼbe jme xi títsjoána. Jméni xi sʼian nga ngisa nda xínyasoan je énnda chjotse”. Kʼiatsa kui xi tsʼe Niná títjon si̱kʼéjnaa koakoñá nga bʼailee kjoanda jmeni xi títsjoáná kʼoa je Jeobá tsjoáná jme xi machjénná (Mat. 6:25-33). Kʼianga ʼyaa jokji tsjoakená je Jeobá kʼoa nga síkuindaná, kui xosíkaoná nga bʼenenilee yaoná nga fayatsjoaa ni̱ma̱le (Prov. 27:11).

14. Kʼiáni nga bʼasjentjai Jeobá je naxinandále.

¹⁴ Je David i kitso nga kise: “Tsínna xi basenkaona kʼoa ma̱a tijna; je Jeobá kuenta tísʼínna. Jiní xi bisenkaonái kʼoa xi chʼasjentjainái; ji Ninána ali nikʼachxinjin” (Sal. 40:17). Je Jeobá jekjoan nkjín kʼa nga bʼasjentjai je naxinandále, kʼoa ngisa kʼianga nʼio fitjenngike je xi kontra tjíole. Nʼio bʼailee kjoanda je Jeobá nga tsjoáná jmeni xi basenkaoná nga tosi tonda kixi koanngíntʼalee kʼianga kjoañʼai bitjatojiaan.

15. Jngola choa̱ kʼoasi josʼín jngo nʼai nga síkuinda ʼndíxtile.

¹⁵ Jngo nʼai xi tsjoake ʼndíxtile ali tsa tokuijin tsjoále jmeni xi machjénle, kʼoati síkuinda. Kjitʼanangi binyakao kʼianga xkón  tjío. Jngo ndsʼee xi kʼoatso kʼianga ñandiaxó kʼianga sʼa ʼndí kji, je nʼaile kʼoa kao je yaxó niʼyale tjíofi kʼianga jekitsoyason kʼoa nga tjíofi ya yandiaa nandáxó tífaʼa kʼoa likuixó tima bitjañá. Je xo̱ngá koanjexó nga̱ nʼioxó tsʼa jtsí nga tanjio, kʼoa toyaxó la̱jao̱ xi yʼai kjoan kiskítʼa nga koan jaʼatojinndá. Jéxó tje̱n títjonle nʼaile tonga kʼianga tíkjison jngo la̱jao̱ likuixó nda kisasen ndso̱ko̱ kʼoa kiskangindáxó, kʼoa jaokʼaxó nga kiskasʼenngindá. Je nʼaile kjitʼaxónangi kiskoé xjale nga tsín ya kʼienngindá. Tiʼndí jebi nʼiojin kitsjoale kjoanda je nʼaile nga kʼoasʼin tsakasenkao. Kʼoakjoánti sʼín je Nʼainá xi tíjna ngʼajmi, bʼasjentjainá tʼatsʼe je Na̱i kʼoa kao kjoa xi chʼaotjín kijnajtsale sonʼnde nga je tíbatéxoma. Jé Jeobá xi ngisasa nda síkuindaná tikʼoajinni toʼyani (Mat. 6:13; 1 Juan 5:19).

16, 17. Jósʼin kisikuinda Jeobá je chjota israelita kʼianga kiskan kao chjota amalequita.

¹⁶ Josʼin síkuindaná je Jeobá yaa ʼyañá jokisikao je chjota israelita kʼianga jetsakationdaí ya naxinandá Egipto kʼianga nó 1513 nga kjesa chʼajin nó 1. Je Jeobá jngo kjoaxkón tsakʼéjna kʼianga koan jaʼatojinndá ya ndáchikon xi Ní ʼmi. Kʼoa xijekoan, kʼianga tjíotsoma ya ʼndekixí nga tjíofi ya nindo Sinaí yaa kicho ya ʼnde xi Refidim ʼmi.

¹⁷ Je Na̱i bení nga kuitjoson jmeni xi kitso Niná ya Génesis 3:15, kʼoa kuijin nga tsakásjainile josʼin tsakʼetʼale je chjota israelita, kʼoa nga tsabele kon kʼoakisʼin. Jé kisichjén je chjota amalequita xi jtike je naxinandále Niná (Núm. 24:20). Jósʼin kisichjén Jeobá je Josué, Moisés, Aarón kʼoa kao Hur nga tsakʼasjentjai je naxinandále. Je Josué kiskan kao je chjota amalequita, kʼoa je Moisés, Aarón kao Hur yaa kikatio jngo jko̱nindo. Kʼianga kjomingʼa ntsja je Moisés je chjota israelita njele. Kʼoa kʼianga jenchjá koanle je xjale Moisés, jé Aarón kao Hur kitsoangi. Nga kʼoasʼin tsakasenkao Jeobá kʼoa  kisikuinda, “je Josué kao ki̱cha̱ espada kisikinjenile je Amaleq kao naxinandále” (Éx. 17:8-13). Kʼoa je Moisés jngo sonxta tsakʼénda ya ʼnde jebi, “Jeobá-nisí” kitsole kʼoa nga én hebreo “jéní Jeobá xi basenkaona” sʼin tsoyanile (tʼexkiai Éxodo 17:14, 15). *

18, 19. Jósʼin síkuindaná Jeobá nichxin xi tiyoaa ndʼai.

¹⁸ Je Jeobá síkuinda ʼyani xi tsjoake kʼoa xi sítjosonle. Tojo kisʼin je chjota israelita ya Refidim kʼoati je Jeobá ninʼiotʼaa yaoná kʼianga jme xi síkaoná je chjota kontraná. Jekjoan nkjín kʼa nga síkuinda je naxinandále kʼoa alikui tsjoáʼnde nga je Na̱i josikao. Tosi̱kjaʼaitsjenla josʼin jekisikuinda je ndsʼee xi tsín jaʼatone je kjoatéxomale ninga kjoañʼai kinikjaʼá. Kʼianga nó 1930 kao nó 1940, nʼio nkjín ndsʼee xi kui kjoa jaʼatojin ya Alemania kʼoa ya jñasani tsakatéxoma chjota nazi. Kʼianga bʼexkiaa ya Anuario josʼin kisikuinda Jeobá je choʼndale kʼianga tjín xi kitjenngike kʼoa nga nikjaʼaitsjenjiaan ngisa manʼiotʼasaa je Jeobá (Sal. 91:2).

¹⁹ Je Jeobá kui síchjén je naxinandále kao je xo̱n xi bʼasje naxinandá jebi nga tsjoáná kjoafaʼaitsjen xi síkuindaná. Kʼianga kʼoasʼin bájintokonná nʼio basenkaoná nichxin xi tiyoaa ndʼai. Je chjotasonʼnde sa nʼio sa nʼio tjíosísin kjoachajngi, xán kʼoa kao pornografía. Tonga je Jeobá kjitʼa tsjoáná kjoafaʼaitsjen kʼoa kʼiakjoan tsjoáná nga machjénná kʼoa jebi kui xi basenkaoná nga tsínkui kʼoanʼia jmeni xi chʼaosʼin sikʼéjnaná ngixko̱n. Kʼoasʼín josʼín jngo nʼai, kʼoatsoná nga tsín je si̱miyoaa je chjota xi chʼao sʼín kʼoa nga tsín toʼya xi si̱miyoaa ya redes sociales (1 Cor. 15:33). *

20. Jósʼin bʼainá kjoafaʼaitsjen kʼoa sʼendiaaná ya jtínná.

²⁰ Jósʼin koakoá nga je Jeobá títsoyaná. Kʼiaa nga si̱tjosoán je kjoatéxomale (Is. 54:13). Yaa jinjtínná sokóná kjoafaʼaitsjen kʼoa sʼendiaaná. Yaní jñani tjío je xi chjotajchínga sʼin tjío ya jinjtín kʼoa jé binyakaoná kʼoa tsjoáná kjoafaʼaitsjen xi ya Biblia yʼangini (Gál. 6:1). Jé “kjoatjao” jebi síchjén je Jeobá nga síkuindaná (Efes. 4:7, 8). Jméni xi tjínnele sʼiaan kʼiatsa kjoafaʼaitsjen tsjoáná jngo xi chjotajchínga sʼin tíjna. Tjínnele nga si̱tjosonlee, tsa kʼoasʼiaan je Jeobá sichikontʼainná (Heb. 13:17).

21. 1) Jméni xi ñaki kʼoatjín tokoán nga sʼiaan. 2) Jméni xi chótʼayá ya kjoaʼmiya xi ijngo.

²¹ Kʼoaiʼndee nga kui katabándiaaná je nganʼiotsjele Nʼainá xi tíjna ngʼajmi kʼoa chʼa̱ʼén je kjoafaʼaitsjen xi tsjoáná. Si̱kjaʼaitsjenjiaan je choa̱ xi tsakʼéjnaná je Jesucristo kʼoa kʼoénelee yaoná nga chjénngilee. Je ʼNdíle Niná kisitjoson saʼnda nga kʼien kʼoa je Jeobá nʼio tse kjoanichikontʼain kitsjoale (Filip. 2:5-11). Kʼoati nʼio tse kjoanda kʼoainá tsanda ñá tsa ñaki je Jeobá si̱nʼiotʼaa kao ngayeje ni̱ma̱ná (Prov. 3:5, 6). Kuinga si̱kjaʼaitsjenntsjaisíñá nga je Jeobá tsjoáná xi machjénná kʼoa síkuindaná. Nʼio tse kjoanda tjínná nga je Jeobá tinixálee. Tonga ánni nga kʼoabixónsíñá nga je Jeobá xi ngisasa nda miyo xi tjínná. Kui chótʼayá ya kjoaʼmiya xi ijngo kʼoa kʼianga jchaa xi tʼatsʼe jebi ngisa koa̱ntsjoachasaa je Jeobá.