1. Jmé kjoa xi tjíojin je chjotasonʼnde.

 JE Jeobá nikʼiajinla kʼoasʼin koanmele nga katamajchínga je chjota kʼoa nga kjoañʼai katafaʼá. Kui xi koanmele tsakai nga je xi xʼin kao xi yánchjín nʼio nda katabatio kʼoa nga tsín jme chʼin katasʼele kʼoa nga ya katabationtsjai ya ʼNdenaxó. Tonga “ngatsʼi xi kisʼenda sonʼndebi saʼnda ndʼaibi, tojngo tsene, kʼoa tojngo jo ma̱ sʼín joni tsa jngo chjoón xi ʼndí tíbʼé” (Rom. 8:22). Jómale je Niná nga be je kjoañʼai xi tjíofaʼá je chjota xi totʼatsʼe je jée. Kuilakjoan je xi chjotajchínga, tokʼoamaná nga tosa kʼia tjíonjiotokon kʼianga ngisasa machjénle nganʼio (Sal. 39:5; 2 Tim. 3:3).

2. Ánni nga nʼio tsjoa sʼesíniná nga tjío je ndsʼee kao tichjaa xi jekoanjchínga ya jinjtínná.

² Ñá xi choʼndale Jeobá maa nʼio tsjoa sʼená nga tjíojin ya jinjtín je ndsʼee kao tichjaa xi jejchínga. Tsjoánganʼioná kjoafaʼaitsjen xi tjínle kʼoa chjenngilee je kjoamakjainle. Tjínkʼa ndsʼee jebi xi xíngiaa mani. Tonga ninga tsín xíngiaa mani, nʼio mandosinná xi tʼatsʼe (Gál. 6:10; 1 Ped. 1:22). Kuila chótʼayá josʼin síkjaʼaitsjen Niná xi tʼatsʼe je ndsʼee xi jejchínga kʼoa kataʼyala jmeni xi kjinele je familiale kao je jtín.

3, 4. 1) Jméni xi nʼio chjíle kisijéle Jeobá je xi kiski Salmo 71. 2) Jméni xi koa̱n sijéle Niná je ndsʼee xi jejchínga xi tjío ya jinjtín.

³ Ya Salmo 71:9 itso: “Ali tsa xinjin nikʼéjnanái kʼianga  jekjimajchínga; ali tsa njiotokonjinnái kʼianga jetínroajen nganʼiona”. Tsakui nichxin je David kiski én jebi. Saʼnda nga sʼa xti je David kʼoa saʼnda nga jekoanjchínga jé Niná kisixále, kʼoa je Jeobá nʼio nda kisichjén je David (1 Sam. 17:33-37, 50; 1 Rey. 2:1-3, 10). Ninga kʼoalani, tojo kisijéle nganʼio je Jeobá nga katasíchikontʼain kʼoa nga katasíkuinda (tʼexkiai Salmo 71:17, 18). *

⁴ Ya jinjtín nʼio nkjín ndsʼee xi kʼoatjíosʼín joni tsa David. Ningalani jejchínga, tojo tjíobʼénele yaole jokji tje̱n kʼoamale nga tjíobʼasjengʼa je Niná (Ecl. 12:1-7). Me ngatsʼi nga tsín tikʼoamanile nga kʼoasʼín jmeni xi kisʼin ngasʼa, jolani kʼianga tsoyason. Tonga tojo kisʼin je David, kʼoati koa̱n sijéle nganʼio je Jeobá nga tosi tonda katasíchikontʼain kʼoa nga katasíkuinda. Alikui jao tjínná nga kjuinrʼoéle je Jeobá. Nga̱ je én xi kinchja̱ je David nga kʼoakitso jotjín kon, kao nganʼiotsjele Jeobá kʼoakitsoni.

5. Jókji bechjí je Jeobá je ndsʼee xi jejchínga.

⁵ Ya Biblia kʼoatsokixi nga je Jeobá nʼio bechjí je ndsʼee xi jejchínga kʼoa kui xi mele nga kʼoati jchaxkoán tsanda ñá (Sal. 22:24-26; Prov. 16:31; 20:29). Ya Levítico 19:32 itso: “Tisenndui nga jchai je xi jekoanchxoa ntsja̱jko̱, kʼoa jchaxkuín xi jechjotajchínga, tjínneli kuijkónchai je Nináli. Anña je Jeobá”. Kʼianga kichji én jebi, je chjotajchínga xi tjío ya naxinandá Israel nʼio tsaʼyaxkón kʼoa nichxin xi tiyoaa ndʼaibi kʼoati tjínnele kʼoasʼin jchatokon. Tonga, ʼyáni xi kjinele nga sikuinda kʼoa nga sisinle xi jejchínga.

6. Jmé choa̱ xi tsakʼéjna je Jesús nga kisikuinda je na̱le.

⁶ Je Énle Niná itso: “Jchaxkuín nʼaili kao na̱li” (Éx. 20:12; Efes. 6:2). Je Jesús tsakakó nga nʼio chjíle je kjoatéxoma jebi kʼianga kʼoakitsole je chjota fariseo kao chjota escriba nga nʼio chʼao tjíosʼín nga tsín tjíosíkuinda je xijchále (Mar. 7:5, 10-13). Kʼoa je Jesús jngo choa̱ xi nʼio nda tsakʼéjna xi tʼatsʼe jebi. Kʼianga toje kuiyá nga kjitʼa yá kʼoakitsole je Juan nga katasíkuinda je na̱le. Tsakui nichxin toje tíjnakʼan nga kʼia je na̱le (Juan 19:26, 27).

7. 1) Jmé kjoafaʼaitsjen xi kitsjoa je Pablo nga katamakuinda je chjotajchínga. 2) Jmésani xi kitso je Pablo.

⁷ Je xo̱n xi kiskile Timoteo je pastro Pablo kʼoakitsole nga je xi chjotale Cristo ma tjínnele koa̱njngíʼa je familiale (tʼexkiai 1 Timoteo 5:4, 8, 16). Je Pablo kʼoakitsole Timoteo ʼyani xi koa̱n kʼoainganʼiole ya jinjtín kʼoa ʼyani xi mai. Kʼoakitsokixi kʼianga je xi sikuinda je yánchjínkʼan, jéní je xtile, xtindaile kʼoa kao je xínkjín xi ngikʼa xi makjainle. Tsa kʼoasʼin alikui je jtín ska̱nele je gasto xi machjénle. Nichxin xi tiyoaa ndʼaibi, je xi chjotale Cristo ma bakó “nga bexkón Niná” kʼianga tsjoále je familiale jme tsojmi xi machjénle.

8. Ánni nga tsín kʼoatsokixisíni Biblia josʼin si̱kuindaa je xijcháná xi jejchínga.

⁸ Je xti tjínnele nga tsjoále je xijchále jme xi machjénle. Kʼoa ninga je xokitsole Pablo je xínkjín xi makjainle Énle Niná, je xi chjotale Cristo ma tjínnele sikuinda je xijchále ninga tsín kotʼaya Énle Niná. Tsakui nichxin kjaʼaí kjaʼaísʼin sisinle je xijchále. Nga̱ kjaʼaí kjaʼaí chʼin tjínle je chjotajchínga, kjaʼaí kjaʼaí jmeni xi machjénle, kʼoa kʼoati kjaʼaí kjaʼaí kjoan. Tjínkʼa xi nkjín mani xtile kʼoa tjínkʼa xi tojngo mani.  Tjínkʼaje̱ xi bichóle je nganʼio xi tsjoá je gobierno, tonga kʼoati tjíokʼa xi mai. Kʼoa kjaʼaí kjaʼaísʼin mele je chjotajchínga nga koa̱nkuinda. Kʼoa kuinga tsín koa̱n chʼaosʼin si̱kʼaxki̱síñá josʼin síkuinda xíngiaa je xínkjín xi jekoanjchínga. Je Jeobá sichikontʼain ʼyani xi kʼoasʼin jotso je Énle kʼoa koasenkao nga nda katabichómani, tojo tísʼín saʼnda nichxinle Moisés (Núm. 11:23).

9-11. 1) Jmé kjoa xi faʼatojin sakʼoa je ndsʼee. (Chótsenlai sén xi faʼaitʼa ya jña fitsʼiani kjoaʼmiya jebi.) 2) Ánni nga tsín koa̱n tokjoan sikatíosíni xále je ndsʼee xi tse tjíosíxále Niná. Jngola choa̱ tʼejnai.

⁹ Kʼiatsa kjin tjío je xti ngisajin ñʼai koa̱nle nga kuinyakao xijchále. Kʼianga jechʼin tjínle xijchá tsakui nichxin toʼi̱koa̱n ska̱tsʼotje̱n, tsa tjótʼáole kʼoa tsa jmesani xi koa̱nle, machjénjin nga kjitʼanangi kuijnafichonle. Kʼoa xijekoa̱n, tsakui nichxin machjén nga koa̱nkuinda choatse kʼoa tsamaije̱ tse nichxin machjénle nga koa̱nkuinda. *

¹⁰ Je ndsʼee xi tse tjíosíxále Niná xi kjin tjíole niʼyale, tsakui nichxin tjínnele skoéjin jmeni xi sʼin. Je xi Betel tjíosíxá, xi misionero ma kao xi superintendente sʼin tjío nʼio bechjí je xá xi tjíosʼín nga̱ be nga tʼatsʼe Jeobá tínroani. Tonga kʼiatsa jngo xijchále tjóchʼinle, tsakui nichxin tokjoan i̱ kuitso: “Machjénjin nga kjuinñá niʼyaná nga si̱kuindaa je xijcháná kʼoa si̱kʼéjnaa je xáná”. ʼNdele nga tokjoán kʼoasʼin ngisajin nda nga je kjoanla Jeobá kʼoetsʼoale kʼoa katabekjoanla tsa machjén kjoaixile je xijchále nga koa̱nkuinda kʼoa tsakui xi meleje̱ je xijchá. Alikui koa̱n nga tokjoán sikatío josʼin tjíosíxále Niná nga̱ sakʼoa likuini machjén nga kʼoasʼin. Tsakui nichxin tochoatseni tjínnele koa̱nkuinda je xijchá kʼoa tsamaije̱ koa̱n je sikuinda choatse je xíngiaa xi tjío ya jtín jñani tjío je xijchá (Prov. 21:5).

¹¹ Si̱kjaʼaitsjenla jokoan ñandia jao xti, xi tindsʼe̱ mani, xi kjin tjíosíxále je Jeobá. Jngo xi misionero tísíxá ya Paraguay kʼoa xi ijngo yaa tísíxá ya Brooklyn (Nueva York), jña tje̱n tísʼendiaanile xále Niná jngo tjíjtsa Sonʼnde. Kʼianga nganʼio koanchjénle je xijchále, nga jao xti jebi kʼoa kao yánchjínle ki ya Japón nga kikotsenle je xijchále kʼoa kui xá kini nga skoe̱ jósʼin kuinyakao. Je xi ya tjíosíxá ya Paraguay kʼoasʼin tjíobʼéndajin tsakai nga tsín ti misionero sʼin sixáni kʼoa tosa xijchále koaisíkuinda. Kʼoa je chjotajchínga xi coordinador sʼin tíjna ya jtín jñani fi je xijchále kinchjale teléfono, kʼoakitsole nga je xi chjotajchínga sʼin tjío ya jinjtín jetsakjaoyani josʼin kuinyakao xijchále ndsʼee jebi ánni nga tosi tonda misionero sʼin sixásíni. Nʼio bechjí je xá xi tjíomasʼín kʼoa kʼoasʼin tsakʼéndajin nga je sikuinda je xijchále ndsʼee. Familia jebi nʼio kitsjoa kjoanda nga kʼoasʼin tsakinyakao xi chjotajchínga sʼin tjío.

12. Jméni xi kuenta katasʼín je chjotale Cristo josʼin sikuinda je xijchále.

¹² Tojmeni xi sʼin je chjotale Cristo nga sikuinda je xijchále, tjínnele nga ndasʼin kʼoasje je jaʼaínle Niná. Alikui koa̱n kʼoasʼiaan jokisʼin je chjota ngʼajko̱le relijión xi tsakatio nichxinle Jesús (Mat. 15:3-6). Kui xi mená nga je Niná katabitjongʼa jmeni xi sʼiaan kʼoa nga nda katabʼaxki̱ je jtín (2 Cor. 6:3).

13, 14. Jótso je Biblia, jmé xi tjínnele sʼin je jtín xi tʼatsʼe je chjota xi jejchínga.

¹³ Ali tsa tongatsʼijin nga kʼoamale  nga kʼoasʼin binyakao je xíngiaa xi tse tjíosíxále Niná tojo kisʼin je jtín xi jekaʼyaa. Tonga je xi koan nga siglo I kui bakóná nga ngatsʼi xi tjío ya jinjtín tjínnele koa̱nndosinle jmeni xi machjénle je ndsʼee xi jejchínga xi kixi tjíofitʼale Niná. Ya Biblia kʼoatso kʼianga je jtín xi kisʼejna ya Jerusalén “niʼyajin xi nijmejin xi koantsinle”. Jebi ali tsakuijin xi tsonile nga kisʼele tao̱n ngatsʼi. Tjínkʼa xi ma̱ kisijchá yaole. Tonga “tsʼabíle nga jngójngó chjota jo tjín xi machjénle” (Hech. 4:34, 35). Kʼianga koanskanni jngo kjoa kisʼe. Kʼoakitso én nga je yánchjín “xi jekʼen xʼinle likui kʼoasʼin tsʼakaole je tsojmi [xi ma chine] xi bʼabíle nyaonnyaon”. Kuinga je pastro kiskoejin kʼasíni je chjota xi tsakánele nga tsjoále ngatsʼi je ʼndíyánchjínkʼan jmeni xi machjénle (Hech. 6:1-5). Kjoaixi nga tochoatse nga kʼoasʼin tsakʼaile tsojmi xi koanchjénle. Kui xá kisʼendajinni jebi nga kuinyakao je xi tokʼia chjotale Cristo koan nga kisʼejna sʼuí Pentecostés nga nó 33, xi ya tsakatio choatse ya Jerusalén nga kisitajasa je kjoamakjainle. Jmeni xi kitso je pastro kui bakó nga koa̱n tsjoánganʼio je jtín nga koa̱nkuinda je xi nganʼio machjénle.

¹⁴ Je Pablo kʼoakitsole je Timoteo kʼiani nga koa̱n tsjoánganʼiole je jtín jngo ʼndíchjoónkʼan xi chjotale Cristo ma (1 Tim. 5:3-16). Je Santiago kʼoati kitso nga je chjotale Cristo tjínnele sikuinda je ʼndíxtijchʼa̱n, ʼndíyánchjínkʼan, xi kjoa tjíofaʼatojin kao xi ñʼai chonle (Sant. 1:27; 2:15-17). Kʼoa je pastro Juan i kitso: “Tonga je xi tjínle ngayije xi machjénle xi tsʼe sonʼnde, kʼoa skoe̱ jngo ndsʼe̱ xi tsínle xi machjénle, kʼoa kʼoechjoale ni̱ma̱le, a tíjnajinntsjai ni̱ma̱le kjoatjaochale Niná” (1 Juan 3:17). Kʼiatsa tjínnele kʼoasʼin nga jngó jngó je chjotale Cristo, a tsí kʼoati tjínnele kʼoasʼin je jtín.

15. Jmé xi kuitsoni jokji kʼoainganʼiolee je ndsʼee xi jekoanjchínga.

¹⁵ Tjínkʼa naxinandá jñani je gobierno tsjoále nganʼio kʼoa síkuinda je chjotajchínga (Rom. 13:6). Tonga kʼoati tjín naxinandá jñani tsín nganʼio jebi. Jokji tsjoánganʼiole familiale kao je jtín je ndsʼee xi jekoanjchínga kui xi kuitsoni josʼin tjío. Nʼio nkjín je xti xi kjin tjíole je xijchále kʼoa tsakui nichxin likui kʼoakoa̱nle nga nʼio tsjoánganʼiole. Kʼiatsa ñʼai kjimale je xti, tjínnele kjoakaonajmí je xi chjotajchínga sʼin tjío ya jtín jñani fi je xijchále ánni nga katabesíni  je kjoa xi tjíofaʼatojin. Tsakui nichxin je xi chjotajchínga sʼin tjío ya jinjtín kuinyakao je xijchá nga katabʼaile je nganʼio xi tsjoá je gobierno. Kʼoati koa̱n kʼoakuitsole je xtile tsa jmeni xi skoe̱, tobʼelañá, tsa jme xo̱n kabichóle je chjotajchínga kʼoa kje bʼéxkiajin, kʼoa tsa tsín tjíoʼbije̱ je xkile. Tsa je xi xti kʼoa kao je xi chjotajchínga sʼin tjío nda kjaonajmí alikui koa̱ntse je kjoa kʼoa ngisajin nda skoe̱ josʼin kʼoendajin. Je xti tja̱jin koa̱nle nga tjío xi tjíobinyakao je xijchále kʼoa xi kʼoakuitsole tsa jme xi kjimale.

16. Jméni xi sʼín kʼa je chjotale Cristo nga binyakao je ndsʼee xi jekoanjchínga xi tjío ya jinjtín.

¹⁶ Tjínkʼa je ndsʼee xi ni̱ma̱le nroajinni jokji tse nichxin síkʼayale nga síkuinda je ndsʼee xi jekoanjchínga. Kʼoa kui kʼoasʼínni nga tsjoake. Ñaki jo familiale síkao. Kʼoa sakʼoaa kʼoasʼin bʼéndajin kao xi ngikʼa josʼin kʼoakaole nga sikuinda. Kʼoa nga tsín kʼoamale nga nʼio tse síxále Niná tsjoa satíole kʼianga binyakao je xi kʼoasʼin tse tjíosíxá ánni nga tsín katasíkatíosíni xále. Nʼio nda sʼín kʼianga kʼoasʼín je ndsʼee jebi. Ningalani kʼoasʼin tsjoánganʼio je ndsʼee jebi, alikui xi tsonile tsa tsín tijme xi kjinenile je xti, tojo je kjinele nga sikuinda je xijchále jokji tje̱n kʼoakoa̱nle.

17, 18. Ánni nga nʼio chjísínile nga ndʼé katama je chjotajchínga kao je xi síkuinda.

¹⁷ Je xi jekoanjchínga kao je xi síkuinda machjén nga kʼoenele yaole nga tsjoa kʼoe kon nga̱ kui xi kuinyakao. Kʼianga jemajchíngaa sakʼoaa nroajen tokoán kʼoa tsakui nichxin saʼnda kui ska̱tʼaná chʼin xi depresión ʼmi. Tsakui nichxin machjén nga ngisa kʼoénelai yaoli nga jchaxkuín kʼoa nga si̱nʼiui kon je xi jekoanjchínga nga ñaki nda tso én xi chja̱kaonajmí. Bakinle nga jchachjiá jmeni xi sʼín je ndsʼee jebi. Je Jeobá alikui tísíchajin josʼin kisixá ndsʼee jebi kʼoa ñá kʼoati tsín koa̱n si̱chajiaan (tʼexkiai Malaquías 3:16 * kao Hebreos 6:10).

¹⁸ Kʼiatsa tsjoakjoa je chjotajchínga ngisa kuinyakao nga chókjoajinle je kjoa xi kjoaʼatojin nga nyaon nyaon (Ecl. 3:1, 4). Nʼio nkjín ndsʼee xi jejchínga xi tsín síkʼatone choa̱le jmeni xi síjé. Bení nga ngisa nda koa̱nsinle kʼoa nga ngisa nkjín chjota kuichosíxatʼa kʼiatsa ndʼé. Nʼio nkjín xíngiaa xi i̱ tso kʼianga jefisíxatʼa je ndsʼee xi jekoanjchínga: “ʼNdele nga an tsjoanganʼiole tosani je katsjoánganʼiona” (Prov. 15:13; 17:22).

19. Jméni xi koasenkao je xi sʼa xti kao xi jekoanjchínga kʼianga kjoa kjoaʼatojin.

¹⁹ Ñaki mená nga katabichó nichxin kʼianga katatjoxin je kjoachjaʼatokon kʼoa kao je kjoañʼai xi síkjaʼáná je jée xi kichʼá. Tonga nga kjesa bichójin nichxin jebi, ñá xi choʼndale Niná maa ñaki kui kuenta sʼiaan je kjoanda xi sʼe̱ná nichxin xi nroaján. Je kjoamakjain xi tjínná basenkaoná kʼianga chókjoajinná je kjoañʼai xi bitjatojiaan. Kʼianga tjínná kjoamakjain alikui maʼindajiaan. Kʼoa ninga je yaoná kʼoasʼin tífengi, jokjoaan ya jinni̱ma̱ná kjimachjotseya nichxin nga nyaon (2 Cor. 4:16-18; Heb. 6:18, 19). Ningalani makjainná jmeni xi tso je Énle Niná, jméni xi koasenkaoná nga si̱kuindaa je xi jekoanjchínga. Je kjoaʼmiya xi ijngo tsjoáná kjoafaʼaitsjen jokoa̱n sʼiaan.