Kui bersíkulo jebi xi ngisa nʼio ʼyale kʼoa xi ngisa nʼio bʼaxki̱. Kʼoatso én nga tsín ijngo testo xi kui bʼéyanajmí josʼin tjío chjota xi kao Niná kʼoa josʼin kuitjontjaile yaole. Kʼoa kuinga tsín tomaxkónniná nga tjínkʼa naxinandá jñani pancarta bʼéta testo jebi nga bakó ya jñani maská kao jñani se chjota, kʼoa saʼnda kui letrero bʼétʼa karrole kʼoa tsamaije̱ kui bersíkulo jebi bʼétʼa ya tʼaxjáo nga síkʼijon.

Je chjota jebi kʼoasʼin makjainle nga nʼio tsjoake je Niná kʼoa nga tsjoále kjoabijnachon xi tsínkʼia fetʼa. Jósʼin nikjaʼaitsjen ngái ji. Jméni xi kisʼin je Niná kʼianga tsjoakeli.

Nʼio nkjín chjota xi kʼoasʼin makjainle nga je Niná kisinda je ngʼajmi kao sonʼnde, je tsojmintje kao cho̱ kʼoa kao je chjota. Je xi tjíokon nʼio ndasʼin koannda kʼoa tíjnajin ʼyani xi kisinda xi nʼio tse kjoachjine tjínle. Xi ijngosani, nʼio nkjín chjota xi tsjoále kjoanda je Niná nga nyaon nyaon nga kʼoasʼin títsjoá kjoabijnachon. Bení nga totʼatsʼe nga tjíokon kʼoa nga je títsjoá je ntjao̱, je nandá, je tsojmi xi ma chine kʼoa josʼin tjínnda sonʼnde nga tijé sítsjeni yaole.

Nʼio bʼailee kjoanda je Niná nga kʼoasʼin títsjoá ngayeje jebi, jé kisindaná kʼoa je títsjoáná kjoabijnachon (Salmo 104:10-28; 145:15, 16; Hechos 4:24). Kʼoasʼin tíbakóni nga tsjoakená. Je pastro Pablo i kitso: “Jé [Niná] tsjoáná kjoabijnachonná, kʼoa nga chjenjta, kʼoa kao ngayije tsojmi” (Hechos 17:25, 28).

 Tonga ali tsa tokuijin tsjoáná Niná jme xi tiyochonñá, nʼiosa tse tíjna kjoatsjoachale. Kʼoasʼin kisindaná nga katamandosinná xi tʼatsʼe kʼoa tijé basenkaoniná nga kataʼyaa, kʼoa toñá ñá xi chjotaa xi kʼoasʼin koanndaa (Mateo 5:3, TNM). Kʼoa nga kʼoasʼin kisindaná tsjoáʼndená nga ya koa̱njngokoaa ngatsʼi je choʼndale. Tsa chʼa̱ʼénlee je Niná, saʼnda xtile koaan (Romanos 8:19-21).

Tojo tso ya Juan 3:16, je Niná tsakakó nga tsjoakená nga kisikasén je ʼNdíle i̱ Sonʼnde. Je ʼNdíle kui xá jaʼaini nga jaʼaikakóyaná xi tʼatsʼe Niná kʼoa nga kitsjoantjai kjoabijnachonle xi totʼatsaan. Tonga nʼio nkjín chjota xi tsín majinle ánni nga kʼiensíni je Jesús kʼoa kʼoati tsín majinle nga kjoatsjoacha tsakakóná Niná nga kʼoasʼin kʼien ʼNdíle. Kataʼyala jotso je Énle Niná xi tʼatsʼe jebi.

Ningalani sokóchʼinná, majchíngaa kʼoa biyaa ngatsʼiaa, je Niná alikui kʼoasʼin koanmele nga kʼoakoaan. Je chjota xi títjon kisinda kui xá kisindani tsakai nga jngo ʼndenaxó koatioson ngantsjai nichxin i̱ Sonʼnde. Tonga tjín xi kisijéle nga katasʼín. Kʼoakitsole nga tjínnele sitjosonle nga̱ tsa mai kuiyání (Génesis 2:17). Je chjota xi títjon koannda, xi Adán tsakʼin, jaʼatone je kjoatéxomale Niná, kʼoa nga kʼoakisʼin kjoabiya kichomani kʼoa kʼoati tsʼakaotʼale je ntje̱le. Je pastro Pablo i kitso: “Kui je xi jée ʼmi jaʼasʼenjin sonʼnde xi totʼatsʼe jngo chjota. Kʼoasʼin tjín kjoabiya xi totʼatsʼe jéebe. Kʼoa je kjoabiyabe kʼoasʼin kitsaotʼale ngatsʼi chjota, nga̱ tsajngi jée ngatsʼi” (Romanos 5:12).

Tonga je Niná kui tsjoake je xi kjoatéxomakixi (Salmo 37:28). Ningalani tsín kisichatʼale chjota jebi nga kʼoasʼin jaʼatone je kjoatéxomale, alikui kʼoakitso nga kjoañʼai kjoaʼa ngantsjai kʼoa nga katabiya je chjotasonʼnde xi totʼatsʼe jngo chjota xi jée tsakajngi. Tosa kui kisichjén je kjoatéxoma xi tso nga kjoabijnachon kao kjoabijnachon katamachjíni, kʼoa kʼoakjoan tjín chjíle kjoabijnachon xi kitsjoangajaoni jotjín chjíle kjoabijnachon xi kisicha Adán. Nga kʼoakisʼin so̱ko ijngokʼanile kjoabijnachon ngantsjai je chjota xi kʼoaʼén (Éxodo 21:23). Je Adán kjoabijnachon tsje xi kisicha, kuinga tjínnesínile nga jngo chjota xi tsje tsjoántjai kjoabijnachonle, nga koa̱nngóson je kjoabijnachon xi kisicha Adán.

Nijngojin je ntje̱le Adán xi koanle tsakʼéchjíntjai je jée xi tsakajngi Adán, tojékjoan je Jesús xi koanle (Salmo 49:6-9). Je Jesús ñaki tsje nga kitsin, alijme jée kisʼele, koanngóson kao Adán nga kjesa bajngijéejin. Nga kitsjoantjai je kjoabijnachonle Jesús, je chjotasonʼnde ndaí tsakatiole je jée kao kjoabiya. Je xtile Adán koaan so̱ko ijngokʼanile je kjoabijnachon xi kisʼele Adán kao Eva (Romanos 3:23, 24; 6:23). Jméni xi sʼiaan nga so̱koná kjoanda kʼianga kʼoasʼin kitsjoa Niná je ʼNdíle.

Ya Juan 3:16 itsosa: “Jméni nga ngatsʼisíni xi makjainle tʼatsʼe [Jesús], likui cha̱, tonga tjínle kjoabijnachon ngantsjai”. Xi tsonile, tsa mená sʼe̱ná je kjoabijnachon ngantsjai tjínnele nga katamakjainná xi tʼatsʼe Jesús kʼoa tjínnele si̱tjosonlee.

Tsakui nichxin tjín xi i̱ kuitso: “Tonga je testo jebi ali tsakui nchja̱ni tsa chʼa̱ʼén. Je Jesús tokui xi kitso nga ngatsʼi xi makjainle, tjínle kjoabijnachon ngantsjai”. Kjoaixiní nga nʼio chjíle nga koa̱nkjainná, tonga ali tsa tokuijin xi machjén. Jngo diccionario xi kʼoatso nga je én xi kisichjén je Juan i̱ testo jebi kui tsoyanile nga ninʼiotʼaa tsa jmeni kʼoa tsa ʼyani, ali tsa tokuijin nga makjainná (Diccionario expositivo de palabras del Antiguo y del Nuevo Testamento exhaustivo, de W. E. Vine). Je xi kjoamakjain ʼmi ali tsa tokuijin nga koa̱nkjainná xi tʼatsʼe Jesús kʼoa nga jchaa nga je tsakʼasjentjainá. Kʼoati tjínnele nga si̱nʼiotʼaa kʼoa kʼoénelee yaoná nga si̱tjosoán je Énle, tsa kʼoasʼiaan nda kuiyoaa ngixko̱n Niná. Tsa tsín kʼoasʼiaan lijmejinni chjíle je kjoamakjain xi tjínná. Nga̱ je Énle Niná itso: “Je xi makjainná tochajinní, tsa tsín nda tjín xáná” (Santiago 2:26). Kʼiatsa makjainná xi tʼatsʼe Jesús kʼoasʼin si̱jchá yaoná jokitso.

Je Pablo i kitso xi tʼatsʼe jebi: “Je kjoatjaochale Cristo kjoanʼio sʼínnajin, nga jekinikjaʼaitsjainjin jebi, nga jngo xi kʼen xi tʼatsʼe ngatsʼi [...] jméni nga je xi tjíokon, likui tikoatiokonni xi titʼatsʼeni, tonga xi tʼatsʼe je xi kʼoasʼin kʼen, kʼoa xi kinikjaʼáyanile xi tʼatsʼe” (2 Corintios 5:14, 15). Kʼiatsa nʼio chjí ʼyaa je kjoabʼechjíntjai xi kitsjoa je Jesús, si̱kʼantjaiyajián yaoná, alikuijin to yaoná kjuinñá kʼoajinsʼin kjuinkoaa yaoná josʼin mele je Jesús, xi kʼoasʼin kʼienntjainá. Xi tsonile, kuijin ngisa kʼoailee kjoandosin nga si̱tjosoán je kjoatéxomale. Kʼoa yaa koakoñá josʼin koanngínkoaa yaoná, jme xi chjoéjiaan kʼoa josʼiaan. Jmé kjoanda xi so̱koná nga makjainná xi tʼatsʼe Jesús.

Ya jña fetʼani Juan 3:16 kʼoatso jmeni xi tsjoále Niná je chjota xi sʼe̱le kjoamakjain tʼatsʼe kjoabʼechjíntjaile Jesús kʼoa xi sitjoson je kjoatéxomale, kʼoatso nga tsín kuiyá nga tosa kjoabijnachon ngantsjai sʼe̱le. Tonga ali tsa tojngojin koatio ngatsʼi je chjota xi tsjoake Niná.

Jngo jtín mani xi ya ngʼajmi koatio ngantsjai. Jómani ʼyaa. Kuinga kʼoakitsole Jesús je xi chjota tje̱nngile koanni nga jngo ʼnde koaikʼéjnandale ya ngʼajmi nga ya koatexomakao (Juan 14:2, 3; Filipenses 3:20, 21). Je xi ya koai ya ngʼajmi “naʼmile Niná kao xi tsʼe Cristo koa̱n. Koatexomakao jngo jmi nó” (Apocalipsis 20:6).

To tjíchoaa mani je chjotale Cristo xi kui kjoanda jebi sʼe̱le. Je Jesús i kitsole: “Ali jkonjion, jon xi tochoa mani xi tiyojtíon, nga̱ je Nʼainá kjaínga koantsjoale nga tsjoáno kjoatéxomale” (Lucas 12:32). Jótjín mani chjota jebi. Apocalipsis 14:1, 4 itso: “Kiskotsen, koeni je Barré ya tíjnason nindo xi Sión ʼmi, kʼoa tjíokao nga je jngo siento kao ñachanño jmi xi tjínle jaʼaínle Barré kao jaʼaínle Nʼaile. Tjíotʼa ya tjen [...]. Jebi xi koanchjíntjai yajinle chjota, nga ʼndítjon koan xi tsʼe Niná kao je Barré”. Nga to jngo siento kao ñachanño jmi mani chjota jebi, alikui mangóson jokji jmi miyón chjota tjíobatio i̱ Sonʼnde. Tonga bersíkulo jebi kʼoatso nga rey koa̱n. ʼYáni xi koatexomasonle.

Je Jesús kʼoakitso tʼatsʼe je jtín xi majaoni nga kʼoati sʼe̱le kjoanichikontʼain nga jekoatexoma ya ngʼajmi. Kʼoakitso nga kʼoati tjínsale xi kjaʼaí barré xi tsín tsa ya tjíojin je barré xi ngikʼa xi kʼoati machjénle nga koaikao kʼoa kjuinrʼoé jta̱le. Tojngo koa̱njtín, kʼoa tojngo koa̱n xi skóʼnda (Juan 10:16). “Barré” jebi i koyale nga koatio ngantsjai nichxin i̱ Sonʼnde, tojosʼin tjínnele tsakatio tsakai je Adán kao Eva. Jómani ʼyaa jebi.

Je Biblia nʼio nkjín kʼa kʼoatso nga naskánakoa̱nchon je Sonʼnde. Tsa meli nga ji kjoan jchai  jñani kʼoatso tjasjaijin ya Biblia je testo jebi: Salmo 37:9-11; 46:8, 9; 72:7, 8, 16; Isaías 35:5, 6; 65:21-23; Mateo 5:5; Juan 5:28, 29 kao Apocalipsis 21:4. Je testo xokjoan jetongini kʼoatso nga tjóxin je kjoajchán, je kjinrá, je chʼin kʼoa kao kjoabiya. Kʼoa kʼoati tso nga je chjota kʼoenda niʼyale, kʼoentje tsojmi kʼoa ya sijchá je ʼndíxtile jña nga tsín ti kjoatsʼen tjínni. * A meli nga kʼoachon jña si̱jchái yaoli. Alikui jao tjínná nga jeme kuitjoson jotso én jebi.

Kʼianga jekachotʼayajiaan jebi, kaʼyañá nga nʼio tse jmeni xi kisʼin Niná xi tʼatsaan. Jé títsjoáná kjoabijnachon, kjoankjíntokon, kʼoa nga nda tiyoaa kʼoa kao ngayeje jmeni xi tiyochonñá. Tonga je xi ngisa nʼio chjíle, kuinga kisikasén je ʼNdíle nga kʼien xi totʼatsaan, nga koa̱n so̱koná je kjoanichikontʼain tojosʼin kaʼyaa ya Juan 3:16.

Ñaki nʼio tsjoa sʼe̱ tokoán tokʼia saʼndani nga ya kuiyoaa jngo sonʼnde jñani sʼe̱ kjoanyʼán, jñani tsín tisʼeni chʼin, kjoajchán, kjinrá kao kjoabiya. Ñá xi kuixónñá nga jngó jngoá tsa mená nga sʼe̱ná kjoanichikontʼain jebi. Tonga xi koa̱n chjónangilee yaoná kui: Jméni xi tinʼia xi tʼatsʼe Niná.