TONGA je chjota xi ya tjíojin je relijión xi tjíojtín alikui kʼoatso. Je chjota xi Eboo Patel ʼmi, xi tsakʼétsʼiakao nga tojngo kisʼin yaole je relijión (Interfaith Youth Core) i kitso: “Kʼoalatʼinnáo, a tíjna jngo relijión xi tsín kʼoatso nga katasʼe kjoamatokon, nga katamakuinda Sonʼnde kʼoa nga ndʼé katamaa kao xíngiaa”.

Kʼoatjín kjoaixi, kuilakjoan je relijión xi budismo ʼmi, hinduismo, musulmán protestante kʼoa kao católica, sakʼoaa tojngo sʼín yaole nga batiojtín kʼianga binyakao je chjota xi ma̱ tjío, nga sítoánntjai chjota, nga kʼoatso nga tsín tikui katasatíoni xi minas ʼmi (ki̱cha̱ xi tsinnga kʼianga binyane chjota), kʼoa nga bájinkon chjota nga kʼoasʼin tíbitson je Sonʼnde. Kʼoati fáoyani josʼin nda koatiokao xínkjín je chjota kʼoa tsjoángañále kjoafaʼaitsjen xínkjín. Kʼoa nga kʼoasʼin tjíojtín sʼuí bʼasje, baká sera, síkjanee músika kʼoa bʼétsʼoaa.

A sʼe̱ndajinle relijión je kjoa xi tjínle kʼianga kʼoasʼin koatiojtín. A kui sichjén Niná kʼianga ngisa nda sichon Sonʼnde.

Je jtín xi ngisa nkjín relijión tjíojtínle kʼoatso nga jankan kao xjaʼaon jngo naxinandá tjínni jña kjinentsja kʼoa nga tsʼato jao siento relijión tjíojtínle. Je xi mele kuinga kuinyakaongañá xínkjín je relijión kʼoa nga jtín sʼin katabatio ngantsjai. Tonga alikuini kʼoakjimale. Tobʼelañá, je chjota xi tsakʼétsʼiakao jtín jebi kʼoakitso nga je kjoatéxoma xi tsakʼénda nʼio kiskosonnile jotsakʼé kʼianga tsín koa̱njtile je relijión kʼoa kao je chjota xi énma̱ nchja̱ xi ya tjíojin. Ánni. Kuinga tsín tsa tongatsʼijin nga kisasenle kʼianga Niná kʼoaxki̱ ya xo̱n xi tsakʼénda. Kʼoa jókisʼin chjota xi nyatítjon. Niʼi̱jinnatjín kisikʼaxki̱ Niná ya xo̱n kjoatéxoma jebi.

Tonga kʼiatsa tsín koa̱n nga Niná kʼoaxki̱, jmé xá tjíoni je relijión. Jtín jebi yaa mangóson je jtín xi chjota binyakao. Kuinga tsín relijión tsonile yaole, je jtín jebi kui xá tíjnani nga tokuinyakaongañá xínkjín je chjota.

Je xi Dalai Lama ʼmile xi ngisa nchja̱ntjai je relijión xi tjíojtín itso: “Ngatsʼi je relijión tongóson kui bakóya tʼatsʼe kjoatsjoacha, kjoamatokon kʼoa kao  nga si̱chatʼalee xíngiaa”. Kʼoa kʼoakitso nga je xi ngisa chjíle kuinga kʼoasʼin kjuinkoaa yaoná nga nyaon nyaon.

Kjoaixi kʼianga nʼio machjén nga katasʼená kjoatsjoacha, kjoamatokon kʼoa kao kjoanichatʼa. Je kjoatéxoma xi kitsjoa je Jesús itso: “Ngayije kjoa xi meno nga síkaono chjota, kʼoatisʼin tikaonio nga je” (Mateo 7:12). Tonga a tokui xi machjén nga kʼoakuitso je relijión xi kixi nga nda katasʼín je chjota.

Je pastro Pablo kʼoakitso nichxin nga tsakʼejna nga nʼio nkjín chjota xi nʼio koanmele nga Niná sixále, tonga alikui kisʼele kjoaʼisentokonle Niná. Kʼoa nga tsín tsabe “kjoakixi xi Niná tsjoá”, toje tsakʼasje “kjoakixi xi titsʼeni” (Romanos 10:2, 3). Kʼoa nga tsín tsabe jmeni xi mele Niná, toxitsjoani je kjoamakjain xi kisʼele kʼoa toxitsjoani ninga koanmele nga Niná kisixále (Mateo 7:21-23).

Je Jesús i kitso: “Nʼio tsjoa tjíole je xi kjoanyʼán síxántjai” (Mateo 5:9, El libro del Pueblo de Dios). Je Jesús ali tsa to énjin xi kinchja̱, kʼoakisʼin jmeni xi tsakakóya. Kʼoakitso nga tsín koa̱n kuixkán kʼoa kjoanyʼán kikaole ngatsʼi chjota ninga kjaʼaí kjaʼaí relijión tjíojin (Mateo 26:52). Je chjota xi kinrʼoé je én xi tsakakóya je Jesús tsjoakengañá koan xínkjín kʼoa kui xi jtín kisikatío (Colosenses 3:14). Tonga a kui xi tsonile nga tokui kitsoya je Jesús nga nda katabatiokao xínkjín chjota kʼoa nga nyʼán katabatio. A yaa kisijngokao yaole je relijión xi kjaʼaí.

Je chjotatítjonle chjota fariseo kʼoa kao chjota saduceo nʼio kitjenngike Jesús kʼoa saʼnda koanmele kisikʼien. Jókisʼin Jesús. I kitsole je chjotale: “Tikatío xi kʼoakjoan. Toxkaa kjoan” (Mateo 15:14). Tojo tso én jebi, je Jesús alikui ya kisijngokao yaole chjota jebi.

Kʼoa nga jeki nó, jngo jtín xi tsʼe Cristo kisʼejna ya Grecia, ya naxinandá Corinto. ʼNde jebi, nkjín kostumbre kisʼe kʼoa nkjín relijión kisʼe. Nga kʼoakoanchon ʼnde jebi, jósʼin tjínnele kikao yaole je chjotale Cristo xi ya tsakatio. Je pastro Pablo i kitsole: “Ali tojngojin biyokjao kao xi tsín makjainle”. Kʼoa xijekoan kitsole: “Jósʼin koa̱nni nga sa̱tíokjaoni Cristo kao Belial [je Na̱i], axo jmé ʼnde xi tojngo koa̱nnile je xi makjainle kao je xi tsín makjainle”. Kʼoa itso kjoafaʼaitsjen xi kitsjoale: “Titjo̱jin basennilao nga je, kʼoa tinyatʼaxinlao” (2 Corintios 6:14, 15, 17).

Tojosʼin tiʼyaa, je Biblia alikui tsjoáʼnde nga tojngo katasʼín yaole je relijión. Tonga tsakui nichxin i̱ kuixoán: “Tonga jókoa̱nni nga ñaki jtín sʼin kuiyoaa”.

Jngo ki̱cha̱ tíjna ngʼá xi Estación Espacial Internacional ʼmi kʼoa xjaʼaonla naxinandáyʼai kisixájtín nga kisinda. Jósi ngái ji, a koan kisinda ki̱cha̱ jebi tsa tsín koanngóson kjoafaʼaitsjenle ngatsʼi kʼoa tsa tsín jngo plano kitjenngi.

Nichxin xi tiyoaa ndʼaibi, kʼoati mele sʼin je relijión xi kʼoasʼin tjíobatiojtín. Ninga kʼoatso nga kuinyakaongañá xíngiaa kʼoa jchaxkoán xíngiaa, alikui mangóson kjoafaʼaitsjenle nga ñaki tojngo kjoamakjain katasʼele ngatsʼi. Kʼoa kuinga tokjoa tjínnile ngantsjai josʼin fikao yaole kʼoa josʼin makjainle.

Ya Biblia kui kjoatéxomale Niná faʼaitʼa, kʼoa jebi mangóson joni tsa jngo plano. Nga mangíntjenngiaa jmeni xi tso je Biblia nda biyoaa. Je xi kui tjíofitjenngi jtín sʼin tjíobatio kʼoa alikui bʼasjengi xínkjín josʼin tsen yaole, kʼoa ñaki jtín sʼin tjíosíxá. Je Niná jetongini i̱ kitso: “Kʼoa kʼiaa sikʼantjaiya je én xi male naxinandá nga jngo én xi tsje katanchja̱, ánni nga sikʼaxki̱síni ngatsʼi je jaʼaínle Jeobá, nga tojngo sixájtínle ngatsʼi”. Kui xi jtín sʼin tjíosíkatío nga tjíofitjenngi je “én xi tsje” tíjna, xi tsonile, je kjoatéxomale Niná (Sofonías 3:9; Isaías 2:2-4).

Je testigole Jeobá kʼoatsoli nga tʼin ya Ndʼia jña kotʼaya kʼoa jisoa kataʼyai nga nyʼán sʼin tjío kʼoa nga jtín sʼin tjíokao xínkjín (Salmo 133:1).