1. Jmé kjoanichikontʼain xi títsjoáná Jeobá kʼianga tsjoa kʼoé tokoán.

 JE Jeobá nʼio tse kjoanichikontʼain tsjoáná nga̱ mele nga tsjoa kʼoé tokoán. Tobʼelañá, jé títsjoáná je kjoabijnachonná. Kʼoa nga tiyochoán koaan chʼa̱sjengʼaa, nga̱ kʼoasʼin koanmele nga tsaʼyaxkoaan (Sal. 144:15; Juan 6:44). Je Jeobá kʼoatsoná nga tsjoakená, kʼoa basenkaoná nga tosi tonda nixálee (Jer. 31:3; 2 Cor. 4:16). Nʼio nkjín koya jmeni xi títsjoáná kʼoa josʼin tíbasenkaoná. Tobʼelañá, jngo naxinandá kisikatíojinná jñani ndsʼe sʼin ʼyatokoán xíngiaa. Naxinandá jebi tíjna ngakjijnda Sonʼnde, nyʼán tiyoaa, jtín tiyoaa kʼoa tsjoachañá ngatsʼi xíngiaa. Kʼoa saʼnda jngo kjoachoya xi nʼio naskánatjín títsjoáná.

2. Jósatío kʼa kjoafaʼaitsjenle je choʼndale Niná.

² Tonga tjíokʼa choʼndale Niná xi síkʼajen kon ningalani tse kjoanichikontʼain tjínná xi tsjoa bʼé tokoán. Kʼoasʼin síkjaʼaitsjen nga tsín chjí bekon Jeobá kʼoa kao josʼin tjíosíxále. Kʼianga kʼoasʼin síkʼajen kon, tsakui nichxin kʼoasʼin síkjaʼaitsjen nga tsínkʼia tsjoa sa̱tío kon. Xíngiaa jebi to kjoaba tjíokaontsjai (Ecl. 11:8).

3. Jñá nroani nga kʼoasʼin síkʼajen kon xíngiaa.

³ Jñá nroani nga kʼoasʼin síkʼajen kon xíngiaa. Tsakui nichxin  tsín kʼoama jmeni xi koyale kʼoa tsa tsín nda bitjo jmeni xi sʼín, tsa chʼin tsaotʼale kʼoa tsa chʼinxkʼén tjíokao (Sal. 71:9; Prov. 13:12; Ecl. 7:7). Xi ijngosani, ninga tsjoa tjínle Niná xi tʼatsaan, ñá sakʼoaa likui nda nikjaʼaitsjeen xi tʼatsaan nga̱ je ni̱ma̱ná nʼio bʼanachaná (Jer. 17:9; 1 Juan 3:20). Kʼoa je Na̱i énndiso báne je choʼndale Niná. Tjíokʼa chjota xi kui kjoafaʼaitsjenle Na̱i fitje̱nngi kʼoa mele nga katamakjainná jmeni xi kitsole Elifaz je Job, nga tsín jme chjíná ngixko̱n Niná. Tonga jebi to énndisoní (Job 4:18, 19).

4. Jmé tʼatsʼeni xi chótʼayá i̱ kjoaʼmiya jebi.

⁴ Je Jeobá kʼoatsoná nga ya tje̱n tíjnakao je xi síkʼajen kon (Sal. 23:4). Tobʼelañá, kui Biblia síchjén nga tsjoánganʼiole. Je Énle Niná “tjínle nganʼio [...] nga sikixoya tojmeni xi nʼio tjío”, jolani nga likui nda nikjaʼaitsjen xi titʼatsaanñá (2 Cor. 10:4, 5). Kataʼyala jósʼin koa̱n si̱chjén je Biblia nga tsjoa kʼoé tokoán kʼoa nga tsjoa katasʼentsjainá. Jebi nʼio koasenkaoná xi tiñáñá kʼoa koaan si̱chjén nga kʼoainganʼiolee xíngiaa.

5. Jméni xi tjínnele si̱kjaʼaitsjenjiaan kʼianga tsjoa kʼoé tokoán.

⁵ Je pastro Pablo jngo koya kisikʼaxki̱ xi koasenkaoná nga tsjoa kʼoé tokoán kʼianga i̱ kitsole je chjotale Cristo xi tsakatio ya Corinto: “Chótʼao yaono [...] tsa nda tiyokao xi makjainno” (2 Cor. 13:5). Je én “xi makjainno” tso kui tínchja̱ni ngayeje xi makjainná xi chjotale Cristo maa xi ya Biblia yʼangini. Kʼianga jchaa tsa nda tíjna kjoamakjainná, tjínnele si̱kjaʼaitsjenjiaan josʼin nokjoaa kʼoa jmeni xi nʼia, tsa kʼoasʼin timangíntjenngiaa jmeni xi makjainná. Tonga ali tsa tokuijin xi si̱tjosoán xi ngisa skénndiaaná, tjínnele kʼoasʼin koanngínkoaa yaoná jotjínni ngayeje kjoatéxomale Niná (Sant. 2:10, 11).

6. Ánni nga chótʼasíñá yaoná tsa nda tiyokoaa xi makjainná. (Chótsenlai sén xi faʼaitʼa ya jña fitsʼiani kjoaʼmiya jebi.)

⁶ Tsakui nichxin likui koa̱nmená nga si̱kjaʼaitsjenjiaan josʼin tíjna kjoamakjainná, ngisa tsa kʼoasʼin si̱kjaʼaitsjeen nga tsín nda tiyoaa. Tonga je xi ngisa chjíle kui josʼin síkjaʼaitsjen Jeobá xi tʼatsaan, nga̱ je kjoafaʼaitsjenle ngisa ngʼa tíjna tikʼoajinni tsaan (Is. 55:8, 9). Je Jeobá kui xá kotʼani josʼin tjío choʼndale nga be jñani nda tjíosʼín kʼoa nga koasenkao, ali tsakuijin nga jée kjoane. Kʼiatsa je Biblia si̱chjain nga chótʼai tsa nda tíjna kjoamakjainli, ngisa kʼoasʼin si̱kjaʼaitsjain xi titʼatsini josʼin síkjaʼaitsjen je Niná. Kʼoa kui jebi xi koasenkaoli nga tsín tichʼaosʼin si̱kjaʼaitsjenni xi titʼatsini kʼoa koa̱nchoyali nga je Jeobá nʼio chjí bekonli. Kʼianga jekoa̱nchoyali jebi ñaki kʼoasʼin koa̱nʼisenli joma jñani njio chon nga tsjoá maʼisen nga jekotʼa je ndoá.

7. Jósʼin koasenkaoná je choa̱ xi tsakatío je choʼndale Niná xi síkʼaxki̱ Biblia.

⁷ Jngo koya josʼin koa̱n chótʼaa yaoná tsa nda tiyokoaa xi makjainná kuinga si̱kjaʼaitsjenjiaan je choa̱ xi tsakatío je choʼndale Niná xi síkʼaxki̱ Biblia. Tingósonkoai jokisatio kon kʼoa jme kjoa xi jaʼatojin kao josʼin tijnai ji ndʼaibi kʼoa tikjaʼaitsjain jókinʼiai tsa jilani xi kui kjoa kitjatojin. Janla choa̱ kataʼyaa xi koakoyaná josʼin si̱chjén je Biblia nga jchaa tsa nda tiyokoaa xi makjainná kʼoa jebi koasenkaoná nga tsín tichʼaosʼin si̱kjaʼaitsjenñá xi tʼatsaan.

8, 9. 1) Jósʼin tíjna je ʼndíchjoónkʼan xi tsabe Jesús. 2) Jókisʼe tsokʼoa kon je ʼndíchjoónkʼan jebi.

⁸ Kʼianga tíjna Jesús ya yo̱ngo̱ Jerusalén jngo ʼndíchjoónkʼan tsabe. Je choa̱le chjoón jebi koasenkaoná nga tsjoa sʼe̱ tokoán tsandalani likui kʼoakji bitjosonná jokji mená kʼoasʼiaan tsakai (tʼexkiai Lucas 21:1-4). Jósʼin tíjna je ʼndíchjoónkʼan jebi. Kjoaba tíjnajin nga̱ jekʼien xʼinle kʼoa kjoañʼai tífaʼá  xi totʼatsʼe xi nyatítjonle relijión nga kui nichxin, nga̱ ʼndele nga koasenkao tosa je “fayontjai ndʼiale yánchjín xi kʼen xʼinle” (Luc. 20:47). Je chjoón jebi nʼio ma̱ tísíjchá yaole kʼoa je tao̱n xi kisikʼatsaoya ya kaxa̱ xi tjío ya yo̱ngo̱, tongotjo koaisíxá jngo chjota kʼianga so̱kole.

⁹ Tikjaʼaitsjenlai jókisʼe kon je ʼndíchjoónkʼan jebi kʼianga kicho ya nditsinle yo̱ngo̱ kʼoa nga to jao tao̱n yʼa xi nʼio choa chjíle. A kui kisikjaʼaitsjen nga nʼio tosʼa choa chjíle tao̱n xi yʼa kʼoa nga ngisa tse kisikʼatsaoya ya kaxa̱ nga sʼa tíjnakon je xʼinle. A soa koanle nga ngisa tse tao̱n tjíosíkʼatsaoya xi ngikʼa. A kʼoasʼin kisikjaʼaitsjen nga toxitsjoa nga to jao tao̱n sikʼatsaoya. Tsanda kʼoalanisʼin kisikjaʼaitsjen, tojo kisikʼatsaoya ya kaxa̱ je tao̱n xi yʼa. Nga kʼoakisʼin jokji kicho nganʼiole kitsjoanganʼio xi tʼatsʼe xále Niná.

10. Jósʼin tsakakó Jesús nga nʼio chjíle ngixko̱n Jeobá je ʼndíchjoónkʼan jebi.

¹⁰ Je Jesús kʼoakitso nga je ʼndíchjoónkʼan jebi nʼio chjíle ngixko̱n Jeobá kʼoa kao jotjín tao̱n kisikʼatsaoya ya kaxa̱. Kitso: “Ngisa tse tsakinyá kaoni tsa ngatsʼi [chjotanyiná]”. Je tao̱n xi kitsjoa toyajin kitsʼójinle je tao̱n xi kitsjoa chjota xi ngikʼa. Tonga Jesús jé ʼndíchjoónkʼan jebi xi kuenta kisʼin. Je chjota xi tsakʼéxkó tao̱n likʼiajin koanchoyale jokji tsabechjí Jeobá tao̱n jebi. Je xi ngisa chjíle kui josʼin kisikjaʼaitsjen Jeobá, ali tsakuijin josʼin kisikjaʼaitsjen chjota kʼoa josʼin kisikjaʼaitsjen ʼndíchjoónkʼan jebi xi titʼatsʼeni. Jósʼin basenkaoná choa̱ jebi nga ʼyaa tsa nda tiyokoaa xi makjainná.

11. Jméni xi bakóyaná je choa̱le je ʼndíchjoónkʼan.

¹¹ Tojosísʼin tiʼyaa sakʼoaa tochoa bichó nganʼioná nga nixálee Jeobá. Tobʼelañá, tjíokʼa ndsʼee xi jenʼio jchínga kʼoa tsa chʼin tjíokao kʼoa jetochoa ora tsoyason. Xíngiaa jebi, a tjínnele kʼoasʼin sikjaʼaitsjen nga tosa tsín sikʼasʼen jotjín ora síxá. Kʼoa ningalani tsínkui kjoa tibitjatojiaan ñá, tsakui nichxin sakʼoa kʼoabixoán nga nʼio tochoa ora ʼmiyasoán tsakui si̱ngósonkoaa  jotjín ora tsoyason nga xki̱ nó je naxinandále Niná. Tonga je choa̱le ʼndíchjoónkʼan xi jekanikʼaxkiaa, bakóná nga je Jeobá nʼio bechjí nga nixálee jokji bichó nganʼioná kʼoa ngisa tsa kjoa tibitjatojinkaoñá. Tikjaʼaitsjenlai jokji kinixálai Niná nó xi jaʼato. A faʼaitsjenli tsa ñandia nga tiʼmiyasuin kichʼasjesai nganʼio kʼoa ijngo ora tsakʼinyasonsai. Je Jeobá nʼio tsabechjí je ora jebi. Kʼianga bʼenelai yaoli nga nixálai Jeobá jokji bichó nganʼioli, tojo kisʼin je ʼndíchjoónkʼan, tibakoní nga nda tíjna kjoamakjainli.

12-14. 1) Jókisʼe kon je Elías. 2) Ánni tsokʼoa nga kʼoakisʼesíni kon.

¹² Je profeta Elías kixi kitʼale Jeobá kʼoa nʼio taja kisʼejna kjoamakjainle. Tonga ñandia nga nʼio kisikʼajen kon kʼoa kʼoakitsole Niná nga tosa katafaʼáxinle kjoabijnachonle. Kitsole: “Jekichobena. Ji Jeobá tosa chja̱ʼaxinnái je kjoabijnachonna” (1 Rey. 19:4). Tsa ʼyani xi tsín kʼoasikji kjoanikjaojin tífaʼatojin tochale kʼoakuitso nga tokitso tomani je Elías (Job 6:3). Tonga tse kjoanikjaojin jaʼatojin kjoaixi. Je Jeobá alikui koanjtile nga kʼoakitso Elías nga mele kuiyá, tosa kitsjoanganʼiole.

¹³ Ánni nga kʼoasikji kisikʼajensíni kon je Elías. Nga kjesa kʼoasʼejin kon je Elías, jngo kjoaxkón tsakʼéjna xi tsakakó nga tojé Jeobá je xi ñaki Niná kjoaixi kʼoa ño siento basen profetale Baal kinikʼien (1 Rey. 18:37-40). Tsakui nichxin kʼoasʼin kisikjaʼaitsjen nga je Jeobá skoe̱xkón ijngokʼa ngatsʼi chjota israelita, tonga alikui kʼoakoan. Je reina xi nʼio tsʼen koan, xi Jezabel tsakʼin, jngo chjota kisikasén jña tíjna Elías nga kʼoakatatsole nga mele sikʼien. Je Elías kitsokjon, tsakangaa kʼoa yaa jaʼatojin ya Judá nga ki ya ʼndekixí, jngo ʼnde xi nʼio xkón chon (1 Rey. 19:2-4).

¹⁴ Kʼianga tojé tíjna Elías kʼoasʼin kisikjaʼaitsjen nga toxitsjoani jmeni xi kisʼin. I kitsole Jeobá: “Likui tsa ngisa chjína an tikʼoajinni je chjotajchíngana xi kjoatse tsakatio”. Tokʼoasʼin tsabekon yaole joni tsa nindale kʼoa tsa to chaole je chjotajchíngale xi jekjoatse kʼien. Tijé chʼaosʼin kisikjaʼaitsjenni xi tʼatsʼe yaole kʼoa kʼoasʼin kisikjaʼaitsjen nga ñaki toxitsjoa, kʼoa nga tsín jme chjíle ngixko̱n Jeobá kʼoa ngixko̱n chjota.

15. Jósʼin tsakakóle Jeobá je Elías nga tojo nʼio chjí bekon.

¹⁵ Tonga je Niná alikui kʼoasʼin kisikjaʼaitsjen xi tʼatsʼe Elías, nʼio chjí tsabekon. Jósʼin tsakakóle nga nʼio chjí tsabekon. Jngo ánkje kisikasén xi kitsjoanganʼiole Elías. Kʼoati kitsjoale xi kiskine kʼoa xi tsakʼi nga kichokjoale je xi ñachan nichxin tsakʼamje saʼnda nga kicho ya nindo Horeb. Kʼianga kʼoasʼin kisikjaʼaitsjen Elías nga nijngojin chjota israelita xi kixi tífitʼale Niná, je Jeobá ngasin nganda kʼoakitsole nga tjíosa xi kjaʼaí xi kixi tjíofitʼale. Xi ijngosani, kjaʼaí xá kitsjoasale Niná. Nʼio kitjonganʼiole je Elías nga kʼoasʼin tsakasenkao Jeobá kʼoa ijngokʼa kisitjoson je xále nga profeta koan (1 Rey. 19:5-8, 15-19).

16. Jósʼin tíbasenkaoli Jeobá nga tíkali jme xi tibitjatojin.

¹⁶ Je choa̱le Elías koasenkaoli nga jchai tsa nda tíjna kjoamakjainli kʼoa nga tsjoa kʼoái tokuin. Koaan si̱kjaʼaitsjain josʼin tíbasenkaoli Jeobá nga tíkali jme kjoa xi tibitjatojin. A faʼaitsjenli tsa jngo ndsʼee jekitsjoanganʼioli kʼoa tsa jngo xi chjotajchínga sʼin tíjna (Gál. 6:2). A tjonganʼioli kʼianga bʼexkiai Biblia kʼoa tsakui je xo̱n xi kjioná kʼoa tsakʼia nga ʼmi kjoajtínná. Kʼianga jchai josʼin tíbasenkaoli jebi, tikjaʼaitsjain nga tʼatsʼe Jeobá tínroani kʼoa tʼetsʼoalai nga tʼailai kjoanda (Sal. 121:1, 2).

17. Jméni xi chjí bekon Jeobá xi tʼatsaan.

¹⁷ Kʼoati tikjaʼaitsjain nga sakʼoaa likui kʼoatjín josʼin nikjaʼaitsjeen xi titʼatsaanñá. Je xi ngisa chjíle kui josʼin síkjaʼaitsjen je Jeobá xi tʼatsaan (tʼexkiai Romanos 14:4). Je  Jeobá kuinga chjí bekonniná nga ʼyaxkoán kʼoa nga kixi mangíntʼalee, ali tsakuijin jmeni xi jetibichotjenngiaa i̱ jinnaxinandále. Kʼoa tojo koan je Elías nga tsín koanjinle nga nʼioni tse jmeni xi kisʼin xi tʼatsʼe Jeobá, tsakui nichxin kʼoati koaan tsanda ñá. Tochale jesa tsakʼainganʼio kʼalai ndsʼee ya jinjtín kʼoa likui tjínjinli, kʼoa tsamaije̱ tjíokʼa chjota xi jekinrʼoé énle Niná nga tsakʼinyasuin.

18. Jméni xi bakó je xá xi tsjoáná Jeobá.

¹⁸ Kʼoati tikjaʼaitsjain nga je xá xi tsjoáli Jeobá kui bakó nga ya tje̱n tíjnakaoli (Jer. 20:11). Tojo koan je Elías, tsakui nichxin si̱kʼajeen tokoán nga tsín jme xi tíbichómani jmeni xi tinʼia, kʼoa tsakuije̱ nga kʼoasʼin si̱kjaʼaitsjeen nga tsínkʼia kuichotjenngiaa je xá xi mená xi tʼatsʼe Niná. Tonga ñá jngo xá tjínná xi ngisa chjíle tikʼoajinni tojmeni, nga ʼmiyasoán je énnda chjotse kʼoa kao nga jaʼaínle Niná kichʼá. Kuinga machjénsíni nga kixi kjuintʼalee Jeobá. Kʼiatsa kʼoasʼiaan, kʼoati kʼuínná jokitso Jesús kʼianga tsakʼéjna jngo choa̱: “Titjásʼenjin kjoatsjoale naili” (Mat. 25:23).

19. Jókisʼe kon je xi kiski kapítulo 102 xi tsʼe Salmo.

¹⁹ Je xi kiski kapítulo 102 xi tsʼe Salmo alikui titsabeni jokisʼin. Nʼio tse kjoaʼaon tsakʼejnajin, tochale tsa kjoañʼai jaʼá kʼoa tsa to kjoafaʼaitsjenle xi kʼoakisʼe. Likui tikisʼenile nganʼio nga kichokjoale kjoa xi jaʼatojin (Sal. 102, én xi tjítʼa jña fitsʼiani kapítulo). Je én xi kiski kui bakó nga ñaki tokui kisikjaʼaitsjen kjoaʼaon xi tíjnajin kʼoa nga toje tíjna (Sal. 102:3, 4, 6, 11). Kʼoasʼin kisikjaʼaitsjen nga jetítsjionkon je Jeobá (Sal. 102:10).

20. Jósʼin koasenkaoná tsa kʼoétsʼoaa nga tsín tichʼaosʼin si̱kjaʼaitsjenñá xi titʼatsaanñá.

²⁰ Tonga je salmista koan kisixále Jeobá ningalani kui kjoa jaʼatojin (tʼexkiai Salmo 102:19-21). * Tojo tso je Salmo 102, saʼnda je xi nda tjíokao kjoamakjainle kʼoati sakʼoa toxkia tse kjoanikjaojin sʼele kʼoa lijmesa xi tisíkjaʼaitsjenni. Je salmista i kitso: “Kʼoasʼin mangósoan joni tsa jngo nise xi toje tíjna ya sonndʼia”. To kjoanikjaojin tsakʼejnajin ʼndeʼnde (Sal. 102:7). Kʼiatsa sakʼoa kʼoasʼe tokuin tsanda ji, tʼeyanajmílai Jeobá jotjín ni̱ma̱li jokisʼin tsa je salmista. Je kjoabʼetsʼoa xi tsakʼéjna je salmista xi kjoaʼaon tsakʼejnajin, kʼoa kao kjoabʼetsʼoa xi kʼoéjnai ji, kui xi koasenkaoli nga tsín tichʼaosʼin si̱kjaʼaitsjenni xi titʼatsini. Je Jeobá kʼoatso nga “kjuinrʼoéle je kjoabʼetsʼoale chjota xi nʼio ma̱ tjío” kʼoa nga tsín “kʼoasjengi je kjoabʼetsʼoale” (Sal. 102:17). Tʼejngui tokuin nga kʼoasʼin je Jeobá.

21. Jósʼiaan nga tsjoasa katasʼe tokoán.

²¹ Salmo 102 kʼoati tsoyaná josʼiaan nga tsjoasa kʼoé tokoán. Kʼianga tsjoasa kisʼe kon je salmista kui kisikjaʼaitsjen josʼin tíjna ngixko̱n Jeobá (Sal. 102:12, 27). Xi kitsjoanganʼiole kuinga koanchoyale nga koasenkao Jeobá je naxinandále kʼiatsa kjoa kjoaʼatojin. Tʼetsʼoalai je Jeobá kʼiatsa tsín nda nikjaʼaitsjain xi titʼatsini kʼoa tsakui xotísíkaoli nga tsín kʼoakji tinixánilai josʼin meli. Kʼoatʼinlai nga katanrʼoéli, tonga ali tsa tokuijin nga nda sʼe̱ tokuin, kuinga chʼa̱sjengʼai je jaʼaínle (Sal. 102:20, 21).

22. Jósʼin koa̱n tsjoa kʼoé kon Jeobá.

²² Tojosísʼin kaʼyaa koaan si̱chjén je Biblia nga jchaa tsa nda tiyokoaa xi makjainná kʼoa nga chjí bekonná Jeobá. Kjoaixi kʼianga je nichxin xi tiyoaa ndʼaibi alikui ñaki tjoxinná nga sakʼoa chʼaosʼin nikjaʼaitsjeen xi titʼatsaanñá kʼoa nga nikʼajenlee tokoán. Tonga ngatsʼiñá nga koa̱n tsjoa kʼoé kon Jeobá kʼoa koaan kuitjo̱ntjé kʼiatsa tosi tonda si̱tjosoán je xá xi títsjoáná (Mat. 24:13).