XI NGISA TÍNCHJA̱NI REBISTA JEBI
A machjén nga kʼoétsʼoaa
Je Jesús kʼoakitso kʼianga be Niná jmeni xi machjénná tiʼani nga kjesa nijéjinlee (Mateo 6:8). Kʼoa je David, xi rey tsakʼejna ya naxinandá Israel i kitso: “Saʼnda kje tíjnaʼajin én ya ndsoʼba, kʼoa ji Jeobá, jeʼyai jmeni xi xián” (Salmo 139:4). Kʼianga kʼoatso én jebi, tsakui nichxin i̱sí: “Kʼiatsa jebe ngayeje Niná, saʼnda be kjoafaʼaitsjenna kʼoa jmeni xi machjénna, ánni nga tjínnesínile nga kʼoetsʼoa”. Kʼianga jchaa xi tʼatsʼe jebi, kuikjoanla títjon kataʼyaa jmeni xi tso je Biblia xi tʼatsʼe kjoabʼetsʼoa. *
“Tichriantʼalao Niná, kʼia kʼoati je sichriantʼano nga jon.” (Santiago 4:8)
KʼIANGA BʼETSʼOAA MACHRIANTʼASALEE JE NINÁ
Ninga kʼoatso je Biblia nga jebe Jeobá * ngayeje, kʼoati tso nga kui xi mele nga nʼio nda skoe̱ nga jngó jngó je choʼndale (Salmo 139:6; Romanos 11:33). Je kjoafaʼaitsjenle alikui mangóson joni tsa jngo computadora, xi to jngo jao én batíotjao. Je Niná saʼnda mandosinle jotjío je ni̱ma̱ná, kui xi mele nga ñaki miyole koaan (Salmo 139:23, 24; Santiago 4:8). Kuinga kʼoatsosíniná je Jesús nga kʼoétsʼoalee je Jeobá ninga jebe jmeni xi machjénná (Mateo 6:6-8). Kʼiatsa ntsjaintsjai kʼoakʼuínlee je Niná jotjín tokoán ngisa nʼio koa̱nmiyosaa.
Tsakui nichxin saʼnda tsín ʼyaa jokʼuínlee je Niná nga kʼoétsʼoalee. Tonga je bení jmeni xi mená kʼuínlee nga̱ nʼio nda be jmeni xi tibitjatojiaan kʼoa koaanle koasenkaoná (Romanos 8:26, 27; Efesios 3:20). Kʼoa kʼianga ʼyaa nga tíbasenkaoná je Niná ngisa machriantʼasalee.
A NRʼOÉLE NINÁ NGATSʼI CHJOTA KʼIANGA BʼÉTSʼOALE
Je Biblia kʼoatso nga nrʼoéle Niná je choʼndale xi kixi tjíofitʼale. Tonga kʼoati tso anni nga tsín nrʼoé sakʼoasíni je kjoabʼetsʼoa. Tobʼelañá, kʼianga nʼio kisʼe kjoatsʼen ya naxinandá Israel, je Niná kʼoakitsole je profeta Isaías nga i̱ katatsole je chjota israelita: “Ninga nʼio nkjín kʼa kʼoétsʼoao, alikui kjuinrʼoeno; nga̱ tomakji njín tibʼejtaon” (Isaías 1:15). Tojo tso testo jebi, je xi bʼasjengi kjoatéxomale Niná kʼoa xi kui síjé xi tsín kixi tíjna alikui kjuinrʼoéle (Proverbios 28:9; Santiago 4:3).
Tonga kʼoati i̱ tso je Biblia: “Tsa nijé tojmeni kjoa josʼin mele nga je, je nrʼoéná” (1 Juan 5:14). A kui xi tsonile jebi nga tsjoále Niná tojmeni xi síjé je choʼndale. Mai. Tobʼelañá, je pastro Pablo jan kʼa kʼoakitsole Niná nga katafaʼáxin ya jinyaole je “naʼyá” xi tísíkjaʼákon (2 Corintios 12:7, 8). Tsakui nichxin tsín tinanda koantsennile kʼoa kui xokitsole. Nʼiojin tsʼe koanle Pablo nga tsín koanle tije kisindayani yaole, nga̱ koanle kisindaya chjota kʼoa saʼnda jngo chjota kisikjaʼáyale (Hechos 19:11, 12; 20:9, 10). Ninga tsín kʼoakisʼin Niná jmeni xi kisijéle je Pablo, tsjoa kisʼele josʼin tsakasenkao je Niná (2 Corintios 12:9, 10).
“Kʼoasʼin nʼiotʼatakoán ndʼai ngixko̱n nga je. Tsa nijé tojmeni kjoa josʼin mele nga je, je nrʼoéná.” (1 Juan 5:14)
Kjoaixiní nga tsakatio kʼa chjota, xi síkʼaxki̱ ya Biblia, xi kʼoakoan jmeni xi kisijé (2 Reyes 20:1-7). Tonga nʼio tosakʼoa nga kʼoakoan. Tjínkʼa je choʼndale Niná xi kʼoasʼin kisikjaʼaitsjen nga tsín tínrʼoé Niná je kjoabʼetsʼoale, kʼoa ba koanle. Tobʼelañá, je rey David i kitso: “Kʼiá saʼndani ji Jeobá, nga kʼoasʼin si̱chajinnái. A ngantsjainí” (Salmo 13:1). Tonga kʼianga jetsabe je David jokji nkjín kʼa tsakasenkao je Jeobá ngisa kisinʼiotʼasa. Kʼoa saʼnda i kitsole nga jekoanni: “Kui tisinʼiotʼa je kjoandali kao kjoatsjoachali” (Salmo 13:5). Tojo koan je David, tsakui nichxin kʼoati nkjín kʼa kʼoetsʼoa je choʼndale Niná xi tjío ndʼaibi nga skoe̱ josʼin títsjoále Niná jme xi síjéle (Romanos 12:12).
JÓSʼIN TSJOÁNÁ NINÁ JMENI XI NIJÉLEE
Kui tsjoáná jmeni xi ñaki machjénná.
Ninga tsjoake je ʼndíxtile jngo nʼai alikui xi tsonile tsa kuikjoan tsjoále jmeni xi síjéle kʼoa tsa kʼiakjoan tsjoále kʼiani nga síjé. Kʼoakjoánti sʼín je Niná, sakʼoaa tsínkjoan kʼoasʼin tsjoáná jmeni xi nijélee josʼin mená kʼoa kʼiani nga mená. Ninga kʼoalani, je Jeobá jngoní Nʼai xi nʼio tsjoake je ʼndíxtile kʼoa tsjoále jmeni xi machjénle, kʼoa kʼiakjoán tsjoále kʼiani nga machjénle (Lucas 11:11-13).
Je Niná kʼoati síchjén je Biblia nga basenkaoná
Sakʼoaa tsín ʼyaa josʼin tsjoáná jmeni xi nijélee.
Kʼoa tsa jngo kjoa tjínná kʼoa kui xá tibʼetsʼoañá nga katasʼendajin, kʼoa tsín kʼoakjima jme xi kanijé, a koaan kʼoasʼin si̱kjaʼaitsjeen nga tsín tínrʼoéná je Niná. Mai. Tjínnele si̱kjaʼaitsjenjiaan tsakuini nichxin tsín tiʼyaa josʼin títsjoáná jmeni xi kanijélee. Tsakuini nichxin jngo xi miyoná mani kitsjoaná nganʼio kʼianga koanchjénná (Proverbios 17:17). Tsakui nichxin jéni Jeobá tsakʼéxále nga tsakasenkaoná miyo jebi. Je Niná kʼoati síchjén je Biblia nga basenkaoná. Tsakui nichxin ya kisokoná kjoachjine josʼin kitjatojiaan jngo kjoa (2 Timoteo 3:16, 17).
Je Niná sakʼoaa je síchjén je miyoná kʼianga tsjoáná kjoanʼiojin kʼiani nga machjénná
ʼNdele nga kʼoendajin Niná ngayeje kjoa xi tjínle je choʼndale, sakʼoaa to tsjoánganʼiole nga katachókjoakaole (2 Corintios 4:7). Ñandia kʼianga je Jesús kui kisijéle je Nʼaile nga katafaʼáxinle kjoa xi tífaʼatojin nga̱ tsín mele nga chʼaosʼin kuitjo jaʼaínle Nʼaile. Je Niná kinrʼoéle je Jesús kʼoa jngo ánkje kisikasén xi kitsjoanganʼiole (Lucas 22:42, 43). Kʼoati koa̱nle sʼin je Niná ndʼaibi, koaan je sichjén kʼa je miyoná kʼianga tsjoáná kjoanʼiojin kʼiakjoanni nga machjénná (Proverbios 12:25). Kʼianga kʼoasʼín je Niná sakʼoaa tsín ʼyaa. Kuinga machjénsíni nga si̱kjaʼaitsjeen tsa kʼoanisʼin tíbasenkaoná.
Sakʼoaa machjén nga chóyala saʼnda nga tsjoáná jmeni xi kanijélee.
Ya Biblia kʼoatso nga nrʼoéle je Niná je xi tjínle kjoanangitokon, kʼoa nga kʼia tsjoále jmeni xi kasíjé kʼiani nga bele kon (1 Pedro 5:6). Kʼiatsa tsín xátí kʼoakjima jmeni xi kanijélee je Niná, alikui koa̱n kʼoasʼin si̱kjaʼaitsjeen nga tsín mandosinle Niná xi tʼatsaan. Tosa kui si̱kjaʼaitsjeen jokji ngʼa tíjna je Niná kʼoa nga be jmeni xi koasenkaoná, jé xi ngisa nʼio nda be jmeni xi kanijélee.
“Soma̱tʼangilao ntsja Niná xi tjínle nganʼio, jméni nga je sikinngʼasínino kʼia nga kuicho nichxinbe.” (1 Pedro 5:6)
Tobʼelañá, tsa jngola tiʼndí tíjnali kʼoa tsa jngo bicicleta sijéli, a tokjoan kuindálai. Kʼiatsa ʼyai nga kje koa̱njinle kʼoéjnason, tsakui nichxin tsín tokjoán kuindálai. Tsakui nichxin chóyakaolai kʼoa kʼia kuindálai saʼnda nga jeʼyai nga koa̱nle kʼoéjnasonle. Kʼoakjoánti sʼin mangóson xi kao Niná. Kʼiatsa ñaki kʼoatjín ni̱ma̱ná jmeni xi tinijélee kʼoa kjitʼa kʼoétsʼoalee, tochale kʼia tsjoáná kʼiakjoanni machjénná jmeni xi tinijélee (Salmo 37:4).
JE JEOBÁ NRʼOÉLI
Ya Biblia kʼoasʼin tsjoánganʼiole je xi chjotale Cristo ma nga tsín jao kʼoe kon jokji nganʼio tjínle je kjoabʼetsʼoa. Tsakui nichxin i̱sí: “Ngotjo nokjoañá xi to én tonga ñʼai tíjna nga kʼoanʼia”. Kʼiatsa jekjoatse jngo kjoa tijnajiaan kʼoa tsa totaon tíʼyaná, tsakui nichxin ñʼai koa̱nná nga chóyaa saʼnda nga kʼoendajin je Niná. Ninga kʼoalani, si̱kjaʼaitsjenjiaan jmeni xi kitso je Jesús kʼianga kjitʼa kʼoétsʼoaa.
Je Jesús jngo choa̱ tsakʼéjnachoya xi tʼatsʼe jngo chjoónkʼan xi ma̱ tíjna. Chjoónkʼan jebi ngotjo ngosá kʼoafitsonile jngo jues xi tsʼen nga katabasenkao (Lucas 18:1-3). Ninga koankaile nga títjon jues jebi, tochan i̱ kitsole yaole: “Kʼoasjentjai[ña], jméni nga tsín tsa tikjoaʼaí kinyásinina” (Lucas 18:4, 5). Kʼianga én griego je én xi “tikjoaʼaí kinyásinina” sʼin jaʼatoya ibi nga to xki̱ én i tsonile: “nga bʼéngi xko̱n tsa ʼyani”, kʼoa kui xi tsonile “nga chʼaosʼin nikʼéjna tsa ʼyani”. * Kʼiatsa jngo jues xi tsʼen tsakasenkao chjoónkʼan jebi, a tsí tongisa koasenkao je Niná ʼyani “xi nʼio nchja̱le nichxin kao nitje̱n”, tojo kitso Jesús, “nʼio xítí kʼoendajinle” (Lucas 18:6-8).
“Tijáo, kʼoa kʼoaino.” (Lucas 11:9)
Ninga sakʼoa kuijtajinná nga kʼoatiʼmilee je Niná nga katabasenkaoná, alikui koa̱n si̱kinroajeen tokoán. Kʼiatsa kʼoétsʼoaa kjitʼa kjitʼalee, kʼoasʼin koakoñá nga kʼoakatasʼín jmeni xi tinijélee. Kʼoa kʼoasʼin jchañá nga tsjoáná Niná jmeni xi tinijélee kʼoa ngisa koa̱nchriantʼasalee. Kʼiatsa kʼoasʼin kʼoétsʼoalee je Jeobá josʼin nga mele kʼoa ñaki koa̱nkjainná nga kjuinrʼoéná, alikui jao tjínná nga tsjoáná jmeni xi tinijélee (Lucas 11:9).
^ párr. 3 Kʼiatsa mená nga kjuinrʼoéná je Niná, machjénní nga kʼoénelee yaoná nga si̱tjosoán jmeni xi síjéná. Kʼiatsa kʼoasʼiaan, tsakui nichxin ñaki jchaa josʼin kuitjoson jmeni xi kanijélee je Niná, tojosʼin koakoyaná i̱ kjoaʼmiya jebi. Kʼiatsa mesali jchai xi tʼatsʼe jebi, tʼexkiai je libro xi Jmé kjoanni xi bakóya je Biblia ʼmi, ya kjoaʼmiya xjaʼaonjao. Jé testigole Jeobá bʼasje libro jebi.
^ párr. 5 Ya Biblia kʼoatso nga Jeobá ʼmi jaʼaínle Niná.
^ párr. 22 Nichxin kjoatse, je Niná kui xi koanmele kʼianga je xi jues tjío ya naxinandá Israel nga nda sisinle je ʼndíyánchjínkʼan kʼoa kao ʼndíxtijchʼa̱n (Deuteronomio 1:16, 17; 24:17; Salmo 68:5).
Tsa kʼoati meli jchai xi tʼatsʼe jebi
XI MACHJÉN NGA JCHAA
A nrʼoéle Niná ngatsʼi chjota kʼianga bʼétsʼoa
A nrʼoé Niná tsa to yaole tífini chjota jmeni xi tísíjé. Kʼoa a nrʼoéle jngo chjota xi totaon be chjoónle kʼoa xijema bʼétsʼoale Niná.
