A bʼetsʼoaní ji ngantsjai. Nʼio nkjín chjota xi kʼoasʼín. Saʼnda tjínkʼa chjota xi bʼétsʼoa ninga tsín makjainle tʼatsʼe Niná. Ánni nga bʼétsʼoasíni je chjota. Kʼianga kichjonangile chjota xi ya Francia tsʼe, basenla xi kʼoakitso nga tokui kʼoasʼínni nga “nda satío kon”. Kʼoa tjíosa kʼa je chjota xi ya Europa tsʼe xi tsín tokui nga bʼétsʼoani nga Niná fákaonajmí, kʼoati kui kʼoasʼínni nga nda satío kon. Kʼoa kʼoati tjín chjota xi makjainle tʼatsʼe Niná, tonga tokʼiaa bʼétsʼoale kʼianga kjoa tjínle, kʼoa kui xi mele nga sasa katabitjosonni jmeni xi síjé (Isaías 26:16).

Kʼoa ji, a bʼetsʼoaní. Jósi ngái ji, kʼianga bʼetsʼoaa a kuinga to kjoafaʼaitsjenná nikʼéjnandaa. Kʼiatsa makjainli xi tʼatsʼe Niná, a bitjoson jmeni xi ʼmilai, axo tsínkʼia kʼoama. Jmeni xi bakóya Biblia koasenkaoli nga koa̱njinli nga tsín tsakui xá bʼetsʼoañá nga nda sʼe̱ tokoán, kuiní nga koa̱n si̱chriantʼalee je Niná.