Antonio: ʼNdali Luis. Jótondani nga tijnai.

Luis: ʼNdali, tijnalangá.

Antonio: Kui jaʼaikaole je Xo̱n xi Bájinkonná kʼoa kao ¡Despertad! xi sʼa kitjo. Nʼiojin koa̱nndosinli jmeni xi nroatʼa.

Luis: Niná xi katʼéchjíli. Jótonda nga kafaʼaichonnái, tjín xi skonangile.

Antonio: Ye, kʼoatʼinnái.

Luis: Ñandia kʼianga tifakaonajmía jngo xi ñatje̱n nixáijin kʼoakixinle nga nʼio nda tjío je rebistano. Tonga je kʼoakitsona nga tsínxó nda tisʼian nga kui tibʼexkia, nga̱ jon xi testigole Jeobá mao tsínxó makjainno xi tʼatsʼe Jesús. Kʼoa kʼoakixinle nga ji skonangile tsa kjoaixi. A kjoaixi nga tsín makjainno xi tʼatsʼe Jesús.

Antonio: Nʼio nda tinʼiai nga tichjonanginái. Kʼianga jchaa josʼin makjainle jngo chjota ngisajin nda nga jesoa chjónangilee, a tsí jaon.

Luis: Jaonjin.

Antonio: Jin xi testigole Jeobá maijin, makjainnajin xi tʼatsʼe Jesús. Kʼoasʼin makjainnajin nga tsín kuitjo̱ntjé tsa tsínná kjoamakjain xi tʼatsʼe.

Luis: Ngo̱ kʼoatixian tsanda an nga makjainno xi tʼatsʼe Jesús, tonga je chjota xi ñatje̱n nixáijin kjaʼaí kitsona, kuinga tikjonangisínile. Kʼoa nga̱ kjelangá sakui chobayajinñá.

Antonio: Matsjoana nga koako kʼale bersíkulole Biblia jñani kʼoatso anni nga nʼio chjísínile nga katamakjainná xi tʼatsʼe Jesús. Kʼoa kui je testo xi nʼio nichjainjin nga ʼmiyalaijin chjota.

Luis: Ndajin.

Antonio: Kuila títjon kʼoéxkiaa je én xi kitsole Jesús jngo xi pastrole koan. Yaa faʼaitʼa ya Juan 14:6, itso: “An nía xi ndiaa, an nía xi kjoakixi, an nía xi kjoabijnachon. Nitoʼyajin xi faʼaikonle Nʼainá, tsa tsian nga an”. Tojo tso bersíkulo jebi, jólasʼin nga koa̱n koa̱nchriantʼanilee je Niná.

Luis: Tokʼiala tsa koa̱nkjainná xi tʼatsʼe Jesús.

Antonio: Jaon, kʼoatjín. Kʼoa kʼoasʼin makjainnajin xi testigole Jeobá maijin. Tojosʼin majinli jmeni xi tso je Biblia, ʼyá kao tsʼe jaʼaín kʼoétsʼoañá, jósí ngái ji.

Luis: Kaojin jaʼaínle Jesús.

Antonio: Kʼoatjín, kʼoa kʼianga bʼetsʼoa kao jaʼaínle Jesús bʼetsʼoaña. Kʼoa kʼoasʼín ngatsʼi je xi testigole Jeobá ma.

Luis: A jaon.

Antonio: Jaon, kuila kʼoéxkiaa ndʼaibi jmeni xi tso Juan 3:16. Bersíkulo jebi tojngo jao kjoan én síchjén nga kʼoatso jme xi kisʼin  Jesús i̱ Sonʼnde kʼoa jme xi kitsoyason. Nʼio chjíle én jebi. A koaan kʼoéxkiai.

Luis: Koa̱njin. “Nga̱ Niná kʼoasʼin koantsjoake sonʼnde nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai.”

Antonio: A jesa tsakʼexkiai testo jebi.

Luis: Mai, tonga jelasí sa kinrʼoe nga koanxkia ya yo̱ngo̱.

Antonio: Nʼio ʼyale testo jebi. Tonga ndala chótʼayajiaan. Je Jesús kʼoakitso nga nʼio tsjoakená je Niná kʼoa kuinga menile tsjoáná kjoabijnachon ngantsjai. Tonga jmé xi machjén nga sʼe̱ná.

Luis: Kjoamakjainjin.

Antonio: Kʼoatjín. Kuinga katamakjainná tʼatsʼe ʼNdíjngole Niná, je Jesucristo. Kʼoa nga tokʼia kʼoainá kjoabijnachon xi tsínkʼia fetʼa tsa koa̱nkjainná xi tʼatsʼe Jesús, yaa faʼaitʼa rebista xi katsjoale, je Xo̱n xi Bájinkonná, ya pájina 2. Yaa kʼoatso jme xá bitjoni rebista jebi kʼoa kʼoatso nga “kʼoati basenkaoná nga sʼená kjoamakjain xi tʼatsʼe Jesucristo, Rey xi jetíbatéxoma ya ngʼajmi, xi kitsjoantjai kjoabijnachonle nga koa̱n sʼe̱ná kjoabijnachon xi tsínkʼia fetʼa”.

Luis: Ngo̱ yangóni tjítʼa rebistano nga makjainno xi tʼatsʼe Jesús.

Antonio: Jaon.

Luis: Kʼoa ánni kʼoatsosíni je chjota nga tsín makjainno xi tʼatsʼe Jesús.

Antonio: Liʼyaa, tochale tokui makjainle jme xi tso je chjota. Kʼoa tsa maije̱ je chjota xi tsoyale ya yo̱ngo̱ xotsole.

Luis: A tsíkui tsokʼoa nga testigole Jeobá ʼmino, nga tsín testigole Jesús ʼmino.

Antonio: Tochale.

Luis: Kʼoa ánni nga kʼoasikji nikʼaxki̱síño je Jeobá.

Antonio: Kuinga Jeobá ʼmi je Niná kʼoa ʼyaníjin nga nʼio machjén nga si̱chjén jaʼaínle. Je Jesús kisichjén je jaʼaínle Niná. Kʼoéxkiala jokitsole je Nʼaile kʼianga tsakʼétsʼoale. A koaan kʼoéxkiai i̱ Juan 17:26 (TNM).

Luis: Koa̱njin, itso: “Tsakakoyale je jaʼaínli, kʼoa tosi tonda koakoyasa, ánni nga kʼoatisʼin tsjoake katamani xínkjín josʼin koantsjoachanái an kʼoa nga ya tojngo koatejnakoa”.

Antonio: A kaʼyaní nga tsakakóya Jesús je jaʼaínle Niná. Ánni nga kʼoakisʼinsíni.

Luis: Likui ʼyaa.

Antonio: Jngola bersíkulole Biblia kʼoéxkiaa jñani kʼoatsoná. Ya Hechos 2:21 (TNM), itso: “Kʼoa toʼyani xi sikʼaxki̱ je jaʼaínle Jeobá, kuitjontjainí”. Tojo tso ibi, kʼianga kuitjo̱ntjé tjínnele nga si̱chjén je jaʼaínle Niná. Kʼoa kuijin nga kisichjénni je Jesús.

Luis: An, kuila kʼoakisʼinni tsokʼoa.

Antonio: Jaon, kʼoa kuinga nʼio koanndosinnile nga katabe chjotale je jaʼaínle Nʼaile kʼoa nga katasíchjén. Nga̱ kui xi machjén nga kuitjontjai. Kʼoa kʼoati kuinga nʼio nokjoanijin tʼatsʼe Jeobá xi testigole Jeobá maijin. Je xi nʼio mandosinnajin kuinga katabe je chjota kʼoa nga katasíchjén je jaʼaínle Niná.

Luis: Tonga je chjota be ʼyani je Niná ninga tsín be joʼmi kʼoa ninga tsín síchjén je jaʼaínle.

Antonio: Jaonjin, tonga je Niná kui xá tsakakóniná je jaʼaínle kʼianga ngisa choa ñʼai koa̱nná nga si̱chriantʼalee.

 Luis: Alikui majinna.

Antonio: Tobʼelañá, me ʼyaa ngatsʼiaa nga tsakʼejna jngo chjota xi kisijaoya ndáchikon xi Ní ʼmi kʼoa xi tsakʼaile xi Te Kjoatéxoma, a tsí jaon. Kʼoati ʼyaa nga tsakʼejna jngo chjota xi jngo arca kisinda kʼoa tsakʼasjentjai je familiale kʼoa kao cho̱. Jókoa̱n tsa tsínlani ʼyaa joʼmi chjota jebi. Alikuijin koa̱nndosinná xi tʼatsʼe, a tsí mai. Saʼnda tsínjin koa̱nndosinná joʼmi je chjota xi ya ngʼajmi kinroani kʼoa i̱ Sonʼnde jaʼai nga kʼienntjai je jéená, a tsí mai.

Luis: Maijin.

Antonio: Tonga je Niná kʼoasʼin koanmele nga kataʼyaa jotsakʼin chjota jebi. Nga Moisés tsakʼin xi kisijaoya ndáchikon, nga Noé tsakʼin xi tsakʼénda je arca kʼoa nga Jesús tsakʼin xi tsakʼéchjíntjai je jéená. Kʼianga ʼyaa jaʼaínle ʼyañá nga ñaki tsakatio chjota jebi ninga tsín tsaʼyaxkoaan.

Luis: Kjelangá kʼoasʼin sikjaʼaitsjenjian tonga kʼoajintjín.

Antonio: Kuinga nichjénsínijin jaʼaínle Jeobá, jin xi testigole maijin. Kui xi menajin nga je Jeobá katasínʼiotʼa yaole je chjota, nga ñaki tsen katamale nga tíjna, joni tsa jngo miyo. Tonga kʼoati ʼyaijin nga nʼio machjén je Jesús kʼianga kuitjo̱ntjé. A koaan koako ijngole testole Biblia jñani kʼoatso.

Luis: Koa̱njin.

Antonio: Jená kabʼexkiaa Juan 14:6 jñani kʼoakitso je Jesús nga je ndiaa, nga je xi kjoakixi kʼoa nga je xi kjoabijnachon. Tonga ndʼaibi kuila kʼoéxkiaa Juan 14:1. A koaan kʼoéxkiai jñani fikjetʼani.

Luis: Koa̱njin, itso: “Makjainno xi tʼatsʼe Niná, kʼoati katamakjainno xi tʼatsʼan”.

Antonio: A kui xi tsonile bersíkulo jebi nga chja̱ʼajiaan ʼyá tʼatsʼeni xi koa̱nkjainná, tsa tʼatsʼe Jesús kʼoa tsa tʼatsʼe Jeobá.

Luis: Maijin. Kui xi kitso je Jesús nga katamakjainná tʼatsʼe nga jao.

Antonio: Kʼoatjín. Kʼoa kʼoajin tisʼin nikjaʼaitsjain ji nga tsín tsa tokui xi machjén nga tokʼoakuixoán nga tjínná kjoamakjain. Tjínnele nga koakoá kjoamakjainná.

Luis: Jaonjin.

Antonio: Kʼoa jósʼin koakoá nga tjínná kjoamakjain. Jósi tsa kjaʼaí nichxin cho̱bangáñá kʼoa kʼia kʼoaxínle. *

Luis: Ndajin.