1, 2. 1) Ánni nga nʼio chjísínile nga ndakjoanla si̱kjaʼaitsjeen jme xi chjónangilee je chjota. (Chótsenlai sén xi faʼaitʼa ibi.) 2) Ánni nga tsín koa̱n kuinókjonsíñá kʼiatsa jmeni xi ñʼai tjín chja̱kaoñá chjota.

 NICHXIN kjoan jngo jao nó ján, jngo tichjaa tsakjákaonajmí je xʼinle xi tʼatsʼe Biblia. Alikui testigole Jeobá ma je xʼinle nga kʼia. Yaa yo̱ngo̱ kisisin kʼoa ñandiaa kʼoakitso nga makjainle xi tʼatsʼe Trinidad. Je tichjaa bení nga tsín majinle je xʼinle jokjoansʼin tíjna xi tʼatsʼe Trinidad. Kuinga i̱ kitsosínile: “A kʼoasʼin makjainli nga Niná je Niná, nga Niná je Jesús kʼoa nga Niná je espíritu santo, nga Niná nga jan kʼoa nga tojngo mani”. Je xʼinle kitso: “Mai, alikui kʼoasʼin makjainna”. Kʼoasʼin tsakʼétsʼiakaoni tichjaa nga tsakjákaonajmí je xʼinle xi tʼatsʼe ʼyákjoanni je Niná.

² Jebi kui xi bakóyaná nga nʼio chjíle nga ndakjoanla nikjaʼaitsjeen jme xi chjonangilee je chjota kʼoa nga tsín toxkia kʼuínlee nga chja̱koaa. Kʼoati kui tsoyaná nga tsín koa̱n kuinókjonlee chjota kʼianga chja̱kaonajmíñá tʼatsʼe xi makjainle, jolani tsa tʼatsʼe Trinidad, tʼatsʼe ʼnde jña lʼí títi, kʼoa tʼatsʼe nga tíjna jngo Niná xi kisindaná. Kʼiatsa je Jeobá si̱nʼiotʼaa yaoná kʼoa kʼoakʼoé tokoán nga je bakóyaná, koaanná jokʼuínlee  je chjota, koa̱nkjainle kʼoa kuichojin ni̱ma̱le jme xi kʼuínlee (Col. 4:6). Kui chótʼayá i̱ kjoaʼmiya jebi josʼiaan nga nʼio nda kʼuínyalee je chjota. Xi títjon, chjónangilee ánni nga kʼoakuitsosíniná josʼin síkjaʼaitsjen. Xi majaoni, si̱jinlee jotso je Biblia, kʼoa xi majanni, jngo choa̱ kʼoéjnalee xi koasenkao nga ñaki nda katamajinle.

3, 4. Ánni nga nʼio chjísínile nga chjónangilee je chjota kʼianga jchaa josʼin síkjaʼaitsjen. Jngola choa̱ tʼejnai.

³ Kʼianga chjonangilee je chjota ʼyañá jmeni xi síkjaʼaitsjen. Ánni nga nʼio chjísínile nga kʼoanʼia. Proverbios 18:13 itso: “Kʼianga jngo chjota xi tokjoan nchja̱ nga tikje nrʼoéjinni jotjínni kjoa, to chjotachininí kʼoa nangi síkʼéjna yaole”. Kuinga ndatjínsíni nga títjon kjoanla kataʼyaa josʼin síkjaʼaitsjen je chjota xi tichjakoaa. Tsa mai, tokjoatjaojin kui chja̱kaonajmíñá jmeni xi tsínni makjainle (1 Cor. 9:26).

⁴ Tobʼelañá, tsa jngo chjota tichjakoaa xi kui makjainle nga tíjna jngo ʼnde jña lʼí títi, jókʼuínlee. Tjínkʼa xi kʼoasʼin makjainle nga ya nikjaʼá kjoañʼai je chjota xi tsʼen. Kʼoa tjínkʼa xi kjaʼaísʼin makjainle. Kuinga koa̱n i̱ kʼuínsínilee: “Je chjota nkjín koya josʼin makjainle tʼatsʼe ʼnde jña lʼí títi, jósʼin makjainli ji, jméni xoʼmi”. Kʼianga jekʼoakuitsoná, koaan kʼuínyalee jotso je Biblia xi tʼatsʼe jebi.

5. Jósʼin basenkaoná nga chjonangilee je chjota anni nga kʼoasʼin makjainsínile.

⁵ Kʼiatsa nda chósonnilee jme xi chjónangiaa jchañá ánni nga kʼoasʼin síkjaʼaitsjensíni je chjota. Tobʼelañá, kʼiatsa jngo chjota xi kʼoakuitsoná nga tsín makjainle tʼatsʼe Niná, jmé xi si̱kjaʼaitsjeen. Tochale tokjoan kʼoasʼin si̱kjaʼaitsjeen nga kuinga kʼoasʼin makjainnile nga kʼoatso je chjota nga to evolución jaʼaini ngayeje (Sal. 10:4). Tonga tjínkʼa chjota xi nʼio tse kjoañʼai tjíofaʼá kʼoa kuinga kʼoasʼin makjainnile nga tsín je Niná, kʼoa tsa maije̱ kui kʼoatsoni nga be jokji kjoañʼai tjíofaʼá je chjota. Kʼiatsa ʼya xi kʼoakuitsoná nga tsín makjainle tʼatsʼe Niná, koaan i̱ kʼuínlee: “A kʼoasʼin nikjaʼaitsjain saʼnda ngasʼa”. “Mai” tsa kuitso, koaan chjónangilee jméni xokisikao nga kʼoasʼin síkjaʼaitsjenni. Jmeni xi kuitsoná tikui koasenkaoniná nga jchaa jokʼuínlee (tʼexkiai Proverbios 20:5). *

6. Jméni xi sʼiaan kʼianga tjín xi kachjonangilee je chjota.

⁶ Kʼianga tjín xi kachjonangilee je chjota tjínnele nga nda kuinóʼyá jme xi kuitsoná kʼoa kuenta sʼiaan josʼin síkjaʼaitsjen. Tobʼelañá, tsa kʼoakuitsoná nga jngo kjoaxkón kisokole kʼoa kuinga kʼoasʼin síkjaʼaitsjenni nga tsín je Niná, jókʼuínlee. Ngisa nda nga kuikjoanla títjon kʼoakʼuínlee nga kʼoati chʼao maná nga kʼoakoantʼain kʼoa nga tsín chʼaotjín nga chjonangilee yaoná ánni nga kjoañʼai chjaʼasíñá, kʼoa xijekoa̱n, koaan kʼoakʼuínlee ánni nga kʼoabixónsíñá nga tíjna je Niná (Hab. 1:2, 3). Kʼiatsa tsejtaa kʼoa tsa majinná jomale tochale koa̱nndosinle jme xi kʼuínlee. *

7. Jméni xi tjínnele sʼiaan nga nda kʼuínyaa jotso je Énle Niná.

⁷ Kuila chótʼayá ndʼaibi jókʼuínlee je chjota nga katamajinle jotso je Biblia,  nga̱ kui xi ngisa nʼio nichjén kʼianga ʼmiyasoán. Je Biblia basenkao kʼoa síchjinee toʼyani nga ngisa nda bitjosonle je xá xi ndatjín (2 Tim. 3:16, 17). Kʼianga nda kʼuínyaa ali tsakuijin xi tsonile tsa nkjín testo kʼoéxkialee chjota. Je xi ngisa chjíle kuinga nda kʼuínyalee josʼin tínchja̱ni je bersíkulo xi bʼexkialee kʼoa nga katamajinle jmeni xi tiʼmilee (tʼexkiai Hechos 17:2, 3). Janla koya kataʼyaa jokoa̱n sʼiaan.

8, 9. 1) Jókoa̱n kʼuínlee jngo chjota xi kʼoasʼin makjainle nga tijeni Niná je Jesús. 2) Jósa tsakʼinlai je chjota kʼianga kichjakaonajmíni xi tʼatsʼe jebi.

⁸ Xi títjon. Tsa jngo chjota kakajiaan xi kʼoasʼin makjainle nga Niná je Jesús. Jmé testo koakolee kʼianga katamajinle jokjoantjínni. Koa̱njin si̱kʼéxkiaa Juan 6:38 jñani i̱ kitso je Jesús: “Likui jitjojennia ngʼajmi, jméni nga kʼoasʼinsínia josʼin mena nga an, tonga josʼin nga mele je Nʼainá xi kisikasénna”. Kʼianga jekʼuínyalee josʼin tínchja̱ni bersíkulo jebi koaan i̱ kʼuínlee: “Kʼiatsa Niná je Jesús, ʼyáni xi kisikasén i̱ Sonʼnde. A tsín ngisa ngʼa tíjna je xi kisikasén tikʼoajinni je Jesús. Nga̱ je chjota xi bʼéxá ngisa ngʼa tíjna tikʼoajinni xi sʼexále, a tsí jaon”.

⁹ Xijekoa̱n, koaan kʼoéxkialee 1 Corintios 15:28 jñani i̱ kitso je pastro Pablo: “Kʼia nga ngayije kjoa nangi sa̱tíole [je Jesús], kʼia tijeni ʼndíle [Niná] nangi kʼoéjnale je xi nangi tsakʼéjnale nga je ngayije kjoa, jméni nga [tsʼe] Niná koa̱nyijesíni”. Kʼianga kuisenkoaa je chjota nga katamajinle testo jebi, koaan i̱ kʼuínlee: “Kʼiatsa tijeni je Jesús kao Niná, a tije nangi kʼoéjnanile yaole. Je xi nangi tíjna a tsí je sítjosonle je xi ngisa ngʼa tíjna”. Kʼiatsa bexkón Énle Niná chjota jebi kʼoa tsa ñaki kʼoatjín kon tochale koa̱nmesale skoe̱ xi tʼatsʼe jebi (Hech. 17:11).

10. 1) Jókoa̱n kʼuínlee jngo chjota xi kui makjainle nga tíjna jngo ʼnde jñani lʼí títi. 2) Jósa tsakʼinlai je chjota kʼianga kichjakaonajmíni xi tʼatsʼe jebi.

¹⁰ Xi majaoni. Tsa jngo chjota kakajiaan xi tsín sasénle nga tsín ya ʼnde jña lʼí títi kjoaʼa kjoañʼai je chjotatsʼen. Tsakui nichxin kuinga kʼoatsoni nga mele nga kjoañʼai katabʼaile je chjota xi chʼao sʼín. Jósʼin kuisenkoaa chjota jebi. Koaan kuikjoanla kʼoakʼuínlee nga kʼoaile kjoañʼai je chjotatsʼen (2 Tes. 1:9). Kʼianga jekʼoakaʼmilee koaan si̱kʼéxkiaa Génesis 2:16, 17, jñani kʼoatso nga kʼoakitsole Jeobá je Adán nga kuiyá kʼiatsa koa̱njngijée. Xijekoa̱n, koaan kʼoakʼuínlee,  nga ninga kʼoalani koan, je Niná alikuikʼia kʼoakitso tsa ya kʼoaile kjoañʼai chjota ya ʼnde jña lʼí títi, kʼoa koaan i̱ kʼuínlee: “Kʼiatsa ya si̱kjaʼá kjoañʼai ngantsjai nichxin je Adán kao Eva ya ʼnde jña lʼí títi ánni nga tsín tongini kʼoakitsosínile je Niná. A tsí chʼao kisʼin nga tsín jokitsole tsa tíjnalani ʼnde jebi”. Xijekoa̱n, koaan kʼoéxkialee Génesis 3:19 jmeni xi kitso Niná nga koa̱nle Adán kao Eva kʼianga jetsakajngijée. Kʼoa kʼoakʼuínlee nga tsín ʼnde jña lʼí títi kisikʼaxki̱ je Niná. Je xi kitso Niná kuinga chao koa̱n ijngokʼani je Adán. Koaan i̱ kʼuínsalee: “A ndatjín kʼianga kʼoakitsole nga chao koa̱n kʼiatsa yani ʼnde jña lʼí títi kjoaʼa kjoañʼai”. Kʼiatsa sinkjínle kon je chjota jebi tochale sikjaʼaitsjenjin jmeni xi tiʼmilee.

11. 1) Jókoa̱n kʼuínlee jngo chjota xi kʼoasʼin makjainle nga ya ngʼajmi koai je xi nda chjota. 2) Jósa tsakʼinlai je chjota kʼianga kichjakaonajmíni xi tʼatsʼe jebi.

¹¹ Xi majanni. Tsa jngo chjota kakajiaan xi kʼoasʼin makjainle nga ya ngʼajmi koai ngatsʼi je xi nda chjota. Kʼianga kʼoasʼin makjainle tochale kjaʼaísʼin majinle jotso Biblia. Tobʼelañá, tsakui kabʼexkialee Apocalipsis 21:4 (tʼexkiai), tochale kʼoasʼin sikjaʼaitsjen nga ya ngʼajmi sʼe̱ je kjoanichikontʼain xi ya bʼaxki̱. Jósʼin kuisenkoaa chjota jebi. ʼNdele nga kjaʼaí testo koakolee, koaan tikui koakonilee je én xi nroajin testo jebi ya jñani kʼoatso nga “likui tisʼe̱ni kjoabiya”. Koaan i̱ kʼuínlee: “Kʼiatsa jmeni xi tsín, a koaan kʼoakuixoán nga likui tisʼe̱ni”. Mai kuitsojin. Xijekoa̱n, koaan i̱ kʼuínlee: “Ya ngʼajmi tsín kjoabiya, toʼi̱ Sonʼnde nga mʼe chjota. Kuinga kʼoabixónsíñá nga i̱ Sonʼnde sʼe̱ je kjoanichikontʼain xi síkʼaxki̱ Apocalipsis 21:4 (Sal. 37:29)”.

12. Ánni nga choa̱ kisichjénsíni Jesús kʼianga kitsoya.

¹² Je Jesús kʼoati tsakatío choa̱ kʼianga kitsoyason (tʼexkiai Mateo 13:34, 35). Kuinga kʼoakisʼinni nga skoe̱ jotjío ni̱ma̱le je chjota xi kinrʼoéle (Mat. 13:10-15). Kʼoa nga kʼoasʼin choa̱ kisichjén ngisa nda kitsoya kʼoa alikui kichajinle je chjota jme xi tsakʼinyale. Jósʼin si̱chjén je choa̱ kʼianga kʼuínyasoán.

13. Jmé choa̱ xi koa̱n si̱chjén kʼianga koakolee chjota nga ngisa ngʼa tíjna je Niná tikʼoajinni je Jesús.

¹³ Je choa̱ xi choa ñʼai tjío sasa majinnile je chjota. Tobʼelañá, kʼianga kʼoaʼmilee je chjota nga ngisa ngʼa tíjna Niná tikʼoajinni je Jesús tsakui nichxin koa̱n kʼoakʼuínlee nga je Niná kʼoakitso nga ʼNdíle ma je Jesús, kʼoa je Jesús kʼoakitso nga Nʼaile ma je Niná (Luc. 3:21, 22; Juan 14:28). Koaan i̱ kʼuínlee: “Kʼiatsa kuilani mená kʼuínyaa nga mangóson jao chjota xi ʼyaxkoaan, jmé choa̱ xi kʼoéjnaa. A kʼoakuixoán nga jngo xi nʼai mani kʼoa nga jngo xi ʼndí mani, axo kʼoakuixoán nga ndsʼe̱ fáo nga jao”. Je chjota kʼoajin kuitso nga kui si̱ngósonkoaa je xi tindsʼe̱ fáoni kʼoa tsa je xi xtingʼion. Kʼoa koa̱njin i̱ kʼuínlee: “Kʼiatsa kʼoabixoán ñá, a tsí kʼoati kui choa̱ kisichjén je Jesús kʼiatsa mangósonlani kao je Nʼaile. Tonga je Jesús, kʼoakitso kʼianga je Niná, Nʼaile mani, xi tsonile, nga ngisa kjoatse tíjna kʼoa ngisa ngʼa tíjna tikʼoajinni je”.

14. Jmé choa̱ xi koa̱n kʼoéjnalee chjota kʼianga koakolee nga tsín je Niná tíbʼéxále je Na̱i nga ya katatsjoále kjoañʼai je chjota ya ʼnde jña lʼí títi.

¹⁴ Ijngolasa choa̱ kataʼyaa. Tjínkʼa chjota xi kʼoasʼin makjainle nga je Niná tsakʼéxále je Na̱i nga ya katatsjoále kjoañʼai je chjota ya ʼnde jña lʼí títi.  Jngo xi nʼai ma, tochale koasenkao tsa jngo choa̱ si̱kʼéjnalee. Koaan i̱ kʼuínlee: “Kʼiatsa nʼio xíjin kjima je tili kʼoa chʼao tísʼín. Jmé xi sʼiain”. Tsakui nichxin je nʼai jebi kʼoakuitso nga koatekjáyale je tile, tsakui nichxin nkjín kʼa koatekjáyale (Prov. 22:15). Xijekoa̱n, koaan chjónangilee jmé xi sʼin kʼiatsa tsín kjuinrʼoé je tile. Tochale kʼoakuitso nga koatekjáyale. Kʼoa koaan i̱ kʼuínlee: “Kʼoa tsa sʼe̱jinli nga tjín xi tíbinyáskále kʼianga xíjin kjimani, jósʼiain”. Tochajinle koa̱njtile nʼai jebi tʼatsʼe chjota xi tíbinyáskále je tile. Kʼoa kʼianga koa̱njinle choa̱ jebi, koa̱njin i̱ kʼuínlee: “Kʼiatsa jchai ʼyani xi tíbinyáskále je tili, a kʼoakʼuínlai nga je katatsjoále kjoañʼai je tili. Maijin. Kʼoakjoánti tjínni xi kao Niná, alikui je Na̱i kʼoexále nga je katatsjoále kjoañʼai je chjota xi tije Na̱i tíbinyáskánile”.

15, 16. 1) Ánni nga tsín tokjuinrʼoétsʼisíniná je chjota kʼianga kʼuínyasonlee. 2) A tokʼiaa tsa nʼio maná ʼmiya nga koa̱nná nda chja̱kaonajmiá je chjota. (Kʼoati chótsenlai rekuadro xi tso: “ Nʼio basenkaoná joʼmilee chjota kʼianga jme xi kjonanginá”.)

¹⁵ Ninga nʼio nda si̱kjaʼaitsjeen jme xi chjónangilee je chjota, ninga nda si̱jinlee jmeni xi tso je Biblia kʼoa ninga nda choa̱ si̱chjén kʼianga chja̱koaa, ali tsa tongatsʼijin nga koa̱nkjainle Énle Niná (Mat. 10:11-14). Kʼianga nichxinle Jesús nʼio tochoa koanni xi kinrʼoéle. Kʼoa jélasa xi ngisasa nʼio nda maestro koan i̱ Sonʼnde (Juan 6:66; 7:45-48).

¹⁶ Kʼoa tsa kʼoasʼin nikjaʼaitsjeen nga tsín maná nga nda ʼmiyaa. Tojo koaan nda kʼuínyasoán (tʼexkiai Hechos 4:13). Je Énle Niná kʼoatso nga ngatsʼi je xi tjíonda nga sʼe̱le “kjoabijnachon ngantsjai” kjuinrʼoéní je énnda chjotse (Hech. 13:48). Kuinga tsín tokjoan kjaʼaísʼin si̱kjaʼaitsjensíñá xi tʼatsaan kao tʼatsʼe je chjota xi ʼmiyasonlee. Si̱chjén je kjoachjine xi títsjoáná je Jeobá ánni nga nda kʼuínyasíñá je Énle. Tsa kʼoasʼiaan kjoanda tsaanñá kʼoa kʼoati kjoanda tsʼeni je xi kjuinrʼoéná (1 Tim. 4:16). Je Jeobá bakóyaná josʼin chja̱koaa nga jngó jngó chjota. Ya kjoaʼmiya xi ijngo kui chótʼayá jmeni xi sʼiaan nga kʼuínyasoán kʼianga koanngíntjenngiaa je kjoafaʼaitsjen xi kitsjoa je Jesús.