Nʼio nkjín chjota xi kʼoasʼin makjainle nga je Niná tíbatéxomale je sonʼnde. Tonga tsa jelani tíbatéxomale, a kʼoasikji kjoañʼai sʼe̱ (Deuteronomio 32:4, 5). Je Biblia kʼoatso nga jngo xi nʼio tsʼen kjinentsja je sonʼnde. (Tʼexkiai 1 Juan 5:19.)

Jókoannile nga je tsakánentsjasíni sonʼnde. Kʼianga sʼa kinroatsʼiani kjoa, je Na̱i ánkjele Niná tsakai, tonga yátsʼin tsakasénle Niná kʼoa kʼoakitsole je chjota xi títjon tsakatio, je xi Adán kʼoa kao xi Eva tsakʼin, nga tsín katasítjosonle Niná (Génesis 3:1-6). Je chjota jebi kisitjosonle je Na̱i, kʼoa kʼoakoanni nga je tsakatéxomasínile. Tojékjoán je Niná xi nʼio tse nganʼio tjínle xi bakinle nga koatexomale chjota, tonga kui xi mele nga kuinga tsjoachaa nga si̱tjosonnilee (Deuteronomio 6:6; 30:16, 19). Tonga me ngatsʼi chjota nga kʼoati tjíosʼín jokisʼin Adán kao Eva. (Tʼexkiai Apocalipsis 12:9.)

A tsjoáʼnde je Niná nga je Na̱i koatexomantsjaile chjotasonʼnde. Mai. Kʼoa jé Jesucristo sichjén je Niná kʼianga kjoaʼaxin ngayeje kjoa xi tíbajngi je Na̱i. (Tʼexkiai 1 Juan 3:8.)

Je Niná, jé Jesús jekitsjoale kjoatéxoma nga katafaʼáxin je Na̱i (Romanos 16:20). Xijekoa̱n, jé Niná koanentsja chjotasonʼnde kʼoa kʼoasʼin sikatío jokjoansʼin koanmele saʼnda ngasʼa, nga nyʼán koatio kʼoa nga tsjoa satío kon. (Tʼexkiai Apocalipsis 21:3-5.)